GBƐNƐKPO sɔ̄, Jɛhova wee su yeloo doore loo taɛ dua nɛɛ tɔɔ̄loo naana pee ama. Bu ye Muɛ̄ ue a agɛrɛ i nyiɛ kɔ: “Mda mdaa loo gaa le gbī na gbo naana pee muɛ̄, e M kuū-wa-dɛɛ̄ loo.”—Ezekiel 34:11, 12.

Ba mɛɛ̄ na naana pee Jɛhova ani? Lo ekɔ warɛ, pya naana pee Jɛhova na pya nɛɛ ba ye wereloo sa ye taaŋaba. Kpa Baibol kɔ: “Dooraa i taaŋaba sa uubeekɛ̄; dooraa i kunɛ̄ zū kɛsī Jɛhova nɛɛ abee i Dɛm. Nyɔnɛbee alɛ na ilii Bari a, e ili lu pya ye nɛɛ ale ye kɛ̄ taa ebie, gbo naana pee a gaa kuūdɛɛ̄ loo.” (Le-yɔɔ 95:6, 7) Dookɛ̄ taɛ kasī naana pee wee doo, pya a taaŋaba Jɛhova ɛrɛ taɛ loe nyɔnɛ Nɛɛ a gaa wa kuūdɛɛ̄ loo. Ekɔ, lɔgɔ pɔrɔ naa wa le loo ni? Eeye. Pio sɔ̄, pya zooro Bari wee le doodoo “naana pee alu elagiri,” “naana pee ape,” le “doodoo naana pee adag.” (Ezekiel 34:12;  Matiu 15:24; 1 Pita 2:25) Kere sɔ̄ ale doowo a, sɔ̄ nɛɛ dɔ kii dumɛ, Jɛhova naa lɛɛ ye baloo bie kɔ anaa ɛrɛ na lɔgɔ bɛābu. O lege gaa kɛɛrɛ kɔ Jɛhova gaa a kuūdɛɛ̄ loo ni? Bu mɛ sīdee na Jɛhova tɔgɛ siā kɔ a gaa i kuūdɛɛ̄ loo anii’ee ani? Naa kɛɛrɛ taa sīdee:

Anɛ i nuede bu edɔɔ̄. “Le kɛ̄ taa ebie na M nɛ wa nuede a,” kɛ̄ Jɛhova kɔ doolo. “Lo kɛ̄ na ba gaa le makɛ̄ bu kaānā kɛ̄ taa ebie, eba e taa le ebie.” (Ezekiel 34:14) Jɛhova sii lɔɛ enɛ i keekee bee nuede bu edɔɔ̄ ai ziinɛ loo nyɔɔ sɔ̄. O dap ge nyɛŋiabu ziī ekobee ue abee lu e’ɛm, ziī ekɔaue ale ziī vidio lo abee lu agara loo kara o bee bara yerebah ni? Ekɔ anaa doo kɔ a gbɔɛ̄ aloo kɔ Jɛhova kuūdɛɛ̄ loo taɛ olo ni?

A gaa i baɛloo sa i yere kpotɛ̄. Jɛhova yira yii kɔ: “M gaa le obara pya abee kiā pe. M gaa le bɔp pya ekpo bee buna, e M gaa le agɛrɛloo pya loo ɔ.” (Ezekiel 34:16) Jɛhova agɛrɛloo pya loo ɔ,ale pya wa etɛɛrɛ wa eenyɔɔ. Asu bɛ bɔmā pya ye naana pee, wa yerebah nɛ loe ɛrɛ boa lo ale ba ɛrɛ taaŋa—naa daba aāba pya le aba gbaa yira. A obara pya abee dag nua le pya abee dap ɛrɛ elɔh ekɛɛrɛ.

A suā kɔ a kuu ye loe yerebah inɛ. “M gaa le agara wa aā dɛ̄dɛɛ̄ kɛ̄ ba bee lagara le,” Jɛhova kɔ. “M gbī pya lo abee pe.” (Ezekiel 34:12, 16) Kiikɛ̄ Jɛhova le, naana pee a pe, naa lu kɔ bɛābu naa lena. A suā sɔ̄ ziī naana pee gaa pe, a gbī lo naana pee, “ea ɛɛŋa sɔ̄ aye gbī muɛ̄.” (Matiu 18:12-14) Nyɔnɛbee, asu pya aye taaŋaba bu kaka kue “na gbo naana pee, gbo M gaa kuūdɛɛ̄ loo.” (Ezekiel 34:31) Olo lu ziī yɛɛ lo gbo naana pee.

Ena anua Jɛhova gbī a, sa gaa a kue kɔ o obia sī lu ani? Nyɔnɛbee a gbī kɔ o le bu ɛɛbu. A yira yii kɔ “leelee e egia kɛ̄ bee boo” nɛ pya ye naana pee. (Ezekiel 34:26) Naale esah yii. Oe daasī muɛ̄ nu atɔgɛ lo ama siā.

Nyɛŋiabu kɛ̄ nu bee a kiā loo doo sɔ̄ o gaa bee lu wee suā loo Jɛhova. Bu edoba abee a tɔɔ̄loo doodoo wa tua sɔ̄ o bee nɔ̄ pya ekpeloo kaka ue akiiloo bee Bari le ye ekɛɛrɛ kumaloo ganɛɛ ni? O nyɛŋia ge bu kɛ̄ loo a bee sukɛ̄ doo loe gbaaloo pya le ɔɔ gbaa lu NɛɛKraist bie asɛmbli le kɔnvɛnsɔn lo sɔ̄ ni? Sɔ̄ o bee dap zue leyere ue nɛ nɛɛ atɔgɛ nia kaānā, ekɔ bu a naa bee ɛɛ sa loo a sukɛ̄ sɔ̄ o gaa kii be ni?

O dap sikɛ̄ ɛrɛ dua lo ɛɛbu. “Obara i yaa loo a, aa Jɛhova,” pya zooro Bari a dee kere bee yere kara kɔ, ei kpɛnaloo loe “obia alu loo. Sikɛ̄ kwa dɛ̄dɛɛ̄ i dee doodoo bu gbo nama dee.” (Yɔɔ-To 5:21) Jɛhova bee agara lo kara sa pya ye nɛɛ bee obia kii wee sitam ye enɛ sa sikɛ̄ ɛrɛ ɛɛbu. (Nehemia 8:17) Jɛhova edoo nage wo anɛ.

Kerewo, obia pii Jɛhova waɛ ekɔ ee dodoo ye. Naa ɛp pio taaŋa ale loo obia sī, le kɛ̄ o dap wa be eeba doo.