NUENƆ 10
O Tɛɛ̄ Doodoo Wa Suā Loo Kaka Taāŋaba Ni?
1. Ekɔ aba ziī kaka sīdee taāŋaba ale ni?
“Suaā loo i loo pya zue ue esah.”
Aba ziī kaka sīdee taāŋaba na Jizɔs bee tɔgɛ pya awee ye nyɔnɛ dumɛ a. Ale doodoo dee ature nɛɛ̄ mmɛ loo dum anaatah. Jizɔs bee kɔ pya a gbī lo dee: “Muɛ̄ lu nwīepoo.” (Matiu 7:14) Bari wee su aba taāŋaba a dɛɛa nyɔɔ ye Muɛ̄ Ue alu kaka. Dɛ̄dɛɛ̄ pya a taāŋaba bu kaka sīdee gbaa ɛrɛ aba yira.
2. Ena Jizɔs bee kɔ akiiloo pya anaale pya kaka Nɛɛ̄Kraist ani?
“Ba gaa kɔ siā kɔ ba sua e loo Bari, mɛ ba ānā ye bu dɛ̄dɛɛ̄ wa tam.”
Jizɔs bee zuurabahtɔ kɔ pya mɔmanudɛɛ̄ esah egbee pya sīdee taāŋaba ba kɔ ba nyɔnɛɛ̄ dumɛ Kraist. Lo o aadee wa ɛp, ba bee pya a taāŋaba bu kaka sīdee. Pya wa tɔbari kɔ ba lue pya Nɛɛ̄Kraist. Mɛ o dap suā taɛ nu pya nɛɛ̄ ama lu. Bu mɛ sīdee? Aba kaānā taāŋaba na awee doo kɔ pya nɛɛ̄ alu kaka Nɛɛ̄Kraist sa wa dogo le tɔɔ̄dum lee a.
3. O tɛɛ̄ doodoo wa suā loo pya a taāŋaba bu kaka sīdee ni?
Naa kɛɛrɛ o’oo nu o tɛ̄maloo wa suā loo ama:
-
Pya a taāŋaba Bari bu kaka sīdee nwādɛɛ̄ Kpa Baibol sa ye su nuā Muɛ̄ Ue Bari. Ba piiga loe edoo nu awa gbī bah. Nyɔwo, kaka sīdee taāŋaba lu kee loo taāŋaba a dɛɛa nyɔɔ ekɛɛrɛ nɛɛ̄. (Matiu 15:7-9) Pya a taāŋaba Bari bu kaka sīdee naa zue ziī nu sa ba doo lo dɔɔ̄na.
—Buū Jɔn 17:17; 2 Timɔti 3:16, 17. -
Pya kaka Nɛɛ̄Kraist nɛ enwādɛɛ̄ bee Bari, akura Jɛhova. Jizɔs bee nɛka bee Bari tɛ̄maloo ekɔ ye siā. Abee yerebah nɛ pya nɛɛ̄ kɔ ba asuā loo Bari sa wa tɔgɛ kɔ ba a yere kara kɔ bee Bari ale kaɛ. (Matiu 6:9) Bui barasī, amunu sīdee taāŋaba na adoo kɔ pya nɛɛ̄ asuā bee Bari ani?
—Buū Jɔn 17:26; Pya Rom 10:13, 14. -
Pya kaka Nɛɛ̄Kraist zue nu akiiloo Buɛ̄-mɛnɛ Bari. Bari bee yere Jizɔs kɔ a zue leyere ue Buɛ̄-mɛnɛ. Aba Buɛ̄-mɛnɛ Bari na alu bɛābu miɔ̄ŋɔ nɛɛ̄ a. Jizɔs bee kiisī loe kɔ nu akiiloo mmɛ dee a u. (Luk 4:43; 8:1; 23:42, 43) Abee kɔ pya aye nyɔnɛ dumɛ gaa le zue nu akiiloo. Lo ale ziī nɛɛ̄ lu aloo sa zue nu akiiloo Buɛ̄-mɛnɛ Bari, amunu sīdee taāŋaba na o kɛɛrɛ kɔ ale bu ani?
—Buū Matiu 24:14. -
Pya a nyɔnɛ dumɛ Jizɔs naa lu loo lo pɔrɔ nyɔuwe ama. O dap wa suā loo tɛmaloo kɔ ba naa sudɔ bu bira bɛbɛɛ ale taāŋa asira yɛɛ pya nɛɛ̄. (Jɔn 17:16; 18:36) Gbaānage loo wo, ba naa nɔ elap dogo le doonu nyɔuwe anua taāŋa.
—Buū Jemes 4:4. -
Pya kaka Nɛɛ̄Kraist ɛrɛ keekee wereloo kumaloo ɛnia aba. Tɛmaloo nɔ̄ Muɛ̄ Ue Bari, ba ɛrɛ enwādɛɛ̄ loo pya a aa dɛ̄dɛɛ̄ barasī. Kere aadoo pya ekwɔ sīdee taāŋaba wee yere kpotɛ̄ nɔ̄ bu eagaba bu keebee edo, pya a taāŋaba bu kaka sīdee āmana loe doowo. (Maika 4:1-3) Taāwo, pya kaka Nɛɛ̄Kraist su wa sɔ̄ le nu ba ɛrɛ yeabah sa yere mɛm loo pya dɔɔ̄na.
—Buū Jɔn 13:34, 35; 1 Jɔn 4:20.
4. O dap ge suā loo lo kaka sīdee taāŋaba ni?
Amunu sīdee taāŋaba na dɛ̄dɛɛ̄ wa tɔgɛnu dɛɛa nyɔɔ Muɛ̄ Ue Bari, nɛka bee Bari, sa zue Buɛ̄-mɛnɛ Bari yaari nua aba bɛābu miɔ̄ŋɔ nɛɛ̄ ani? Pya amunu eku na ba tɔgɛ wereloo sa naa benɔ̄ ani? Ena o kɛɛrɛ ani?
