Bari gbī kɔ pya nɛɛ a ɛrɛ ekpeloo bu dum a kɛnɛkɛ̄. Abee dɛm kɛnɛkɛ̄ le dɛ̄dɛɛ̄ nu ale bu nyɔnɛbee a wereloo gānɛɛ̄. Sɔ̄ sɔ̄ naalee binīa, a gaa lee doo dogo loe nɛ pya nɛɛ̄ bu dɛ̄dɛɛ̄ nyɔuwe le kɛ̄tɔɔ̄ li deesī. E agara gānɛɛ lɛɛ bu nu anuā tɔga.—Buū Jeremia 29:11.

Lɔgɔ bɛbɛɛ sii dap lɛɛ dogo lumiī, dumɛloo, ale luh. Mɛ, a ɛrɛ leyere ue ale. Sɔ̄ naale ebinia Bari gaa le su ye bɛbɛɛ sere dɔ bɛbɛɛ miɔŋɔ nɛɛ. Pya nɛɛ ae le kɛɛ̄ ye bɛbɛɛ e ɛrɛ kaānā efɛɛloo le nwanaloo.—Buū Aisaia 25:8; 33:24; Daniel 2:44.

Tɔga e’ina kuma aba sɔ̄ Bari elɛɛ dɛ̄dɛɛ̄ pya pɔrɔ nɛɛ a nyɔɔ kɛnɛkɛ̄. (Zefania 2:3) Mɛ sɔ̄ na lo ama esira ani? Muɛ̄ Ue Bari ebee bagara kɔ sere kɛ̄ kɔ pya kɛ̄tɔɔ̄ ayere bɔɔ i gaa muɛ̄ anii’ee gaa le sira. Pya piya nu agaa sira tɔgɛ kɔ sɔ̄ Bari edoo dogo ewara.—Buū 2 Timɔti 3:1-5.

I nɔ̄ nu akiiloo Bari aābu ye Muɛ̄ Ue, Kpa Baibol le doodoo lɛta i wereloo tɛ i ɛ̄m ma. A kɔ inɛ kɛ̄ i ɛrɛ le sīdee tɔɔ̄dum anyaawo, le sīdee kɛ̄ i ɛrɛ dum anaa tah akɛnɛkɛ̄ li deesī doo. Bu kaka, naalee nia pio nɛɛ kɔ a gaa lue yerebah anɛ loe dābee loo Baibol. Mɛ, naalee epeere yii Bari eyira kumaloo le kɛ̄tɔɔ̄ li mmsī, nyɔwo ii ɛrɛ e lɛɛ baloo lɔgɔ nɛɛ̄ kɔ a ɔbɛ i lɛɛloo nɔ̄ nu akiiloo Bari.—Buū Kam 29:25; Mumuuna 14:6, 7.