NUENƆ 9
o butɔ etɛɛ̄ doodoo wa le bu ɛɛbu ni?
1. Ena anua iya dam le wa lu gbɛnɛ loe doo kɔ butɔ ale bu ɛɛbu ani?
Leyere ue aaba Jɛhova, Bari ɛɛbu, loa gbī kɔ dɛ̄dɛɛ̄ butɔ ale bu ɛɛbu. (1 Timɔti 1:11) Alɛ na abee bɔātɛ̄ iya dam le wa a. Iya dam le wa lo lok yere kpotɛ̄ lu ebɛɛ̄ lokwa butɔ le bu ɛɛbu. Nyɔnɛbee alu kpega bu kpɔā gbomiɔ̄ŋɔ. Pya nɛɛ̄Kraist e ɛrɛ enwadɛɛ̄ sa yere wa iya dam le wa bu kpa lok wa naɛsī.
Bari ɛmadɛɛ̄ iya dam le wa doodoo wa? A gbī kɔ alu biakɛ̄ gbaaloo yɛɛ ziī nɛɛ̄dam le ziī nɛɛ̄wa. Jɛhova gbī kɔ dam le wa a tɔɔ̄nɛ̄ ziī. (Pya Hibru 13:4) A baaloo kiī wa ale dam. (Malaki 2:16) Mɛ, alɛɛ baloo pya Nɛɛ̄Kraist kɔ ba dap kiī dam ale wa sa sīkɛ iya lo ale dam ale wa kunagā.
2. Dam le wa ekɔ ue sa doo dogo kumaloo ziī, doodoo wa ni?
Jɛhova bee dɛm nɛɛ̄dam le nɛɛ̄wa loe mmɛnɛ ziī doodoo dam le wa. (Jɛnɛsis 2:18) Doodoo nɛɛ̄bee butɔ, dam a su zaāsī loe nɛ nu bu namloo pya ye butɔ le bu tɔgɛ wa nu akiiloo Bari. A ɛrɛ esu loo wɔma zɔɔ bu e wereloo ye wa. Dam le wa ɛrɛ e wereloo sa nɛ enwādɛɛ̄ ziī. Kuma sɔ̄ dɛ̄dɛɛ̄ dam le wa naa mmana a, lu gbɛnɛ kɔ ba a aaloo pɔrɔ nɛ ziī lokwa wa iya dam le wa le bu ɛɛbu.
3. Bɔgeloo kɔ o aa yeloo lo ale bui iya dam le wa naale bu ɛɛbu ni?
Lo ale taāŋa yii bu bui iya dam le wa, baɛ bui a piiga loe aara ziī bu wereloo. (1 Pya Kɔrint 13:4, 5) Muɛ̄ Ue Bari naa yere kpotɛ̄ kɔ alu e aaloo ziī nua sīdee e kwaā taāŋa awee sira bu iya dam le wa.
4. Gbomiɔ̄ŋɔ, ena alu ekɛɛrɛ Bari i kumaloo ani?
Jɛhova gbī kɔ bui le bu ɛɛbu. Anɛ a zuurabahtɔ̄ alee eera kii loo kɛ̄ o ɛrɛ ɛɛbu bu o dee zuguru doo. A gbī kɔ o ɛrɛ biī aāloo suānu le nu abee sira loo o tɛ le o ka. (Pya Kɔlɔsi 3:20) Jɛhova gbīnage kɔ o ɛrɛ ɛɛbu lo edoo nu Nɛɛ̄- dɛm nu le ye Saaro kɔ.
5. Pya tɛ le ka, ena abɛɛ̄ bui miɔ̄ŋɔ lokwa ba dap tɔɔ̄ bu ɛɛbu ani?
O ɛrɛ esi tam bu eagaba loe nɛ nuede, bɛloo, le tɔ pya o miɔ̄ŋɔ. (1 Timɔti 5:8) Mɛ, lokwa pya o miɔ̄ŋɔ le bu ɛɛbu, lunage ebɛɛ̄ kɔ o tɔgɛ wa kɔ ba a wereloo Bari sa nɔ̄nu ye aāba. (Pya Ɛfɛsɔs 6:4) O edoba bu tɔgɛ wereloo loo Bari dap bie gbɛnɛ pah bu benyiɛ pya o miɔ̄ŋɔ. Sɔ̄ o zuurabahtɔ̄ dɛɛa nyɔɔ Muɛ̄ Ue Bari edap kwa ekɛɛrɛ pya o miɔ̄ŋɔ leere.
Wee dɔbiī nɛ gbomiɔ̄ŋɔ sɔ̄ o wa yere mɛmloo sa wa kaɛgɛ. Ba gbīnage leredee bah le kā-kāmɛ̄nɛ̄. Kpɔā wa doowo e baɛ wa loo lɛɛloo dogo adap doo kɔ ba aa ɛrɛ ɛɛbu. (Kam 22:15) Kerewo, kā-kāmɛ̄nɛ̄ aalu edoo bu e bɛaloo le bag.
Pya Ekeebee Jɛhova e’ɛma gbɛnɛkpo kpa loe yerebah nɛ taɛtaɛ pya tɛ le ka, le gbomiɔ̄ŋɔ. Pya kpa ama dɛɛa nyɔɔ Kpa Baibol.
You May Also Like
O BUTƆ DAP TƆƆ̄ BU ƐƐBU
Doo Nu Bari Kɔ Lokwa O Iya Dam Le Wa Le BU Ɛɛbu
Su baɛ ewɛpba ebip daānu dap a yerebah nɛ loe nyimɛ o iya dam le wa.
O BUTƆ DAP TƆƆ̄ BU ƐƐBU
Kɛ̄ E Kwa Taaŋa Doo
Lo bui aa baloo bu sīdee alee bui iya dam le wa e agaloo sa le bu ɛɛbu, mɛ lo anaale wo ele bu e’ɔaloo le biira bu.
