Gbɛnɛ-edo nɛɛ̄ e ɔbɛ esi kɛ̄tɔɔ̄ yiga Bari nyɔnɛbee ba naa muɛ̄ yerebah a tɔgɛ dee tɔɔ̄dum Bari ale agɛrɛ benyiɛ. Lo sɔ̄, ena anua o si enɔānu pya Nɛɛ̄ Kraist lo Pya Ekeebee Jɛhova nɔɔ̄ a? Ena o gaa le muɛ̄ lo kɛ̄ a?

Ɛɛŋa a sira aabu le le yɛɛ pya nɛɛ̄ a ɛrɛ wereloo sa kuūdɛɛ̄ loo ziī. Bu tua sɔ̄ o’oo tup zua pya Nɛɛ̄ Kraist bee lu ebɔŋɛnɛ̄ wa bu ziī ziī bɔŋanaloo, ba wee gbaa zɔŋiā loe taāŋaba Bari, loe nɔ̄ Kpa Kaɛ, le loe yere mɛm loo ɛnia aba. (Pya Hibru 10:24, 25) Sɔ̄ ba bɔŋia bu enɔānu, loo wa sukɛ̄ nyɔnɛbee ba le yɛɛ pya wa wuga bu yira. (2 Pya Tɛsalɔnaika 1:3; 3 Jɔn 14) I nyɔnɛ wa edoba sa ɛrɛnage lo dua ɛɛŋa ama.

Biī ale bu nɔ̄nɔ̄ kɛ̄ esu nu alu egbī i aāba bu Baibol yere bu dogo. Dookɛ̄ abee le doo sɔ̄ abee lu e ɛm Baibol a dee kere, pya nɛɛ̄dam, pya nɛɛ̄wa le pya miɔ̄ŋɔ wee gbaa bɔŋanaloo. Pya nɛɛ̄ tɔgɛ nu ba nyim tura su Baibol i yɛābah nɛ̄ kɔ i dābee loo kɛ̄ esu pya nu ai gbī bah yere bu dogo doo ziī ziī dee. (Deuteronomi 31:12; Nehemia 8:8) Dɛ̄dɛɛ̄ nɛɛ̄ dap ɛrɛ epoo bu ture ebip le uɛ-yɔɔ. Lo ama doo kɔ i kɔ i bɛābu pya Nɛɛ̄ Kraist siā.—Pya Hibru 10:23.

Leelee ale bu yere mɛm loo o yira bu Bari. Nɛɛ̄ lɛɛratam Pɔɔl bee kɔ nɛ̄ ziī bɔŋanaloo abee le bu ye dee kɔ: “A taɛ mɛ egbaara i dɛɛ̄ loo, lokwa I gbaa ɛrɛ eaga benyiɛ tɛmaloo yira i muɛ̄ bu ɛnia ii.” (Pya Rom 1:11, 12) Sɔ̄ i si enɔānu dɛ̄dɛɛ̄ sɔ̄, sa gbaaloo pya i wuga, agɛrɛ loo i yira le biaɛfii loe tɔɔ̄dum doodoo Nɛɛ̄ Kraist.

I kue a bu kaānā loo kɔ o si i enɔānu bu bɔŋanaloo i sikɛ̄ ɛrɛ sa muɛ̄ pya nu ama oloo loo. A elu esu baɛ bah a suā leere. Dɛ̄dɛɛ̄ i enɔānu lu puɛ—naale elu etup a kpugi bah.

• Pya i enɔānu dɛɛa nyɔɔ amunu edoba?

• Bu mɛ sīdee na ili dap ɛrɛ biī aāloo enɔānu Pya Nɛɛ̄ Kraist ani?