Naa kɛɛrɛ kɛ̄tɔɔ̄ ama: Thomas naa gbī esi tɔkpa anii’ee. Ale nyɔɔ’ee li. Ale kunɛ dɔɔ̄na dee. Nu anua na bee taa enɔɔ̄ akii adumɛ pya ye gbo tɔkpa bee ye kɔ esah loo sa ye gbee bee gbɛnɛ. Lɛɛ ba nɛ ye esobee. Pio sɔ̄ ba zip kpa ye lɛɛ bah sa doodoo bee ba naa suā e, ale ziī nɛɛ a wa le yɛɛ e taā ye bah aā dumɛ sa sɔ̄ Thomas e bɛɛa dɛɛ̄, naale e suā loo lo nɛɛ. Nyɔɔ’ee a, dɛ̄dɛɛ̄ nu bee gbasu sɔ̄ ba bee yere ue bɔɔ bu fon ye mā . . .

Lo olo na o bee le Thomas a, ena o bee doo ani?

Nu o doo le! Bu kaka, o dap be nɛɛ a a gbiā ue, kere oo ye zip. Bu mɛ sīdee?

•   OA BE BE. Kpa Baibol kɔ: “Nɛɛ ezu doo kɔ ye saŋ a sira bu ɛɛdee, mɛ nɛɛ suānu kpaɛ̄ ye sa doo kɔ a ɔp.” (Kam 29:11) Lo ale o ubepiī kuma kɛ̄ o dap doo—sa fɛɛrɛloo—loo pya a gaa a gbiā ue dap ɔ.

• OA OBARA KPƐ. Kpa Baibol kɔ: “Bui aa obara pɔrɔ kpɛā pɔrɔ.” (Pya Rom 12:17) Gbī e kpɛ pɔrɔ esīkɛ̄ doo kɔ nu a bee piya yee kɛ̄.

• OA YERE BEE BU TAĀŊA. Kpa Baibol kɔ: “Nɛɛ a ɛrɛ buābee muɛ̄ nu bɔɔ sa gɔ̄ ye loo.” (Kam 22:3) Kuma kɛ̄ o dap doo, tɔɔ̄ aaloo pya nɛɛ e yere a bu taāŋa sa kpoora loo lɛɛ loo kɛ̄tɔɔ̄ e yere a muū loo.

• TURE UE BU SīDEE BA NAA BEE ƐMADƐƐ̄. Kpa Baibol kɔ: “Efɛɛloo ture ue wee kiira gbɛnɛ saŋ lɛɛ.” (Kam 15:1) O dap doo ziī nwī nu mɔm. Bu edoba, lo ale ba gbɛ a kɔ o kuī ka niā, o dap nyɔŋɛ loo a sa kɔ, “kɛ̄ mda muɛ̄ nage doolo!”

• KIĀ AA. “Ubepii tɔgɛ kɔ oe nyima tura nɛɛ le kɔ o agaloo ee nɛɛ a gaa a gbiā ue. A tɔgɛ nage kɔ o dap aa oloo—elap pya a gaa a gbiā ue naa ɛrɛ,” kɛ̄ Nora ae lua 19 zua kɔ doolo.—2 Timɔti 2:24.

• KWA BALOO KƐ̄ O DƐRƐ NYIƐ̄ NYƆƆ OLOO DOO. Pya a gaa a gbiā ue suā loo pya a naa dɛrɛ nyiɛ nyɔɔ wa loo le pya a naale e obia wa be. Mɛ bu kiiya sī, gbɛnɛ-edo pya a gaa a gbiā ue e ɔbɛ wa taāŋa lo ale ba muɛ̄ kɔ oo wa nɛ dee.

• KPƐA NƐ NƐƐ. Ziī nɛɛ a wee tɔgɛnu kɔ: “Eniā mɛ kɔ ɛrɛgeba nɛɛ a gaa lu enɛ taāŋa a kɔ siā. Nu a bɔloo edoo lo. Lo ama edoo kɔ aa luna enɛ taāŋa pya dɔɔ̄na nɛɛ.”