Ma pya a wereloo Jɛhova Bari le ye Muɛ̄ Ue, lo a le Baibol:

Jizɔs bee kɔ, “bui suāloo kaka ue, e kaka ue edoo kɔ bui aa bu zooro.” (Jɔn 8:32) Naa kɛɛrɛ kɛ̄ a bee a tɔɔ̄loo doo sɔ̄ o bee dasī nɔ tuatua kaka ue a le bu Baibol! Bee a ɛɛrɛbu lo esuā kɔ o dap nɔ kaka ue bu nyɔuwe esah mma bu ama.—2 Timɔti 3:1.

Jɛhova Bari gbī kɔ o suā kaka. E nyɔɔbee i wereloo pya nɛɛ a, i gbī ekɔ nu akiiloo kaka ue wa nɛ. Mɛ a ɛrɛ gbɛnɛ-edo nu a le bu si tam nɛ Bari. I ɛrɛ edoo kuma kɛ̄ i dap doo lo etɔɔ̄dum doodoo pya Nɛɛ Kraist nyɔnɛbee i ɛrɛ kaāna enwadɛɛ̄ loo pya daakuu Jɛhova. Jizɔs baatɛ̄ ziī gbɛnɛ sīdee i dap tɔgɛ kɔ i wereeloo Bari. A bee kɔ: “Lo a le bui sere dɛ̄dɛɛ̄ na lok bui tɔɔ̄ bu na wereloo, dookɛ̄ mda bee sere dɛ̄dɛɛ̄ lok na Tɛ doo sa tɔɔ̄ bu ye wereloo.”—Jɔn 15:10.

Jizɔs bee wereloo ye Tɛ kaāna, e a bee doo dɛ̄dɛɛ̄ nu ye Tɛ gbī kɔ a doo. Lo i nɔ Jizɔs bu i sīdee tɔɔ̄dum, Jɛhova ewere i loo sa i ɛrɛ kaāna ɛɛbu. Dookɛ̄ Jizɔs bee kɔ doo kɔ, “lo a le bui suā dɛ̄dɛɛ̄ pya lo nu ama, leelee a le i nɛ lo a le bui doo wa.”—Jɔn 13:17.

I bɛābu kɔ kpa ama eyerebah a nɛ kɔ o nɔ lo etɔɔ̄dum tɛ̄maloo kaka ue a le bu Baibol le kɔ o lu gbo Bari. I bara kɔ o nyim kiisī bu ewereloo Bari sa tɔɔ̄ bia bu “wereloo Bari . . . mmɛ loo dum a naa tah.”—Jud 21.