DƐ̄DƐƐ̄ nɛɛ wee ɛrɛ gbɛnɛ ekɛɛrɛ—kere kunɛ pya nɛɛ Bari. “Gbɛnɛ ekɛɛrɛ wee mɛ ee bee,” kɛ̄ nɛɛ ɛm Le-yɔɔ bee kɔ doolo. (Le-yɔɔ 94:19) E Jisus bee kɔ bu sɔ̄ kuma, “ekɛɛrɛ loo dum” edoo kɔ a aga gbɛnɛ loe taaŋaba Jɛhova. (Luk 21:34) E olo niā? Ekɔ taaŋa kɛ̄ etɛɛ̄ doo ɛrɛ kpugi, taaŋa butɔ, ale taaŋa dumɛloo gaa a ee bee ni? Bu mɛ sīdee na Jɛhova edap a yerebah nɛ loe tamā ani?

Ii le edap tamā gbɛnɛ ekɛɛrɛ bu aba ilii ekpo. Lu “enɛ i etɛɛrɛloo dɛ̄dɛɛ̄ barasī loo,” kɛ̄ nɛɛ lɛɛratam Pɔɔl bee kɔ lo. “Nu ee i bee; alu zip i zimakɛ̄.” Kerewo, abee kɔnage kɔ “anaa lu ebii mmɛ lo dɔ ii damana aa dɔ,” “naa lu kɔ ii muɛ̄na lɔgɔ dee,” sa “anaa lu egbee i lɛɛ.” Ena ai yerebah nɛ loe egerebu ani? “Eenyɔɔ ekpo”—ekpo a aaba Jɛhova, lo Bari adap doo dɛ̄dɛɛ̄ nu.—2 Pya Kɔrint 4:7-9.

Naa kɛɛrɛ kɛ̄ o bee tɛɛ̄ doo ɛrɛ “eenyɔɔ ekpo” a sɔ̄ akii adumɛ. O gaa nyɛŋia ge bu kɛ̄ ekɔaue a agɛrɛloo nɛɛ bee doo kɔ o tɔgɛ nia loo kɛ̄ Jɛhova ɛrɛ wereloo anaa nyaā doo ni? Ekɔ yira o bee ɛrɛ bu pya yii Jɛhova bee nyim agatɛ̄ sɔ̄ o tɔgɛ bɛābu Paradais pya dɔɔ̄na ni? Sɔ̄ i si enɔānu pya Nɛɛ Kraist sa kɔ i yira siā nɛ pya dɔɔ̄na, i ɛrɛ eagaloo loe egerebu sɔ̄ gbɛnɛ ekɛɛrɛ i lu loo bu dum sa i sikɛ̄ ɛrɛ efɛɛloo benyiɛ loe sitam nɛ Jɛhova bu ɛɛbu.

I yira kɔ, tua sɔ̄ nu dap a eenyɔɔ. Bu edoba, Jɛhova bara i kɔ i gbī Buɛ̄-mɛnɛ nua tua tua sa kiisī loe aaba loo agɛrɛ ie siatam bu edɔɔ̄ dɛ̄dɛɛ̄ sɔ̄. (Matiu 6:33; Luk 13:24) Kerewo, lo ale gbanasī, dumɛloo, ale pio taaŋa butɔ e’era a bee bu namloo niā? Ale, lo ale, o gbora su sɔ̄ le ekpo o bee siātam bu bɔŋanaloo niā? Sɔ̄ gbɛnɛkpo nu lu egbī a aāba—sa oo ɛrɛna sɔ̄ le ekpo loe doo dɛ̄dɛɛ̄ ɛɛ—o dap ɛrɛ gbɛnɛ ekɛɛrɛ pio sɔ̄, o dap ɛrɛ ekɛɛrɛ kɔ Jɛhova gaa a ɛmadɛɛ̄ nu aāba yemākɛ̄.

Jɛhova dābee loo o kɛtɔɔ̄. Naa ɛmadɛɛ̄ nu ii lee dap doo i aāba. Ea suā kɔ esu i sɔ̄ bah loe ɛrɛ i loo sɔ̄ loo i ɔ le sɔ̄ i ɛrɛ gbɛnɛ ekɛɛrɛ.—Le-yɔɔ 103:13, 14.

Bu edoba, naa kɛɛrɛ sīdee Jɛhova bee kuūdɛɛ̄ loo nɛɛ mɔmanudɛɛ̄ Elaija. Sɔ̄ loo Elaija bee ɔ gbɛnɛ, sa bɔɔ aa ye mmɛ lo kɛ̄ a teera kii bu kposagara wii, ekɔ Jɛhova bee kɔgara ue nɛɛ mɔmanudɛɛ̄ ama sa ye kɔnɛ bu bah ekpo kɔ a obia kiiloo ye tam ni? Eeye. Baɛ sɔ̄, Jɛhova yere ziī ɛngɛl kɔ a lobara Elaija lɛɛ daa sa ye nɛ nuede. Kerewo, sɔ̄ 40 biradee etɛna, Elaija bee lege gaa ɛrɛ gbɛnɛ ekɛɛrɛ le bɔɔ. Dɔɔ̄na e, na Jɛhova bee doo loe yerebah ye nɛ ani? Tua  tua, Jɛhova bee tɔgɛ siā kɔ adap e baɛloo. Eree baɛ, Jɛhova bee gbɔ̄ benyiɛ Elaija tɛmaloo “muɛ̄ a fɛɛrɛloo, sa kii kɛ̄.” Bu ye kpɛdumɛ, Jɛhova muūna siā kɔ a ɛrɛ gbɛnɛ-edo pya dɔɔ̄na ba gaa taaŋaba Bari bu yira ba lege. Sɔ̄ naa bee binia; Elaija sikɛ̄ su mɛm siātam doodoo nɛɛ mɔmanudɛɛ̄. (1 Mɛnɛ 19:1-19) Ena i nɔ̄ aāloo ani? Sɔ̄ gbɛnɛ ekɛɛrɛ bee eenyɔɔ Elaija, Jɛhova bee ye aara bu egerebu le esaɛ benyiɛ. Jɛhova sii nyaā ge. A gaa i kuūdɛɛ̄ loo gbɛnɛ bu aba sīdee ama.

Sɔ̄ o gaa kɛɛrɛ nu o dap doo nɛ Jɛhova, ɛp leere. Oa su nu o dap doo anii’ee doore loo nu o wee doo sɔ̄ akii adumɛ. Lo enɛ edoba: Nɛɛ para tee lo anaa bee teera na bu gbɛnɛkpo enɔɔ̄ alɛ zua lo, naale edap teera taɛ kɛ̄ awee teera doo aba sɔ̄ ama. Taāwo, ae buātɛ̄ tɛmaloo e gbī e teera kina kina lokwa loo ye aga sa adap egerebu. Pya Nɛɛ Kraist le doodoo pya a gaa teera tee. A ɛrɛ nu ba seea sī sɔ̄ ba gaa kiisī. (1 Pya Kɔrint 9:24-27) Ena anua oo kponia ziī nu seea sī bu edɔɔ̄ abee kɔ ewaɛ a bah anyawo ani? Bu edoba, o dap seea sī a kɔ o sie enɔānu bu bɔŋanaloo. Bara Jɛhova kɔ a yerebah anɛ loe ɛrɛ lo nu o bee seea sī. Sɔ̄ mɛm gaa asikɛ̄ yiiloo bu edɔɔ̄, o lege gaa “daara edɛm loo Jɛhova sa muɛ̄ kɔ alee.” (Le-yɔɔ 34:8) Nyɛŋiabu kɔ ɛrɛgeba nu o doo loe tɔgɛ o wereloo loo Jɛhova—kaɛlɛɛ kɛ̄ abee kɔ atera doo—kuī ye loo gbɛnɛ.—Luk 21:1-4.

Bu mɛ sīdee na Jɛhova yere ekpo loo June loe obia ye lu loo ani? A kɔ inɛ kɔ: “M bee kiisī loe yere kara nɛ Jɛhova, ye bara kɔ a yerebah mɛ nɛ. Lo sɔ̄ waa na nwiī bee mɛ kɔnɛ kɔ a ɛrɛ ziī asɛmbli ae sudɔ na buɛ̄. M bee biaɛfii lo esi ziī biradee loo lo asɛmbli. Naa ɛp kɛ̄ abee mɛ kpeloo doo lo esikɛ̄ obia le yɛɛ pya nɛɛ Jɛhova dooa! Lo asɛmbli bee le mɛm m gaa bee gbī. Nyawo, m gaa sikɛ̄ sitam nɛ Jɛhova bu ɛɛbu dɔɔ̄na sɔ̄. Dum sikɛ̄ mɛ kpeloo eera. Eenyɔɔ dɛ̄dɛɛ̄ sɔ̄, m suā kɔ mm dap kpoora loo mɛ ale tɔɔ̄ aba am. M doo yaa kɔ sɔ̄ bee mɛ lege bah loe obia sī lu.”