Ena anuā pya nɛɛ̄ ale akɛ̄ ama le bu ɛɛbu a? Nu anuā na bee ba le ziī pya i gbɛnɛ bɔŋanaloo. Sɔ̄ akii adumɛ̄ bee lu e zuurabatɔ̄ pya zooro Bari kɔ ba a bɔŋana taa sɔ̄ bu ziī ziī zua bu gbɛnɛ bɔŋanaloo, bu lo sīdee nage ili wee bɔŋana taa sɔ̄ bu ziī zua. (Deuteronomi 16:16) Dɛ̄dɛɛ̄ zua i wee ɛrɛ taa gbɛnɛ bɔŋanaloo: Baɛ ka sekiut asɛmbli. Ziī ziī ɛɛ wee lu edoo ziī ziī biradee. Gbaāloo ziī ka kɔnvɛnsɔn ziī ziī barasī awee lu edoo bu taa biradee. Bu mɛ sīdee na i ɛrɛ biī aāloo pya lo gbɛnɛ bɔŋanaloo ama ani?

Ba agɛrɛtɛ̄ i gbanialoo doodoo pya Nɛɛ̄ Kraist. Dookɛ̄ pya Izrɛl bee ɛrɛ ɛɛŋa loe leera Jɛhova “bu gbɛnɛ bɔŋanaloo” doo, ili nage ɛrɛ ekpeloo lo egbaa ye taāŋaba bu pya lo keebee bɔŋanaloo. (Le-yɔɔ 26:12; 111:1) Pya lo zɔzɔ̄ŋia ama kpaānā dee kɔ i muɛ̄ sa gbaaloo Pya Ekeebee a aa keekee bɔŋanaloo ale keekee edonyɔɔ. Ye sɔɔ̄pie loo ziī ziī dee i wee gbaa denu bu ɛɛŋa bie lo kɛ̄ bɔŋanaloo, lo ama wee doo kɔ i agɛrɛba yiiloo ziī bie pya lo doonu. (Doonu 2:42) Bu pya gbɛnɛ bɔŋanaloo ama ili ilii loo muɛ̄ wereloo a gba dɛ̄dɛɛ̄ “pya wuga” ale bu nyɔuwe loo ziī.—1 Pita 2:17.

Ba yerebah inɛ̄ kɔ i nyim kiisī bu taāŋaba Bari. Pya Izrɛl bee ɛrɛ nage biī tɛmaloo e ‘dābeeloo’ pya ue ale bu Kpa Kaɛ lo a bee lu ebagitɛ̄ wa nɛ̄. (Nehemia 8:8, 12) Bu i gbɛnɛ bɔŋanaloo ili nage tɔgɛ niɛ̄ kumaloo pya zuurabatɔ̄ a aabu Baibol. Ekobee ue abɛɛ ziī ziī gbɛnɛ bɔŋanaloo lu e su aābu Kpa Kaɛ. Tɛmaloo pya lele ekɔaue, ekɔaue lɛaba nɛ̄ ziī le tɔgɛ pya nu ae bee sira, i nɔ̄ kɛ̄ i dap doo nu Bari gbī bu ilii dum doo. I ɛrɛ eagaloo sɔ̄ i dā pya wuga kɔ kɛ̄ alaba kiisī leere loe tɔma pya finiaba ale bu dum doodoo Nɛɛ̄ Kraist bu lo eaga sɔ̄ ama doo. Bu kɔnvɛnsɔn ziī ziī barasī bii-sii-ee alu eyaanu sɔ̄ kere biā doo kɔ pya e’ɛma nu ale bu Kpa Kaɛ asira pie inɛ̄ sa i tɔgɛ kɛ̄ esu pya nu alu enɔ̄ ama yere bu dogo doo. Bu dɛ̄dɛɛ̄ gbɛnɛ bɔŋanaloo, liamaā wee lu enɔɔ̄ nɛ̄ pya ba gbī etɔgɛ wa kiīloo nɛ̄ Bari siā.

• Ena anuā pya lo gbɛnɛ bɔŋanaloo ama wee lu sɔ̄ ɛɛbu ani?

• Amunu biī na o ɛrɛ aāloo esi gbɛnɛ bɔŋanaloo a?