1. Mɛ kɛ̄ na i dap nɔ nu akiiloo deesī li aā ani?

O E WEE sige ee nu ba tɔgɛ nyɔɔ TV sa o kɔ, ‘Ekɔ nyɔuwe e bee piya eewo ama ni?’ Gbɛnɛ-edo bag dogo le pɔrɔ nu gaa sira. Lo ama doo kɔ pio nɛɛ a yiga kɔ nyɔuwe e saa e ina kuma. Luge kaka doo wo ni? Ɛrɛge kɛ̄ i tɛɛ̄ doo suā nu esira li deesī ni? Aiī. Jɛhova dap kɔ nu esira li deesī, kere miɔŋɔ nɛɛ naa dap. A kɔ i nɛ bu Baibol nu akiiloo i deesī le nu esira loo nyɔuwe.​—Aisaia 46:10; Jemes 4:14.

2, 3. Ena pya a wee nyɔɔnɛ dumɛ Jizɔs bee gbī esuā a, e Jizɔs bee wa ture nɛ doodoo wa?

² Sɔ̄ i buū nu akiiloo kuma nyɔuwe bu Baibol, a naa kura kɔ kɛnɛkɛ̄ ama e ina kuma. A kura kɔ bag dogo na e ina kuma a. Jizɔs bee tɔgɛ pya nɛɛ kɔ Buɛ̄-mɛnɛ Bari gaa le bɛɛ ina a kɛnɛkɛ̄. (Luk 4:43) Pya awee ye nyɔɔnɛ dumɛ bee gbī esuā sɔ̄ Buɛ̄-mɛnɛ Bari elu, e ba bip Jizɔs kɔ: “Mɛ sɔ̄ na pya lo nu ama e le a, e e na a elu edoba o lulu le kuma lo sɔ̄ eku ama ni?” (Matiu 24:3) Jizɔs naa bee kue lɔgɔ biradee wa nɛ. Mɛ, a bee wa kɔ nɛ nu esira sɔ̄ kuma nyɔuwe ama ewara loo kɛ̄. Nu Jizɔs bee kɔ esira gaa dooa anyaawo.

³ Bu ekobee ue ama, i gaa le kɔ ue nyɔɔ nu a tɔgɛ kɔ i tɔɔ̄dum sɔ̄ nyɔuwe esaa e ina kuma. Tuatua, alu ebɛɛ̄ kɔ i suā nu akiiloo nɔ̄ a bee dɔ li bunyɔɔ lokwa  i dap dābeeloo nu anua pɔrɔ nu gaa sira bu nyɔuwe dookɛ̄ i muɛ̄ doo.

4, 5. (a) Ena a bee sira li bunyɔɔ aba sɔ̄ alu esu Jizɔs nua Mɛnɛ ani? (b) Dookɛ̄ Mumuuna 12:12 kɔ doo, ena a sira sɔ̄ alu etop Setan tɛrɛ a kɛnɛkɛ̄ a?

⁴ Bu 8 Ekobee ue bu kpa ama, i bee nɔ kɔ Jizɔs bee lu Mɛnɛ li bunyɔɔ bu zua 1914 a. (Daniel 7:​13, 14) Kpa Mumuuna kɔ nu a bee sira i nɛ. A kɔ: “Nɔ̄ bee dɔ li bunyɔɔ, Maikɛl [lo a le Jizɔs] le pya ye ɛnjɛl bee be nɔ̄ pima lo dragɔn, [lo a le Setan] e dragɔn a le pya ye ɛnjɛl bee be nɔ̄.” * Bee lu ebe eeba Setan le pya ye gbo-yɔ sa alu etop wa tɛrɛ a kɛnɛkɛ̄. Naa kɛɛrɛ dua ɛɛbu pya lo ɛnjɛl bee ɛrɛ a! E pya nɛɛ ale kɛnɛkɛ̄ ni a? Baibol kɔ, alu sɔ̄ miɔŋɔ nɛɛ e mɔna taāŋa. Ena anua a? Pɔrɔ-edɔɔ̄ ɛrɛ gbɛnɛ saŋ, “nyɔnɛbee a suā kɔ ye sɔ̄ lu nwī ekpuru!”​—Mumuuna 12:7, 9, 12.

⁵ Pɔrɔ-edɔɔ̄ gaa nua gbɛnɛ taāŋa a kɛnɛkɛ̄ kuma kɛ̄ a dap doo. A ɛrɛ gbɛnɛ saŋ nyɔnɛbee a suā kɔ sɔ̄ a siga lɛɛ Bari lɛɛ ye lu ekpuru. Doo i pɛtɛ̄ nu Jizɔs bee kɔ esira bu kpɛdumɛ dee.​—Buū 24 Ue ale dumɛ.

6, 7. Ena i dap kɔ kumaloo nɔ̄ le lɛɛraloo anii’ee a?

⁶ Nɔ̄. Jizɔs bee kɔ: “Edonyɔɔ e aakɛ̄ lo edoo edonyɔɔ, e buɛ̄-mɛnɛ loo buɛ̄-mɛnɛ.” (Matiu 24:7)  Gbɛnɛ-edo nɛɛ elua efɛ bu nɔ̄ a ilii dee ama ee pya dɔɔ̄na sɔ̄. Pya a wee kɔ nu a sira bu nyɔuwe akura Worldwatch Institute kɔ, aā bu zua 1914 a, nɔ̄ efɛa nu a eeloo 100 miliɔn nɛɛ. Buā pya alu efɛ bu nɔ̄ bu 100 zua aā bu zua 1900 mmɛ bu zua 2000 lu taa sɔ̄ buā pya alu efɛ bu nɔ̄ bu 1,900 zua akii adumɛ. Naa kɛɛrɛ dua ekiɛ̄nu le tɔga nɔ̄ su nua nyɔɔ pya nɛɛ a!

⁷ Lɛɛraloo. Jizɔs bee kɔ: “Booboo kii” gaa le le. (Matiu 24:7) Kere alu efoh nu anyaawo ee dɛ̄dɛɛ̄ sɔ̄, gbɛnɛ-edo nɛɛ naa ɛrɛ nuede a wa gbɔɛ̄loo. Ena anua ani? Nyɔnɛbee ba naa ɛrɛ kpugi eyaā nuede ale ba naa ɛrɛ kɛnɛkɛ̄ efoh nu nyɔɔ. Nu a eeloo ziī biliɔn pya nɛɛ naa dap ɛrɛ ziī kpugi dɔla bu ziī biradee lo esu tama dum. Bɔŋanaloo a le Bee Nwanaloo Bu Yube Nyɔuwe kɔ, gbɛnɛ-edo miliɔn pya miɔŋɔ gaa u bu ziī ziī zua, nyɔɔbee ba naa ɛrɛ nuede a doo kɔ ba a tɔɔ̄ bu nwanaloo.

8, 9. Ena a tɔgɛ kɔ pya ue Jizɔs bee kɔ sere kɛ̄ akiiloo nyɔŋa kɛnɛkɛ̄ le dumɛloo gaa dooa ani?

 ⁸ Nyɔŋa kɛnɛkɛ̄. Jizɔs bee kɔ sere kɛ̄ kɔ: “Gbɛnɛ nyɔŋa kɛnɛkɛ̄ ele.” (Luk 21:11) Nyɔɔwo, lu e ɛmadɛɛ̄ kɔ gbɛnɛ-edo nyɔŋa kɛnɛkɛ̄ a gbeesī nu gbɛnɛ esira dɛ̄dɛɛ̄ zua. Aā ge bu zua 1900 a, nyɔŋa kɛnɛkɛ̄ efɛa nu a eeloo baɛ miliɔn pya nɛɛ. E kere pya kwanu e yerebah lo e bagara suā kɛ̄ nyɔŋa kɛnɛkɛ̄ gaa le sudɔ, nyɔŋa kɛnɛkɛ̄ gaa fɛ ge booboo nɛɛ.

⁹ Dumɛloo. Jizɔs bee kɔ sere kɛ̄ kɔ: “Bu keekee kɛ̄ . . . pɔrɔ dumɛ nu” ele. Pɔrɔ dumɛ nu wee nwaabah yaara sa fɛ nɛɛ gbɛnɛ. (Luk 21:11) Kere pya dambie enɔā kɛ̄ e boh gbɛnɛ-edo dumɛloo doo, a ɛrɛ pya lo dumɛloo a naa dap lu e boh. Kɛādoo, ziī kpɛa kɔ, bu ziī ziī zua, dumɛloo a le doodoo emɔŋɔ bɛɛ, akɔm le kɔlera gaa fɛ gbɛnɛ-edo miliɔn pya nɛɛ. Naale aba wo, mɛ pya dambie e gbiā 30 aā dumɛloo muɛ̄, e pio ɛɛ naa dap lu e boh.

10. Bu mɛ sīdee na 2 Timɔti 3:1-5 gaa dooa mmɛɛ̄ anii’ee ani?

¹⁰ Bu 2 Timɔti 3:1-5, Baibol kɔ: “Bu kpɛdumɛ dee gbɛnɛ taāŋa gaa le le.” Nɛɛ-lɛɛratam Pɔɔl baatɛ̄ kɛ̄ booboo nɛɛ edoo dogo doo bu kpɛdumɛ dee. A kɔ pya nɛɛ

• e wiibu

• e wereloo kpugi

• e lɛɛbeekɛɛ̄ tɛ le ka

• naale e tɔɔ̄ agɛrɛ

• naale e wereloo pya wa butɔ

• naale e aa wa loo

• e ɛrɛ dum lumiī le gbɛnɛ saŋ

• e wereloo ekpeloo ee wereloo Bari

• e daādaa kɔ ba wereeloo Bari sa naa gbaɛ̄-ye-tɔ̄loo

11. Dookɛ̄ kpa Le-yɔɔ 92:7 kɔ doo, ena a esira loo pya bag dogo ani?

¹¹ Ekɔ gbɛnɛ-edo nɛɛ a le kɛ̄ o tɔɔ̄ doo ge dogo doowo ama ni? Bu yube nyɔuwe, kɛ̄ gbɛnɛ-edo nɛɛ tɔɔ̄dum doolo. Mɛ, Bari esaa e doo dogo kumaloo. A yira yii kɔ: “Kere  pya bag dogo nyim doodoo ebie sa dɛ̄dɛɛ̄ pya doo gbee nyim leere, lu egbee wa lɛɛ [ale, gbee wa sī lɛɛ] ina deedee.”​—Le-yɔɔ 92:7.

12, 13. Ena Jɛhova etɔgɛ i akiiloo kpɛdumɛ dee ani?

¹² Baibol bee kɔ sere kɛ̄ kɔ bu kpɛdumɛ dee, ezialoo le tɔga e mma bu nyɔuwe. Mɛ, Baibol bee kɔ nage kɔ pio le nu esira.

¹³ Dābeeloo Baibol. Nɛɛ mɔmanudɛɛ̄ Daniɛl bee ɛm nu akiiloo kpɛdumɛ dee. A bee kɔ: “Suānu gaa le yiiloo.” (Daniel 12:4) Bari enɛ ekpo pya ye nɛɛ lo e dābeeloo Baibol yere loo ee sɔ̄ akii adumɛ. Jɛhova edoora wo, eenyɔɔ tɔɔ̄ na aāge bu zua 1914 a. Bu edoba, a etɔgɛ i kɛ̄ ye bee le ye ekɛɛrɛ kumaloo kɛnɛkɛ̄ lu gbɛnɛ doo. Gbaā nage loo kaka akiiloo a’agara, kɛ̄tɔɔ̄ pya nɛɛ e ua, le aakɛ̄ bu luh. I enɔā kɔ aba Buɛ̄-mɛnɛ Bari na edap kwa i taāŋa a. I enɔā nage kɛ̄ edoo le bu ɛɛbu le kɛ̄ e tɔɔ̄dum bu sīdee a nia Bari doo. Mɛ, ena pya zooro Bari su suānu ba enɔā daā ani? Dɔɔ̄na mɔmanudɛɛ̄ agara i nɛ.​—Buū 21 le 25 Ue ale dumɛ.

14. Mɛ kɛ̄ na leyere ue akiiloo Buɛ̄-mɛnɛ gaa lu ezue ani, e ba mɛɛ̄ na ba gaa zue a?

¹⁴ Zue ue bu yube nyɔuwe. Sɔ̄ Jizɔs gaa kɔ nu esira bu kpɛdumɛ dee, a bee kɔ: “A elu e zue leyere ue ama lo Buɛ̄-mɛnɛ tɛ̄ma ɛŋɛnɛ dɛ̄dɛɛ̄ nyɔuwe.” (Matiu 24:3, 14) Lo leyere ue Buɛ̄-mɛnɛ gaa lu e zue bu nu a eeloo 230 edonyɔɔ, le bu nu a eeloo 700 muɛ̄ ue. Aiī, bu yube nyɔuwe, Pya Ekeebee Jɛhova ba  aabu dɛ̄dɛɛ̄ “edonyɔɔ le edo” gaa yerebah nɛ pya nɛɛ lo e dābeeloo nu Buɛ̄-mɛnɛ Bari lu le nu a gaa le doo nɛ pya nɛɛ. (Mumuuna 7:9) E ba naa kpɛ wa lɔgɔ nu loo tam ama. Kere gbɛnɛ-edo nɛɛ baa wa loo sa wa tɛ̄ŋaloo, lɔgɔ nu naa dap ɔbɛ tam zue ue, dookɛ̄ Jizɔs bee kɔ doo.​—Luk 21:17.

15. (a) O yiga ge kɔ i le bu kpɛdumɛ dee ni, e ena a nua a? (b) Ena esira loo pya a gbaɛ̄tɔ̄loo Jɛhova le pya a naa gbaɛ̄-ye-tɔ̄loo ani?

¹⁵ O yiga ge kɔ i le bu kpɛdumɛ dee ni? Gbɛnɛ-edo mɔmanudɛɛ̄ Baibol akiiloo kpɛdumɛ dee gaa dooa. Sɔ̄ naale e binia, Jɛhova gaa le biaɛfii lo e ɔbɛ tam zue le yere ue sa “kuma” lu. (Matiu 24:14) Ena lo kuma ani? Ɛɛ na nɔ̄ Amagidɔn, sɔ̄ Bari elɛɛ dɛ̄dɛɛ̄ bee bag dogo. Jɛhova gaa le su Jizɔs le pya ye ɛnjɛl ekpo le loo gbeāsī ɛrɛgeba nɛɛ a naa gbaɛ̄ ye tɔ̄loo le ye saaro. (2 Pya Tɛsalɔnaika 1:6-9) Sɔ̄ lo ama etɛ̄na, Setan le pya gbo-yɔ naale edag na pya nɛɛ. E dɛ̄dɛɛ̄ pya a gbī edoo nu Bari kɔ sa su ye Buɛ̄-mɛnɛ gaa le muɛ̄ sɔ̄ dɛ̄dɛɛ̄ yii Bari e dooa.​—Mumuuna 20:1-3; 21:3-5.

16. Ena alu ebɛɛ̄ kɔ o doo a, sɔ̄ kuma etɔɔ̄na waɛloo ani?

¹⁶ Lo nyɔuwe Setan gaa bɛɛ ama, esaa e’ina kuma. Nyɔɔwo, alu ebɛɛ̄ kɔ i bip aba ii kɔ, ‘Ena a bɔloo kɔ m doo a?’ Jɛhova gbī kɔ o nɔ gbɛnɛ-edo nu aābu Baibol kuma kɛ̄ o dap doo. Lu ebɛɛ̄ kɔ o su o enɔānu nua nu a a kuī loo. (Jɔn 17:3) Pya Ekeebee Jɛhova wee si enɔānu dɛ̄dɛɛ̄ kaɛ, lo e yerebah nɛ pya nɛɛ lokwa ba dābeeloo Baibol. Piiga lo esi pya enɔānu ama dɛ̄dɛɛ̄ kaɛ. (Buū Pya Hibru 10:24, 25.)  Lo o muɛ̄ kɔ alu ebɛɛ̄ kɔ o nyaāna kɛ̄ o tɔɔ̄dum doo, bɔɔ aa a aa lo edoo wo. Lo o doowo, o gbanialoo kiikɛ̄ Jɛhova le e agatɛ̄.​—Jemes 4:8.

17. Ena anua elu nyɛŋia loo gbɛnɛ-edo nɛɛ sɔ̄ kuma elu ani?

¹⁷ Nɛɛ-lɛɛratam Pɔɔl bee kɔ gbeerasī pya bag dogo edooa sɔ̄ gbɛnɛ-edo nɛɛ naa bee ɛmadɛɛ̄, “doodoo lulu nɛɛ biu bu edɛɛ̄.” (1 Pya Tɛsalɔnaika 5:2) Jizɔs bee kɔ gbɛnɛ-edo nɛɛ e ɛp pya nu a tɔgɛ kɔ i le kpɛdumɛ dee tɛrɛ. A bee kɔ: “Dookɛ̄ a bee le doo bu gbo dee Noa, kɛ̄ lulu Nwiī nɛɛ [ale, kpɛdumɛ dee] ele nage doo lo. Nyɔnɛbee dookɛ̄ bu gbo dee ama bee le doo, lɛɛ gbɛnɛ yii maā gae ina, ba gaa bee denu sa ɔ̄ nage, ba gaa bee ii wa sa nɛnage wa dam, mmɛ dee Noa eyira bu fah, e ba naa bee suā mmɛ sɔ̄ gbɛnɛ yii maā elua sa su dɛ̄dɛɛ̄ aba aā, kɛ̄ lulu Nwiī nɛɛ ele nage doolo.”​—Matiu 24:37-39.

18. Amunu zuurabahtɔ̄ na Jizɔs bee nɛ ani?

¹⁸ Jizɔs bee nɛ zuurabahtɔ̄ kɔ, i aa doo kɔ, ‘gbɛnɛ denu le gbɛnɛ ɔ̄ mii le ekɛɛrɛ lo dum ama’ a dabara i ekɛɛrɛ. A bee kɔ, kuma gaa le lu bu bugia “doodoo zaɛ̄.” A bee kɔ nage kɔ, “a e dɔ nyɔɔ dɛ̄dɛɛ̄ pya a tɔɔ̄ bu dɛ̄dɛɛ̄ nyɔuwe.” Lɛɛ a kɔ gbaāloo kɔ: “Nwanaadɛɛ̄ dɛ̄dɛɛ̄ sɔ̄, bara lokwa bui ɛrɛ ekpo lo eteā aāloo dɛ̄dɛɛ̄ pya lo nu a esudɔ ama le lo eyira kɛ̄sī Nwiī nɛɛ.” (Luk 21:34-36) Ena anua alu ebɛɛ̄ lo esu zuurabahtɔ̄ Jizɔs ani? Nyɔnɛbee pɔrɔ nyɔuwe Setan esaa elu egbeesī. Aba pya Jɛhova le Jizɔs su na etɛɛ̄ yee kuma sa tɔɔ̄dum ina deedee bu aā nyɔuwe a.​—Jɔn 3:16; 2 Pita 3:13.