Pɔrɔ bee bɔātɛ̄ a kɛnɛkɛ̄ sɔ̄ Setan bee kɔ lo tua esah. Tua sɔ̄ Setan bee le ɛnjɛl a mmana, mɛ “anaa bee yira agɛrɛ bu kaka.” (Jɔn 8:44) Abee ɛrɛ taɛ loe su taāŋaba akuu aba Bari. Setan bee kɔ esah nɛ lo tuatua nɛɛ̄nɛɛ̄wa, akura Iv, sa ye zū kɔ a gbaɛ̄-ye-tɔ̄loo taā a gbaɛ̄tɔ̄loo Bari. Adam bee nyɔnɛ Iv lɛɛbeekɛɛ̄ Bari. Biaɛfii Adam bee nua tɔga le luh.—Buū Jɛnɛsis 3:1-6, 19.

Sɔ̄ Setan bee kɔ Iv a lɛɛbeekɛɛ̄ Bari, abee buātɛ̄ e bebe loo bɛbɛɛ Bari, ale ye dɔ doodoo Nɛɛ̄-a-eenyɔɔ dɛ̄dɛɛ̄ nu. Gbɛnɛ-edo miɔ̄ŋɔ nɛɛ̄ gbaaloo Setan loe kiī Bari doodoo nɛɛ̄ awa bɛɛ. Nyɔwo, Setan elua “nɛɛ̄ abɛɛ nyɔuwee,”NW.—Buū Jɔn 14:30; 1 Jɔn 5:19.

Dɛ̄dɛɛ̄ tam Bari mmana. Miɔ̄ŋɔ nɛɛ̄ le pya ɛnjɛl Bari bee dɛm ebee dap gbaɛ̄tɔ̄loo Bari mmɛnɛ. (Deuteronomi 32:4, 5) Bari bee i dɛm kɔ i ɛrɛ i loo loe sagɛ lo i doo le ale pɔrɔ. Lo ɛrɛ i loo ama nɛ i dee loe tɔgɛ i wereloo loo Bari siā.—Buū Jemes 1:13-15; 1 Jɔn 5:3.

Aā sɔ̄ lɛɛbeekɛɛ̄ a, Jɛhova elɛɛra baloo kɔ alu e lɛɛbeekɛɛ̄ ye bɛbɛɛ bu ziī nwīkere sɔ̄. Ena anua ani? Lo etɔgɛ kɔ lɔgɔ epiaga loe bɛɛ lo Bari naa yerebah bu naa dɔbiī nɛ pya nɛɛ̄. (Eklisiatis 7:29; 8:9) Nyawo, sɔ̄ 6,000 zua etɛna aa sɔ̄ abee lu edɛm nɛɛ̄ a, ue ama  esira leere. Miɔ̄ŋɔ nɛɛ̄ ba bɛɛ naa dap lɛɛ nɔ̄, bag dogo, pɔrɔ biaɛ, ale dumɛloo.—Buū Jeremia 10:23; Pya Rom 9:17.

Bu kiiya sī loo bɛbɛɛ nɛɛ̄, bɛbɛɛ Bari gaa dɔbiī nɛ pya aye su. (Aisaia 48:17, 18) Sɔ̄ naale ebinia, Jɛhova esu kuma nua loo dɛ̄dɛɛ̄ bɛbɛɛ nwiīnɛɛ̄. Aba pya a sagɛ kɔ Bari a bɛɛ wa na ba etɔɔ̄ bu nyɔuwe a.—Aisaia 11:9.—Buū Daniel 2:44.

Setan bee āmkɛ̄ kɔ miɔ̄ŋɔ nɛɛ̄ taāŋaba Jɛhova nyɔɔ aba nu ba e’ɛrɛ. Enia age loe āmanā lo esah ni? O dap! Egerebu Bari nɛ dee dɛ̄dɛɛ̄ ii kɔ i tɔgɛ lo ale bɛbɛɛ Bari nia i, ale bɛbɛɛ nɛɛ̄. Kɛ̄ i tɔɔ̄dum doo na atɔgɛ lo i sagɛ a.—Buū Job 1:8-12; Kam 27:11.

I dap sagɛ Bari nua mɛnɛ ai Bɛɛ tɛ̄maloo enɔ̄ nu aye akiiloo sa sudɔ bu kaka taāŋaba adɛɛa nyɔɔ Muɛ̄ Ue Bari, lo ale Baibol. (Jɔn 4:23) I dap āmanā kɔ Setan aa i bɛɛ tɛ̄maloo e kpoora loo lɛɛ loo bira bɛbɛɛ le benɔ̄, dookɛ̄ Jizɔs bee doo.—Buū Jɔn 17:14.

Setan su ye ekpo nyimɛ dogo kunagā le pya dogo a gbee nɛɛ̄ abee kɔ alee. Sɔ̄ i āmanā dua dogo ama, pio pya i gbo le pya i mana mana dap i kɛgɛ ale ba e gbana-isī. (1 Pita 4:3, 4) Nyɔwo, i ɛrɛ esagɛ nu i doo. I suge loo gbaloo pya a wereloo Bari ni? I gbaɛ̄-ge-tɔ̄loo ye lok suānu le wereloo le loo ni? Lo ale i doowo, i tɔgɛ siā kɔ alu esah, sɔ̄ abee amkɛ̄ kɔ lɔgɔ nɛɛ̄ naale edap doo nu Bari kɔ sɔ̄ ale bu taāŋa.—Buū 1 Pya Kɔrint 6:9, 10; 15:33.

Wereloo Bari ɛrɛ loo miɔ̄ŋɔ nɛɛ̄ nɛ i eaga nyiɛ kɔ pɔrɔ le tɔga e’ina kuma. Pya a tɔgɛ siā kɔ ba yira e lo ama e’ɛrɛ ekpeloo bu tɔɔ̄dum ina deedee a kɛnɛkɛ̄.—Buū Jɔn 3:16.