Sɔ̄ Jizɔs bee lu ina Bɛtani awaɛ kpaɛ̄ buɛ̄ Jerusalem, Lazarus ye gbo ebee u loo nia biradee. Jizɔs bee kii kɛ̄ ba bee ye li gbaāloo Mata le Meri, ba lu wuga gbobia nɛɛ̄ a ua a. Sɔ̄ naa binia, gbɛnɛ-edo nɛɛ̄ bee bɔ̄ŋia akɛā. O dap ge kɛɛrɛ dua ɛɛ̄ŋa Mata le Meri ɛrɛ sɔ̄ Jisus lɛɛ Lazarus kɛ̄ bu luh ni?—Buū Jɔn 11:21-24, 38-44.

Mata ebee suā leyere ue kiiloo pya ae ua. Abee suā kɔ Jɛhova gaa le lɛɛ pya ae ua kɛ̄ bu luh sere dum a kɛnɛkɛ̄.—Buū Job 14:14, 15.

Bee lu edɛm nɛɛ̄ aāloo esaā. (Jɛnɛsis 2:7; 3:19) Ii lu edɔɔ̄ a tɔɔ̄dum bu namloo nɛɛ̄. Lu edɛm i bu namloo, nyɔwo, lɔgɔ kɛ̄ ai le loo naa sinakɛ̄ tɔɔ̄dum. Sɔ̄ i u, i puī u nage, e i ekɛɛrɛ pe. Nyɔwo, Lazarus naa bee kɔ lɔgɔ nu aye sira loo sɔ̄ abee u, nyɔnɛbee pya ae ua naa suā na lɔgɔ nu.—Buū Le-yɔɔ 146:4; Eklisiastis 9:5, 6, 10.

Ekɔ Bari wee tɔg ge nɛɛ̄ bu bānā miā sɔ̄ ba e’ua ni? Kuma sɔ̄ Kpa Baibol tɔgɛ kɔ pya ae ua naa suā na lɔgɔ nu a, bānā miā lu esah tɔgɛnu a gbee bee Bari. Ekɛɛrɛ tɔg nɛɛ̄ bu miā lu ye saāŋa loo.—Buū Jeremia 7:31.

Pya ae ua naa dap na kɔ ue ale dānu. (Le-yɔɔ 115:17) Mɛ pio pya ɛnjɛl lu bag, sa dap kɔ ue nɛ pya nɛɛ̄ sa daādaā sere loo doodoo pya nɛɛ̄ abee u. (2 Pita 2:4) Jɛhova yere lok loo nyɔnɛ pya ae ua kɔnia ue.—Buū Deuteronomi 18:10, 11.

Gbɛnɛ-edo miliɔn pya ae ua gaa le aakɛ̄ bu bānā luh sa sikɛ̄ tɔɔ̄dum a kɛnɛkɛ̄. Kere kunɛ̄ pya ba naa bee suā loo Bari le pya ba bee doo pɔrɔ-pɔrɔ nu gaa le lu elɛɛ kɛ̄ bu luh.—Buū Luk 23:43; Doonu 24:15.

Pya alu elɛɛ kɛ̄ bu luh dap nɔ̄ kaka akiiloo Bari sa tɔgɛ yira bu Jizɔs tɛmaloo e gbaɛ̄-ye-tɔ̄loo. (Mumuuna 20:11-13) Pya a obia sikɛ̄ le dum sa doo nu alee edap ɛrɛ ekpeloo bu e tɔɔ̄dum a kɛnɛkɛ̄ mmɛ deedee.—Buū Jɔn 5:28, 29.

Bari bee doo kɔ bɛābu ale nɛ pya ae ua tɛmaloo eyere ye Saaro kɔ a u i bee.  Nyɔwo, aakɛ̄ bu luh tɔgɛ i kɔ Jɛhova ɛrɛ wereloo le ewonu. Sɔ̄ pya ae ua esikɛ̄ le dum, taɛ̄ mɛɛ̄ na o gbī e muɛ̄ ani?—Buū Jɔn 3:16; Pya Rom 6:23.