Pya nɛɛ̄ ale Bɛtɛl tɔɔ̄ doodoo ziī butɔ sa si keekee bee tam loe ɛp nu akiiloo tam zue ue bu ziī edo ale eewo. Pio nɛɛ̄ dap sitam tap kpa, kwa magazin, kwa ekpo kpa, nɔɔ̄ kpa kɛ̄ sere kpa, kwa DVD o dā aba muɛ̄ le loe ɛp le pya dɔɔ̄na tam a eewo bu eku kɛ̄ ba kuūdɛɛ̄ loo.

Kɔmitii A Kuūdɛɛ̄ Loo Tɔnaa-Tam baɛbee pya tam alu esi tɔnaa-tam. Eku A Baɛbee su tam bu ziī ziī Tɔnaa-tam yerebah pya kanɛɛ̄ a nyim tura ba lu taa ale eewo. Lo eku doo suā nɛ̄ Eku A Baɛbee aā ziī sɔ̄ mmɛ ziī kɛ̄ tam ale naɛsī a wa le kɛɛ̄ gaa kiisī doo le ɛrɛgeba taāŋa adap aakɛ̄. Dua kpɛa ale doowo yerebah nɛ̄ Eku A Baɛbee kɔ ba asuā pya ekobee ue a elu e’ɛm bu kpa ale kɔ bie enɔānu le bu gbɛnɛ bɔ̄ŋanaloo. Eku A Baɛbee wee yere pya nɛɛ̄ a wa tɔɔ̄ dɔ siā ziī ziī tɔnaa-tam aa ziī sɔ̄ yii ziī loe leredee bah Kɔmitii A Kuūdɛɛ̄ Loo Tɔnaa-tam kiiloo kɛ̄ e aa baloo wa tam doo. (Kam 11:14) Keebee nɔɔ̄nu wee lue ɛrɛ sɔ̄ pya nɛɛ̄ ama lu, ziī lo nɔɔ̄nu na ekɔaue tɛmaba ziī aba loe yere mɛm loo pya a le kɛɛ̄ lo tɔnaa-tam.

Tɔnaa-tam yerebah nɛ̄ pya bɔ̄ŋanaloo a wa le kɛɛ̄. Pio pya wuga li tɔnaa-tam wee yere bee aā bɔ̄ŋanaloo. Pya wuga ale tɔnaa-tam wee baɛ nage bee tam pya sɛmdee, pya zue ue dɔɔ̄na edo, le pya kuūdɛɛ̄ loo bɔ̄ŋanaloo aa ziī buɛ̄ yii ziī ba le kɛɛ̄ lo tɔnaa-tam. Ba nɔɔ̄ asɛmbli le kɔnvɛnsɔn, baɛbee wuwu aā Tɔ Nɔ̄nu Buɛ̄-mɛnɛ le muɛ̄ kɔ kpa ziī ziī bɔŋanaloo gbī a ina wa bah. Dɛ̄dɛɛ̄ tam alu esi Tɔnaa-Tam doo kɔ tam zue ue alu edoo mmɛ bu sīdee ale nyɔɔ etaā. —1 Pya Kɔrint 14:33, 40.

• Kɔmitii a kuūdɛɛ̄ loo Tɔnaa-Tam yerebah nɛ̄ Eku A Baɛbee doodoo wa ni?

• Pya amunu tam na alu esi li Tɔnaa-Tam a?