Kere adoo i ɛrɛ ekiā tɛɛ̄ bu kaba kuɛ kɛɛ̄ due ale boo, i wee le kɛ̄ bu i enɔānu pya Neɛ̄ Kraist dɛ̄dɛɛ̄ sɔ̄. Kaɛlɛɛ pya kɛ̄tɔɔ̄ finiaba loo dum le e ɔaloo loo tam ziī ziī dee, ena anua Pya Ekeebee Jɛhova wee piiga doowo loe gbaaloo pya wa wuga ba gbaa le bu aba yira ani?

A lee loo i tɔɔ̄ dum. Pɔɔl ɛm kumaloo pya i yɔ gbaaloo bu bɔŋanaloo kɔ “kɛɛrɛa bu ɛnia ii.” (Pya Hibru 10:24) Lo ekɔaue ama kura kɔ, i ɛrɛ ekɛɛrɛ bu loo ɛnia ii kaānā loe suā loo ziī leere, nyɔwo pya ue nɛɛ̄ lɛɛratam ama zū i kɔ i kɛɛrɛ ebɛɛ̄ pya dɔɔ̄na. Tɛmaloo esuā loo pya dɔɔ̄na butɔ pya Nɛɛ̄ Kraist, i gbī muɛ̄ kɔ pio aba ebea eeba pya finiaba abee lo ili, sa ba dap i yerebah nɛ̄ loe kii nage sī leere.

A doo kɔ i kiisī loe lu kaānā le gbo. Bu pya i enɔānu i wee gbaaloo ziī doodoo pya kaānā gbo naale kunɛ pya asuā loo ziī. Bu pya dɔɔ̄na sɔ̄, i wee gbaa ɛrɛ sɔ̄ bu ekpeloo seseea a bɔloo. Amunu le pah na dua gbanialoo loo ziī ama i ɛrɛ nyɔɔ a? I nɔ̄ lo etɔgɛ nia bu ɛnia ii kaānā, elo ama yere mɛm loo bɔp wereloo ai le yɛɛ. Sɔ̄ pya i wuga nɛɛ̄dam le nɛɛ̄wa gaa kpesī keekee taāŋa, i yerebah wa nɛ̄ nyɔnɛbee eagatɛ̄ biakɛ̄ yiniagbo bee dasī lu e wu. (Kam 17:17) Tɛmaloo su loo gbanialoo dɛ̄dɛɛ̄ nɛɛ̄ bu bɔŋanaloo, i tɔgɛ kumaloo loo ziī sa ‘ɛp ɛnia ii.’—1 Pya Kɔrint 12:25, 26.

I yere a mɛm loo kɔ o sagɛ pya a gaa doo nu Bari gbī nuā pya o gbo. O muɛ̄ dua gbo a le doowo yɛɛ Pya Ekeebee Jɛhova. Soosoo, oa yiga kɔ lɔgɔ nu a ɔbɛ a lɛɛloo egbaa i loo.

• Ena anua a dɔbiī i nɛ̄ loe gbaa zɔŋia bu i bɔŋanaloo a?

• Mɛ sɔ̄ na enia a elu i enɔānu a?