Lo kaka Bari na Nɛɛ̄ abee dɛm dɛ̄dɛɛ̄ nu a. A naa ɛrɛ buātɛ̄ ea naa lee ɛrɛ kuma (Le-yɔɔ 90:2) Alɛ na leyere ue ale bu Baibol aaba a. (1 Timɔti 1:11) kuma sɔ̄ Bari na ai nɛ dum a, aba alɛ na i taāŋaba a.—Buū Mumuuna 4:11.

Lɔgɔ nɛɛ̄ sii muɛ̄ Bari nyɔnɛbee alu edɔɔ̄, lo akura kɔ a kii nyɔɔ ee ɛrɛgeba nu abee lu edɛm a kɛnɛkɛ̄. (Jɔn 1:18; 4:24) Kerewo, i dap suā dua nɛɛ̄ Bari lu aāloo pya nu abee dɛm. Bu edoba, keekee bee te le, flawa doo kɔ i suā kɔ awere-i-loo sa suānu. Kɛ̄ nyɔuwe kuī doo siā ye ekpo.—Buū Pya Rom 1:20.

I dap nage nɔ̄ pya elap Bari yere loo tɛ̄maloo ebuū Baibol. Bu edoba, akɔ inɛ nu a nia Bari le nu a naa nia ye, sīdee a aara pya nɛɛ le kɛ̄ adoo dogo kiiloo kera kera kɛ̄tɔɔ̄ doo.—Buū Le-yɔɔ 103:7-10.

Jizɔs bee kɔ: “Ilii tɛ ale li bunyɔɔ doolo o bee le kaɛ.” (Matiu 6:9) Kere aadoo Bari ɛrɛ gbɛnɛ-edo esobee, a ɛrɛ aba ziī bee. Bu ziī ziī muɛ̄ ue alu e kue bu keekee sīdee. Bu Khana alu ekue “Jɛhova.”—Buū Le-yɔɔ 83:18.

Bee Bari elua elɛɛ bu gbɛnɛ-edo Baibol, sa su pya esobee ale doodoo Nɛɛ-ai-ɛrɛ ale Bari sere ye dɔ. Mɛ sɔ̄ Baibol bee lu e ɛ̄m, bee Bari bee sira bu, nu aluge 7,000 sɔ̄. Jizɔs bee doo kɔ bee Bari alu esuā sɔ̄ abee tɔgɛ̄ nu a kiiloo Bari pya nɛɛ.—Buū Jɔn 17:26.

Ekɔ bee pya nɛɛ̄ gaa tɔga gbɛnɛ a, kura ge kɔ Jɛhova lu Bari anaa kuū-i-dɛɛ̄ loo ni? Pio nɛɛ̄ kɔ adoo kɔ i tɔga loe doā-i-ɛp, mɛ lo ama naa lu kaka.—Buū Jemes 1:13.

Bari yere i ka loo bu elɛɛ i baloo kɔ i sah nu i doo. Ekɔ anaa nia i kɔ Bari nɛ i dee kɔ i sagɛ loe taaŋa-ye-bah ni? (Joshua 24:15) Mɛ, gbɛnɛ-edo nɛɛ sagɛ loe doo piya nu pima pya dɔɔ̄na, nyɔwo tɔga mma kɛ̄. A bɛā Jɛhova loe muɛ pɔ̄rɔ biaɛ̄.—Buū Jɛnɛsis 6:5, 6.

Jɛhova lu Bari ai kuūdɛɛ̄ loo. A gbī kɔ i ɛrɛ ekpeloo dum. Sɔ̄ naalee biniā a gaa le lɛɛ tɔga le pya aye nua. Mɛ nyawo, a ɛrɛ kaānā nu anuā alɛɛ baloo tɔga kɔ ale bu nwīkere sɔ̄. Bu lo 8 nuenɔ̄, i suā nu a nuā.—Buū 2 Pita 2:9; 3:7, 13.

Jɛhova kue i kɔ i tɔɔ̄ e ye waɛloo tɛ̄maloo e kɔ ue ye nɛ bu kara. A ɛrɛ taɛ bu ziī ziī ii. (Le-yɔɔ 65:2; 145:18) A kpɛnaloo e aaloo i tɛɛ̄ ekwɔ. A yere nukuādɛɛ̄ loo kɛ̄ i piiga loe doo nu a ye nīa doo, kere aadoo i tɛɛ̄ ekwɔ pio sɔ̄. Nyɔwo, kaɛlɛɛ kɔ ii mma, bu kaka i dap ɛrɛ kaānā le gbanialoo kiikɛ̄ Bari le.—Buū Le-yɔɔ 103:12-14; Jemes 4:8.

Kuma sɔ̄ Jɛhova bee inɛ dum a, i ɛrɛ e were-ye-loo ee ɛrɛgeba dɔɔ̄na nɛɛ̄. (Maak 12:30) Sɔ̄ o tɔgɛ wereloo loo Bari tɛ̄maloo enɔ̄ gbɛnɛkpo pya nu aye kiiloo, sa doo nu a kɔ, o tɔɔ̄ ye waɛloo kaānā.—Buū 1 Timɔti 2:4; 1 Jɔn 5:3.