BƆĀTƐ̄ KƆNIA UE
5 NUENƆ
Kari
Daakuu Baibol: “Dooraa bui ekɔa ue kɔ alu ewonu dɛ̄dɛɛ̄ sɔ̄.”—Kɔl 4:6.
Nu Pɔɔl Bee Doo
1. Si ee lo VIDIO, ale o buū Doonu pya Nɛɛ lɛɛratam 17:22, 23. Lɛɛ o agara pya ebip a nyɔɔnɛ ama:
-
Bu mɛ sīdee na Pɔɔl bee doo dogo kumaloo ekwɔ sīdee taāŋabah a bee muɛ bie Atɛns a?—Buū Doonu 17:16.
-
Taā Pɔɔl gbɛ pya Atɛns, bu mɛ sīdee na a bee su nu ba yiga wa zuema ue nɛ a?
Ena I Nɔ Aāloo Pɔɔl A?
2. Pya nɛɛ egbaɛ̄ i tɔ̄ loo, lo i kɔ ue wa nɛ bu sīdee a lee le sɔ̄ a bɔloo.
Nɔ Pɔɔl
3. Kɔ pya ue a bɔloo. Bu edoba, sɔ̄ o gaa kɔ ue nɛ nɛɛ a naa yiga bu Bari, o dap kwabahloo kɛ̄ o kɔ ue aābu Baibol ale kɛ̄ o sere bahloo doo sɔ̄ o gaa kɔ ue kumaloo Jizɔs.
4. O aa nwaabah kɔ nɛɛ naa agara leere. Lɛɛ ye bahloo kɔ a kɔ nu a kɛɛrɛ. Lo a kɔ ziī ue a naa gbaaloo tɔgɛnu Baibol, o aa ye nyɔɔnɛ amkɛ̄. (Jem 1:19) Tɛ̄maloo egbaɛ̄ ye tɔ̄, o suā pya nu a yiga le nu anua a yiga pya lo nu.—Kam 20:5.
5. Nyɔɔnɛ ye yiga nu a kɔ sa ye kaɛgɛ sɔ̄ a bɔloo. A dap le gaa yiga kɔ bu kaka ye sīdee yigabari na a lee a. Dasī ye nyɔɔnɛ kɔnia nu bui gbaa yiga, sa kina kina o yerebah ye nɛ kɔ a dābeeloo nu Baibol tɔgɛ.
