Ku nɛɛ̄ yɛɛ Pya Ekeebee Jɛhova olo suāloo ni? Pio ii dap lu pya nɛɛ̄ ale kɛ̄ o tɔɔ̄, ale pya aa nyɔnɛ sinia tam, ale pya bui gbaa le tɔ kpa. Ale ie bee a nyɔnɛ kɔnia nu a aabu Baibol. Taɛ taɛ ba mɛɛ̄ na ili lu ani, e ena anua i nyɔnɛ pya nɛɛ̄ ponia i yira ani?

Ili lenage doodoo ɛrɛgeba nɛɛ̄. I aabu keebee kɛ̄tɔɔ̄ le keekee dɔ bu dum. Pio ii bee le bu kee sīdee taāŋaba, sɔ̄ pio ii naa bee yiga loo Bari. Kerewo, lɛɛ i gae bee lu Pya Ekeebee, dɛ̄dɛɛ̄ ii bee dasī su sɔ̄ gbiātɛ̄ leere pya tɔgɛ nu ale bu Baibol. (Doonu 17:11) I bee yiga nu i bee nɔ̄, lo sɔ̄ i bee sagɛ su nɛ̄ i loo loe taāŋaba Jɛhova Bari.

I ɛrɛ biī aāloo enɔ̄ Baibol. Doodoo pya dɔɔ̄na nɛɛ̄, i ɛrɛ e aaba loo ilii taāŋa le ie ɔaloo. Mɛ tɛmaloo e piiga loe su zuurabahtɔ̄ Baibol yere bu dogo bu i tɔɔ̄dum dɛ̄dɛɛ̄ dee ie mɔna kaānā nyaā asira. (Le-yɔɔ 128:1, 2) Lo ama lu ziī nu anua i nyɔnɛ pya dɔɔ̄na nɛɛ̄ ponia pya le nu ie nɔā aābu Baibol.

I tɔɔ̄dum dɛɛa nyɔɔ nu Bari gbī. Pya nu a gbī ama, dookɛ̄ alu etɔgɛ doo bu Baibol, nyimɛ i lee loo le enwadɛɛ̄ kumaloo pya dɔɔ̄na, gbaāloo elap ale doodoo kɔ kaka ue le kaānā dogo. Pya lo dogo Bari gbī ama doo kɔ pya nɛɛ̄ a ɛrɛ le kɛ̄tɔɔ̄ nwanaloo sa doo kɔ i dɔbiī kɛ̄ i tɔɔ̄, sa ba yere mɛm loo gbaaloo butɔ le tɔɔ̄dum a ɛɛ. Sɔ̄ i suā leere kɔ “Bari naa wee ɛp sī nɛɛ̄” a, i ɛp i loo nua ziī butɔ a aa keekee naɛsī loo nyɔuwe alu egba loo ziī tɛmaloo pya nu i yira. Ii wee ɛp pya i wuga a aa dɔɔ̄na barasī nuā kee ale yii bu bira bɛbɛɛ. Kere adoo ii mma, i lu ziī eku alu keebee.—Doonu 4:13; 10:34, 35.

• Ena Pya Ekeebee Jɛhova le pya dɔāna gbaa ɛniā a?

• Pya ena Pya Ekeebee esuā aāloo nɔ̄ Baibol a?