Bari kue dɛ̄dɛɛ̄ neɛ̄ kɔ ba a tɔɔ̄ e ye waɛloo bu kara. (Le-yɔɔ 65:2) Kerewo, alɛ naa wee gbaɛ̄tɔ̄ ale agara dɛ̄dɛɛ̄ kara. Bu edoba, kara neɛ̄ atɔg ye wa lu ekpeg. (1 Pita 3:7) Gbaāloo wo, sɔ̄ pya Izrɛl bee kiisī lo edoo pɔrɔ nu, Bari naa bee gbaɛtɔ̄ loo wa kara. Asira pie kɔ, kara lu dee ai kpaā nɛ̄. Kerewo, Bari gbaɛ̄tɔ̄loo kara neɛ̄ pɔrɔ dogo, elo a kiiya.—Buū Aisaia 1:15; 55:7.

Kara lu ziī gah loo i taāŋaba, nyɔwo, i yere kara nɛ aba Neɛ̄ abee i dɛm Jɛhova. (Matiu 4:10; 6:9) Gbaāloo wo, kuma sɔ̄ ii mma, a bɔloo kɔ i yere kara bu bee Jizɔs neɛ̄ abee u nyɔɔ i pɔrɔ. (Jɔn 14:6) Jɛhova naa gbī kɔ i wee tɛɛ̄ nyɔɔ kara ale i buū aābu kpa. A gbī kɔ i yere kara aābu i benyiɛ.—Buū Matiu 6:7; Pya Filipai 4:6, 7.

Neɛ̄ abee i dɛm dap dā kere kara i yere bu benyiɛ̄ i. (1 Samuel 1:12, 13) A kɔ i yere kara ye nɛ̄ dɛ̄dɛɛ̄ sɔ̄, doodoo sɔ̄ i aakɛ̄ lɔɔrɛ le sɔ̄ i mākɛ̄ uūnɛ, sɔ̄ i denu le sɔ̄ i kpesī taāŋa.—Buū Le-yɔɔ 55:22; Matiu 15:36.

Tɔɔ̄ waɛloo Bari naa wee waɛ, nyɔnɛbee i tɔɔ̄ yɛɛ pya neɛ̄ anaa ɛrɛ yira sa ba kɛgɛ yii Bari kiiloo efɛɛloo a kɛnɛkɛ̄. (2 Timɔti 3:1, 4; 2 Pita 3:3, 13) Nyɔwo alu ebɛɛ̄ kɔ i yɔ pya le ii yira bɔŋana loe yere i mɛm loo, eba gbī i.—Buū Pya Hibru 10:24, 25.

 Su loo gbaloo pya a wereloo Bari yerebah inɛ kɔ i tɔɔ̄ waɛloo Bari. Enɔānu pya Ekeebee Jɛhova doo kɔ i ɛrɛ biī aāloo yira pya dɔɔ̄na.—Buū Pya Rom 1:11, 12.

O dap tɔɔ̄ waɛloo Jɛhova tɛ̄maloo e ɛrɛ ekɛɛrɛ nyɔɔ nu oe nɔā aābu ye Muɛ̄ Ue. Ɛrɛ ekɛɛrɛ nyɔɔ pya nu adoo, ye zuurabahtɔ̄ le pya ye yii. Ɛrɛ ekɛɛrɛ sa yere kara nyɔɔ doo kɔ i ɛrɛ nia loo wereloo Bari le ye suānu.—Buū Joshua 1:8; Le-yɔɔ 1:1-3.

O dap tɔɔ̄ waɛloo Bari aba sɔ̄ o ye dɛrɛ nyiɛ nyɔɔ sa ye ɛrɛ yira bu. Mɛ yira le doodoo nu ale dum loa gbī nuede. O ɛrɛ eyere mɛmloo o yira tɛ̄maloo etɛɛ̄ nyɔɔ nu o yira dɛɛa nyɔɔ dɛ̄dɛɛ̄ sɔ̄.—Buū Matiu 4:4; Pya Hibru 11:1, 6.

Jɛhova kuūdɛɛ̄ loo pya neɛ̄ a ye wereloo. Alɛ dap wa baɛloo lɛɛ loo ɛrɛgeba nu e gbee wa yira le wa bɛ̄abu dum anaatah. (Le-yɔɔ 91:1, 2, 7-10) A zuura-i-bahtɔ̄ kiiloo pya sīdee tɔɔ̄dum enua i dumɛloo le biira bu loo. Jɛhova tɔgɛ i sīdee tɔɔ̄dum alee eera.—Buū Le-yɔɔ 73:27, 28; Jemes 4:4, 8.