Nuenɔ̄ 5
Samuɛl Bee Kiisī Loe Doo Nu Alee
Aā dee Samuɛl bee le nwiī zege, a bee tɔɔ̄ sa sitam li tɔkpo zɔ̄zɔ̄ŋia, kɛ̄ pya nɛɛ wee lu wee taāŋaba Jɛhova. O suāge kɛ̄ Samuɛl bee tɛɛ̄ doo ina tɔkpo zɔ̄zɔ̄ŋia ni? Doo i dasī nɔ̄ nu akiiloo ka Samuɛl akura Hana.
Bu nyɔɔnyɔɔ sɔ̄, Hana naā bee ɛrɛ nwiī, kere abee ye taɛ loe ɛrɛ kere ziī bee. Nyɔwo, abee yere kara bara Jɛhova kɔ a yerebah ye nɛ. A bee yira yii kɔ, lo ale a ɛrɛɛ ziī nwiīnɛɛ̄dam, a gaa le sue ye ture kɔ a tɔɔ̄ sa sitam bu tɔkpo zɔ̄zɔ̄ŋia. Jɛhova bee agara ye kara, e a bee maɛ̄ ziī nwiīnɛɛ̄dam. A kue ye bee, Samuɛl. Dookɛ̄ Hana bee yira yii doo, sɔ̄ Samuɛl ebee lu taa ale nia zua, ye ka bee ye su ture tɔkpo zɔ̄zɔ̄ŋia kɔ a sitam nɛ Bari lo kɛ̄.
Elai bee le nɛɛ̄ tɛsī ewɔp bu tɔkpo zɔ̄zɔ̄ŋia. Baɛ ye miɔ̄ŋɔ nɛɛ̄dam wee sinage tam lo kɛ̄. Nyɛŋiabu kɔ, tɔkpo zɔ̄zɔ̄ŋia bee le tɔ etɔɔ̄ taāŋaba Bari, ea bɔloo kɔ pya nɛɛ adoo le nu lo kɛ̄. Mɛ miɔ̄ŋɔ nɛɛ̄dam Elai gaa bee doo nu a bee piya gbɛnɛ. Samuɛl bee muɛ̄ nu ba gaa bee doo. Ekɔ Samuɛl bee dooge piya nu dookɛ̄ miɔ̄ŋɔ nɛɛ̄dam Elai bee doo ni?— Eeye, a bee kiisī loe doo nu a lee dookɛ̄ ye tɛ le ka bee ye tɔgɛ doo.
Ena olo kɛɛrɛ kɔ Elai ebee doo kiilo baɛ ye nwiī nɛɛ̄dam ani?— E bee su kpɔte wa nua loo. Naalee bee wa lɛɛ baloo kɔ ba a kiigesī loe sitam bu lo tɔkpo. Mɛ Elai naa bee doowo, nyɔwo Jɛhova bee ye ɛrɛ saŋ loo le baɛ ye miɔ̄ŋɔ nɛɛ̄dam. Jɛhova bee biaɛfii loe su kpɔte wa nua loo.
Samuɛl bee kɔ yere ue Jɛhova nɛ̄ Elai
Ziī uūnɛ̄ sɔ̄ Samuɛl bee le daa, a bee dā nɛɛ̄ a ye kue kɔ: ‘Samuɛl!’ A bee teera pii Elai, mɛ Elai bee kɔ: ‘Mm bee a kue.’ Lo ama bee sira dɔɔ̄na baɛ sɔ̄. Sɔ̄ ae daā lo eree taa sɔ̄, Elai bee kɔ nɛ Samuɛl kɔ lo a sikɛ̄ dā lo muɛ̄ dɔɔ̄na sɔ̄, a kɔ: “Soosoo kɔ a Jɛhova, m gaa gbaɛ̄tɔ̄.” Taɛ nu Samuɛl bee doolo. Lo sɔ̄ Jɛhova bee kɔ nɛ Samuɛl: Kɔ nɛ Elai kɔ: “M gaa le su kpɔte nuā nyɔɔ ye tɔ nyɔbee pɔrɔ nu ba edoora.” O kɛɛrɛ kɔ a waɛge bah Samuɛl loe kɔ yere ue ama nɛ Elai ni?— Eeye, naa bee waɛ. Mɛ kere adoo bɔɔ bee aa Samuɛl a bee doo nu Jɛhova bee ye kɔnɛ kɔ a doo. Nu Jɛhova bee kɔa bee dooa. Baɛ miɔ̄ŋɔ nɛɛ̄dam Elai bee lu efɛ, e Elai bee u’nage.
Samuɛl lu le edoba inɛ. A bee doo nu a lee kere abee muɛ̄ pya dɔɔ̄na gaa doo piya nu. E olo nia? O kiige sī loe doo nu a lee doodoo Samuɛl ni? Lo ale o doowo, o doo kɔ bu Jɛhova le o tɛ le ka a ɛɛ.
