SƆ̄ O benyiɛ a begee ue dap a ziloo gbɛnɛ. “Na doo gbee e’era mɛ bee,” kɛ̄ Mɛnɛ Devid bee ɛm doolo. “Doodoo dɔnia toh eelo m dap toora.” (Le-yɔɔ 38:4) Gbɛnɛ biira bu e era nyɔɔ pio pya NɛɛKraist, nyɔnɛbee ba su kɔ Jɛhova naale e aaloo wa nɛ. (2 Pya Kɔrint 2:7) Kɛ̄ ba biaɛfii doo ama luge kaka ni? Kere adoo o bee si pio gbɛnɛ iiloo pɔrɔ, ekɔ oe tɔɔ̄na ebinī gbɛnɛ aaloo Jɛhova mmɛ lo dɔ anaale e aaloo anɛ ni? Eeye, naale doowo!

Jɛhova naa lɛɛ baloo pya pɔrɔ dogo ba kiiya bie. Kɛadoo, a gaa wa gbī! Bu kam nwiīpee zɔ, Jisus bee su Jɛhova doore loo tɛ a ɛrɛ wereloo lo ye nwiī bee ye aaloo sa kii wee tɔɔ̄ dum pe. Sɔ̄ pio sɔ̄ etɛna lo nwiī biaɛfii loe obia lu be. “Mɛ sɔ̄ [lo nwiī] a le kɛ̄ abinia, ye tɛ muɛ̄ ye ɛrɛ toesaɛ̄ loo, ea teera ye pigara baloo, sa ye kuɛ̄ nyɔnu loo.” (Luk 15:11-20) Wee ania ge etɔɔ̄ yiiloo Jɛhova mɛ a tɔɔ̄ aloo kɔ o “le kɛ̄ abinia” ye aaloo ni? Doodoo tɛ abu kam Jisus, nu a zū Jɛhova na esaɛ̄ benyiɛ aa ɛrɛ loo. A kpɛnaloo loe obia asu.

Mɛ lo ale o yira kɔ o pɔrɔ kuī gbɛnɛ ale alu booboo kɔ Jɛhova naale e aaloo niā? Soosoo kɛɛrɛ bu kue Jɛhova alu e’ɛm bu kpa Aisaia 1:18: “ ‘Bui luaa anyawo, dooraa i gbaa sere bee loo ue’ Jɛhova kɔ. ‘Kere dɛ̄dɛɛ̄ bui pɔrɔ lu miimii doodoo doh, ba elu ɛɛ doodoo snow.’ ” Aii, kere pya pɔrɔ abee kɔ anaa dap zugia doodoo miimii doh ale bu ɛɛ bɛloo naa eeba Jɛhova loe aaloo.

Jɛhova naa gbī kɔ o kiisī loe tɔga bu ekɛɛrɛ benyiɛ a gaa a begee ue. Lo ale wo, o tɛɛ̄ doodoo wa ɛrɛ lo agia awee aaloo sɔ̄ Bari aaloo pɔrɔ nɛ, le ɛɛ ekɛɛrɛ benyiɛ ni? Naa kɛɛrɛ baɛ pah ekaɛtɔ lo Mɛnɛ Devid bee naana. Tuatua, abee kɔ: “M gaa le kɔ dɛ̄dɛɛ̄ na elɔh dee nɛ Jɛhova.” (Le-yɔɔ 32:5) Nyɛŋiabu, Jɛhova ebee akue kɔ o lue ye loo bu kara le kɔ bui “sere bee loo ue.” Si lo kue. Kɔ o pɔrɔ siā nɛ Jɛhova, sa doo kɔ asuā o ekɛɛrɛ. Aāloo nu abee ye sira loo, Devid bee dap yere kara bu eagaloo kɔ: “Log mɛ leere lɛɛ loo na doo gbee . . . benyiɛ a baara sa ɛrɛ ekiɛnu, aa Bari, oo “wee ɛp kumakɛ̄.”—Le-yɔɔ 51:2, 17.

Eree baɛ, Devid bee ɛrɛ yerebah aāba nɛɛ Bari tubo baloo aye yira dɔ, lo ale nɛɛ mɔmanudɛɛ̄ Natan. (2 Samuel 12:13) Nii’ee, Jɛhova enɛā i pya kanɛɛ bu bɔŋanaloo lo elua ekpɔā kɔ ba a yerebah nɛ pya adoo pɔrɔ sa kiiya lokwa ba sikɛ̄ nyɔnɛ Jɛhova ɛrɛ le gbanialoo. Sɔ̄ o lu loo  pya kanɛɛ, ba esu kpa kaɛ le kara awa aa nyiɛ boā o benyiɛ, loe doo kɔ o ekɛɛrɛ a kiikɛ̄ ale kɔ pɔrɔ ekɛɛrɛ a aa abu sa a yerebah nɛ loe ɛrɛ boa bu edɔɔ̄.—Jemes 5:14-16.

I yira kɔ, kɔ o pɔrɔ siā nɛ Jɛhova Bari sa si loo pya kanɛɛ lu ziī nu e aga a bah loe doo. Kɛ̄ abee tɔɔ̄ nage loo Devid doolo. Abee “piī” loo ye pɔrɔ bu ziī nwīsɔ̄. (Le-yɔɔ 32:3) Kerewo, sɔ̄ ae saa, abee ye nia kɔ abee kɔge ye pɔrɔ siā sa kwa ye dee.

Ziī gbɛnɛ biī na bee, Devid sikɛ̄ ɛrɛ ɛɛbu. Abee ɛm kɔ: Ɛɛbu ale nɛ nɛɛ alu e aaloo ye doo gbee, lo ye pɔrɔ lu e aaloo. (Le-yɔɔ 32:1) Abee yere nage kara kɔ: “Kpaānā na baɛ ekpa-nyɔnu, ena egā gae tɔgɛ o leera siā.” (Le-yɔɔ 51:15) Sɔ̄ benyiɛ Devid naa bege na ye ue le sɔ̄ a tɔgɛ nia loo kɔ Bari aaloo ye nɛ, abee lu ezū ye kɔ akɔ nu akiiloo Jɛhova nɛ pya dɔɔ̄na.

Jɛhova gbī kɔ o agia ɛrɛ ɛɛ ekɛɛrɛ benyiɛ. Ea gbī kɔ o kɔ nu aye kiiloo le ye ekɛɛrɛ bu kaānā ekɛɛrɛ le gbɛnɛ ɛɛbu, mɛ anaale bu ekɛɛrɛ a gaa a begee ue. (Le-yɔɔ 65:1-4) Nyɛŋiabu ye kue “lokwa alu ezugere dɛ̄dɛɛ̄ bui pɔrɔ lɛɛ, lokwa sɔ̄ e’ɛrɛ aā mɛm lo a aa kɛ̄sī Jɛhova elu doowo ama.”—Doonu 3:19.

Nu abee sira loo Mata. Abee kɔ: “Na saaro bee kiisī loe yere kpa Watchtower le Awake! mɛ mā. Kina-kina, m bee sikɛ̄ yiiloo Jɛhova. Lo gah loo na obia sī abee mɛ aga loo gbɛnɛ na kɔ dɛ̄dɛɛ̄ pɔrɔ m bee si siā. Mɛ bu ye kpɛdumɛ, m bee yiiloo Bari bu kara sa ye bara kɔ a aaloo mɛ nɛ. A aga loe yira kɔ 40 zua a tɛɛ̄ loo lɛɛ m gaa obia pii Jɛhova. Mda lu nɛɛ ale dum atɔgɛ siā kɔ, kere sɔ̄ gbɛnɛkpo zua etɛna kɛɛ̄, dap lu esikɛ̄ nɛ dɔɔ̄na dee nɛɛ loe sitam nɛ Bari sa obia sikɛ̄ le bu ye wereloo.”