Lo ale o gaa nyɔnɛ ziī yɛɛ Pya Ekeebee Jɛhova nɔ̄ Baibol, naa daba o wee piiga loe tɛɛ̄ nyɔɔ ziī ziī nu enɔ̄ sere kɛ̄ lɛɛ ae lu enɔ̄. Alee edoo nage wo lɛɛ o gaa kii enɔānu bu bɔ̄ŋanaloo lokwa o ɛrɛ gbɛnɛ biī. Sɔ̄ i nɔɔ̄ sa bialoo doowo nu asira aabu lee gbɛnɛ.

Biaɛfii sɔ̄ le kɛ̄ o tɔɔ̄ nɔ̄nu. Mɛ sɔ̄ na o dap nɔ̄nu dābee loo leere ani? Elu bagara lɔɔre lɛɛ o gae bɔātɛ̄ tam lo biradee, sɛh uūnɛ̄ sɔ̄ pya gbomiɔ̄ŋɔ edaara ni? Kere oo wee dap nɔ̄nu bu nyɔɔnyɔɔ dɛɛ̄ sɔ̄, biaɛ kuma sɔ̄ o dap nɔānu, e oa yira kɔ lɔgɔ nu a gbana asī. Gbī kɛ̄ kɔma naale, sa zimɛ̄ ɛrɛgeba nu edabara o ekɛɛrɛ doodoo ekpo yɔɔ, tɛlɛvisɔn, le fon. Yere kara lɛɛ o gae bɔātɛ̄ enɔ̄nu e yerebah lo elɛɛ gbɛnɛ ekɛɛrɛ o bee dap ɛrɛ lo biradee, lokwa o dap sere o ekɛɛrɛ nyɔɔ Muɛ̄ Ue Bari.—Pya Filipai 4:6, 7.

Yere nukuādɛɛ̄ loo pya nu enɔ̄ sa kpɛ̄naloo loe ɛrɛ ba bu. Bɔātɛ̄ tɛmaloo e dābee loo lo ekobee ue. Kɛɛrɛ bu loo lo ekobee ue, ale ekpokɛ̄ enɔ̄ sa ɛp kɛ̄ ziī ziī nwīgbagbara ekobee ue nuuna lo gbɛnɛ ekobee ue doo, sa o ɛp ɛrɛgeba foto le ebip tɛma-nyɔɔ atɔgɛ kpog bee ue siā. Buū ziī ziī ekpokɛ̄ sa gbī ture akiiloo pya ebip alu e’ɛm ye kɛɛ̄. Ɛɛra sa buū pya dɔ kpa kaɛ alu e’ɛm sa ɛp kɛ̄ ba gbaaloo lo nu enɔ doo. (Doonu 17:11) Sɔ̄ oe mɔ̄na ture ziī ebip, niina nu kɛɛ̄ lo kpog bee ue ale etaā ue bu lo ekpokɛ̄, lo e doo kɔ o nyɛŋia bu ye ture. Sɔ̄ o e ina enɔānu o dap toore ba nyɔɔ sa ture ebip bu ekpuruba kɛ̄ o dābee loo doo.

Tɛmaloo sikɛ̄ tɛɛ̄ nyɔɔ keekee ekobee ue i nɔ̄ bu ziī ziī kaɛ o yɛgɛ yereloo o “zɔ” suānu Baibol.—Matiu 13:51, 52.

• Amunu nɔɔ̄nu na olo dap doo loe kpɛ̄naloo kiiloo pya i enɔānu a?

• O kpɛ̄naloo doodoo wa loe ture ebip bie enɔānu ni?