Lɛta A Aaba Eku A Baɛbee
“Bui ɛrɛ elu pya tɔgɛ nu.” (Hib 5:12) Naa kɛɛrɛ! Jɛhova—lo Nɛɛ Tɔgɛnu a lee eera bu yube nyɔuwe—kue i kɔ i su nu a ye kiiloo tɔgɛ pya dɔɔ̄na! Ɛrɛgeba tam lo etɔgɛ nu akiiloo Jɛhova—bie butɔ, bu bɔŋanaloo, ale bie uwe zue ue—lu tam a si gbɛnɛ du sa kuī. E na edap doo kɔ i si leere ani?
Ye ture le bu ue nɛɛ-lɛɛratam Pɔɔl bee ɛm ma Timoti: “Su oloo nɛ buū kpa, lo zue ue, lo tɔgɛ nu.” Pɔɔl sikɛ̄ kɔ: “Bu edoo pya lo nu ama o kpɔā oloo loo le pya a a dā.” (1 Tim 4:13, 16) Elua enɛ a yereue a kpɔā dum kɔ o kɔ nɛ pya nɛɛ. Nyɔɔwo a lu ebɛɛ̄ kɔ o si tam lo enyimɛ kɛ̄ o buū kpa sa tɔgɛ nu doo. Nwīekpo kpa ama eyerebah a nɛ kɔ o doo wo. Naa ɛp pio nu a le bu ama.
A ɛrɛ dɔ kpa kaɛ a le ziī ziī naɛsī lo a tɔgɛ nu Baibol kɔ kumaloo lo ekobee ue ale a nɛ edoba loo kɛ̄ suānu a le bu lo ekobee ue lu esu daānu doo
Jɛhova na Gbɛnɛ “Nɛɛ tɔgɛnu” a. (Ais 30:20) Kere sɔ̄ kpa ama eyerebah a nɛ kɔ o nyimɛ o kari yereloo bu o buū kpa le tɔgɛnu a, aa a ibere kɔ Jɛhova na Nɛɛ dɛ̄dɛɛ̄ ue a le bu aaba a, le kɔ alɛ na a wee zuura nɛɛ a. (Jɔn 6:44) Nyɔɔwo, wee yere kara gbɛnɛkpo sɔ̄ bara kaɛ edɔɔ̄. Wee buū Muɛ̄ Ue Bari. Su ka ma Jɛhova, e o aa su nua olo. Piiga lo edoo kɔ pya a a gbaɛ̄tɔ̄ a ɛrɛ toga toga wereloo kumaloo Jɛhova.
Elua ekue a kɔ o su yereue a kuī eera tɔgɛ pya nɛɛ. I suā leere kɔ kuma sɔ̄ o dɛɛa nyɔɔ “ekpo Bari nɛ,” o gaa le kiisī leere.—1 Pit 4:11.
Pya nɛɛ le bui gaa gbaa tɔgɛ nu,
Eku A Baɛbee Pya Ekeebee Jɛhova
