Naa kɛɛrɛ kɛ̄tɔɔ̄ ama: Sɔ̄ Julia ɛp bu taŋaligi, sa muɛ̄ kɔ a kuī e ereloo, abee kɔ: “E lee kɔ mm kuīna gbɛnɛ.” Kerewo, ye tɛ le ye ka le pya ye gbo bee ye kɔ nɛ kɔ ye mɛā “le le.”

Aā lo sɔ̄, Julia bee kɛɛrɛ ekɛɛrɛ gbɛnɛ loo nu edooe lokwa a “tera kina.” Nyɔwo, abee kaɛ ziā pio biradee . . .

Lo ale olo na o le bu kɛ̄tɔɔ̄ Julia le ama, ena o bee doo ani?

Naa bee piya loe ɛrɛ ekɛɛrɛ loo kɛ̄ o mɛā doo. Bu kaka, Baibol kɔ le kumaloo pya nɛɛwa le nɛɛdam ba ɛrɛ le mɛā. Pio aba na Sera, Rechɛl, Josɛf, Devid, le Abigɛl. Baibol kɔ ziī wa ye bee kura Abishag “bee ɛrɛ le mɛā ereloo.”—1 Pya Mɛnɛ-Buɛ̄ 1:4.

Kerewo, gbɛnɛ-edo pya zege nɛ taāŋa yee kɛ̄ loo kɛ̄ ba mɛā doo. Lo ama dap nuā gbɛnɛ taāŋa. Naa kɛɛrɛ:

• Bu ziī egbiātɛ̄ nu loo 100 miɔŋɔ nɛɛwa, 58 aba kɔ ba kuī e ereloo, sɔ̄ aba 17 aba na a kuī a.

• Bu dɔɔ̄na egbiātɛ̄ nu, 45 yɛɛ 100 pya nɛɛwa ba beeloo bee kɛɛrɛ kɔ ba kuī e gbɛnɛ!

• Lokwa ba beeloo, pio pya zege ekara ziā sa dɔ bu gbɛnɛ dumɛnu a sira aaloo kaɛ nuede.

 Loa bee kɔ o ɛrɛ lo dumɛ ale oo dap denu leere, gbī yerebah. Bɔātɛ̄ tɛ̄maloo ekɔ nɛ o tɛ ale o ka ale dɔɔ̄na nɛɛ ae lua kagbara ale kawa nɛɛ lo o dap dɛrɛ nyiɛ nyɔɔ. Kpa Baibol kɔ: ‘Kaana gbo wereloo dɛ̄dɛɛ̄ sɔ̄, ea lu wuga anɛ sɔ̄ o le bu etɛɛrɛ.’—Kam 17:17.

Bu kaka, taɛ nu nɛɛ lu li bu ye na a doo kɔ a kpedɛɛ̄ ale aa kpedɛɛ̄ a. Naa kɛɛrɛ bu Nwiīnɛɛdam Devid a kura Absalɔm. Kpa Baibol kɔ:

‘Lɔgɔ nɛɛ alu eleera ye ee bu mɛā naale . . . lɔgɔ bo naa bee ye le loo.’—2 Samuel 14:25.

Kerewo, lo zuguru gbara ama bee danaloo nɛ nyɔɔ gbɛnɛ, ɛrɛ pɔrɔ taɛ sa lu nɛɛ kiāŋana! Nyɔbee wo, Kpa Baibol naa kɔ le kumaloo Absalɔm. A kɔ ue ye kumaloo doodoo nɛɛ a naa ɛrɛ kɛɛ, nɛɛ a naa tɔɔ̄ agara sa lu nɛɛ a baaloo nɛɛ, sa gbī e fɛ nɛɛ.

Nyɔwo na Kpa Baibol i zuurabahtɔ̄ a, kɔ:

“Yaaraa aā mɛ̄mɛā.”—Pya Kɔlɔsi 3:10, NW.

‘Bui aa doo kɔ bui le alu aba nyɔɔ ekpaloo i . . . , mɛ doolo alu nɛɛ gɔā bu benyiɛ̄.’—1 Pita 3:3, 4.

Kere sɔ̄ anaa bee piya loe gbī e ɛrɛ le mɛā a, nu a kuī ee o mɛā na o dogo. Sɔ̄ sɔ̄ gaa kiīsī pya elap dogo alu ekɔ le kumaloo edoo kɔ o kpedɛɛ̄ pya dɔɔ̄na ee kɛ̄ o ekpaloo le o mɛā le doo! Ziī nwiīnɛɛwa a kura Phylicia kɔ: “Sɔ̄ o kpedɛɛ̄ dap doo kɔ nɛɛ a sere adɛɛ̄ nyɔɔ, mɛ nɛɛ o lu li bu le pya o le elap dogo na pya nɛɛ esu a nyɛŋia bu loo gbɛnɛ a.”

Kɛ̄ o mɛā doo wee a bɛā gbɛnɛ-edo sɔ̄ ni?

O e bee kɛɛrɛge bu loo elɛra nɔɔ̄ ɛɛ lokwa o kpedɛɛ̄ ee kɛ̄ o le doo ni?

Ena o bee nyaana loo o mɛā lo ale o dap ani? (Niina nu kɛɛ̄ dɛ̄dɛɛ̄ lo a a niā.)

• O GĀNYƆƆ

• O KUĪ-KA

• O ZIA

• O MƐĀ

• O SĪ

• O EKPALOO

Lo o ture lu aiī loo lo tuatua le lo eree baɛ ebip sa o niina nu kɛɛ̄ taa ale eenyɔɔ wo bu lo eree taa ebip, naa kɛɛrɛ lo ama: Gbɛnɛkpo pya dɔɔ̄na naa muɛ̄ kɔ o bee piya dookɛ̄ o muɛ̄ aba ɔɔ doo. A waɛ enɛ taāŋa loo a yee kɛ̄ kiiloo kɛ̄ o mɛā le doo.—1 Samuel 16:7.