Dookɛ̄ lo bee, Tɔ Nɔ̄nu Buɛ̄-mɛnɛ tɔgɛ doo, ekatɛ̄ tɔgɛnu Baibol alu etɔgɛ bie Tɔ Nɔ̄nu Buɛ̄-mɛnɛ na Buɛ̄-mɛnɛ Bari—lo alu ekobee ue loo esiatam Jizɔs.—Luk 8:1.

Alu kɛ̄ kaka taāŋaba sudɔ bu lo buɛ̄. Tɔ Nɔ̄nu Buɛ̄-mɛnɛ lu kɛ̄ Pya Ekeebee Jɛhova wee tɔɔ̄ nɔɔ̄ tam zue ue. (Matiu 24:14) Pio Tɔ Nɔ̄nu Buɛ̄-mɛnɛ, le kɛ̄ alu e sere baloo ewu doo, kerewo dɛ̄dɛɛ̄ ɛɛ kuūnadɛɛ̄ sa gbɛnɛ-edo Tɔ Nɔ̄nu Buɛ̄-mɛnɛ nu a yeeloo ziī bɔ̄ŋanaloo wee si bu. Bu ilii sɔ̄ ama ie wua edo sɔ̄ baɛloo le lop tup Tɔ Nɔ̄nu Buɛ̄-mɛnɛ (sɔ̄ alu edɔɔ̄ kuūnɛ̄, dap lu o’oo ka alu ewu bu ziī biradee) i doowo loe ɛrɛ kɛ̄ etɔɔ̄ nɛ̄ bɔ̄ŋanaloo a gaa yii loo bie dee. Lo ama waɛba doodoo wa ni?—Matiu 19:26.

Alu ewu Tɔ Nɔ̄nu Buɛ̄-mɛnɛ tɛmaloo kpugi alu etura aāba pya nɛɛ̄ tɛɛ̄ ɛŋɛnɛ̄ dɛ̄dɛɛ̄ nyɔuwe. Pya tura ama lu eyere ture tɔnaa-tam lokwa kpugi nwiī-nyɔɔ naa le nyɔɔ dap le kɛ̄ nɛ̄ pya bɔ̄ŋanaloo a gbī ewu ale sikɛ̄ kwa baloo wa Tɔ Nɔ̄nu Buɛ̄-mɛnɛ.

Tɔ Nɔ̄nu Buɛ̄-mɛnɛ lu ewu tɛmabah pya wuga a su loo nɛ̄ kaɛlɛɛ ɛrɛgeba nu ba lu, ea naa lu ekpɛ wa kpugi. Eku Eku Pya Wu Tɔ Nɔ̄nu Buɛ̄-mɛnɛ elua enɔɔ̄ sere bu gbɛnɛkpo edonyɔɔ. Eku eku pya a Sitam wu tɔ nɔ̄nu buɛ̄-mɛnɛ le pya a wa yerebah nɛ̄ aa ziī bɔ̄ŋanaloo yii ziī bu ziī edonyɔɔ, kere kɛ̄ alu koro koro kɛ̄, sa yerebah nɛ̄ pya bɔ̄ŋanaloo ale lo kɛ̄ lo ewu wa Tɔ Nɔ̄nu Buɛ̄-mɛnɛ. Bu pya dɔɔ̄na edonyɔɔ Pya Ekeebee apara tam wube elua etubo baloo loe kuūdɛɛ̄ loo wuwu le kwa baloo pya Tɔ Nɔ̄nu Buɛ̄-mɛnɛ ale kɛ̄ alu enɛ̄ wa. Kere adoo gbɛnɛ-edo pya nɛɛ̄ a ɛrɛ kari lo naɛsī su loo nɛ̄ loe yerebah bu dɛ̄dɛɛ̄ kɛ̄ alu ewu Tɔ Nɔ̄nu Buɛ̄-mɛnɛ, pya nɛɛ̄ a nuūnā lo bɔ̄ŋanaloo wee lu pya akuī kpo eera bu esiatam. Nu a doo kɔ dɛ̄dɛɛ̄ lo ama awaɛ na Kaɛ edɔɔ̄ Jɛhova le epiaga pya ye nɛɛ̄ su dɛ̄dɛɛ̄ wa benyiɛ daā.—Le-yɔɔ 127:1; Pya Kɔlɔsi 3:23.

• Ena anuā pya i kɛ̄ taāŋaba lue kue Tɔ Nɔ̄nu Buɛ̄-mɛnɛ a?

• Ena anuā awaɛ ewu Tɔ Nɔ̄nu Buɛ̄-mɛnɛ tɛ̄mā ɛŋɛnɛ̄ dɛ̄dɛɛ̄ nyɔuwe a?