1, 2. E na i dap doo lo etɔɔ̄ bia bu wereloo Bari a?

WEE nia dɛ̄dɛɛ̄ nɛɛ kɔ ba a agaloo sa le bu nwanaloo. Nyɔɔwo, i piiga lo ede le nuede, laɛgɛloo dɛ̄dɛɛ̄ sɔ̄, sa kuūdɛɛ̄loo i namloo. Kere a su i epiaga bah lo edoo wo, a dɔbiī i nɛ, nyɔɔwo, ii ɔbɛ edoo wo. Mɛ, a lunage ebɛɛ̄ kɔ i agaloo sa le bu nwanaloo bu dɔɔ̄na sīdee.

² Kere i bee doo leere sɔ̄ i gaa bee bɔātɛ̄ enɔ nu akiiloo Jɛhova, alu ebɛɛ̄ kɔ i kiisī lo edoo kɔ i gbanialoo kiikɛ̄ Jɛhova le a agɛrɛbah agaloo. Sɔ̄ Jud bee agɛrɛloo pya Nɛɛ Kraist kɔ, “Sereaa bui loo bu wereloo Bari,” a bee baatɛ̄ kɛ̄ ba edoo lo ama doo. A bee wa kɔ nɛ kɔ: “Wuaa bui loo nɛ nyɔɔ doodoo tɔ nyɔɔ bui yira a le kaɛ.” (Jud 20, 21) Nyɔɔwo, bu mɛ sīdee na i dap wu i yira doo kɔ a agaloo a?

3-5. (a) Setan gbī kɔ o ɛrɛ amunu ekɛɛrɛ kumaloo pya nu Jɛhova a gbī bah? (b) O ɛmadɛɛ̄ pya lok le nu Jɛhova i gbī aābah doodoo wa?

³ Alu ebɛɛ̄ kɔ o suā leere kɔ nu Jɛhova kɔ na a lee  eera a. Setan gbī kɔ o kɛɛrɛ kɔ a aga gbɛnɛ lo edoo pya nu Bari i gbī aābah le kɔ bu a e’ɛɛ gbɛnɛ lo o biaɛfii nɛ oloo nu a lee le nu a bee piya. Aāge bu gɔh Idɛn, edoora kɔ pya nɛɛ a yiga doo wo. (Jɛnɛsis 3:1-6) Sa a gaa piiga nage lo edoo kɔ i yiga doo wo anii’ee.

⁴ Nu Setan kɔ ama luge kaka ni? Ekɔ pya nu Jɛhova i gbī aābah naa nɛ i dee kɔ i ɛrɛ i loo ni? Eeye. Bu edoba, naa kɛɛrɛ kɔ o gaa kiā bu ziī gɔh a kpedɛɛ̄. O muɛ̄ kɛ̄ alu ebe a kii nyɔɔ lo a doo kɔ o aa muɛ̄ pio kɛ̄ a le bu lo gɔh. Naa daba o bura kɔ ‘E na anua alu ebe akɛ̄ama a?’ Mɛ, taɛ lo sɔ̄, o dā muɛ̄ ziī sasa-ekpo a gaa pɔm dumɛ kɛ̄ ba be a. Nyaawo, o kɛɛrɛ doodoo wa kumaloo kɛ̄ a bee lu ebe ani? Ɛp kɛ̄ bu a e’ɛɛ doo kɔ nu alu ebe a kpega a doo kɔ lo sasa-ekpo aa a ba! Pya nu Jɛhova i gbī bah le doodoo kɛ̄ a lu ebe a, e Pɔrɔ-edɔɔ̄ le doodoo lo sasa-ekpo. Muɛ̄ Ue Bari zuura i bah tɔ̄ kɔ: “Nwanaadɛɛ̄, tɔɔ̄naabaɛ! Bui nɛɛbaa lo a le Pɔrɔ-edɔɔ̄ kiā i tɛɛ̄ ɛŋɛnɛ doodoo sasa-ekpo a gaa pɔm, sa gbī nɛɛ eba.”—1 Pita 5:8.

⁵ Jɛhova gbī kɔ i tɔɔ̄dum a lee eera. A naa gbī kɔ Setan a dag i. Ɛɛ na anua a nɛ i lok le pya nu a gbī kɔ i doo lokwa a i baɛloo sa doo kɔ bu i a ɛɛ a. (Pya Ɛfɛsɔs 6:11) Jemes bee ɛm kɔ: “Nɛɛ a ɛp doo tɔɔ bu lok a mma, lok a ɛrɛ ye loo, sa tɔɔ̄ agɛrɛ . . . alɛ ɛrɛ leelee bu ye doodoo.”—Jemes 1:25.

6. Bu mɛ sīdee na i dap suā leere kɔ pya nu Jɛhova i kɔ nɛ lee eera a?

⁶ Sɔ̄ i nyɔɔnɛ tɔgɛ dee a aabah Jɛhova, nu ekiā i  leere loo sa i gbanialoo kiikɛ̄ Jɛhova le e agaloo. Bu edoba, a dɔbiī i nɛ sɔ̄ i yere kara ye nɛ dɛ̄dɛɛ̄ sɔ̄ dookɛ̄ a kɔ i doo. (Matiu 6:5-8; 1 Pya Tɛsalɔnaika 5:17) Bu i ɛɛ sɔ̄ i gbaa bɔŋanaloo lo etaāŋa ye bah sa yere mɛm loo ziī dookɛ̄ a kɔ i doo, le sɔ̄ i si tam zue ue le tɔgɛnu mmɛnɛ. (Matiu 28:19, 20; Pya Galetia 6:2; Pya Hibru 10:24, 25) Kuma sɔ̄ i kɛɛrɛ bu kɛ̄ pya nu ama eyerebah doo kɔ i yira a agaloo doo, i agɛrɛbah suā kɔ pya nu Jɛhova kɔ i doo lee eera.

7, 8. E na eyerebah i nɛ kɔ i aa nɛ taāŋa loo i loo doā-ɛp a dap i lu nyɔɔ li mmsī a?

⁷ I dap ɛrɛ ekɛɛrɛ kɔ doā-ɛp a aga gbɛnɛ gaa le lu i nyɔɔ li deesī. Lo o ebee kɛɛrɛ doo wo, nyɛŋia bu kɔ Jɛhova kɔ: “Mda na Jɛhova o Bari a, lo a a tɔgɛ kɛ̄ e’ɛrɛ biī doo, lo a a ture bu dee o ɛrɛ ekii. Ebee  mɛ nia lo a le o bee gbaɛ̄tɔ̄loo dɛ̄dɛɛ̄ na lok! Lo sɔ̄ o efɛɛloo ebee le doodoo pɛnɛ, e o kaāna dogo doodoo efɔp-maā loo gbɛnɛ pɛnɛ.”—Aisaia 48:17, 18.

⁸ Sɔ̄ i gbaɛ̄tɔ̄loo Jɛhova, i efɛɛloo ele doodoo pɛnɛ a naa wee kaga, e i kaāna dogo ele doodoo efɔp-maā loo gbɛnɛ pɛnɛ lo a kiisī lo ezia nu egā gbɛnɛ pɛnɛ. Kaɛlɛɛ ɛrɛgeba nu a i siraloo bu dum, i dap tɔɔ̄dum a bɔloo eture nyiɛ loo. Baibol yira yii kɔ: ‘Su dɛ̄dɛɛ̄ o taāŋa toore Jɛhova doodoo to, mɛ a enɛ a e’agaloo; e a naale eyiga lɔgɔ sɔ̄ kɔ nɛɛ kaāna dogo a aa ye dɔ.’—Le-yɔɔ 55:22.

9, 10. E na nyim tura nɛɛ kura a?

⁹ Kuma sɔ̄ o agɛrɛtɛ̄ o gbanialoo kumakɛ̄ Jɛhova le, o “nyim tura nɛɛ.” (Pya Hibru 6:1) E na a kura nyim tura nɛɛ a?

¹⁰ Lu Nɛɛ Kraist a nyim tura naa dɛɛa nyɔɔ zua i elua. Lo elu nɛɛ a nyim tura, i ɛrɛ esu Jɛhova nua i le gbo sa piiga lo e ɛmadɛɛ̄ nu dookɛ̄ a doo. (Jɔn 4:23) Pɔɔl bee ɛm kɔ: “Pya a kiā bu sīdee e’ɔaloo namloo, gbī nu akiiloo namloo, e pya a kiā bu sīdee edɔɔ̄, gbī nu edɔɔ̄.” (Pya Rom 8:5) Nɛɛ a nyim tura naa bie ye ekɛɛrɛ nyɔɔ ekpeloo le zɔ bu namloo. Taāwo, a bie ekɛɛrɛ nyɔɔ sitam nɛ Jɛhova sa su suānu biaɛma nu fii bu ye dum. (Kam 27:11; Buū Jemes 1:2, 3.) A naa yiga kɔ pɔrɔ dogo a nyaana ye. Nɛɛ a nyim tura suā nu a lee sa biaɛfii lo edoo ye.

11, 12. (a) E na Pɔɔl kɔ akiiloo “buābee” Nɛɛ Kraist a? (b) Bu mɛ sīdee na lu Nɛɛ Kraist a nyim tura bee nɛɛ a para teera tee a?

 ¹¹ Nɛɛ ɛrɛ epiiga lɛɛ a gaa nyim tura nɛɛ. Nɛɛ lɛɛratam Pɔɔl bee ɛm kɔ: “E’aga nuede le nɛ pya a enyima tura nɛɛ, pya a ekpɔā wa buābee tɛ̄maloo dogo, lo esuā kee a le yɛɛ le le pɔrɔ.” (Pya Hibru 5:14) Bee ue “kpɔā” dap doo kɔ i kɛɛrɛ kɛ̄ a wee lu ekpɔā nɛɛ kɔ a para tee doo.

¹² Lo o muɛ̄ kɛ̄ nɛɛ a para tee gaa teera doo, o suā kɔ a bee su sɔ̄ nɔā para. A naa bee para tee aābu ka. Sɔ̄ nwiī mɛā, a naa wee suā taɛ kɛ̄ esu baɛ bah le tɔ ye daānu doo. Mɛ sɔ̄ sɔ̄ gaa kiisī, a nɔ kɛ̄ e aabahloo nu le kɛ̄ ekiā doo. E lo alu e kpɔā ye, sɔ̄ esaa, a dap lu nɛɛ a para tee. Bu aba sīdee ama, esu sɔ̄ le kpɔā lɛɛ i gae lu pya Nɛɛ Kraist a nyim tura.

13. E na eyerebah i nɛ kɔ i kɛɛrɛ ekɛɛrɛ dookɛ̄ Jɛhova doo a?

¹³ Bu kpa ama, i ekɔa kɛ̄ i dap ɛrɛ ekɛɛrɛ sa doo dogo kumaloo nu dookɛ̄ Jɛhova doo. I enɔā kɔ i tɔgɛ nia loo sa wereloo pya nu Jɛhova i gbī bah. Sɔ̄ i biaɛ nu fii, i bip aba ii kɔ: ‘E na Baibol kɔ ale amunu lok a le bu Baibol na akiiloo kɛ̄tɔɔ̄ ama a? Bu mɛ sīdee na m dap su yere bu dogo a? E na enia Jɛhova kɔ m doo a?’—Buū Kam 3:5, 6; Jemes 1:5.

14. E na alu ebɛɛ̄ kɔ i doo lokwa i wu i yira a?

¹⁴ Ii le e’ɔbɛ ewee wu i yira bu Jɛhova. Dookɛ̄ de le nuede wee yerebah lo edoo kɔ i namloo a agaloo doo, kɛ̄ nɔ nu akiiloo Jɛhova yere nage bah doo kɔ i yira a agaloo doolo. Sɔ̄ i bee bɔātɛ̄ nɔ Baibol, i bee nɔ pya kpog bee kaka akiiloo Jɛhova le  nu a i gbī aābah. Mɛ sɔ̄ sɔ̄ gaa kiisī, alu ebɛɛ̄ kɔ i nyimɛ i edaābeeloo Baibol yereloo. Nu nɛɛ lɛɛratam Pɔɔl gaa bee kɔ lo sɔ̄ a bee kɔ: “E’aga nuede le nɛ pya a enyima tura nɛɛ.” Tɛ̄maloo esu pya nu i nɔ yere bu dogo, i ɛrɛ suānu. Baibol kɔ i nɛ kɔ: “Bɔātɛ̄ suānu na ama.”—Kam 4:5-7; 1 Pita 2:2.

15. Wereloo Jɛhova le pya i wuga nɛɛdam le nɛɛwa lu gbɛnɛ doodoo wa?

¹⁵ Nɛɛ dap agaloo sa le bu nwanaloo, mɛ lo etɔɔ̄ bia doo wo, e suā kɔ ekiiesī lo ekuūdɛɛ̄loo ye loo leere. Bu aba sīdee ama, nɛɛ a enyima tura suā kɔ alu ebɛɛ̄ kɔ a piiga lokwa gbanialoo a ɛrɛ kumaloo Jɛhova kiisī lo e’agatɛ̄. Pɔɔl bee i nyɛŋiabu kɔ: “Ɛma ɛp bɔɔloo loo, lo a le bui lege bu bui yira.” (2 Pya Kɔrint 13:5) Kerewo, naale aba yira a agaloo na a i bɛɛ̄ a. Wereloo i ɛrɛ loo Jɛhova le pya wuga nɛɛdam le nɛɛwa ɛrɛ ekiisī lo enyim. Pɔɔl bee kɔ: “Lo a le m . . . suā dɛ̄dɛɛ̄ nu gɔā le dɛ̄dɛɛ̄ suānu, e lo a le m ɛrɛ dɛ̄dɛɛ̄ yira lokwa m dap lɛɛ gbɛnɛ kpokɛ̄, sa mm ɛrɛ wereloo, mm lu lɔgɔ nu.”—1 Pya Kɔrint 13:1-3.

16. Enia Setan kɔ i ɛrɛ mɛ dua ekɛɛrɛ?

¹⁶ Setan gbī kɔ i kɛɛrɛ kɔ ii le edap doo le mmɛ kɛ̄ enia Jɛhova. A egbī kɔ i ɛrɛ e’ɔaloo sa kɛɛrɛ kɔ lɔgɔ kɛ̄ ekwa i taāŋa doo naale. A naa gbī kɔ i dɛrɛ nyiɛ nyɔɔ pya le ii gbaa lu Nɛɛ Kraist, e a naa gbī nage kɔ i le bu ɛɛbu. (Pya Ɛfɛsɔs 2:2) Setan suā kɔ lo i ɛrɛ pɔrɔ ekɛɛrɛ, a dap i nɛ taāŋa sa gbee  gbanialoo i ɛrɛ kiikɛ̄ Bari le. Mɛ a ɛrɛ nu Jɛhova i nɛ lo ebebe loo pɔrɔ ekɛɛrɛ. A nɛ i bɛābu.

17. Bu mɛ sīdee na bɛābu lu nu a kuī a?

¹⁷ Bu 1 Pya Tɛsalɔnaika 5:8, Baibol su i bɛābu doore loo pɛgɛrɛ a wee baɛloo ekobee nɛɛ nɔ̄ sɔ̄ a le uwe nɔ̄, sa su pɛgɛrɛ nɔ̄ a kure, “bɛābu kpɔā.” Bɛābu i ɛrɛ bu pya yii Jɛhova dap baɛloo i ekɛɛrɛ sa i yerebah nɛ kɔ i amana pɔrɔ ekɛɛrɛ.

18, 19. Bu mɛ sīdee na bɛābu Jizɔs bee ɛrɛ bee ye yere mɛm loo a?

¹⁸ Bɛābu Jizɔs bee ɛrɛ bee doo kɔ a ɛrɛ e’agaloo. Kpɛdumɛ uunɛ a tɔɔ̄dum a kɛnɛkɛ̄, a bee kpesī gbɛnɛ-edo taāŋa. Ziī ye gbo bee ye lɛɛ. Dɔɔ̄na aba ana kɔ a naa ye suāe loo. Pya lo dɔɔ̄na bee ye lɛɛbahloo sa teera. Pya ye barasī bee aa kɛ̄ lo edoo ye, sa kɔ alu etɔg ye sa ye fɛ. E na a bee ye yerebah  nɛ kɔ a egerebu bu dɛ̄dɛɛ̄ ezialoo kɛ̄tɔɔ̄ ama ani? ‘Nyɔɔ ɛɛŋa a bee lu esere ye kɛ̄sī, a egerebu nyɔɔ te tɔga, ɛp bɔp kɛɛ kumakɛ̄ sa ɛŋɛtɛ̄ bara bale lo kasi mɛnɛ Bari.’—Pya Hibru 12:2.

¹⁹ Jizɔs bee suā kɔ tɛ̄maloo etɔɔ̄dum a bɔloo eture nyiɛ loo, a esu ka nua loo ye Tɛ sa tɔgɛ kɔ Setan lu nɛɛ esah. Bɛābu ama bee ye nɛ gbɛnɛ ɛɛbu. A suā kɔ sɔ̄ sɔ̄ naa binia esikɛ̄ gbaaloo ye Tɛ li bunyɔɔ. Bɛābu ama bee ye yerebah nɛ kɔ a egerebu. Doodoo Jizɔs, i ɛrɛ ebie i ekɛɛrɛ nyɔɔ i bɛābu. Eyerebah i nɛ kɔ i egerebu kaɛlɛɛ ɛrɛgeba nu a sira.

20. E na edap a yerebah nɛ kɔ o ɛrɛ le ekɛɛrɛ a?

²⁰ Jɛhova muɛ̄ kɛ̄ o ɛrɛ yira le egerebu doo. (Aisaia 30:18; Buū Malaki 3:10.) A yira yii kɔ “a enɛ a dɛ̄dɛɛ̄ nu o beenyiɛ gbī.” (Le-yɔɔ 37:4) Nyɔɔwo, bie  o ekɛɛrɛ nyɔɔ o bɛābu. Setan gbī kɔ o pee o bɛābu, sa ɛmadɛɛ̄ kɔ pya yii Jɛhova naale edooa. Mɛ a naa lee kɔ o ɛrɛ pɔrɔ ekɛɛrɛ! Lo o muɛ̄ kɔ o gaa ɛrɛ baɛbaɛ beenyiɛ kumaloo o bɛābu, bara Jɛhova kɔ a yerebah a nɛ. Nyɛŋiabu pya ue a le bu kpa Pya Filipai 4:6, 7 a kɔ: “Bui aa ɛrɛ etɛɛrɛloo bu ɛrɛgeba nu, mɛ bu dɛ̄dɛɛ̄ nu tɛ̄maloo yere kara le bara bara gbaāloo doo yaa doolo Bari suā dɛ̄dɛɛ̄ nu bui bara. E efɛɛloo Bari a eenyɔɔ dɛ̄dɛɛ̄ suānu, esere bui beenyiɛ le bui ekɛɛrɛ bu Kraist Jizɔs.”

21, 22. (a) E na alu ekɛɛrɛ Jɛhova kumaloo kɛnɛkɛ̄ a? (b) E na o biaɛfii lo edoo a?

²¹ Wee ɛrɛ ekɛɛrɛ kumaloo ekpeloo kɛ̄tɔɔ̄ a gaa lu li deesī. Sɔ̄ sɔ̄ naa binia, dɛ̄dɛɛ̄ nɛɛ a le dum etaāŋabah Jɛhova. (Mumuuna 7:9, 14) Naa kɛɛrɛ kɛ̄ dum emɛā doo bu aā nyɔuwe. Elee ee ɛrɛgeba nu i dap kɛɛrɛ! Setan, pya gbo yɔ, le dɛ̄dɛɛ̄ bee bag dogo naale elena. Loo a naale edumɛ, e oo le e’u na. Taāwo, ziī ziī biradee, o ɛrɛ gbɛnɛ mɛm sa ɛrɛ ɛɛbu lo ele dum. Dɛ̄dɛɛ̄ nɛɛ egbaa sitam sa kwa kɛnɛkɛ̄ doo kɔ a lu paradais. Dɛ̄dɛɛ̄ nɛɛ e’ɛrɛ le nuede le kɛ̄ etɔɔ̄ a kpoogaloo. Pya nɛɛ naale elu bag ale doo dogo lumiī, mɛ ba elu fɛgɛ loo ziī kaāna. Sɔ̄ a esaa, dɛ̄dɛɛ̄ miɔŋɔ nɛɛ a le a kɛnɛkɛ̄ e’ɛrɛ “ka miɔŋɔ Bari.”—Pya Rom 8:21.

²² Jɛhova gbī kɔ o sue ye nua o le gbo. Nyɔɔwo, doo dɛ̄dɛɛ̄ nu o dap doo lo egbaɛ̄tɔ̄loo Jɛhova sa ye tɔɔ̄ waɛloo ziī ziī biradee. Aiī, doolo dɛ̄dɛɛ̄ ii kiisī lo etɔɔ̄ bia bu wereloo Bari mmɛ deedee!—Jud 21.