1-3. Dɛ̄dɛɛ̄ ii le kpɔgɔrɔ ba e, e bu mɛ sīdee na Jɛhova e agara i a?

NAA kɛɛrɛ kɔ a bee lu e biaɛ a ue loo kɔ o tɔɔ̄ kpɔghɔrɔ mmɛ dee o u loo pɔrɔ oo bee doo. Oo le edap na agia aaba. Bee kɔ oo ɛrɛ na bɛābu, e lɔgɔ nu o dap doo loo naale. Mɛ, sɔ̄ oo bee ɛrɛ na bɛābu doo pippip, o gbī muɛ̄ kɔ ziī nɛɛ ɛrɛ ekpo e agara a, sa a yira yii kɔ e yeree bah a nɛ! Etɔɔ̄ a loo doodoo wa?

² Dɛ̄dɛɛ̄ ii le kpɔgɔrɔ bah luh. Kaɛlɛɛ kɛ̄ i piiga doo, ii ye dap si bah. Mɛ, Jɛhova ɛrɛ ekpo e agara i lɛɛ kɛ̄ bah luh. E a eyira yii kɔ, “Lo kpɛdumɛ nɛɛ baa a e gbee na luh.”​—1 Pya Kɔrint 15:26.

³ Naa kɛɛrɛ kɛ̄ loo a esukɛ̄ doo sɔ̄ oo kɛɛrɛ na kɔ o gaa le u e! Mɛ, naale aba luh na Jɛhova elɛɛ a. E doo nage kɔ pya e bee u a sikɛ̄ le dum. Naa kɛɛrɛ nu lo ama ekura a nɛ. A bee yira yii kɔ pya “a e’ua” gaa le sikɛ̄ tɔɔ̄dum. (Aisaia 26:19) Nu Baibol kure aakɛ̄ bu luh lo.

4. (a) Ena e dap i nɛ egbɔ̄nyiɛ sɔ̄ ziī nɛɛ bu i tɔ ale i gbo u a? (b) Ba mɛɛ̄ na ba bee le pio kaāna gbo Jizɔs ani?

⁴ Sɔ̄ ziī nɛɛ bu i tɔ ale i kaāna gbo u, ezialoo le ekiɛ̄nu a aaloo dap aga e tama. Wee i tɔɔ̄loo kɔ lɔgɔ yerebah naale na. Naa ɛrɛ lɔgɔ nu i dap  doo lo e obara lo nɛɛ sere dum. Mɛ, Baibol nɛ i kaāna egbɔ̄nyiɛ. (Buū 2 Pya Kɔrint 1:3, 4.) Doo i nɔ ziī edoba a tɔgɛ kɛ̄ Jɛhova le Jizɔs gbī e obara pya i wereloo ba e ua sere dum doo. Sɔ̄ Jizɔs bee le a kɛnɛkɛ̄, wee ina loo Lazarɔs le pya ye wuga nɛɛwa ba kura Mata le Meri gbɛnɛkpo sɔ̄. Taa aba bee le kaāna gbo Jizɔs. Baibol kɔ: “Jizɔs bee wereloo Mata, le ye wuga gbobia, le Lazarɔs.” Mɛ ziī dee, Lazarɔs bee u.​—Jɔn 11:3-5.

5, 6. (a) Ena Jizɔs bee doo sɔ̄ a muɛ̄ pya butɔ Lazarɔs le pya ye gbo ba le bu ekiɛ̄nu ani? (b) Ena anua alu nu egbɔ̄nyiɛ sɔ̄ i suā kɛ̄ luh tɔɔ̄ loo Jizɔs doo ani?

⁵ Jizɔs bee si wee gbɔ̄ Mata le Meri. Sɔ̄ Mata dā kɔ Jizɔs gaa lu, a bee teera wee zɔ̄ŋia ye. Bu ye bee ɛɛ lo e muɛ̄ Jizɔs, mɛ a bee kɔ: “Lo a le o bee le akɛāma na wuga nɛɛdam naale e bee u.” Mata bee kɛɛrɛ kɔ Jizɔs ebiɛā dumɛ gbɛnɛ. Sɔ̄ a e saa Jizɔs muɛ̄ ye wuga nɛɛwa akura Meri, a gaa to. Sɔ̄ Jizɔs muɛ̄ kɛ̄ a wa kiɛ̄ doo, a zi ye loo sa a to. (Jɔn 11:21, 33, 35) A bee ɛrɛ dua ezialoo i wee ɛrɛ sɔ̄ nɛɛ i wereloo u.

⁶ Sɔ̄ i suā kɔ kɛ̄ luh i tɔɔ̄ loo doo na a tɔɔ̄ nage loo Jizɔs a, nɛ i egbɔ̄nyiɛ. E Jizɔs bee nage ye Tɛ. (Jɔn 14:9) Jɛhova ɛrɛ ekpo elɛɛ luh ina deedee, e nu a gaa le doo sɔ̄ sɔ̄ naa binia lo.

7, 8. Ena anua Mata naa bee gbī kɔ ba a lɛɛ dɛm nu bana luh Lazarɔs a, mɛ ena Jizɔs doo a?

⁷ Sɔ̄ Jizɔs ina kpaɛ̄ bana luh kɛ̄ ba bee li Lazarɔs, bee lu esu gbɛnɛ ekpo dɛm dɛrɛ nu. Jizɔs kɔ “Suaa  ekpo dɛm ama lɛɛ.” Mɛ, Mata naa bee gbī kɔ ba a su lɛɛ. Ekpaloo Lazarɔs e tɔɔ̄na bu bana loo nia biradee. (Jɔn 11:39) A naa bee suā nu Jizɔs gaa bee gbī edoo lo e yerebah nɛ ye wuga nɛɛdam.

⁸ Jizɔs bee kɔ nɛ Lazarɔs kɔ: “Aabu sira ee!” Nu Mata le Meri sikɛ̄ muɛ̄ bee wa lu nyɛŋia loo. “Nɛɛ a e’ua a aabu sira, bee lu esu bɛ iinɛɛ ye bɔma bah le tɔ.” (Jɔn 11:43, 44) Bee lu e obara Lazarɔs sere dum! A bee sikɛ̄ gbaaloo pya ye butɔ le pya ye gbo. Ba bee ye dap aabaloo, ye daabaloo, sa ye kɔ ue nɛ. Nyɛŋia tam sɛh! Jizɔs elɛra Lazarɔs kɛ̄ bu luh.

9, 10. (a) Mɛɛ̄ na a bee nɛ ekpo Jizɔs lo elɛɛ pya nɛɛ kɛ̄ bu luh ani? (b) Ena anua pya e’ɛma akiiloo lɛɛ nɛɛ kɛ̄ bu luh dɔbiī i nɛ ani?

⁹ E kɔ Jizɔs bee suge alɛɛ ekpo lɛma pya nɛɛ kɛ̄ bu luh ni? Eeye. Lɛɛ Jizɔs gae lɛɛ Lazarɔs kɛ̄ bu luh, a bee yere kara nɛ Jɛhova. Jɛhova bee ye nɛ ekpo lo elɛɛ Lazarɔs kɛ̄ bu luh. (Buū Jɔn 11: 41, 42.) Naa bee le aba Lazarɔs na a bee lu e lɛɛ kɛ̄ bu luh a. Baibol kɔ nu akiiloo ziī nwiīgbobia a elua 12 zua lo loo ye bee dumɛ gbɛnɛ i nɛ. Ye tɛ Jairɔs, bee lu kirikiri, sa a bara Jizɔs kɔ a boh ye. A bee le aba ye nwiī. Sɔ̄ a gaa bee kɔ ge ue nɛ Jizɔs, pio nɛɛ bee lu sa kɔ: “O nwiīgbobia e’ua! Ena o sikɛ̄ nɛ etɛɛrɛ nɛɛ-tɔgɛnu loo a?” Mɛ, Jizɔs bee kɔ nɛ Jairɔs kɔ: “Bɔɔ aa a aa, aba yiyira, e a elu ekpɔā ye.” Lɛɛ a nyɔɔnɛ Jairɔs kiā kii ye be. Sɔ̄ ba e wara loo ye tɔ, Jizɔs muɛ̄ sa dā pya nɛɛ ba gaa to. Jizɔs  kɔ wa nɛ kɔ: “Bui aa tona, nyɔnɛbee a naa u, mɛ a le daa.” Ye tɛ le ye ka bee dap ɛrɛ nyɛŋia loo nu Jizɔs gaa kɔ. Jizɔs bee bara kɔ dɛ̄dɛɛ̄ nɛɛ a aa tɔ. E a su tɛ le ka nwiī a nyima tɔ kɛ̄ lo nwiīgbobia bee le e mā. Jizɔs zuura ye bah lɛɛ kɛ̄ kina kina sa ye kɔ nɛ: “Na nwiīgbobia, m kɔ a nɛ, ‘Aakɛ̄!’” Naa kɛɛrɛ dua ɛɛbu ye tɛ le ye ka ɛrɛ sɔ̄ a aakɛ̄ aba sɔ̄ sa bɔātɛ̄ kiaŋa! Jizɔs elɛra wa sira kɛ̄ bu luh. (Maak 5:22-24, 35-42; Luk 8:49-56) Aā lo dee, sɔ̄ ba muɛ̄ wa nwiīgbobia, ba e nyɛŋiabu nu Jɛhova bee wa doo nɛ tɛ̄maloo Jizɔs. *

¹⁰ Pya Jizɔs bee lɛɛ kɛ̄ bu luh bee sinage kɛ̄ u sɔ̄ a e saa. Mɛ, nu i buū akiiloo pya nɛɛ ama dɔbiī nyɔnɛbee a nɛ i kaāna bɛābu. Jɛhova gbī elɛɛ pya nɛɛ kɛ̄ bu luh, e a edoo nage wo.

11. Ena kpa Eklisiastis 9:5 i tɔgɛ akiiloo Lazarɔs ani?

¹¹ Baibol kɔ siā leere kɔ, “pya a e’ua naa suā lɔgɔ nu.” Kɛ̄ a bee sira loo Lazarɔs doo lo. (Eklisiastis 9:5) Dookɛ̄ Jizɔs bee kɔ doo, a bee le doodoo bee Lazarɔs gaa bee daa. (Jɔn 11:11) Sɔ̄ Lazarɔs bee le bu bana luh, a naa bee suā “lɔgɔ nu.”

12. Ena anua i suā kɔ aakɛ̄ bu luh Lazarɔs bee sira ani?

¹² Sɔ̄ Jizɔs bee lɛɛ Lazarɔs kɛ̄ bu luh, gbɛnɛ-edo  nɛɛ bee muɛ̄. Kunɛ pya baa Jizɔs bee suā kɔ alɛ na a si nyɛŋia tam ama a. Lazarɔs bee le dum, e lo ama tɔgɛ kɔ, bu kaka, lo nyɛŋia tam bee sudɔ. (Jɔn 11:47) Gbaāloo wo, booboo nɛɛ bee ina kpaɛ̄ Lazarɔs, nyɔɔwo a, ba bɔātɛ̄ yiga kɔ Bari bee yerege Jizɔs. Lo ama naa bee nia pya baa Jizɔs, nyɔɔwo ba nɔɔ̄ lo efɛ Jizɔs le Lazarɔs.​—Jɔn 11:53; 12:9-11.

13. Ena anua i dap suā leere kɔ Jɛhova elɛɛ pya a bee u kɛ̄ bu luh a?

¹³ Jizɔs bee kɔ, “dɛ̄dɛɛ̄ pya a le bu li” elu elɛɛ kɛ̄ bu luh. (Jɔn 5:28) Lo ama kura kɔ dɛ̄dɛɛ̄ pya Jɛhova nyɛŋiabu esikɛ̄ le dum. Mɛ, lokwa Jɛhova lɛɛ ziī nɛɛ kɛ̄ bu luh, a ɛrɛ e nyɛŋiabu dɛ̄dɛɛ̄ nu akiiloo lo nɛɛ. Bu kaka, edap ge nyɛŋiabu ni? Kɛādoo, i ɛrɛ gbɛnɛ-edo biliɔn zina a le bunyɔɔ. Baibol kɔ, Jɛhova suā bee ziī ziī ka zina a le. (Buū Aisaia 40:26.) Lo a dap nyɛŋiabu bee ziī ziī ka zina ama, suā leere kɔ ewaɛ ye bah e nyɛŋiabu dɛ̄dɛɛ̄ nu akiiloo pya a gaa le obara sere dum. Lo a kuī gbɛnɛ na bee Jɛhova na a bee dɛm dɛ̄dɛɛ̄ nu a. Nyɔɔwo, i suā kɔ a ɛrɛ ekpo e obara pya nɛɛ sere dum.

14, 15. Ena ue Job i tɔgɛ akiiloo aakɛ̄ bu luh ani?

¹⁴ Gbara a bee ɛrɛ yira akura Job, bee yiga kɔ aakɛ̄ bu luh ele. A bee bip kɔ: “Lo a le ziī nɛɛ u, esigekɛ̄ tɔɔ̄dum ni?” Lɛɛ a kɔ nɛ Jɛhova: “Olo e kue, e mda eture a nɛ. Tam o baɛ bah gaa le taɛ a.” Aiī, Job bee suā kɔ Jɛhova gaa tɔɔ̄baɛ sɔ̄ elɛɛ pya a bee u, kɛ̄ bu luh.​—Job 14:13-15.

¹⁵ Bɛābu aakɛ̄ bu luh, tɔɔ̄ a loo doodoo wa? O dap bip aba ɔɔ kɔ, ‘Pya na butɔ le na gbo ba e’ua e aage kɛ̄ bu luh ni?’ Nɛ i egbɔ̄nyiɛ lo esuā kɔ a  nia Jɛhova kaāna lo e obara pya a bee u sere dum. Doo i ɛp nu Baibol kɔ akiiloo kɛ̄ ba etɔɔ̄ le pya elu elɛɛ kɛ̄ bu luh.

16. Mɛ dua dum na pya nɛɛ elu elɛɛ kɛ̄ bu luh sere a kɛnɛkɛ̄ e’ɛrɛ ani?

¹⁶ Sɔ̄ akii adumɛ a, pya a bee lu elɛɛ kɛ̄ bu luh bee sikɛ̄ gbaaloo pya wa butɔ le wa gbo a kɛnɛkɛ̄. Esira nage doowo li deesī, mɛ, lo elee gbɛnɛ. Ena anua ani? Nyɔnɛbee pya alu e obara sere dum e ɛrɛ dee lo e tɔɔ̄dum ina deedee sa ba naale esinakɛ̄ u. E ba e tɔɔ̄ bu nyɔuwe alu kaāna kee loo lo i tɔɔ̄ bu aniī’ee. Nɔ̄, gbee lok, le dumɛloo naale elena.

17. Ba mɛɛ̄ na elu elɛɛ kɛ̄ bu luh ani?

¹⁷ Mɛɛ̄ na elu elɛɛ kɛ̄ bu luh ani? Jizɔs bee kɔ “dɛ̄dɛɛ̄ pya a le bu li edā ye muɛ̄ sa aabu.” (Jɔn 5:28, 29) E Mumuuna 20:13 kɔ i nɛ kɔ: “E gbɛnɛ pɛnɛ bee nɛ pya a e ua ye bu, e Luh le Hedis bee nɛ pya a e’ua wa bu.” Aiī, gbɛnɛ-edo biliɔn pya nɛɛ esikɛ̄ tɔɔ̄dum. Nɛɛ-lɛɛratam Pɔɔl bee kɔ nage kɔ “pya kaāna dogo le pya pɔrɔ dogo” elu elɛɛ kɛ̄ bu luh. (Buū Doonu pya Nɛɛ-lɛɛratam 24:15.) Ena lo ama kura ani?

18. Ba mɛɛ̄ na “pya kaāna dogo” elu elɛɛ kɛ̄ bu luh ani?

¹⁸ Pya ele yɛɛ “pya kaāna dogo” na pya zooro Jɛhova ba bee tɔɔ̄dum lɛɛ Jizɔs gae lu a kɛnɛkɛ̄. Pya nɛɛ a le doodoo Noa, Abreham, Sera, Mozis, Rut le Ɛsta edap lu elɛɛ wa kɛ̄ bu luh sere a kɛnɛkɛ̄. O dap nage buū nu akiiloo pio pya nɛɛdam le nɛɛwa ama  bu kpa Pya Hibru 11 ekobee. E pya zooro Jɛhova ba u a ilii sɔ̄ ama ni a? Ba lunage “pya kaāna dogo,” nyɔɔwo, elu elɛɛ wa kɛ̄ bu luh.

19. Ba mɛɛ̄ na “pya pɔrɔ dogo” a? Amunu dee na Jɛhova e nɛ wa ani?

¹⁹ Pya ele yɛɛ “pya pɔrɔ dogo” na gbɛnɛ-edo biliɔn pya nɛɛ ba naa bee ɛrɛ dee lo esuā loo Jɛhova.  Kere ba bee u, Jɛhova sii wa ibere. A gaa le lɛɛ wa kɛ̄ bu luh, e ba gaa le ɛrɛ dee lo enɔ nu a ye kiiloo le lo esitam ye nɛ.

20. Ena anua a naale elu elɛɛ dɛ̄dɛɛ̄ nɛɛ kɛ̄ bu luh ani?

²⁰ Ekɔ lo ama kura ge kɔ dɛ̄dɛɛ̄ nɛɛ a bee u elu elɛɛ kɛ̄ bu luh ni? Eeye, Jizɔs bee kɔ pio nɛɛ naale elu e obara sere dum. (Luk 12:5) Mɛɛ̄ na e biaɛfii lo a le ziī nɛɛ elu elɛɛ kɛ̄ bu luh ale a naale elu elɛɛ ani? Nɛɛ a ebiaɛfii na Jɛhova. Mɛ a e nɛa nage ekpo Jizɔs “lo elu nɛɛ biaɛ loo pya ale dum le pya a e’ua.” (Doonu pya Nɛɛ-lɛɛratam 10:42) Ɛrɛgeba nɛɛ alu e biaɛ nua nɛɛ bag dogo sa a naa gbī e kiiya naale elu elɛɛ kɛ̄ bu luh.​—Buū 19 Ue ale dumɛ.

21, 22. (a) Ena aakɛ̄ bu luh kii bunyɔɔ kura ani? (b) Tuatua mɛɛ̄ na a bee lu elɛɛ kɛ̄ bu luh kuma bunyɔɔ ani?

²¹ Baibol kɔnage i nɛ kɔ, pio pya nɛɛ e tɔɔ̄dum li bunyɔɔ. Sɔ̄ alu elɛɛ ziī nɛɛ kɛ̄ bu luh kuma bunyɔɔ, naale eluna e obara ye kɔ a tɔɔ̄dum doodoo nɛɛ a ɛrɛ ekpaloo nɛɛ. Elu elɛɛ ye kɛ̄ bu luh ture bu dum li bunyɔɔ nua nɛɛ ale bu edɔɔ̄.

²² Jizɔs na tuatua nɛɛ a bee lu elɛɛ kɛ̄ bu luh doo wo a. (Jɔn 3:13) Jɛhova bee lɛɛ Jizɔs kɛ̄ bu luh, sɔ̄ taa biradee etɛ̄na aā sɔ̄ a bee lu efɛ ye. (Le-yɔɔ 16:10; Doonu pya Nɛɛ-lɛɛratam 13:34, 35) Naa bee lu elɛɛ Jizɔs kɛ̄ bu luh bu ekpaloo nɛɛ. Nɛɛ-lɛɛratam Pita baatɛ̄ kɔ Jizɔs “bee u bu namloo . . . mɛ a le dum bu edɔɔ̄.” (1 Pita 3:18) Bee lu e obara Jizɔs sere dum doodoo nɛɛ ale bu edɔɔ̄ a ɛrɛ ekpo!  (1 Pya Kɔrint 15:3-6) Mɛ Baibol kɔ a naale elu aba alɛ.

23, 24. Ba mɛɛ̄ na pya “nwī eku naana pee” lo Jizɔs kɔ a, e ba lu ku aba?

²³ Lɛɛ Jizɔs gae u, a bee kɔ nɛ pya awee ye nyɔɔnɛ dumɛ ba bɔloo ture nyiɛ loo kɔ, “M gaa kii wee kwa kɛ̄ i esɛɛ.” (Jɔn 14:2) Lo ama kura kɔ pio pya a ye nyɔɔnɛ dumɛ elu elɛɛ kɛ̄ bu luh kɔ ba a tɔɔ̄dum ye kpaɛ̄ li bunyɔɔ. Ba elu ku aba ni? Jizɔs bee kɔ ba etera buā, a kue wa “nwī eku naana pee.” (Luk 12:32) Nɛɛ-lɛɛrɛtam Jɔn bee kue taɛ wa buā sɔ̄ a muɛ̄ Jizɔs a “le eyira nyɔɔ kpokɛ̄ Zaiɔn [li bunyɔɔ], 144,000 pya nɛɛ bee ye le loo.”​—Mumuuna 14:1.

²⁴ Mɛ sɔ̄ na pya 144,000 pya Nɛɛ Kraist elu elɛɛ kɛ̄ bu luh ani? Baibol kɔ i nɛ kɔ esira sɔ̄ Kraist e bɔātɛ̄ e bɛɛ li bunyɔɔ. (1 Pya Kɔrint 15:23) Taɛ lo sɔ̄ na i le ama, gbɛnɛ-edo pya 144,000 nɛɛ e aara kɛ̄ bu luh ina li bunyɔɔ. Lo aba ba lege a kɛnɛkɛ̄ sa ba u ilii sɔ̄ ama elu elɛɛ wa kɛ̄ bu luh aba lo sɔ̄ ture bu dum li bunyɔɔ. Kerewo, gbɛnɛ-edo pya nɛɛ elu elɛɛ wa kɛ̄ bu luh li deesī sere dum a kɛnɛkɛ̄ bu paradais.

25. Ena i nɔ bu ekobee ue a e nyɔɔnɛ ama ani?

²⁵ Sɔ̄ naale ebinia, Jɛhova gaa le doo kɔ lɔgɔ nɛɛ aa u na. E luh naale elena ina deedee! (Buū Aisaia 25:8.) Mɛ, ena pya a kii bunyɔɔ edoo bie lo kɛ̄ ani? Baibol baatɛ̄ kɔ ba e nyɔɔnɛ Jizɔs bɛɛ bu Buɛ̄-mɛnɛ. Bu lo ekobee ue a e nyɔɔnɛ ama, i gaa le nɔ nu akiiloo lo bɛbɛɛ yere loo.