Bu enɔānu Pya Nɛɛ̄ Kraist a dee kere ba wee uɛ yɔɔ, yere kara, buū Kpa Kaɛ sa kɔnia ue nyɔɔ. (1 Pya Kɔrint 14:26) Dua nu ale doowo na o muɛ̄ bie i enɔānu a.

I tɔgɛ nu dɛɛa nyɔɔ Baibol sa dɔbiī inɛ̄. Bu dɛ̄dɛɛ̄ takaɛ ziī ziī bɔŋanaloo wee bɔŋia lo edā ziī ekɔaue Baibol bu 30 minit. Lo ekɔaue nyɔɔ Kpa Kaɛ̄ wee kɔ nu kumaloo i tɔɔ̄ dum le sɔ̄ i le ama. Alu eyere mɛm loo dɛ̄dɛɛ̄ ii kɔ i buū aābu ilii Baibol sɔ̄ alu ebuū ziī ziī dɔ Baibol. Sɔ̄ lo ekɔaue etaa, Enɔānu “Watchtower” wee nyɔnɛ bu ziī awa, bu lo ba ama ziī ziī nɛɛ̄ bu bɔŋanaloo lu etubo baloo loe kɔ ue nyɔɔ nuenɔ̄ bu lo Watchtower i gaa nɔ̄. Lo enɔānu ama yerebah inɛ̄ kɔ i su ture a aabu Baibol yere bu i dum. Nu a yeeloo 115,000 i bɔŋanaloo tɛɛ̄ ɛŋɛnɛ̄ dɛ̄dɛɛ̄ nyɔuwe wee nɔ̄ aba ziī nuenɔ̄ ama.

Lue yerebah inɛ̄ kɔ i nyimɛ i kari bu tɔgɛnu leere. I wee gbaanage zɔŋia loouūnɛ̄ bu taɛyɛɛ kaɛ loo taa enɔānu bu ziī. Bu tuatua 30 minit Enɔānu Baibol Bu Bɔŋanaloo, alu ebip le ture loa nɛ̄ togatɛ̄ dābee loo zuurabahtɔ̄ le mɔmanudɛɛ̄ Baibol. Dɔɔ̄na 30 minit i ɛrɛ Tɔkpa Esiatam Buɛ̄-mɛnɛ Bari, lo ama bɔātɛ̄ aāloo kɔnia ue nyɔɔ dɔ Baibol lo dɛ̄dɛɛ̄ nɛɛ̄ ale bu bɔŋanaloo ebee buū aā be. Sɔ̄ esaa, pya abee yere bee lo tɔkpa wee nɛ̄ keredɛɛ̄ ekɔaue. Nɛɛ̄ asere tɔkpa wee sere dɛɛ̄ nyɔɔ nɛɛ̄ akɔ ue loe yerebah inɛ̄ kɔ i nyim bu kari bu buū kpa le ekɔaue. (1 Timɔti 4:13) Lo kpɛdumɛ̄ 30 minit na Enɔānu Esiatam Zue Ue, lo a wee i nɔɛ̄ kɛ̄ etɔgɛ Baibol pya dɔɔ̄na doo tɛmaloo ekɔaue Baibol, tɔgɛ siā le bip ue aā nu nɛɛ̄.

Sɔ̄ o lu i enɔānu, dua tɔgɛnu Baibol o ɛrɛ enia a.—Aisaia 54:13.

• Ena o dap ɛmadɛɛ̄ loe dā bie enɔānu Pya Ekeebee Jɛhova a?

• Amunu yɛɛ i enɔānu bu kaɛ na enia a lo esi sɔ̄ i obia ɛrɛ enɔānu ani?