NUENƆ 7
Ena Akura Buɛ̄-mɛnɛ Bari Ani?
1. Ena akura Buɛ̄-mɛnɛ Bari ani?
Ena anua Jizɔs lu mɛnɛ abɔloo ani?—MAAK 1:40-42.
Buɛ̄-mɛnɛ Bari na bɛbɛɛ ale li bunyɔɔ. Ae sudɔ dɛ̄dɛɛ̄ dɔɔ̄na bɛbɛɛ sa edoo kɔ ekɛɛrɛ Bari adooa li bunyɔɔ le nyɔɔ kɛnɛkɛ̄. Yere ue akiiloo Buɛ̄-mɛnɛ Bari lee. Sɔ̄ sɔ̄ naalee binia, Buɛ̄-mɛnɛ Bari gaa le mmɛnɛ taɛ miɔ̄ŋɔ nɛɛ̄ loe ɛrɛ le bɛbɛɛ. A gaa le su dɛ̄dɛɛ̄ nɛɛ̄ a tɔɔ̄dum a kɛnɛkɛ̄ gbaloo ziī.
Buɛ̄-mɛnɛ ɛrɛ e’ɛrɛ ye mɛnɛ-buɛ̄. Jɛhova bee tubo baloo ye Saaro, Jizɔs Kraist, kɔ alu mɛnɛ ye Buɛ̄-mɛnɛ.
2. Ena anua Jizɔs lu Mɛnɛ abɔloo ani?
Saaro Bari lu Mɛnɛ abɔloo, nyɔnɛbee alu fɛgɛ sa tɔɔ̄ agara loe doo nu a lee. (Jɔn 1:14) Gbaāloo wo, a ɛrɛ ekpo adap yerebah nɛ pya nɛɛ̄, nyɔnɛbee ae bɛɛ bee nyɔuwe aā bunyɔɔ̄. Sɔ̄ ae bee lu elɛɛ ye kɛ̄ bu luh, abee kii bunyɔɔ̄ sa ɛŋɛtɛ̄ bara bale Jɛhova ye tɔɔ̄baɛ. (Pya Hibru 10:12, 13) Bu ye kpɛdumɛ̄, Bari bee ye nɛ ekpo kɔ a buātɛ̄ e bɛɛ.
3. Ba mɛɛ̄ na ba enyɔnɛ Jizɔs bɛɛ ani?
Pya eku alu ekue “pya kaɛ” gaa le nyɔnɛ Jizɔs bɛɛ li bunyɔɔ. (Daniel 7:27) Tua tua pya kaɛ abee lu esagɛ na pya nɛɛ̄ lɛɛratam Jizɔs ba bɔloo eture nyiɛ loo. Jɛhova gaa kiige sī loe sagɛ pya nɛɛ̄dam le nɛɛ̄wa ba bɔloo eture nyiɛ loo nua pya kaɛ mmɛ nyawo. Doodoo Jizɔs, lu elɛɛ wa kɛ̄ bu luh bu ekpaloo edɔɔ̄.
Ku nɛɛ̄ na ekii bunyɔɔ ani? Jizɔs bee wa kue “nwīeku naana pee.” (Luk 12:32) Dɛ̄dɛɛ̄ wa buā elu 144,000. Ba e nyɔnɛ Jizɔs bɛɛ bee nyɔuwe.
4. Ena abee sira sɔ̄ Jizɔs bee bɔātɛ̄ e bɛɛ ani?
Buɛ̄-mɛnɛ Bari bee bɔātɛ̄ ebɛɛ abu zua 1914. * Tua nu Jizɔs bee doo sɔ̄ elua mɛnɛ na top Setan le pya ye gbo yɔ tɛrɛ a kɛnɛkɛ̄. Setan bee ɛrɛ gbɛnɛ saŋ sa yere taāŋa bu yube nyɔuwe. (Mumuuna 12:7-10, 12) Aā lo sɔ̄ taāŋa miɔ̄ŋɔ nɛɛ̄ sikɛ̄ agɛrɛba nyim. Nɔ̄, kii, dumɛloo, le nyɔŋa kɛnɛkɛ̄, dɛ̄dɛɛ̄ nu ama gbaa lu “edoba” a tɔgɛ kɔ Buɛ̄-mɛnɛ Bari esaa ebɛɛ nyɔuwe.
5. Ena Buɛ̄-mɛnɛ Bari edoo gbɔmɛɛ̄ ani?
Tɛmaloo tam zue ue bu yube nyɔuwe, Buɛ̄-mɛnɛ Bari gaa bɔŋɛnɛloo gbɛnɛ eku nɛɛ̄ aābu dɛ̄dɛɛ̄ edonyɔɔ. Gbɛnɛkpo miliɔn pya a kuma nyiɛ kɛ̄ gaa su wa loo sere kɛɛ̄ Jizɔs nua wa mɛnɛ. Buɛ̄-mɛnɛ Bari e baɛ wa loo sɔ̄ e gbeesī lo pɔrɔ sɔ̄ eku nyɔuwe ama. Nyɔwo, dɛ̄dɛɛ̄ pya a gbī e’ɛrɛ bere aāloo Buɛ̄-mɛnɛ Bari a nɔ̄ loe gbaɛtɔ̄ bu etɔɔ̄ kɛɛ̄ Jizɔs.
Bu 1,000 zua, lo Buɛ̄-mɛnɛ gaa le doo mmɛɛ nu abee lu ekɛɛrɛ Bari aā bɔātɛ̄ kumaloo pya nɛɛ̄. Yube kɛnɛkɛ̄ elu paradais. Bu ye kpɛdumɛ̄, Jizɔs e obara Buɛ̄-mɛnɛ a, nɛ ye Tɛ. (1 Pya Kɔrint 15:24-26) O suā ge loo ziī nɛɛ̄ enia a kɔ o nyɔnɛ kɔnia nu akiiloo Buɛ̄-mɛnɛ Bari ni?
^ bar. 6 Lo edā mmɛɛ sīdee mɔ̄manudɛɛ̄ Baibol bee kɔ ue kumaloo zua 1914, ɛp 215-218 naɛsī loo kpa akura What Does the Bible Really Teach?
