E niāge a loe gbītɛ̄ pio nu loe nyimɛ o suānu Baibol yereloo ni? E kɔ a taɛ ge a kaānā lo esuā nu akiiloo ziī dɔ Kpa Kaɛ, ziī nɛɛ, ziī kɛ̄, ale nu alu ekɔ ue kumaloo bu Baibol ni? Ale oe dabage kɛɛrɛ lo ale Muɛ̄ Ue Bari dap a yerebah nɛ̄ kiiloo ziī nu alu o ebɛɛ̄ ni? Lo ale wo, si kɛ̄-sere-kpa ebuū ale Tɔ Nɔ̄nu Buɛ̄-mɛnɛ.

Anɛ̄ i pya nu tam lo ai yerebah nɛ̄ loe egbītɛ̄ nu. Naa daba oo ɛrɛ dɛ̄dɛɛ̄ kpa a dɛɛa nyɔɔ Baibol ale bu o muɛ̄ ue lo Pya Ekeebee Jɛhova e’ɛma. Kerewo, kɛ̄-sere-kpa ebuū ale Tɔ Nɔ̄nu Buɛ̄-mɛnɛ ɛrɛ booboo i aā kpa. A dap ɛrɛ keekee tatap Baibol le ziī le kpa a baatɛ̄ nu ziī ziī bee ue kura, le pya dɔɔ̄na egbīatɛ̄ nu a ebee lu edoo. Dee kpaā anɛ̄ lo ebuū kpa lo kɛ̄ sɔ̄ enɔānu sii bɔātɛ̄ le sɔ̄ enɔānu e ina kuma. Lo ale alu esere kɔmputa lo kɛ̄ adap ɛrɛ Watchtower Library loa ɛrɛ gbɛnɛ-edo kpa a ye le bu sa ɛrɛ nu esu gbiātɛ̄ nu loa doo kɔ awaɛ egbītɛ̄ ziī ekobee ue, ziī bee ue, ale ziī dɔ kpa kaɛ.

A dɔbiī nɛ̄ pya nwiī tɔkpa ale TɔKpa Esiatam Buɛ̄-mɛnɛ. Lo ale oe yere bee lo tɔkpa, o dap su kɛ̄-sere-kpa ebuū ale Tɔ Nɔ̄nu Buɛ̄-mɛnɛ daānu sɔ̄ o gaa kpɛ̄naloo o nu edoo. Nɛɛ̄ sere tɔkpa na alu nɛɛ̄ ale bee lo kɛ̄-sere-kpa ebuū ama a. Alu ye tam loe muɛ̄ kɔ pya aā kpa le lo kɛ̄ sa lu enɔɔ̄ leere. Alɛ ale nɛɛ̄ a gaa a tɔgɛ Baibol dap a tɔgɛ kɛ̄ e gbī pya ue aa bɛɛ̄ doo. Kɛ̄ adoo, lɔgɔ pya kpa ale kɛ̄-sere-kpa ebuū aa lu esu lɛɛ Tɔ Nɔ̄nu Buɛ̄-mɛnɛ. Bu kaka, bɔloo kɔ i aara pya kpa ama leere sa ii ɛm lɔgɔ nu bu.

Baibol kɔ bagītɛ̄ kɔ loe gbī “suānu Bari muɛ̄,” I ɛrɛ e kpɛ̄naloo loe gbī ye “doodoo zɔ a gɔā.” (Kam 2:1-5) Kɛ̄-sere-kpa ebuū ale Tɔ Nɔ̄nu Buɛ̄-mɛnɛ dap a yerebah nɛ̄ loe bɔātɛ̄ gbītɛ̄ nu.

• Pya amunu nu tam gbīatɛ̄ nu na ale kɛ̄-sere-kpa li Tɔ Nɔ̄nu Buɛ̄-mɛnɛ a?

• Mɛɛ̄ na edap a yerebah nɛ̄ kɔ o su i kɛ̄-sere-kpa ebuū daānu leere a?