1, 2. Balaam bee gbī egbee pya nɛɛ Jɛhova doodoo wa ni?

NƐƐ fɛ bari wee kii kɛ̄ e’aa dua bari a gaa gbī. A sagɛ nu yere daa toba lɛɛ a top tɛrɛ maā. A tɔɔ̄ baɛ bu egerebu mmɛ sɔ̄ bari elu wee de nu a bee yere daa lo toba, a zige lo toba doo kɔ a su ye elag sa tap lo bari lɛɛ maā.

² Kɛ̄ a dap nage lu e’aa pya nɛɛ doolo. Bu edoba, pya Izrɛl ebee sah eyii bu Buɛ̄ A Bee Lu Eyira Yii Loo sɔ̄ ba bee bɔŋia Pɛɛkɛ̄ Moab. Mɛnɛ-buɛ̄ Moab bee yira kɔ enɛe gbɛnɛ-edo kpugi ziī gbara a kura Balaam lo a dapge kaɛ nu nɛ pya Izrɛl. Nyɔɔwo, Balaam bee gbī sīdee edoo kɔ pya Izrɛl anua kaɛ nu nyɔɔ aba aba. A sueloo kɛ̄ sagɛ nu eyere daa ye toba. A yere pya zege nɛɛwa Moab ture kɛ̄ pya Izrɛl wee tɔɔ̄ kɔ ba a pagɛrɛ pya wa nɛɛdam yere bu dum kunagā.—Buā 22:1-7; 31:15, 16; Mumuuna 2:14.

3. Bu mɛ sīdee na nu Balaam bee yere daa ye toba bee doo kɔ pya Izrɛl a dɔ a?

 ³ Toba Balaam bee aage nu ni? Aiī. Booboo pya nɛɛdam Izrɛl bee “bɔātɛ̄ e kunagā loo miɔŋɔ nɛɛwa Moab.” Ba bee taāŋa nage bah pya ekwɔ bari, gbaāloo Beel lo Peoa alu saāŋa bari kunagā. Nyɔɔbee wo, 24,000 pya Izrɛl bee u bia nu egā Buɛ̄ A Bee Lu Eyira Yii Loo.—Buā 25:1-9.

4. E na anua booboo pya Izrɛl bee kunagā a?

⁴ E na anua booboo pya Izrɛl bee dɔ bu zaɛ̄ Balaam a? Ba gaa bee kɛɛrɛ aba nu enɛ wa ekpeloo, sa ibere dɛ̄dɛɛ̄ nu Jɛhova ebee wa doo nɛ. Pya Izrɛl ɛrɛ gbɛnɛ-edo nu anua ba ebee tɔɔ̄ agara nɛ Bari. A bee wa agara aā bu zooro li Ijipt, a nɛ wa nuede bie bu kpo sagara wii, sa wa ture mmɛ nu egā Buɛ̄ A Bee Lu Eyira Yii Loo. (Pya Hibru 3:12) Kerewo, a bee lu egɔm wa tɛ̄maloo kunagā. Nɛɛ lɛɛratam Pɔɔl bee ɛm kɔ: “E i aa lu pya kue wa dookɛ̄ pio aba bee kue doo, . . . [sa] bee dɔ”.—1 Pya Kɔrint 10:8.

5, 6. E na i dap nɔ aāloo nu a bee sira bie Pɛɛkɛ̄ Moab ani?

⁵ Aā nyɔuwe ewaraloo kɛ̄. Nyɔɔwo, bu ziī sīdee, i le doodoo pya Izrɛl ba le nu egā Buɛ̄ A Bee Lu Eyira Yii Loo. (1 Pya Kɔrint 10:11) Dum kunagā mma bu nyɔuwe anii’ee ee kɛ̄ a bee le bu buɛ̄ Moab doo. Kɛ̄ dogo kunagā mma kɛ̄ doo dap ɛrɛ pah nyɔɔ pya nɛɛ Jɛhova. Bu kaka, yɛɛ dɛ̄dɛɛ̄ nu Pɔrɔ-edɔɔ̄ yere daa toba, lo a ye kiā leere nɛ gbɛnɛ na kunagā.—Buā 25:6, 14; 2 Pya Kɔrint 2:11; Jud 4.

⁶ Bip aba ɔɔ, ‘Eniage mɛ e’ɛrɛ ekpeloo bu doo  pɔrɔ dogo bu nwīgbagbara sɔ̄, sɛh m gbīge etɔɔ̄dum mmɛ deedee sa ɛrɛ ɛɛbu bu aā nyɔuwe ni?’ Ekɔ a naa dɔbiī lo egbaɛ̄tɔ̄loo lok Jɛhova a kɔ: ‘Teeraa aaloo ɛrɛgeba sīdee kunagā’ ni?—1 Pya Kɔrint 6:18.

7, 8. E na alu kunagā a? E na anua a bee piya gbɛnɛ a?

⁷ Gbɛnɛ-edo nɛɛ anii’ee naa ɛrɛna kɛɛ, e ba naa gɔā sɔ̄ ba gaa kunagā lo egbee lok Bari. Bu Baibol, dogo kunagā kiiloo maniakɛ̄ a le yɛɛ nɛɛdam le nɛɛwa ba sii iya ziī. A kii nage loo sɔ̄ nɛɛdam le nɛɛdam ale nɛɛwa le nɛɛwa maloo ziī le sɔ̄ nɛɛ le nam maloo ziī. Dogo maloo ziī, ama dap lu su ziī tɛ̄mabu egā, tɛ̄ma nu tɛ̄, ale dagi bahloo pya kɛ̄ gɔā loo nɛɛdam le nɛɛwa bu taɛ eyɔ ye maniakɛ̄.—Buū 23 Ue ale dumɛ.

⁸ Baibol kɔ lo ziī nɛɛ kiisī lo edoo dogo kunagā, naale elu elɛɛ ye baloo bie bu bɔŋanaloo. (1 Pya Kɔrint 6:9; Mumuuna 22:15) Gbaāloo wo, pya nɛɛ naa wee nwanadɛɛ̄ nɛɛ a kunagā ale dɛrɛ ye nyiɛ nyɔɔ. Kunagā wee nua taāŋa. A wee gbee ekɛɛrɛ beenyiɛ nɛɛ, doo kɔ nɛɛ a su bu sɔ̄ a sii gbī, yere taāŋa yɛɛ dam le wa, nua dumɛloo, sa nua nage luh. (Buū Pya Galetia 6:7, 8.) Lo ziī nɛɛ dasī kɛɛrɛbu nu a wee sira aabu kunagā, naa daba elɛɛbaloo kunagā. Mɛ gbɛnɛkpo sɔ̄, nu a wee doo kɔ nɛɛ a bɔātɛ̄ yii bu dogo kunagā na sɔ̄ a gbī e mmɛɛ̄ ye taɛ namloo. Pio sɔ̄ wee bɔātɛ̄ aāloo si ee foto a tɔgɛ ekotɛ̄ nɛɛ.

9. E na anua foto a tɔgɛ ekotɛ̄ nɛɛ bee piya gbɛnɛ a?

⁹ Ɛp foto a tɔgɛ ekotɛ̄ nɛɛ wee doo kɔ taɛ kunagā a yii bu nɛɛ. Nii’ee, foto ekotɛ̄ nɛɛ le dɛ̄dɛɛ̄ kɛ̄, bu magazin, bu ekpo-ekpo kpa, bu yɔɔ, le pya nu alu etɔgɛ nyɔɔ TV, le nyɔɔ intanɛt. Gbɛnɛ-edo nɛɛ kɛɛrɛ kɔ foto a tɔgɛ ekotɛ̄ nɛɛ naa bee piya, mɛ a bee piya gbɛnɛ. A dap doo kɔ nyiɛ nɛɛ a bia nyɔɔ nyɔɔnɛ nɛɛ maniakɛ̄, sa ɛrɛ lo taɛ yemakɛ̄. Aba sɔ̄ nɛɛ si ee foto a tɔgɛ ekotɛ̄ nɛɛ, a dap bɔātɛ̄ eyaɛ bahloo aba ɛɛ, yere taāŋa bu ye iya dam le wa, sa dap nage doo kɔ a kiī ye wa ale ye dam.—Pya Rom 1:24-27; Pya Ɛfɛsɔs 4:19; buū 24 Ue ale dumɛ.

10. Bu mɛ sīdee na ue a le bu kpa Jemes 1:14, 15 i dap yerebah nɛ lo ekiī dogo kunagā ani?

¹⁰ Alu ebɛɛ̄ kɔ i suā kɛ̄ dogo kunagā i dap gɔm doo. Yere nukuādɛɛ̄ loo zuurabahtɔ̄ a le bu kpa Jemes 1:14, 15 lo a kɔ: “Ziī ziī nɛɛ lu edoā-ɛp sɔ̄ ye pɔrɔ taɛ ye kɛrɛ sa ye gɔm. Lo sɔ̄ ye pɔrɔ taɛ sɔ̄ a esua bu a maɛ̄ pɔrɔ; e pɔrɔ, sɔ̄ a enyima ina kɛ̄tɔɔ̄ a nua luh.” Nyɔɔwo, sɔ̄ pɔrɔ ekɛɛrɛ a yii nyiɛ, nwaabah lɛa nyiɛ aba sɔ̄. E lo o bugia muɛ̄ nu eyere a pɔrɔ taɛ bu, lɛɛ dɛɛ̄ loo! Zimɛ o kɔmputa ale o bii lɛɛ lo dɔ. O aa lɛɛbaloo kɔ pɔrɔ taɛ a bia a bu. Lo o lɛɛbaloo, pɔrɔ ekɛɛrɛ ama dap agatɛ̄ mmɛ kɛ̄ e’aga gbɛnɛ lo ebaɛbee.—Buū Matiu 5:29, 30.

11. Bu mɛ sīdee na Jɛhova edap i yerebah nɛ sɔ̄ pɔrɔ ekɛɛrɛ i yii bu a?

¹¹ Jɛhova suā i loo leere ee kɛ̄ i suā loo aba ii  doo. A suā kuma kɛ̄ pɔrɔ i le bu doo. Mɛ a suā nage kɔ i dap be eeba pɔrɔ taɛ. Jɛhova kɔ i nɛ kɔ: “Nyɔɔwo bui fɛaa keekee kɛ̄tɔɔ̄ ekpaloo nyɔuwe a i le bu: kunagā, saāŋa dogo, pɔrɔ taɛ nu, gbīgbī pɔrɔ, le manyiɛ lo a le doo yɔ.” (Pya Kɔlɔsi 3:5) Kere lo ama naa waɛ, Jɛhova ɛrɛ egerebu i loo sa eyerebah i nɛ. (Le-yɔɔ 68:19) Ziī zege wuga nɛɛdam bee dɔ bu zaɛ̄ bialoo wee si ee foto a tɔgɛ ekotɛ̄ nɛɛ le yaɛ bahloo aba ɛɛ. Pya ye koo tɔkpa bee ɛmadɛɛ̄ kɔ pya dogo ama lu kunɛ nu pya zege a gaa aa kɛ̄ wee doo, mɛ a bee kɔ: “A gbee na ekɛɛrɛ beenyiɛ, sa mɛ yere bu dogo kunagā.” A bee muɛ̄ kɔ alu ebɛɛ̄ kɔ a baɛloo ye taɛ, e tɛ̄maloo yerebah Jɛhova, a bee dap ɔbɛ lo dogo. Lo o wee ɛrɛ ekɛɛrɛ akiiloo kunagā, bara Jɛhova kɔ a nɛ a  “eenyɔɔ ekpo” lo edoo kɔ o ɛrɛ le ekɛɛrɛ beenyiɛ.—2 Pya Kɔrint 4:7; 1 Pya Kɔrint 9:27.

12. E na anua alu ebɛɛ̄ kɔ i ‘baɛloo i beenyiɛ’ a?

¹² Solomɔn bee ɛm kɔ: “Sere o beenyiɛ tɛ̄maloo tɔɔ̄baɛ nyɔnɛbee loo ye na dɛ̄dɛɛ̄ ezi-maā dum bu aa a.” (Kam 4:23) I “beenyiɛ” yira dɔ nɛɛ i lu li bu, dua nɛɛ Jɛhova muɛ̄ kɔ i lu. Pya nu i ɛp dap i ɛrɛ gbɛnɛ pah nyɔɔ. Job a bee tɔɔ̄ agara bee kɔ: “Mda le baɛ na dɛɛ̄ ebee doo yii-bɔma-dum; nyɔɔwo, lo sɔ̄ m tɛɛ̄ doodoo wa ɛp ziī nwiī-emuā-a-sii-si-nɛɛ?” (Job 31:1) Doodoo Job, alu ebɛɛ̄ kɔ i nwaɛ̄dɛɛ̄ loo nu i ɛp le nu i kɛɛrɛ. E doodoo nɛɛ uɛ Le-yɔɔ, i yere kara kɔ: “Kiira na baɛ dɛɛ̄ lɛɛ loo ɛ’ɛp yɔrɔ nu.”—Le-yɔɔ 119:37.

13. Ba mɛɛ̄ na a bee lu pya gbo Daina a?

¹³ Pya gbo i yii dap i ɛrɛ gbɛnɛ pah nyɔɔ bu le sīdee ale pɔrɔ sīdee. Lo o sagɛ pya gbo ba nyɔɔnɛ daakuu Bari, ba dap a yerebah nɛ kɔ o doo nage wo. (Kam 13:20; buū 1 Pya Kɔrint 15:33.) I dap muɛ̄ kɛ̄ sagɛ pya gbo i yii lu gbɛnɛ doo aāloo nu a bee sira loo Daina. A bee le sira Jekɔb, nyɔɔwo, a bee lu ekpɔā ye bie butɔ ba wee taāŋabah Jɛhova. Daina naa wee kunagā, mɛ a bee yii gbo miɔŋɔ nɛɛwa Kenan lo ba naa wee taāŋabah Jɛhova. Pya Kenan wee ɛp maloo nɛɛ bu sīdee alu kee loo kɛ̄ pya nɛɛ Bari ɛmadɛɛ̄ doo, e ba wee kunagā gbɛnɛ. (Levitikɔs 18:6-25) Sɔ̄ Daina bee le kpaɛ̄ pya ye gbo, a bee zɔŋia ziī zege gbara alu Kenan a kura  Shekem a bee ye ɛrɛ nia bu. Shekem bee le nɛɛ a “ɛrɛ ka eenyɔɔ dɛ̄dɛɛ̄” pya zege gbara butɔ ye tɛ. Mɛ a naa bee wereloo Jɛhova.—Jɛnɛsis 34:18, 19.

14. E na a bee sira loo Daina a?

¹⁴ Shekem bee doo nu a kɛɛrɛ kɔ a kpeloo sa bɔloo. Nyɔɔbee bu ye bee ɛɛ loo Daina a, “a aa ye” sa ye ‘gbee.’ (Buū Jɛnɛsis 34:1-4.) Bag dogo ama bee nua gbɛnɛ taāŋa nyɔɔ Daina le pya ye butɔ.—Jɛnɛsis 34:7, 25-31; Pya Galetia 6:7, 8.

15, 16. E na edoo kɔ i ɛrɛ suānu a?

¹⁵ Naa lu ebɛɛ̄ kɔ i dasī tɛɛ̄ dua ekwɔ Daina bee tɛɛ̄ lɛɛ i gae suā kɔ pya daakuu Jɛhova i nɛ nyɔɔ dogo a ɛɛ elee i loo. “Nɛɛ a nyɔɔnɛ pya suānu kiā gaa le suānu, mɛ nɛɛ a nyɔɔnɛ pya ezu kiā gaa le ɛrɛ muɛ̄ pɔrɔ.” (Kam 13:20) Su nua nu o seea sī lo edābeeloo “ɛrɛgeba le . . . dee,” e oo le e’ɛrɛ ezialoo le tɔga a naa bɔloo.—Kam 2:6-9; Le-yɔɔ 1:1-3.

¹⁶ I dap ɛrɛ suānu tɛ̄maloo enɔ Muɛ̄ Ue Bari, yere kara ye nɛ sa nyɔɔnɛ le zuurabahtɔ̄ a aabah zooro a bɔloo eture nyiɛ loo sa suānu lɛɛ i gae biaɛ nu fii. (Matiu 24:45; Jemes 1:5) Kɛādoo, o suā kɔ dɛ̄dɛɛ̄ ii ɛrɛ e’ɔaloo sa ii mmana. (Jeremia 17:9) E na o doo lo ziī nɛɛ zuura a bahtɔ̄ kɔ lo oo nwaɛ̄dɛɛ̄ o dap yii bu dum kunagā a? O ɛrɛ saŋ, sɛh o kumalookɛ̄ su lo yerebah ni?—2 Pya Mɛnɛ-Buɛ̄ 22:18, 19.

17. Naa nɛ edoba a tɔgɛ kɛ̄ zuurabahtɔ̄ a aabah pya le ii gbaa lu Nɛɛ Kraist dap i yerebah nɛ doo.

¹⁷ Bu edoba, naa kɛɛrɛ kɛ̄tɔɔ̄ ama. Ziī gbara bɔātɛ̄ tɔgɛ nia bu ziī wuga nɛɛwa bie kɛ̄tam sa  sere dee ba egbaa si wee de kina dum. Lo gbara naa wee taāŋabah Jɛhova, mɛ a bee kɔ a lee sa lu fɛgɛ. Dɔɔ̄na wuga nɛɛwa bee muɛ̄ kɛ̄ ba yiiloo ziī doo sa ye nɛ zuurabahtɔ̄ kumaloo. Lo wuga nɛɛwa edoo dogo kumaloo doodoo wa? E kɔ ue leere aba ɛɛ, sɛh emuɛ̄ge suānu a le bu lo zuurabahtɔ̄ ni? Lo wuga nɛɛwa dap wereloo Jɛhova sa gbī edoo nu a lee. Mɛ lo a kiisī lo enyɔɔnɛ gbara ama kii ee, a gaa teerage ‘aaloo kunagā’ sɛh a gaa “ture nyiɛ loo alɛɛ ekɛɛrɛ” ni?—Kam 22:3; 28:26; Matiu 6:13; 26:41.

18, 19. Naa baatɛ̄ kɛ̄ Josɛf bee teera aaloo kunagā doo.

¹⁸ Josɛf bee le zege gbara a bee lu zooro li Ijipt.  Aā ziī dee yii ziī, wa ye tɛtɔ bee kɔ a nyɔɔnɛe ye makɛ̄, mɛ Josɛf suā kɔ e bee piya lo a dooe wo. Josɛf bee wereloo Jɛhova sa gbī edoo nu a ye nia. Nyɔɔwo, ziī ziī sɔ̄ lo wa gbī epagɛrɛ Josɛf, a wee amana. Kuma sɔ̄ a bee le zooro a, a naale edap aadee kii aaloo ye tɛtɔ. Ziī dee sɔ̄ wa ye tɛtɔ bee gbī esu bah ekpo ye aā kɔ a nyɔɔnɛe ye makɛ̄, a bee “teera kii ee.”—Buū Jɛnɛsis 39:7-12.

¹⁹ Kɛ̄tɔɔ̄ ama ebee bee piya lo Josɛf bee ɛrɛ ekɛɛrɛ kɔ ekunae gā, ale a wee ɛrɛ pɔrɔ ekɛɛrɛ kumaloo wa ye tɛtɔ. Mɛ gbanialoo Josɛf bee ɛrɛ kumaloo Jɛhova bee ye kuī loo ee ɛrɛgeba dɔɔ̄na nu. A bee kɔ nɛ lo wa kɔ: “Nɛɛ a mɛ ɛrɛ . . . naa kpaɛ̄ mɛ loo lɔgɔ nu, mɛ aba olo, nyɔnɛbee olo lu ye wa. M tɛɛ̄ doodoo wa doo gbɛnɛ bag dogo ama, sa doo pɔrɔ pima Bari?”—Jɛnɛsis 39:8, 9.

20. I tɛɛ̄ doodoo wa suā kɔ bu Jɛhova bee ɛɛ loo Josɛf ni?

²⁰ Kere adoo Josɛf bee le kɛ̄ a binia aaloo pya ye butɔ, a bee tɔɔ̄nɛ Bari dɛ̄dɛɛ̄ sɔ̄, sa Jɛhova bee ye nɛ leelee. (Jɛnɛsis 41:39-49) Bu Jɛhova bee ɛɛ loo kɛ̄ Josɛf ye tɔɔ̄ agara nɛ doo. (Kam 27:11) A dap aga ekiī dogo kunagā. Mɛ nyɛŋiabu ue a kɔ: “Jɛhova wereloo dɛ̄dɛɛ̄ pya a baaloo pɔrɔ; a sere dum dɛ̄dɛɛ̄ pya ye kaɛ; sa wa zuura lɛɛ kɛ̄ bah pya bag dogo.”—Le-yɔɔ 97:10.

21. Bu mɛ sīdee na ziī zege wuga nɛɛdam bee nɔ Josɛf a?

²¹ Dɛ̄dɛɛ̄ dee, pya nɛɛ Jɛhova gaa su e’agaloo tɔŋɛ kɔ ba ‘baae loo pɔrɔ’ le kɔ ba “wereloo . . .  doo le.” (Amos 5:15) Kaɛlɛɛ ɛrɛgeba zua o elua, o dap tɔɔ̄ agara nɛ Jɛhova. Bee lu edoā-ɛp yira ziī zege wuga nɛɛdam bie tɔkpa. Ziī nwiīnɛɛwa bee ye kɔ nɛ kɔ enyɔɔnɛe ye makɛ̄ lo a yerebah lo edoo sɔm ye nɛ. E na lo wuga nɛɛdam bee doo a? A bee doo dogo bee Josɛf. A bee kɔ: “Aba lo sɔ̄, m bee amana nu a bee kɔ. Tɛ̄maloo ekiisī lo eyira agɛrɛ, pya nɛɛ yere mɛ ka loo sa mɛ nɛ enwadɛɛ̄.” Ɛrɛgeba “ekpe nu bu doo gbee bu ziī nwī sɔ̄” a aaloo dogo kunagā wee nua ezialoo sa a nɛ taāŋa nyiɛ nɛɛ. (Pya Hibru 11:25) Gbaɛ̄tɔ̄loo Jɛhova wee nua biakɛ̄ ɛɛbu.—Kam 10:22.

22, 23. Bu mɛ sīdee na Jɛhova i yerebah nɛ kere adoo i bee si gbɛnɛ pɔrɔ a?

²² Setan egbī esu dogo kunagā i aā, e lo ama dap i agaloo kaāna. Dɛ̄dɛɛ̄ ii wee ɛrɛ pɔrɔ ekɛɛrɛ aā ziī sɔ̄ yii ziī. (Pya Rom 7:21-25) Jɛhova suā lo ama sa a nyɛŋia ye bu “kɔ i lu kunɛ tɔ̄.” (Le-yɔɔ 103:14) E lo a le ziī Nɛɛ Kraist yii bu dum kunagā a? E kɔ a naa ɛrɛna lɔgɔ bɛābu ni? Eeye. Lo a le lo nɛɛ kiiya kaāna, Jɛhova eyerebah ye nɛ. Bari kpɛ̄naloo e “aaloo pɔrɔ.”—Le-yɔɔ 86:5; Jemes 5:16; buū Kam 28:13.

²³ Jɛhova nɛnage i “keekee dɔɔ̄nu” bu nɛɛ, lo a le pya kanɛɛ ba ɛrɛ wereloo kɔ ba a kuū i dɛɛ̄loo. (Pya Ɛfɛsɔs 4:8, 12; Jemes 5:14, 15) A nɛ i pya kanɛɛ lokwa ba yerebah lo ekwa i gbanialoo kiikɛ̄ a le.—Kam 15:32.

24, 25. Bu mɛ sīdee na ‘le kɛɛrɛ’ eyerebah i nɛ kɔ i aa dɔ bu kunagā a?

²⁴ Lokwa i biaɛ nu fii leere, i ɛrɛ edābeeloo kɛ̄ pya lok Jɛhova i dɔbiī nɛ doo. Ii gbī ebee zege gbara alu ekɔ nu kumaloo bu kpa Kam 7:6-23. “A naa ɛrɛ ekɛɛrɛ,” nyɔɔwo a dɔ bu zaɛ̄ kunagā. Le ekɛɛrɛ eenyɔɔ kɔ nɛɛ suā nu. Sɔ̄ i ɛrɛ le ekɛɛrɛ, i piiga lo edābeeloo nu alu ekɛɛrɛ Bari sa i doo. Nyɛŋiabu pya ue suānu a kɔ: “Nɛɛ a ɛrɛ suānu wereloo alɛɛ loo; nɛɛ a sere buābee gaa le kiisī leere.”—Kam 19:8.

²⁵ O suāge leere kɔ pya daakuu Bari lee ni? O yigage kɔ lo o nyɔɔnɛ edoo kɔ o ɛrɛ ɛɛbu kaāna ni? (Le-yɔɔ 19:7-10; Aisaia 48:17, 18) Lo o sii suā leere, nyɛŋiabu dɛ̄dɛɛ̄ le nu Jɛhova edoora a nɛ. “Daara edɛm loo sa muɛ̄ kɔ Jɛhova lee.” (Le-yɔɔ 34:8) O muɛ̄ kɔ kɛ̄ o agɛrɛbah doo doo, kɛ̄ o wereloo kiiloo Bari enyim nage doolo. Wereloo nu a wereloo, sa baaloo nu a baaloo. Kɛɛrɛbu pya nu a lee doodoo pya nu alu kaka, pya nu alu kaāna, pya nu a ɛɛ, pya nu a lee ereloo, pya nu a nɛ le kpɛa ue, le pya nu a lee. (Pya Filipai 4:8, 9) I dap bee Josɛf, lo a bee ɛrɛ biī aāloo suānu Jɛhova.—Aisaia 64:8.

26. E na i gaa le sikɛ̄ kɔ nu akiiloo a?

²⁶ Kere o le aba ɔɔ ale o e’iya sa ii, Jɛhova gbī kɔ o ɛrɛ ekpeloo le ɛɛbu bu dum. Baɛ ekobee ue a enyɔɔnɛ ama edoo kɔ i suā nu eyerebah i nɛ kɔ iya dam le wa a kiisī leere.