1, 2. (a) Lo o suā bee ziī nɛɛ alu e yere ka loo kaāna, kurage kɔ o e suā ye loo leere ni? Naa kɔ baatɛ̄. (b) Pya nɛɛ kɔ Jizɔs lu mɛ dua nɛɛ ni?

ƐRƐ gbɛnɛ-edo nɛɛ alu e yere ka loo bu nyɔuwe. O dap suā bee ziī nɛɛ alu eyere ka loo gbɛnɛ. Mɛ, aba e suā ye bee, naa kura kɔ o suā ye loo leere. A naa kura kɔ o suā dɛ̄dɛɛ̄ gah loo ye tɔɔ̄dum le taɛ nu a lu.

² O edaba dā nu akiiloo Jizɔs Kraist, kere a bee tɔɔ̄dum a kɛnɛkɛ̄ nu a dap lu 2,000 zua akii adumɛ. Mɛ gbɛnɛ-edo nɛɛ naa suā dua nɛɛ Jizɔs bee lu. Pio nɛɛ kɔ a bee le le nɛɛ, pio nɛɛ kɔ a bee le nɛɛ mɔmanudɛɛ̄, e pya dɔɔ̄na yiga kɔ alɛ na Bari a. Ena olo kɛɛrɛ ani?​—Buū 12 Ue ale dumɛ.

3. Ena anua alu ebɛɛ̄ kɔ o suā loo Jɛhova Bari le Jizɔs Kraist ani?

³ Alu ebɛɛ̄ kɔ o suā taɛ nɛɛ Jizɔs lu. Ena anua ani? Baibol kɔ i nɛ kɔ: “E alɛ ama na dum a naatah a, lokwa ba suāloo olo aba kaka Bari, le Jizɔs Kraist nɛɛ o bee yere.” (Jɔn 17:3) Aiī, lo o suā taɛ nɛɛ Jɛhova le Jizɔs lu, o dap tɔɔ̄dum ina deedee bu paradais a kɛnɛkɛ̄. (Jɔn 14:6) Gbaāloo wo, suā loo Jizɔs e yerebah a nɛ nyɔnɛbee alu gbɛnɛ le edoba bu kɛ̄ e tɔɔ̄dum sa tɔɔ̄ loo pya dɔɔ̄na doo. (Jɔn 13:34, 35) Bu 1 Ekobee ue a le bu kpa ama, i bee nɔ dua nɛɛ Bari lu. Nyaawo, i gaa le nɔ nu Baibol tɔgɛ akiiloo Jizɔs.

4. Ena bee ue “Mɛsaia” le “Kraist” kura ani?

⁴ Jɛhova ebee kɔ sere kɛ̄ bu Baibol gbɛnɛ-edo zua lɛɛ Jizɔs gae mɛā kɔ, a gaa le yeree Mɛsaia, ale Kraist nua. Bee ue “Mɛsaia” lu muɛ̄ ue Hibru, e bee ue “Kraist” lu muɛ̄ ue Grik. Baɛ esobee ama kura kɔ Bari gaa le sagɛ Mɛsaia a bee lu e yira yii loo sa ye nɛ keebee dɔ. Mɛsaia edoo kɔ dɛ̄dɛɛ̄ yii Bari a dooa. Jizɔs dap nage a yerebah nɛ anyaawo. Mɛ, lɛɛ Jizɔs gae mɛā, gbɛnɛ-edo nɛɛ bee bip kɔ, ‘Mɛɛ̄ na elu lo Mɛsaia ani?’

5. Ekɔ pya a wee nyɔɔnɛ dumɛ Jizɔs bee yiga ge kɔ alɛ na Mɛsaia ani?

⁵ Pya a wee nyɔɔnɛ dumɛ Jizɔs bee suā mmɛɛ̄ kɔ alɛ na Mɛsaia a bee lu eyira yii loo a. (Jɔn 1:41) Bu edoba, Saimɔn Pita bee kɔ nɛ Jizɔs kɔ: “Olo na Kraist” a. (Matiu 16:16) I tɛɛ̄ doodoo wa suā mmɛɛ̄ kɔ Jizɔs na Mɛsaia ani?

6. Bu mɛ sīdee na Jɛhova yerebah nɛ pya nɛɛ le beenyiɛ kɔ ba a suā loo Mɛsaia ani?

⁶ Nyɔɔnyɔɔ sɔ̄ lɛɛ Jizɔs gae mɛā, pya nɛɛ mɔmanudɛɛ̄ Bari bee ɛm gbɛnɛkpo ue e yerebah nɛ pya nɛɛ kɔ ba a suā loo lo Mɛsaia. Lo ama e yerebah doodoo wa? Naa kɛɛrɛ kɔ a bee lu ekɔ a nɛ kɔ o si kɛ̄ yii fah nɛɛ mma wee su ziī nɛɛ o sii wee suāloo e nua. Lo alu ekɔ kɛ̄ lo nɛɛ mɛā doo leere a nɛ, o dap ye suā loo. Bu aba sīdee ama, Jɛhova bee su pya ye nɛɛ mɔmanudɛɛ̄ i kɔā nɛ nu Mɛsaia edoo le nu esira ye loo. Dooa gbɔmɛɛ̄ dɛ̄dɛɛ̄ pya mɔmanudɛɛ̄ ama yerebah nɛ pya nɛɛ le beenyiɛ kɔ ba a suā kɔ Jizɔs na lo Mɛsaia a.

7. Baɛ amunu mɔmanudɛɛ̄ na a tɔgɛ kɔ Jizɔs na lo Mɛsaia ani?

 ⁷ Baɛ yɛɛ pya lo mɔmanudɛɛ̄ na ama. Tuatua, 700 zua lɛɛ Jizɔs gae mɛā, Maika bee mɔmanudɛɛ̄ kɔ Mɛsaia e mɛā bu nwīgbagbara buɛ̄ Bɛtlihɛm. (Maika 5:2) E buɛ̄ Jizɔs bee mɛā lo! (Matiu 2:1, 3-9) Eree baɛ, Daniel bee mɔmanudɛɛ̄ kɔ Mɛsaia esira bu zua 29 C.E. (Daniel 9:25) Lo ama lu aba baɛ yɛɛ gbɛnɛ-edo mɔmanudɛɛ̄ a tɔgɛ siā leere kɔ Jizɔs na Mɛsaia a bee lu eyira yii loo a.​—Buū 13 Ue ale dumɛ.

8, 9. Ena a bee sira sɔ̄ Jizɔs gaa liamaā lo a tɔgɛ kɔ alɛ na lo Mɛsaia ani?

⁸ Jɛhova edoora kɔ alu esuā leere kɔ Jizɔs na lo Mɛsaia a. Bari bee yira yii nɛ Jɔn Nɛɛ li maā lo enɛ ye edoba lokwa a suā loo nɛɛ alu Mɛsaia. Sɔ̄ Jizɔs bee pii Jɔn lo e liamaā bu Pɛnɛ Jɔdan bu zua 29 C.E. a, Jɔn bee muɛ̄ lo edoba. Baibol kɔ nu a bee sira i nɛ: “E sɔ̄ elua edoo baptism Jizɔs, aba sɔ̄ a aabu maā, e ɛp bunyɔɔ bee kpaā, e a muɛ̄ edɔɔ̄ Bari a aa bunyɔɔ doodoo bemaākuku, sa ye dɛɛa nyɔɔ; e ɛp, ziī muɛ̄ aa bunyɔɔ sa kɔ, ‘Alɛ ama na mdaa nwiīnɛɛdam a, bu mɛ ɛɛ ye loo.’” (Matiu 3:16, 17) Sɔ̄ Jɔn bee muɛ̄ sa dā edoba nu ama, a bee suā kɔ Jizɔs na Mɛsaia a. (Jɔn 1:32-34) Lo dee, sɔ̄ Jɛhova egara ye edɔɔ̄ ye nyɔɔ, na Jizɔs lu Mɛsaia a. Alɛ  na Bari bee sagɛ nua Nɛɛ zaāsī le Mɛnɛ a.​—Aisaia 55:4.

⁹ Pya mɔmanudɛɛ̄ Baibol, pya ue Jɛhova kɔ, le edoba nu a nɛ sɔ̄ Jizɔs bee liamaā tɔgɛ kɔ Jizɔs na lo Mɛsaia a. Mɛ, mɛ kɛ̄ na Jizɔs aa a, e a bee lu mɛ dua nɛɛ ni? Doo i ɛp nu Baibol kɔ.

10. Ena Baibol tɔgɛ akiiloo dum Jizɔs lɛɛ a gae lu a kɛnɛkɛ̄ a?

¹⁰ Baibol tɔgɛ i kɔ Jizɔs bee tɔɔ̄ li bunyɔɔ nyɔɔnyɔɔ sɔ̄ lɛɛ a gae lu a kɛnɛkɛ̄. Maika bee kɔ Mɛsaia bee le “aā li gbo nama dee.” (Maika 5:2) Gbɛnɛkpo sɔ̄, Jizɔs alɛɛ loo bee kɔ a e bee tɔɔ̄e li bunyɔɔ lɛɛ a gae mɛā a kɛnɛkɛ̄. (Buū Jɔn 3:13; 6:38, 62; 17:4, 5.) Jizɔs bee nyɔɔnɛ Jɛhova ɛrɛ keebee gbanialoo, kere sɔ̄ a sii bee lu a kɛnɛkɛ̄.

11. Ena anua Jizɔs kuī loo Jɛhova ani?

¹¹ Jizɔs kuī loo Jɛhova kaāna. Ena anua a? Nyɔnɛbee Bari bee ye dɛm lɛɛ a gae dɛm dɛ̄dɛɛ̄ nu le ɛrɛgeba dɔɔ̄na nɛɛ. Nyɔɔwo, lu ekue Jizɔs “lo tuatua a bee mɛā bu dɛ̄dɛɛ̄ nu a bee lu edɛm.” * (Pya Kɔlɔsi 1:15) Jizɔs kuī nage loo Jɛhova nyɔnɛbee alɛ na aba Jɛhova bee dɛm a. Ɛɛ na anua alu ekue ye “aba ye nwiīnɛɛdam” a. (Jɔn 3:16) Aba Jizɔs na a bee nyɔɔnɛ Jɛhova dɛm pya dɔɔ̄na nu a. (Pya Kɔlɔsi 1:16) E aba Jizɔs na alu ekue “Bee ue” a, nyɔnɛbee Jɛhova bee ye su kɔā ue sa nɛā zuurabahtɔ̄ pya ɛnjɛl le pya nɛɛ.​—Jɔn 1:14.

12. I tɛɛ̄ doo wa suā kɔ Jizɔs le Bari naale aba ziī nɛɛ?

¹² Pio nɛɛ yiga kɔ Jizɔs le Bari lu aba ziī nɛɛ. Mɛ, a naale nu Baibol tɔgɛ lo. Baibol kɔ a bee lu edɛm Jizɔs, lo akura kɔ Jizɔs ɛrɛ bɔātɛ̄. Mɛ Jɛhova, nɛɛ a bee dɛm dɛ̄dɛɛ̄ nu, naa ɛrɛ bɔātɛ̄. (Le-yɔɔ 90:2)  Doodoo saaro Bari, Jizɔs sii kɛɛrɛ lɔgɔ sɔ̄ kɔ a lue Bari. Baibol tɔgɛ siā kɔ Tɛ a, eenyɔɔ ye Nwiīnɛɛdam. (Buū Jɔn 14:28; 1 Pya Kɔrint 11:3.) Aba Jɛhova na “Bari A-dap-doo-dɛ̄dɛɛ̄-nu” a. (Jɛnɛsis 17:1) Alɛ na a eenyɔɔ dɛ̄dɛɛ̄ nɛɛ a, sa ɛrɛ nage ekpo ee dɛ̄dɛɛ̄ nɛɛ a le bu nyɔuwe a.​—Buū 14 Ue ale dumɛ.

13. Ena anua Baibol kɔ Jizɔs na “bera Bari a naa lu emuɛ̄” ani?

¹³ Jɛhova le ye Saaro Jizɔs, bee gbaa sitam bu gbɛnɛ-edo biliɔn zua lɛɛ a gae bee lu edɛm bunyɔɔ le kɛnɛkɛ̄. Ba bee wereloo ziī gbɛnɛ! (Jɔn 3:35; 14:31) Jizɔs nɔ pya elap dogo ye tɛ kaāna, mmɛ lo dɔ Baibol ye kue “bera Bari a naa lu emuɛ̄.”​—Pya Kɔlɔsi 1:15.

14. Tɛɛ̄ doodoo wa na saaro Jɛhova a ye kuī loo ama mɛā lu nɛɛ ani?

¹⁴ Saaro Jɛhova a ye kuī loo ama, bee kpɛ̄naloo e aa bunyɔɔ sa mɛā a kɛnɛkɛ̄ doodoo nɛɛ. Bu mɛ sīdee na lo ama bee waɛbah a? Bu nyɛŋia sīdee, Jɛhova bee nyaana dum ye Saaro aā bunyɔɔ, yere bu nwī emuā a sii si nɛɛ akura Meri. Bu sīdee ama, Jizɔs naa bee ɛrɛ tɛ a nyɔɔ kɛnɛkɛ̄. Nyɔɔwo, Meri bee maɛ̄ nwiī a mma, sa ye kue Jizɔs.​—⁠Luk 1:​30-35.

15. O dap doodoo wa suā loo Jɛhova leere ni?

¹⁵ O dap nɔ gbɛnɛ-edo nu akiiloo Jizɔs, ye tɔɔ̄dum, le pya ye elap dogo tɛ̄maloo ebuū Kpa Matiu, Maak, Luk le Jɔn. Lu esu pya Kpa ama kure Leyere Ue. Nyɔnɛbee Jizɔs bee ye Tɛ a, pya nu o  buū a ye kiiloo e yerebah lo edoo kɔ o suā loo Jɛhova leere. Ɛɛ na anua Jizɔs bee dap kɔ: “Nɛɛ a emɔna mɛ, emɔna Tɛ a.”​—Jɔn 14:9.

16. Ena Jizɔs bee tɔgɛ a? Mɛ kɛ̄ na tɔgɛnu Jizɔs bee aa ani?

¹⁶ Gbɛnɛ-edo nɛɛ bee su Jizɔs kure “Nɛɛ Tɔgɛnu.” (Jɔn 1:38; 13:13) Ziī gbɛnɛ nu a bee tɔgɛ na “leyere ue Buɛ̄-mɛnɛ.” Ena alu lo Buɛ̄-mɛnɛ ama ani? Ɛɛ na bɛbɛɛ Bari lo ebɛɛ yube nyɔuwe aā bunyɔɔ, sa nua leelee loo pya nɛɛ a gbaɛ̄tɔ̄ loo Bari. (Matiu 4:23) Dɛ̄dɛɛ̄ nu Jizɔs bee tɔgɛ aaba Jɛhova. Jizɔs bee kɔ: “Mdaa tɔgɛnu naale lo mda, mɛ lo nɛɛ a bee mɛ yere.” (Jɔn 7:16) Jizɔs suā kɔ Jɛhova gbī kɔ pya nɛɛ a dā leyere ue kɔ Buɛ̄-mɛnɛ Bari gaa le bɛɛ nyɔuwe.

17. Mɛ kɛ̄ na Jizɔs wee tɔgɛnu a? Ena anua a bee piiga gbɛnɛ lo etɔgɛnu pya dɔɔ̄na ani?

¹⁷ Mɛ kɛ̄ na Jizɔs wee tɔgɛnu bie a? Dɛ̄dɛɛ̄ kɛ̄ a gbī nɛɛ muɛ̄. A wee tɔgɛnu bie dee wii gbaā nage loo gbɛnɛ buɛ̄, nwīesɔgɔ buɛ̄, kɛ̄du, kɛ̄ pya nɛɛ tɔɔ̄ taāŋabah, le bie be pya nɛɛ. A naa bee ɛmadɛɛ̄ kɔ pya nɛɛ alue ye loo. A wee wa pii. (Maak 6:56; Luk 19:​5, 6) Jizɔs bee si e’aga tam sa su gbɛnɛ-edo sɔ̄ le mɛm tɔŋɛnu pya nɛɛ. Ena anua a? Nyɔnɛbee a suā kɔ Bari gbī kɔ a dooe wo le nyɔɔbee a wee doo nu a niā ye Tɛ dɛ̄dɛɛ̄ sɔ̄. (Jɔn 8:28, 29) Jizɔs bee zue nage ue nyɔnɛbee a bee ɛrɛ esaɛ̄ beenyiɛ loo pya nɛɛ. (Buū Matiu 9:35, 36.) A bee muɛ̄ kɔ pya zaāsī yigabari naa gaa bee tɔgɛ kaka akiiloo Bari le ye Buɛ̄-mɛnɛ. Nyɔɔwo, a bee gbī e yerebah nɛ gbɛnɛ-edo nɛɛ kɔ ba a dā leyere ue.

18. Pya amunu elap dogo Jizɔs na a a nia gbɛnɛ a?

 ¹⁸ Jizɔs bee wereloo pya nɛɛ sa wa kuūdɛɛ̄loo. A bee lu fɛgɛ sa lu nɛɛ a waɛ ekɔ ue nɛ. Wee niā kere pya miɔŋɔ lo e le ye kpaɛ̄. (Maak 10:13-16) Jizɔs wee doo le dogo dɛ̄dɛɛ̄ sɔ̄. A wee baaloo ziā le pɔrɔ biaɛ. (Matiu 21:12, 13) Sɔ̄ a bee le a kɛnɛkɛ̄, naa wee lu enɛ dee pya nɛɛwa nyɔɔ gbɛnɛkpo nu sa naa lu enɛ wa enwadɛɛ̄. Mɛ, Jizɔs wee nɛ enwadɛɛ̄ sa yere ka loo pya nɛɛwa. (Jɔn 4:9, 27) Jizɔs bee kuma nage loo kɛ̄ kaāna. Bu edoba, ziī uunɛ, a bee log tɔ pya ye nɛɛ-lɛɛratam, tam pya zooro e bee si.​—Jɔn 13:2-5, 12-17.

19. Amunu edoba na a tɔgɛ kɔ Jizɔs suā taɛ nu a bɛɛ̄ pya nɛɛ a, le kɔ a gbī e yerebah wa nɛ a?

¹⁹ Jizɔs bee suā taɛ nu a bɛɛ̄ pya nɛɛ, sa a bee gbī e yerebah wa nɛ. Lo ama bee sirapie leere sɔ̄ a bee su ekpo Bari ye nɛ boā pya nɛɛ bu nyɛŋia sīdee. (Matiu 14:14) Bu edoba, ziī nɛɛ ebiakpaŋ bee lu loo Jizɔs kɔ: “Lo a le o gaa gbī, o dapge doo kɔ m ɛɛ.” Ezialoo le mɔna taāŋa gbara ama bee tɔaloo Jizɔs. A bee ye ɛrɛ toesaɛ̄ loo sa gbī e yerebah ye nɛ. Nyɔɔwo, Jizɔs niina bah daa loo nɛɛ a, sa ye kɔ nɛ kɔ: “M gaa gbī, loo a a ɛɛ.” E loo gbara loo bee dumɛ a, bee nwaɛ̄! (Maak 1:40-42) O dapge kɛɛrɛ kɛ̄ a bee tɔɔ̄ loo gbara a doo ni?

20, 21. Bu mɛ sīdee na Jizɔs lu edoba a lee eera bu e gbaɛ̄tɔ̄loo Bari ani?

²⁰ Jizɔs na nɛɛ alu edoba a lee eera bu gbaɛ̄tɔ̄loo Bari a. Kaɛlɛɛ nu a sira ale nu pya ye baa ye doo, a  wee doo nu ye tɛ gbī. Bu edoba, Jizɔs naa bee doo pɔrɔ sɔ̄ Setan bee gbī edoā ye ɛp. (Matiu 4:1-11) Pio pya butɔ Jizɔs naa bee yiga kɔ ɛɛ Mɛsaia, e ba kɔ “a naa suā loo ye.” Kerewo, Jizɔs bee kiisī lo esitam Bari. (Maak 3:21) Sɔ̄ pya ye baa bee ye doo bag dogo loo, Jizɔs bee kiisī loe doo nu Bari gbī sa naa gbī edoo wa piya nu loo.​—1 Pita 2:21-23.

²¹ Kere sɔ̄ Jizɔs bee u luh tɔga le ezialoo, a bee kiisī lo edoo nu Jɛhova gbī. (Buū Pya Filipai 2:8.) Naa kɛɛrɛ kɛ̄ a bee egerebu taɛ dee a ua doo. A bee lu e’aa ye, pya ekeebee esah dɛrɛ ye ue kɔ a kɔ Bari gbee. Pya pɔrɔ nɛɛ biaɛ, biaɛ kɔ alu efɛ ye, pya gbo nɛɛ kɛgɛ ye, sa pya nɔ̄ tɔg ye sa ye ka loo te. Sɔ̄ a gaa  u a wiikpā kɔ: “Etaa!” (Jɔn 19:30) Taa biradee sɔ̄ Jizɔs e ua sah, Jɛhova bee ye lɛɛ kɛ̄ bu luh sa ye nɛ ekpaloo edɔɔ̄. (1 Pita 3:18) Sɔ̄ pio kaɛ etɛ̄na, Jizɔs bee obia kii bunyɔɔ, “ɛŋɛtɛ̄ bara bale Bari,” sa tɔɔ̄ baɛ sɔ̄ Bari esu ye nua Mɛnɛ.​—Pya Hibru 10:12, 13.

22. Amunu dee na a i kpaā nɛ anyaawo a, nyɔnɛbee Jizɔs bee doo nu ye Tɛ gbī dɛ̄dɛɛ̄ sɔ̄ a?

²² Nyɔnɛbee Jizɔs wee doo nu ye Tɛ gbī dɛ̄dɛɛ̄ sɔ̄ a, nyaawo, i dap ɛrɛ dee lo e tɔɔ̄dum ina deedee bu paradais a kɛnɛkɛ̄ dookɛ̄ a bee lu ekɛɛrɛ Jɛhova doo. Bu ekobee ue a e nyɔɔnɛ ama, i gaa le kɔ kɛ̄ luh Jizɔs doo kɔ a waɛ i bah lo e tɔɔ̄dum ina deedee doo.