1. E na kpa Eklisiastis 3:1, 7 i tɔgɛ a?

PIO ii para kɔ ue gbɛnɛ. E pio ii para nage ubepiī. Dookɛ̄ dɔ kpa kaɛ a bɛɛ ekobee ue ama tɔgɛ doo, a ɛrɛ sɔ̄ ekɔ ue le sɔ̄ e ubepiī. (Buū Eklisiastis 3:1, 7.) Kerewo, dap i nia kɔ pya i wuga nɛɛdam le nɛɛwa a kɔ ue i nɛ gbɛnɛ-edo sɔ̄. E i dap nage gbī kɔ pio aba aa kɔ gbɛnɛkpo ue.

2. Mɛɛ̄ na a ɛrɛ ekpo esere daakuu nyɔɔ sɔ̄ i kɔ ue le kɛ̄ i kɔ ue doo a?

² Ekɔaue lu dɔɔ̄nu a aabah Jɛhova. (A’aa 4:10, 11; Mum 4:11) Bu ye Muɛ̄ Ue, a yerebah i nɛ kɔ i suā kɛ̄ esu dɔɔ̄nu ama daānu leere doo. Bu ekobee ue ama, i gaa le nɔ pio edoba a le bu Baibol lo eyerebah i nɛ kɔ i suā sɔ̄ ekɔ ue le sɔ̄ e ubepiī. I gaa le nɔnage nu Jɛhova kɛɛrɛ akiiloo nu i kɔ nɛ pya dɔɔ̄na. Tuatua, i dasī kɔ ue nyɔɔ sɔ̄ a bɔloo kɔ i kɔ ue.

3. Dookɛ̄ Pya Rom 10:14 kɔ doo, mɛ sɔ̄ na a bɔloo kɔ i kɔ ue a?

³ I ɛrɛ ekpɛ̄naloo ekɔ nu akiiloo Jɛhova le ye Buɛ̄-mɛnɛ dɛ̄dɛɛ̄ sɔ̄. (Mat 24:14; buū Pya Rom 10:14.) Dodoo wo tɔgɛ kɔ i gaa nɔ Jizɔs. Ziī nu anua Jizɔs bee lu a kɛnɛkɛ̄ na lo etɔgɛ kaka ue akiiloo ye Tɛ pya dɔɔ̄na. (Jɔn 18:37) Mɛ a bɔloo kɔ i suā kɔ kɛ̄ i kɔ ue doo lunage ebɛɛ̄. Nyɔɔwo, sɔ̄ i gaa kɔ nu akiiloo Jɛhova nɛ pya dɔɔ̄na, i ɛrɛ edoo wo bu ‘kumalookɛ̄ le enwadɛɛ̄,’ sa i tɔgɛ nage kɔ i kɛɛrɛbu pya dɔɔ̄na le nu ba yiga. (1 Pit 3:15) E taā i aadee kɔ ue nɛ nɛɛ; i tɔgɛ ye nu sa piiga lo e’ina ye bu beenyiɛ.

4. Bu mɛ sīdee na i ekɔaue dap yerebah nɛ pya dɔɔ̄na dookɛ̄ alu ekɔ doo bu kpa Kam 9:9 a?

 ⁴ Pya kanɛɛ aa ɔbɛ ekɔ ue sɔ̄ ba muɛ̄ kɔ ziī wuga nɛɛdam ale nɛɛwa gbī kɔ alu ezuura ye bahtɔ̄. Kerewo, ba ekɔ ue ama sɔ̄ a bɔloo lokwa ba naa bɔbɛɛ kɛɛ lo nɛɛ. Ba dap kɔ ue ama kɛ̄ pya dɔɔ̄na nɛɛ naale. Pya kanɛɛ epiiga nage lo ekɔ ue bu sīdee a tɔgɛ ka le enwadɛɛ̄. Kerewo, ba naale e’ɔbɛ esu zuurabahtɔ̄ a le bu Baibol yeābah nɛ pya dɔɔ̄na lokwa ba dap biaɛfii nu leere. (Buū Kam 9:9.) E na anua a bɔloo kɔ i su e’agaloo kɔā ue sɔ̄ a bɔloo a? Naa ɛp baɛ edoba alu kee loo ziī ama: Bu ziī aba, ziī gbara gaa zuurabahtɔ̄ pya ye miɔŋɔ, e bu elua a, ziī wa gaa gbī ekɔ ue nɛ nɛɛ a gae lu mɛnɛ.

5. Mɛ sɔ̄ na Eli Gbɛnɛ Nɛɛ Tɛsī Ewɔp naa bee kɔ ue sɔ̄ a bɔloo kɔ ebee kɔ ue a?

⁵ Eli Gbɛnɛ Nɛɛ Tɛsī Ewɔp bee ɛrɛ baɛ miɔŋɔ nɛɛdam lo a bee wereloo kaāna. Kerewo, pya lo miɔŋɔ naa bee nwadɛɛ̄ Jɛhova. Ba bee ɛrɛ dee lo esitam doodoo pya ewɔp bu tɔkpo. Mɛ ba bee su wa ekpo daā nu bu pɔrɔ sīdee, naa tɔgɛ enwadɛɛ̄ kumaloo waara zɔɔ alu edoo nɛ Jɛhova, sa kunagā bie bu tɔkaɛ. (1 Sam 2:12-17, 22) Dookɛ̄ Lok Mozis kɔ doo, ebee lu efɛ pya miɔŋɔ Eli ama, mɛ Eli bee wa aadee kɔgara ue bu fɛgɛ sa wa aaloo kɔ ba a kiisī lo esitam bu tɔkaɛ. (Deut 21:18-21) Kɛ̄ Eli aabaloo kɛ̄tɔɔ̄ ama doo bee tɔɔ̄loo Jɛhova doodoo wa? A bee kɔ nɛ Eli kɔ: “E na anua o nɛ ka pya o miɔŋɔ mɛ ee a?” Lɛɛ Jɛhova biaɛfii lo efɛ baɛ gbara ama.—1 Sam 2:29, 34.

6. E na i nɔ aāloo Eli a?

⁶ I nɔ gbɛnɛ nu aāloo Eli. Lo i muɛ̄ kɔ i gbo ale i wuga egbeera lok Bari, i ɛrɛ ekɔ ue sa ye nyɛŋiabu nu lok Jɛhova kɔ. Lɛɛ i muɛ̄ kɔ a ɛrɛ yerebah a aabah pya nɛɛ Jɛhova etubobaloo. (Jem 5:14) Ii le ele doodoo Eli, sa nɛ ka pya i gbo ale i wuga ee Jɛhova. A gbī kɔ i ɛrɛ e’agaloo lo ekɔ ue nɛ nɛɛ zuurabahtɔ̄ bɛɛ̄, mɛ nu esira aabu elee kaāna. Naa ɛp kee a le yɛɛ edoba Eli le lo wa alu Izrɛl a kura Abigail.

7. E na anua Abigail bee kɔ ue nɛ Devid a?

⁷ Abigail bee le wa ziī nɛɛ a bee ɛrɛ gbɛnɛ-edo kɛnɛkɛ̄ a kura Nabal. Sɔ̄ Devid  le pya nɛɛ a bee ye le loo gaa bee teera aaloo Sɔɔl, ba bee tɔɔ̄ kpaɛ̄ pya a wee tɔɔ̄loo naana pee Nabal sa wa nyɔɔnɛ kuūdɛɛ̄loo pya lo naana pee lokwa pya biu naa yib. Nabal bee tɔgɛge nia kumaloo nu ba bee doo ama ni? Eeye. Sɔ̄ Devid bee bara Nabal kɔ a nɛe wa nuede, Nabal bee si saŋ sa tue Devid le pya a bee ye le loo. (1 Sam 25:5-8, 10-12, 14) Nu a bee sira aabu na bee, Devid bee biaɛfii lo efɛ dɛ̄dɛɛ̄ nɛɛdam a le tɔ Nabal. (1 Sam 25:13, 22) Dua pɔrɔ nu ama elu e’ɔbɛ doodoo wa? Abigail bee suā kɔ e’ina sɔ̄ ekɔ ue, nyɔɔwo a bee su e’agaloo kuma ee wee zɔ̄ŋia Devid le 400 nɛɛ ba aara nu nɔ̄ lo loo wa gaa bee lɛɛ, e bu wa gaa bee biira nage.

8. E na i nɔ aāloo edoba Abigail a?

⁸ Sɔ̄ Abigail bee zɔ̄ŋia Devid, a bee kɔ ue bu e’agaloo, bu enwadɛɛ̄, le bu sīdee ezū nɛɛ. Kere a naale Abigail na a bee nua lo taāŋa a, a bee taāŋa loo Devid. A bee kɔ nu akiiloo pya lele elap dogo Devid sa bee dɛɛa nyɔɔ Jɛhova kɔ eyereebah ye nɛ. (1 Sam 25:24, 26, 28, 33, 34) Doodoo Abigail, i dap su e’agaloo kɔā ue lo i muɛ̄ ziī nɛɛ a gaa gbī edoo nu eyere ye bu taāŋa. (Yɔɔ 141:5) I ɛrɛ etɔgɛ enwadɛɛ̄, mɛ i ɛrɛ nage e’agaloo. Sɔ̄ i nɛ zuurabahtɔ̄ bu wereloo, i tɔgɛ kɔ i lu kaāna gbo.—Kam 27:17.

9-10. E na pya kanɛɛ ɛrɛ enyɛŋiabu sɔ̄ ba gaa zuurabahtɔ̄ pya dɔɔ̄na a?

⁹ Lu ebɛɛ̄ kɔ pya kanɛɛ a su e’agaloo kɔā ue nɛ pya nɛɛ a tɛɛ̄ ekwɔ a le bu bɔŋanaloo. (Gal 6:1) Pya kanɛɛ kumalookɛ̄ sa suā kɔ ba naa mmana le kɔ ba dabe nage gbīe zuurabahtɔ̄ ziī dee  a ee. Mɛ pya kanɛɛ naa doo kɔ lo ama a ɔbɛ wa lɛɛloo ekāmɛnɛ pya a gbī zuurabahtɔ̄. (2 Tim 4:2; Taitɔs 1:9) Sɔ̄ ba gaa zuurabahtɔ̄ nɛɛ, ba piiga lo esu kari kɔāue sa tɔgɛnu bu egerebu. Ba wereloo pya wa wuga, sa lo ama doo kɔ ba a yerebah wa nɛ. (Kam 13:24) Mɛ taɛ nu ba su nua gbɛnɛ na nɛ ka Jɛhova tɛ̄maloo e’aabaloo ye daakuu agɛrɛ le kpega bɔŋanaloo lɛɛloo taāŋa.—Doonu pya Nɛɛ lɛɛratam 20:28.

¹⁰ Aā bɔātɛ̄ i ekɔa nu akiiloo sɔ̄ a bɔloo ekɔ ue. Kerewo, a ɛrɛ sɔ̄ a bɔloo e ubepiī. Pya amunu nu finiabah na i dap kpesī bu kɛ̄tɔɔ̄ ama a?

11. Amunu edoba na Jemes bee su kɔā ue a, e e na anua alu ebɛɛ̄ a?

¹¹ Pio sɔ̄, dap i agabah e ubepiī. Nɛɛ a bee ɛm Baibol a kura Jemes bee su edoba a bɔloo baātɛ̄ nu finiabah ama. A bee kɔ: “E lo a le nɛɛ naa tɛɛ̄ ekwɔ bu nu a kɔ, alɛ lu nɛɛ a mma, sa lu nɛɛ a damanage aa dɛ̄dɛɛ̄ ye loo.” (Jem 3:2, 3) Wee lu esu ekpo kpe bɔp loo ekobee enyanya sa a lunage esu ye yere bu egā. Tɛ̄maloo ezuura lo eziī, nɛɛ a gaa ɔp enyanya edap baɛloo lo enyanya ale doo kɔ a yira ziī dɔ. Lo a le lo nɛɛ naa aabaloo lo eziī leere, lo enyanya eteera kii ɛrɛgeba kɛ̄ sa a yere muū loo aba ɛɛ le nɛɛ a le nyɔɔ. Bu aba lo sīdee, lo ii baɛloo i edɛm, dap i yere bu taāŋa. I naa ɛp pio kɛ̄tɔɔ̄ a bɔloo kɔ i “bɔp i edɛm” sa i aa kɔ ue.

12. Mɛ sɔ̄ na i “bɔp i edɛm” sa ii le ekɔ ue a?

¹² Wee a tɔɔ̄loo doodoo wa lo ziī wuga nɛɛdam ale nɛɛwa suā ziī nu a bɔloo kɔ a sere bu gɔā ni? Bu edoba, lo  o zɔ̄ŋia ziī wuga a le kɛ̄ alu ekpaɛ̄ i tam, o wee gbī ebip ye nu akiiloo kɛ̄ a gaa lu e’aabaloo i tam lo barasī doo ni? Bu kaka, o ekɛɛrɛ ama lee. I wereloo pya i wuga sa gbī esuā nu a gaa wa sira loo. I gbī nage esu wa yere bu kara sɔ̄ i gaa yere kara. Kerewo, sɔ̄ a le doo wo na sɔ̄ e “bɔp i edɛm” sa ii le ekɔ ue a. Lo i bialoo bip ue ziī nɛɛ a suā ue a le bu gɔā, ii tɔgɛ wereloo kumaloo lo nɛɛ le pya wuga nɛɛdam le nɛɛwa lo ba ye dɛrɛ nyiɛ nyɔɔ kɔ a naale ekɔ lɔgɔ nu akiiloo wa esiatam bie lo barasī. Bu kaka, lɔgɔ ii ii le egbī edoo kɔ nu a agɛrɛbah agaloo pya i wuga nɛɛdam le nɛɛwa ba tɔɔ̄ barasī alu ekpaɛ̄ i tam. Bu aba lo sīdee, lɔgɔ wuga nɛɛdam ale nɛɛwa a tɔɔ̄ dua barasī a le doo wo naale egbī ekɔ gɔā ue akiiloo kɛ̄ pya Ekeebee a le lo barasī nɔɔ̄ si enɔānu le uwe zue ue doo.

13. Dookɛ̄ kpa Kam 11:13 kɔ doo, e na pya kanɛɛ edoo a, e e na anua a?

¹³ Lu ebɛɛ̄ kɔ pya kanɛɛ a su zuurabahtɔ̄ a le bu kpa Kam 11:13 yere bu dogo tɛ̄maloo esere ue gɔā. (Buū.) Lo ama dap lu nu finiabah, eetɔɔ̄ na kumaloo pya kanɛɛ ba e’ɛrɛ wa. Dam le wa wee agɛrɛtɛ̄ wa gbanialoo tɛ̄maloo ekɔ ue nɛ ziī dɛ̄dɛɛ̄ sɔ̄ akiiloo nu ba kɛɛrɛ, kɛ̄ nu wa tɔɔ̄loo doo, le taāŋa ba gaa kpesī. Mɛ nɛɛ kanɛɛ suā kɔ a naa bɔloo kɔ a kɔ “ue gɔā” akiiloo pya a le bu bɔŋanaloo. Lo a doo wo, ba naale edɛrɛ na ye nyiɛ nyɔɔ sa lo ama egbee ye bee. Pya alu etubobaloo kɔ ba a aabaloo dɔtam bu bɔŋanaloo naale elu pya “ba ɛrɛ baɛ edɛm” ale pya a dag nɛɛ. (1 Tim 3:8.) Lo a kura kɔ ba naale elu pya a dag nɛɛ ale pya a tɛɛ̄ piri. Lo nɛɛ kanɛɛ wereloo ye wa, a naale ekɔgara pya ue a naa bɔloo kɔ a dā ye nɛ.

14. Bu mɛ sīdee na wa nɛɛ kanɛɛ eyerebah ye nɛ kɔ a ɛrɛ le bee a?

¹⁴ Wa eyerebah nɛ ye dam kɔ a ɛrɛ le bee tɛ̄maloo kɔ a naale esu bah ekpo ye aā kɔ a kɔ nu a bɔloo kɔ ebee sere bu gɔā. Lo wa doo pya nu ama, a gaa le yerekpotɛ̄ ye dam sa tɔgɛ nage enwadɛɛ̄ kumaloo pya a ye dɛrɛ nyiɛ nyɔɔ. E lo a kuī eera, a doo kɔ bu Jɛhova a ɛɛ nyɔnɛbee a gaa yerebah lo enyimɛ efɛɛloo le gbaaloo bu bɔŋanaloo.—Rom 14:19.

15. Bu mɛ sīdee na Jɛhova bee doo dogo kumaloo taa pya gbo Job a, e e na anua a?

¹⁵ I dap nɔ gbɛnɛ-edo nu aābu kpa Job akiiloo kɛ̄ ekɔ ue doo le sɔ̄ i kɔ ue. Sɔ̄ Job etɛ̄na bu gbɛnɛ-edo taāŋa sah, nia nɛɛ bee lu wee nɛ ye egbɔ̄nyiɛ le zuurabahtɔ̄. Pya nɛɛ ama bee ubepiī bu pio sɔ̄. Mɛ tɛ̄maloo ue taa pya ye gbo a kura Elifaz, Bildad, le Zofa bee sikɛ̄ kɔ, a tɔgɛ kɔ ba naa bee dasī kɛɛrɛ nu ba ekɔ lo eyerebah nɛ Job. Taāwo, ba gaa bee kɛɛrɛ nu ba ekɔ lo etɔgɛ kɔ Job doo piya nu. Ba bee kɔ pio ue a lera, mɛ gbɛnɛkpo ue ba bee kɔ kumaloo Job le Jɛhova naa bee lu kaka ale lu fɛgɛ. Ba bee biaɛ Job bu pɔrɔ sīdee. (Job 32:1-3) Jɛhova bee doo dogo doodoo wa? Ye saŋ bee bɛamiā pima taa gbara ama. A bee kɔ ba lu ezu sa wa kɔ nɛ kɔ ba a si loo Job kɔ a yere wa kara bee.—Job 42:7-9.

16. E na i dap nɔ aāloo pɔrɔ edoba Elifaz, Bildad, le Zofa a?

 ¹⁶ I nɔ gbɛnɛ-edo nu aāloo pɔrɔ edoba Elifaz, Bildad, le Zofa. Tuatua, ii le ebiaɛ pya i wuga. (Mat 7:1-5) Taāwo, i gbaɛ̄ wa tɔ̄ loo kaāna lɛɛ i gae kɔ ue. Aba nu edap doo kɔ i dābeeloo wa kɛ̄tɔɔ̄ lo. (1 Pit 3:8) Eree baɛ, sɔ̄ i kɔ ue, i ɛrɛ emuɛ̄ kɔ pya i ue lu fɛgɛ sa lunage kaka. (Ɛfɛs 4:25) E lo eree taa, Jɛhova ɛrɛ taɛ bu ue i kɔ nɛ ɛnia ii.

17. E na i dap nɔ aāloo edoba Elihu a?

¹⁷ Eree nia nɛɛ a bee siloo Job na Elihu, manamana Abreham. A bee gbaɛ̄tɔ̄ sɔ̄ Job le taa pya elua nɛɛ a gaa kɔ ue. A bee gbaɛ̄tɔ̄loo Job kaāna nyɔnɛbee a bee ye zuurabahtɔ̄ bu fɛgɛ lo a bee ye yerebah nɛ kɔ a sikɛ̄ kɛɛrɛ nu leere. (Job 33:1, 6, 17) Nu a bee kuī loo Elihu kaāna na dana bee Jɛhova nɛ nyɔɔ, e a naale alɛɛ bee ale bee dɔɔ̄na nɛɛ. (Job 32:21, 22; 37:23, 24) Nu i nɔ aāloo edoba Elihu na kɔ a ɛrɛ sɔ̄ a bɔloo ekɔ ue le sɔ̄ e ubepiī. (Jem 1:19) I nɔnage kɔ sɔ̄ i gaa zuurabahtɔ̄ nɛɛ, nu a kuī i loo kaāna na lo enɛ ka Jɛhova, e a naale aba ii.

18. Bu mɛ sīdee na i dap tɔgɛ nia loo dɔɔ̄nu kɔ ue a?

¹⁸ I dap tɔgɛ nia loo dɔɔ̄nu kɔ ue tɛ̄maloo enyɔɔnɛ zuurabahtɔ̄ a le bu Baibol nyɔɔ kɛ̄ ekɔ ue doo le sɔ̄ i kɔ ue. Tɛ̄maloo kaɛ edɔɔ̄ Mɛnɛ Solomɔn a suānu bee ɛm kɔ: “Ue a bee lu ekɔ sɔ̄ a bɔloo le doodoo pio apple gold bu nu silver.” (Kam 25:11) Sɔ̄ i gbaɛ̄tɔ̄loo pya dɔɔ̄na kaāna sa kɛɛrɛ nu lɛɛ i gae kɔ ue, i ue ele doodoo pio apple gold, lo a kura kɔ elee sa dɔbiī. Lo sɔ̄, kere ue i kɔ tera ale a kuī, ewu pya dɔɔna, e i doo kɔ bu Jɛhova a ɛɛ i loo. (Kam 23:15; Ɛfɛs 4:29) Taɛ dua sīdee ama na a bɔloo kɔ i tɔgɛ nia loo dɔɔ̄nu Bari i nɛ a.