Baibol bee kɔ sɔ̄ Kraist e ua sah, pya tɔgɛ nu esah e aakɛ̄ yɛɛ pya bagara Nɛɛ̄ Kraist sa gbee kaka ue Baibol. (Doonu 20:29, 30) Sɔ̄ e saa, taɛ taɛ nu abee sira lo. Ba bee gwa pya tɔgɛnu Jizɔs loo ekɛɛrɛ yiga bari pya yɔ, esa ekwɔ sīdee nyɔnɛ dumɛ Kraist bee bɔātɛ̄. (2 Timɔti 4:3, 4) I tɛɛ̄ doodoo wa suā leere kɔ nii’ee i ɛrɛ lo kaānā dābee loo loo taɛ taɛ nu Baibol tɔgɛ ni?

Jɛhova muūna kaka ue bu ye sɔ̄. Abee kɔ bu ‘sɔ̄ kuma, suānu gaa le yii loo.’ (Daniel 12:4) Bu zua 1870 ziī nwīepoo nɛɛ̄ ba gaa bee gbī kaka ue bee muɛ̄ kɔ gbɛnɛ-edo tɔgɛ nu pya nɛɛ̄ bu tɔbari naa aabu Kpa Kaɛ. Nyɔwo, ba bɔātɛ̄ egbī dābee loo kaānā tɔgɛnu Baibol, e Jɛhova bee wa yerebah nɛ̄ kɔ ba a dābee loo Kpa Kaɛ.

Pya nɛɛ̄ le benyiɛ bee su sɔ̄ nɔā Baibol. Pya nɛɛ̄ a ɛrɛ gbɛnɛ taɛ nɔ̄ Baibol, pya abee i dasī ama, bee nyɔnɛ ziī sīdee enɔānu lo i lege gaa nyɔnɛ anii’ee. Ba bee kɔnia ue nyɔɔ ziī ziī ekobee ue ale bu Baibol. Sɔ̄ ba ina loo dɔ Baibol a aga loe dābee loo, ba bee ɛp pya dɔɔ̄na dɔ ale bu Baibol loe bagitɛ̄ loa aga a. Sɔ̄ ba ekɔa sere bee loo, sa a gbaaloo pya dɔɔ̄na dɔ Kpa Kaɛ ba ɛm sere kɛ̄ sɛɛ̄. Tɛmaloo elɛɛ baloo kɔ Baibol a tap ye loo, ba bee sikɛ̄ gbī muɛ̄ kaka ue akiiloo bee Bari, le ye Buɛ̄-mɛnɛ, ye ekɛɛrɛ kiiloo nwiīnɛɛ̄ le kɛnɛkɛ̄, kɛ̄tɔɔ̄ pya e ua, le bɛābu aakɛ̄ bu luh. Wa gbītɛ̄ nu doo kɔ ba a aabu zooro lo ekwɔ yira le dogo.—Jɔn 8:31, 32.

Bu zua 1879 Pya Nɔ̄ Baibol bee suā kɔ e’ina sɔ̄ ekɔ yaari lo kaka ue mmɛ dɛ̄dɛɛ̄ kɛ̄. Nyɔwo bu lo zua, ba bee bɔātɛ̄ e’ɛm kpa lo ili lege gaa ɛm anii’ee, loa le The Watchtower Announcing Jehovah’s Kingdom. Nyawo i gaa nyɔnɛ pya nɛɛ̄ a aa 239 edonyɔɔ le 700 muɛ̄ ue ponia kaka ue Baibol. Lɔgɔ sɔ̄ kaka suānu ebee mma kɛ̄ doowo ama naale!

• Sɔ̄ Kraist e ua sah, ena abee sira loo kaka ue Baibol ani?

• Ena e yerebah inɛ̄ kɔ i sikɛ̄ gbī kaka ue ale bu Muɛ̄ Ue Bari muɛ̄ ani?