Bu nyɔɔnyɔɔ sɔ̄ lo, Pya Ekeebee Jɛhova lu esuā wa loo nuā pya alu e tɔgɛnu loe zue leyere ue leere. Keebee tɔkpa elua enɔɔ̄ nɛ̄ pya ba su gbɛnɛ-edo sɔ̄ nɛ̄ tam zue ue Buɛ̄-mɛnɛ lokwa ba dap ‘sitam mmɛɛ̄.’—2 Timɔti 4:5.

Tɔkpa Esiatam Pya Sɛmdee. Sɔ̄ nɛɛ̄ sɛmdee esiatam zue leyere ue loo ziī zua, wee lu ekue ye bu tɔkpa alu esere bu ini’ī biradee. Pio wee sudɔ bu Tɔ Nɔ̄nu Buɛ̄-mɛnɛ ale waɛ loo kɛ̄. Alu esere lo tɔkpa lokwa a yerebah nɛ̄ nɛɛ̄ sɛmdee kɔ a tɔɔ̄ waɛloo Jɛhova, para aa baloo dɛ̄dɛɛ̄ sīdee tam zue ue, sa kiisī loo ye esiatam bu bɔ ture nyiɛ loo.

Tɔkpa Pya Zue Ue Buɛ̄-mɛnɛ. Tɔkpa a toora baɛ enɔɔ̄ ama, lu enɔɔ̄ lo ekpɔā pya sɛmdee agbī e aa wa buɛ̄ sa sitam ɛrɛgeba kɛ̄ alu eture wa. Bu lo sīdee ama ba gaa kɔ, ‘M le a kɛ̄ ama! Lɛɛra mɛ!’ bu nɔ̄nɔ̄ lo gbɛnɛ nɛɛ̄ zue ue Jizɔs Kraist lo abee sitam a nyɔɔ kɛnɛkɛ̄. (Aisaia 6:8; Jɔn 7:29) Kii kɛ̄ a binia aa be wee dap doo kɔ nɛɛ̄ a nɔ̄ ewara sīdee tɔɔ̄dum. Wa doonu, sīdee, le nuede dap lu kaānā kee aāloo lo nɛɛ̄ zue ue. Dap nage lu ebɛɛ̄ loe nɔ̄ aā muɛ̄ ue. Lo tɔkpa ama yerebah nɛ̄ pya wuga nɛɛ̄dam ale nɛɛ̄wa ba sii ii wa ale iadam gbaāloo dam le wa ba eluage 23-65 zua, kɔ ba a ɛrɛ pya elap enwadɛɛ̄ Bari bu wa, lo ae lu ebɛɛ̄ bu wa esiatam le pya kari ae doo kɔ Jɛhova le ye bɔŋanaloo adap wa su siātam leere.

Tɔkpa Gilɛd Pya Watchtower. Bu muɛ̄ ue Hibru, “Gilɛd” kura “Buera Kpo Nu Ekeebee.” Aā sɔ̄ abee lue bɔātɛ̄ Tɔkpa Gilɛd bu zua 1943, nu a yeeloo 8,000 pya ae tɛ̄nā aa lo tɔkpa elua eyere ture keekee naɛsī nyɔuwe doodoo pya a zue ue bu dɔɔ̄na edo loe yira ekeebee “mmɛ kuma nyɔuwe” sa ba gaa kiisī leere. (Doonu 13:47) Tua sɔ̄, pya ba aa lo tɔkpa ama bee ina naɛsī loo peru lɔgɔ bɔŋanaloo naa bee le bu lo edonyɔɔ. Mɛ nyawo nu a yeeloo 1,000 bɔŋanaloo e’ina. Sɔ̄ pya i nɛɛ̄ zue ue bu dɔɔ̄na edo bee bɔātɛ̄ zue ue li Japan nu alu lop Pya Ekeebee naa bee le bu lo edonyɔɔ. Nyawo wa buā eyera loo 200,000. Enɔānu Gilɛd a toora o’oo enɔɔ̄ aara kaānā nɔ̄nɔ̄ Muɛ̄ Ue Bari. Pya alu ekue siā lo tɔkpa lu pya ale bu keebee esiatam sɛmdee, pya a zue ue bu dɔɔ̄na edo, pya ba le keekee tɔnaa-tam ale ba le bu esiatam aa ziī bɔŋanaloo yii ziī lu e kue wa nua lo tɔkpa ama loe ɛrɛ kaānā tɔgɛnu loa yere mɛm loo sa wu i esiatam tɛɛ̄ ɛŋɛnɛ̄ nyɔuwe agɛrɛ.

• Ena anuā alu enɔɔ̄ Tɔkpa Esiatam nɛ̄ Pya Sɛmdee ani?

• Tɔkpa Pya Zue ue Buɛ̄-mɛnɛ lu enɔɔ̄ nɛ̄ ba mɛɛ̄?