SUĀ leere kɔ Jɛhova le ekpɛnaloo loe su a lo o obia ye pii. E yerebah anɛ loe tāmā gbɛnɛ ekɛɛrɛ, loe lɛa saŋ nyiɛ, sa doo kɔ o ɛrɛ efɛɛloo bu o ekɛɛrɛ le, le benyiɛ awee sira aaloo ɛrɛ le ekɛɛrɛ benyiɛ. Lo sɔ̄ o sikɛ̄ ɛrɛ taɛ loe yɔ pya dɔɔ̄na gbaa taaŋaba Jɛhova. O kɛtɔɔ̄ ebee lo pya NɛɛKraist abu tua sɔ̄ o’oo tup zua a, lo nɛɛ lɛɛratam Pita bee wa ɛm mā kɔ: “Nyɔnɛbee bui bee kiā pe doodoo naana pee, mɛ nyawo bui e’obia lu loo Nɛɛ-tɔɔ̄loo-naana pee le Nɛɛ-abaɛ loo bui piogi.”—1 Pita 2:25.

Obia pii Jɛhova na taɛ kaana nu alee eera o ɛrɛ edooa. Ena anua ani? O doo kɔ benyiɛ Jɛhova a ɛɛ. (Kam 27:11) Dookɛ̄ o suā doo, Jɛhova ɛrɛ ekɛɛrɛ, nyɔwo i dogo ɛrɛ ye pah nyɔɔ. Kɛadoo, Jɛhova naa aā i bah ekpo kɔ i were-yeloo sa ye sitam nɛ. (Deuteronomi 30:19, 20) Ziī nɛɛ nɔ̄ Baibol kɔ doowo ama kɔ: “Lɔgɔ nu esu kpaānā benyiɛ nɛɛ naale. A ɛrɛ elu e kpaānā aābu li.” Tɛmaloo taaŋaba Jɛhova aābu benyiɛ wereloo mma i dap sah loe kpaānā lo bū. Sɔ̄ i doowo, inɛ ye dɔɔ̄nu akuī—ie aga yira—ei su gbɛnɛ ɛɛŋa ye nua bu benyiɛ. Bu kaka, lɔgɔ nu adap lu esu doloo ɛɛbu i ɛrɛ aāloo nɛ taaŋaba a kuu Jɛhova naale.—Doonu 20:35; Mumuuna 4:11.

Lo a eenyɔɔ tɔɔ̄, sɔ̄ o sikɛ̄ taaŋaba doodoo NɛɛKraist, oe bɛɛ̄ bu edɔɔ̄ elu e mmɛnɛ. (Matiu 5:3) Bu mɛ sīdee? Alu nyɛŋia loo pya nɛɛ bu yube nyɔuwe kɔ, ‘Ena anua i le akɛama a?’ Ba ɛrɛ taɛ loe suā ture pya ebip akiiloo nu alu ekɛɛrɛ ale dumɛ dum. Miɔŋɔ nɛɛ ɛrɛ loe bɛɛ̄ nyɔnɛbee Jɛhova bee dɛm lo taɛ wa yere bu. Abee i dɛm lokwa loo i sukɛ̄ sɔ̄ i ye taaŋaba. Lɔgɔ kɛ̄ edoo loo i sukɛ̄ ee sɔ̄ i suā kɔ i gaa taaŋaba Jɛhova aābu wereloo naale.—Le-yɔɔ 63:1-5.

Soosoo suā kɔ Jɛhova gbī kɔ o obia ye pii. O tɛɛ̄ doodoo wa suā mmɛnɛ ni? Naa kɛɛrɛ: Bee lu eyere kara gbɛnɛ, lɛɛ a gaa lu esu kaānā loo kwaā nwīekpo kpa ama. Nɛɛ abee atɔgɛ kpa ama dap lu NɛɛKraist alu nɛɛ kanɛɛ ale dɔɔ̄na nɛɛ le ɔɔ gbaa yira. Lɛɛ alu ezū a kɔ o buū sa su ye ue yere bu dogo. Dɛ̄dɛɛ̄ lo ama tɔgɛ kɔ Jɛhova sii a ibere. Taāwo, a gaa a zuura obara nua loo ye bu fɛgɛ.—Jɔn 6:44.

I dap ɛrɛ eaga benyiɛ aāloo suā kɔ Jɛhova sii ibere pya ye zooro abee pe. Nu ziī wuga gbobia akura Donna bee kɔ bu ɛɛbu lo. Abee kɔ: “M ebee zuua aabu kaka ue, mɛ gbɛnɛkpo sɔ̄ m gbī na loo muɛ̄ m gaa tɔgɛ pya ue ale bu kpa Le-yɔɔ 139:23, 24 siā, lo akɔ: ‘Gbī mɛ tɛ̄, aa Bari, sa suā na benyiɛ. Doā mɛ ɛp sa suā dɛ̄dɛɛ̄ na ekɛɛrɛ! Sa ɛp lo ale ɛrɛgeba pɔrɔ dee le mɛ bu, sa mɛ ture bu dee anaa ɛrɛ kuma!’ M suā kɔ mm luuna nyɔuwe—bu kaka, anaa su mɛ loo—e m suā kɔ bu bɔŋanaloo Jɛhova na kɛ̄ m bee lea. M bee buatɛ̄ e muɛ̄ kɔ Jɛhova sii mɛ lɛɛ baloo bie; alu ebɛɛ̄ kɔ m gbī na dee ye obia pii. Esa bu mɛ ɛɛ gbɛnɛ kɔ m bee doowo!”

Alu kara a aa taɛ i nyiɛ kɔ olo o sikɛ̄ ɛrɛ “ɛɛbu a aaba Jɛhova” dɔɔ̄na sɔ̄. (Nehemia 8:10) Naale ekiɛ̄ a doo pippip kɔ o bee obia pii Jɛhova.