Bu tua sɔ̄ o’oo tup zua, ziī nwīgbagbara eku nɛɛ̄, “pya nɛɛ̄ lɛɛratam le pya kanɛɛ̄” li Jerusalem bee sitam doodoo eku a baɛbee lo ba yira dɔ dɛ̄dɛɛ̄ bɔŋanaloo Pya Nɛɛ̄ Kraist alu etɔ̄ nɔɔ̄ bee sa aa baloo gbɛnɛ-gbɛnɛ biaɛfii. (Doonu 15:2) Kuūnɛ̄ muɛ̄ lo ba ɛrɛ bu biaɛfii bee ue lu nu asira aaloo bagitɛ̄ pya nu ale bu Kpa Kaɛ le lɛɛ baloo kɔ kaɛ edɔɔ̄ Bari a baɛ wa loo. (Doonu 15:25) Nii’ee a lunage enyɔnɛ lo edoba ama.

Bari gaa su lo Eku A Baɛbee daānu a gbī. Pya wuga nɛɛ̄dam alu etɔ̄ nɔɔ̄ bee ba sitam lu Eku A Baɛbee ɛrɛ gbɛnɛ taɛ bu Muɛ̄ Ue Bari sa para aa baloo nu akiiloo i tam le yira bu Bari. Ba zɔ̄ŋia ziī ziī kaɛ loe kɛɛrɛ bu loo ebɛɛ̄ pya gā wuga tɛɛ̄ ɛŋɛnɛ̄ dɛ̄dɛɛ̄ nyɔuwe. Dookɛ̄ abee le doo bu tua sɔ̄ o’oo tup zua a, zuurabahtɔ̄ a aabu Baibol lu enɛ̄ tɛmaloo e’ɛma lɛta ale pya kuūdɛɛ̄ loo ba aa ziī bɔŋanaloo yii ziī ale pya dɔɔ̄na sīdee. Lo ba ama nyimɛ gbaaloo bu aba ekɛɛrɛ le dogo yɛɛ pya nɛɛ̄ Bari. (Doonu 16:4, 5) Eku A Baɛbee kuūdɛɛ̄ loo nɔɔ̄nu nuede bu edɔɔ̄ sa yere mɛm loo dɛ̄dɛɛ̄ nɛɛ̄ kɔ ba asu zue ue nua nu akuī, kuū nage dɛɛ̄ loo tubo baloo pya i wuga nɛɛ̄dam loe aa baloo dɔ esiatam.

Ba nyɔnɛ tɔgɛ dee kaɛ edɔɔ̄ Bari. Eku A Baɛbee tɔɔ̄baɛ Jɛhova nɛɛ̄ abɛɛ dɛ̄dɛɛ̄ nu le nɛɛ̄ bee bɔŋanaloo Jizɔs loe tɔgɛ wa dee. (1 Pya Kɔrint 11:3; Pya Efɛsɔs 5:23) Pya ale bu lo eku naa ɛp wa loo doodoo pya a zaāsī pya nɛɛ̄ Bari. Alaba gbaāloo dɛ̄dɛɛ̄ pya alu etɔ̄ nɔɔ̄ bee sa kiisī loe “nyɔnɛ Nwiī-naana-pee ɛrɛgeba kɛ̄ akii.” (Mumuuna 14:4) A niā wa sɔ̄ i su alaba le wa esiatam yere bu kara.

• Ba mɛɛ̄ na abee le bu eku a baɛbee bu tuasɔ̄ o’oo tup zua a?

• Bu mɛ sīdee na Eku A Baɛbee anii’ee gbī lere-dee-ba a aaba Bari a?