Jizɔs bee kɔ nɛ̄ pya awee ye nyɔnɛ dumɛ̄ kɔ: “Doolo bui ɛɛdee mɔ̄ kɛ̄sī pya nɛɛ̄ lokwa ba muɛ̄ dɛ̄dɛɛ̄ bui le tam sa nɛ̄ ka bui Tɛ lo ale li bunyɔɔ.” (Matiu 5:16) Nyɔwo, i gaa su aā ekwaa nu gbaānage loo Intanɛt daānu bu le sīdee. I dɔ Intanɛt jw.org lu taɛ dɔ kɛ̄ i su kɔmputa kɔā nu akiiloo yira le esiatam Pya Ekeebee Jɛhova. Ena o muɛ̄ lo kɛ̄ a?

Pya ture Baibol nɛ̄ kiiloo pya ebip awee lu ebip. O dap gbī ture pya gbɛnɛ-gbɛnɛ ebip pya nɛɛ̄ wee bip muɛ̄. Bu edobah, pya nwīepɛɛ kpa a kura Ekɔ Mɔna Taaŋa E Inage Kuma Ni? le Bu Kaka Ekɔ Pya Ae Ua Esige Kɛ̄ Tɔɔ̄dum Ni? le kɛ̄ nyɔɔ̄ intanɛt bu nu a yee loo 600 muɛ̄ ue. O dap nage muɛ̄ New World Translation bu nu a yeeloo 130 muɛ̄ ue le pio kpa nɔā Baibol, gbaānage loo What Does the Bible Really Teach? Le pya aā The Watchtower le Awake! Gbɛnɛ-edo pya kpa ama dap lu ebuū ale dā muɛ̄ bie nyɔɔ dɔ Intanɛt ale lo esu wa yere bu nu ebira sa dā muɛ̄ doodoo MP3, ale bu sīdee ebakpa PDF, ale EPUB. O dap nage yere bu kpa sa dɔɔ̄ nɛ̄ nɛɛ̄ a ɛrɛ taɛ loo bu ye muɛ̄ ue! Pya vidio a aara ekɔaue ale nɛ̄ pya bɔ̄nɔ̄ le pya naɛ̄bee le i dɔ Intanɛt. O dap su Baibol o dā aba muɛ̄ alu ebuū bu sīdee bii-si-ee yere bu nu e biā aā i dɔ Intanɛt. Pya bii-si-ee a aabu Baibol le pya ekpetɔ̄ yɔɔ enɛ̄ a ekpeloo sɔ̄ o le eseea.

Kaka ue akiiloo Pya Ekeebee Jɛhova. Pya nu alunage eyere i dɔ Intanɛt na pya aā ue ai kiiloo, vidio akiiloo i tam tɛɛ̄ ɛŋɛnɛ̄ nyɔuwe, doonu akiiloo Pya Ekeebee Jɛhova le i tam loa nuā iīnaloo loo pya bugia siranu a gbeesī nu dooa loo. O dap gbī muɛ̄ pya yere ue akiiloo i kɔnvɛnsɔn ale mmsī le pya ue akilloo pya i tɔnaa-tam.

Tɛmaloo pya lo sīdee ama i gaa mɔɛ̄ ɛɛdee kaka ue mmɛɛ̄ kuma nyɔuwe. Pya nɛɛ̄ a aa dɛ̄dɛɛ̄ barasī nyɔuwe gbaānage loo Antarctica, kɛ̄ a fiitɔɔ eera, gaa ɛrɛ biī aāloo lo ba ama. ‘I bara kɔ ue Jɛhova a nwaāba yaara’ ina dɛ̄dɛɛ̄ kɛ̄ bu nyɔuwe lokwa alu esu ka nuā loo Bari.—2 Pya Tɛsalɔnaika 3:1.

• Bu mɛ sīdee na jw.org gaa yerebah nɛ̄ gbɛnɛ-edo nɛɛ̄ kɔ ba a nɔ̄ kaka ue Baibol a?

• Ena eniā a lo egbītɛ̄ nyɔɔ i dɔ Intanɛt a?