Pya wuga Nɛɛdam le Nɛɛwa i wereloo:

Wereloo i ɛrɛ loo Bari le pya nɛɛ zū i kɔ i kii “sa doo kɔ dɛ̄dɛɛ̄ edonyɔɔ alu pya a [nyɔɔnɛ dumɛ Jizɔs], sa wa doo baptism.” (Mat 28:19, 20; Maak 12:28-31) Wereloo wiibu naale loo ɛrɛ ekpo. A dap daabaloo beenyiɛ dɛ̄dɛɛ̄ pya nɛɛ alu “esere wa loo dum a naatah.”—Doonu 13:48.

Sɔ̄ akii adumɛ, i wee sere ekɛɛrɛ nyɔɔ kɛ̄ ekɔ ue aābu bee i sa nɛ kpa pya nɛɛ doo. Mɛ nyaawo alu ebɛɛ̄ kɔ i nyimɛ i kari nyɔɔ kɛ̄ enyɔɔnɛ pya nɛɛ kɔnia ue nyɔɔ Baibol doo. I gbī etɔgɛ kɔ i wereeloo pya dɔɔ̄na tɛ̄maloo enyɔɔnɛ wa kɔnia ue nyɔɔ pya nu ba ɛrɛ nia bu. Lo ama kura kɔ i lu pya a naa agabah sa kuūdɛɛ̄kɛ̄ kɛɛrɛbu loo nu alu ekɛɛrɛ ziī ziī nɛɛ le pya nu ba ɛrɛ nia bu. Nwīekpo kpa ama eyerebah i nɛ kɔ i dap doo wo doodoo wa?

Nwīekpo kpa ama ɛrɛ 12 nuenɔ lo a tɔgɛ pya elap dogo alu ebɛɛ̄ kɔ i ɛrɛ lokwa i dap wereloo pya nɛɛ sa doo kɔ ba a nyɔɔnɛ dumɛ Jizɔs. Ziī ziī nuenɔ dɛɛa nyɔɔ e’ɛma a le bu Baibol a kɔ nu akiiloo ziī keebee elap dogo lo Jizɔs ale dɔɔ̄na nɛɛ zue ue a bee tɔɔ̄dum bu tua sɔ̄ o’oo tup zua bee tɔgɛ bu ye esiatam zue ue. Naale kɔ ue nɛ pya nɛɛ aābu bee i na i seea sī a, mɛ lo egbī pya sīdee etɔgɛ wereloo wa kumaloo. Kere sɔ̄ ziī ziī elap dogo ama lu ebɛɛ̄ bu i tam zue ue a, i kɛɛrɛbu loo kɛ̄ ziī ziī pya lo elap dogo lu ebɛɛ̄ kaāna doo kuma sɔ̄ i gaa bɔātɛ̄ enyɔɔnɛ pya nɛɛ kɔnia ue a aabu Baibol, sɔ̄ i gaa wa obia si loo, ale sɔ̄ i gaa sere enɔānu Baibol.

Kuma sɔ̄ o gaa nɔ ziī ziī nuenɔ ama, su kaāna ekɛɛrɛ nɛ kɛ̄ o dap tɔgɛ lo elap dogo doo sɔ̄ o aa nyɔɔnɛ pya nɛɛ a le kɛ̄ o tɔɔ̄ kɔnia ue. Piiga lo e’agɛrɛtɛ̄ wereloo o ɛrɛ loo Jɛhova le pya nɛɛ. Wereloo lo a eenyɔɔ ɛrɛgeba kari o ɛrɛ, eyerebah a nɛ kɔ o dap doo kɔ pya nɛɛ a nyɔɔnɛ dumɛ Jizɔs dookɛ̄ o bee seea sī lo edoo doo.

I tɔgɛ kaāna nia lo enyɔɔnɛ i siniātam bah le bah. (Zef 3:9) Jɛhova a nɛ leelee dɛ̄dɛɛ̄ bui kuma sɔ̄ bui gaa kiisī lo ewereloo pya nɛɛ sa doo kɔ ba a nyɔɔnɛ dumɛ Jizɔs.