1. Kaka ue tɔɔ̄ a loo doodoo wa?

 PYA nɛɛ Jɛhova wereloo kaka ue alu egbī muɛ bu Muɛ̄ Ue Bari. E nyɔɔ lo kaka ue na i wu i yira a. (Rom 10:17) I yiga kaāna kɔ Jɛhova na a bee wu bɔŋanaloo Pya Nɛɛ Kraist a sa doo kɔ alu “bā le ekatɛ̄-be kaka ue.” (1 Tim 3:15) E bu ɛɛbu i su i loo sere kɛɛ̄ “pya a gaa su zaasī” i yɛɛ, lo ba baatɛ̄ kaka ue a aabu Baibol i nɛ, sa i nɛ pya leredeebah lo eyerebah i nɛ kɔ i doo nu alu bura Bari.—Hib 13:17.

2. Dɛɛa nyɔɔ ue a le bu kpa Jemes 5:19, ena edap i sira loo kere sɔ̄ i e nɔa kaka ue sa a?

² Mɛ kere sɔ̄ i esua baɛbah suā kaka ue sa yiga kaāna kɔ bɔŋanaloo Bari na a gaa nɛ leredee a bɔloo edɛɛa nyɔɔ a, a dapnage lu e dag i. (Buū Jemes 5:19.) Ziī gbɛnɛ nu a nia Satan na lo edoo kɔ i ɔbɛ edɛrɛ nyiɛ nyɔɔ Baibol ale leredee i ɛrɛ aābah bɔŋanaloo Bari.—Ɛfɛs 4:14.

3. Ena a nua alu ebɛɛ̄ kɔ i aabahloo kaka ue agɛrɛ a? (Ɛfɛsɔs 6:13, 14)

³ Buū Ɛfɛsɔs 6:13, 14. Nwīgbagbara sɔ̄ aā anyaawo, Pɔrɔ edɔɔ̄ gaa le su esah daŋa dɛ̄dɛɛ̄ edonyɔɔ lokwa ba gbanasī Jɛhova. (Mum 16:13, 14) E i suānage kɔ, Satan e piiga ɛrɛgebah kɛ̄ a dap doo lo edag pya nɛɛ Jɛhova. (Mum 12:9) Nyɔbee wo, alu ebɛɛ̄ kɔ i kpɔā iloo anyaawo lokwa i suā kee a le yɛɛ kaka ue le esah sa gbaɛ̄tɔ̄loo kaka ue. (Rom 6:17; 1 Pit 1:22) Kpɔā i ɛrɛ bu gbɛnɛ etɛɛrɛloo edɛɛa nyɔɔ kɛ̄ i suā kee a le yɛɛ kaka ue le esah sa gbaɛ̄tɔ̄loo kaka ue doo!

4. Ena i nɔ bu ekobee ue ama a?

 ⁴ Bu ekobee ue ama, i gaa le nɔ nu a kiiloo baɛ elap dogo lo alu ebɛɛ̄ kɔ i ɛrɛ, lo eyerebah i nɛ kɔ i suāloo kaka ue a aabu Baibol sa su leredeebah a aabah bɔŋanaloo Bari. Lɛɛ i nɔ taa nu eyerebah i nɛ kɔ i kiisī lo e aabahloo kaka ue agɛrɛ.

PYA ELAP DOGO A I BƐƐ̄ LOKWA I SUĀLOO KAKA UE

5. Bu mɛ sīdee na ɛrɛ bɔɔ loo Jɛhova i yerebah nɛ kɔ i suāloo kaka ue a?

⁵ Aa bɔɔ loo Jɛhova. Nu ɛrɛ bɔɔ loo Jɛhova bu sīdee a kaāna kura na, were ye loo mmɛ kɛ̄ ii gbī edoo lɔgɔ nu ebɛā ye doo pippip. A taɛ i enɔ kee a le yɛɛ, nu a lee le nu a naa lee, kaka le esah, lokwa bu Jɛhova i ɛɛ loo. (Kam 2:3-6; Hib 5:14) Ii ɛrɛ e aaloo kɔ bɔɔ i ɛrɛ loo nɛɛ a kuī eenyɔɔ wereloo i ɛrɛ kumaloo Jɛhova, nyɔɔbee gbɛnɛ-edo nu a nia miɔŋɔ nɛɛ wee bɛā Jɛhova.

6. Bu mɛ sīdee na bɔɔ loo nɛɛ bee doo kɔ lop pya gɔā ɛp buɛ̄ ba aa Izrɛl a nyaana egā loo kaka ue a?

⁶ Lo bɔɔ i ɛrɛ loo nɛɛ eenyɔɔ bɔɔ i ɛrɛ loo Bari, e zuura i lɛɛ loo kaka ue. Naa kɛɛrɛbu loo edobah akiiloo 12 pya a bee lu eyere kɔ ba a si wee ɛp buɛ̄ Jɛhova bee yira yii lo enɛ pya Izrɛl. Yɛɛ 12 pya a bee lu eyere ama, lop aba bee lɛɛbahloo kɔ bɔɔ ba ɛrɛ loo pya Kenan a eenyɔɔ wereloo ba ɛrɛ loo Jɛhova. Ba bee kɔ nɛ pya wa wuga alu Izrɛl kɔ, “ii le edap kii nyɔɔ lo edoo pya nɛɛ ama; nyɔnɛbee ba ɛrɛ ekpo i ee.” (Buā 13:27-31) Alu kaka kɔ, aākɛ̄ miɔŋɔ nɛɛ ɛp nu doo pya Kenan bee ɛrɛ ekpo ee pya Izrɛl. Kerewo, ɛrɛgebah nɛɛ a kɔ pya Izrɛl naale edap be eeba pya wa nɛɛ baa naa dasī kɛɛrɛ nu a kiiloo Jɛhova. E bee lee lo a le lop pya nɛɛ ama bee sere ekɛɛrɛ nyɔɔ nu Jɛhova gbī kɔ pya Izrɛl a doo. Ba ebee kɛɛrɛnage bu loo nu Jɛhova ebee wa doo nɛ lɛɛ a gae lu lo sɔ̄. Lo ba bee doo wo, ba e bee  muɛ kɔ ekpo pya Kenan ɛrɛ ama naa lu lɔgɔ nu sɔ̄ alu esu dooreloo ekpo Jɛhova ɛrɛ, lo alu ekpo a eenyɔɔ dɛ̄dɛɛ̄ ekpo. Joshua le Kaleb bee lu kee loo lop pya a naa bee ɛrɛ yira ama, e baɛ aba bee gbī edoo nu edoo kɔ bu Jɛhova a ɛɛ wa loo. Ba bee kɔ nɛ pya wa wuga Izrɛl kɔ: “Lo a le Jɛhova ɛrɛ ɛɛbu i loo, a gaa le su i nua bu buɛ̄ a, sa ye su i nɛ.”—Buā 14:6-9.

7. Bu mɛ sīdee na i dap doo kɔ bɔɔ i ɛrɛ loo Jɛhova a agatɛ̄ a? (Ɛpnage foto.)

⁷ Lo e agɛrɛtɛ̄ bɔɔ i ɛrɛ loo Jɛhova, alu ebɛɛ̄ kɔ ɛrɛgebah sɔ̄ i gaa gbī edoo ziī biaɛfii i dasī kɛɛrɛ nu e nia ye. (Yɔɔ 16:8) Sɔ̄ o aa buū ziī nu a bee sira lo a lu e’ɛm bu Baibol, bip oloo kɔ, ‘lo mda bee le bu kɛ̄tɔɔ̄ ama, ena m bee biaɛfii lo edoo a?’ Bu edobah, naa su kɔ o waa gbaɛ̄tɔ̄ sɔ̄ lop pya gɔā ɛp buɛ̄ alu Izrɛl aa kɔ pɔrɔ kpɛa nɛ pya wa wuga kɔ pya Izrɛl naale edap be eeba lo buɛ̄. E kɔ o bee yiga lo pɔrɔ kpɛa sa ɛrɛ gbɛnɛ bɔɔ loo nɛɛ sɛh o bee lɛɛgebahloo kɔ wereloo o ɛrɛ loo Jɛhova le taɛ o ɛrɛ lo e doo nu a ye nia a agatɛ̄ ee bɔɔ o ɛrɛ loo nɛɛ ni? Yube loo edonyɔɔ Izrɛl naa bee yiga kɔ nu Joshua le Kaleb aa kɔ lu kaka. E nu a bee sira aabu na kɔ, ba bee peere dee ba bee ɛrɛ lo eyii bu buɛ̄ a bee lu eyira yii loo.—Buā 14:10, 22, 23.

8. Amunu elap dogo na i piiga lo e’ɛrɛ a, e ena anua a?

⁸ Kumalookɛ̄. Jɛhova wee muuna kaka ue nɛ pya a kumalookɛ̄. (Mat 11:25) Sɔ̄ a bee lu eyerebah i nɛ lokwa i nɔ kaka ue, i bee kumalookɛ̄ sa su baɛbah suā. (Doonu 8:30, 31) Kerewo, i ɛrɛ e nwaɛdɛɛ̄ lokwa ii bɔātɛ̄ e eeloo nɛ nyɔɔ. Lo i eeloo nɛ nyɔɔ, dap doo kɔ i bɔātɛ̄ ekɛɛrɛ kɔ kɛ̄ ili kɛɛrɛ nu doo lera sa lu nu suānu le loo ee pya daakuu Baibol le leredeebah a aabah bɔŋanaloo Jɛhova.

9. Bu mɛ sīdee na i dap kiisī lo e kumalookɛ̄ a?

⁹ Lokwa i kiisī lo e kumalookɛ̄, alu ebɛɛ̄ kɔ i nyɛŋiabu kɔ sɔ̄ i su i loo dooreloo Jɛhova i tera sa ii lu lɔgɔ nu. (Yɔɔ 8:3, 4) I dapnage yere kara nɛ Bari sa ye bara kɔ a yerebah i nɛ kɔ i kumalookɛ̄, sa kpɛ̄naloo enɔnu. Jɛhova eyerebah i nɛ kɔ i ɛp ye ekɛɛrɛ lo a i nɛ tɛ̄maloo ye Muɛ̄ Ue le ye bɔŋanaloo, emanyɔɔ loo ili. Sɔ̄ o waa buū Baibol nyɔɔ oloo, gbī pya nu a tɔgɛ kɔ Jɛhova wereloo kumalookɛ̄ sa baaloo eeloo nɛ nyɔɔ, kakaaga, le dānaloo. Sa nwaɛdɛɛ̄ kaāna sɔ̄ alu enɛ a ziī dɔ tam lo a doo kɔ o ɛrɛ ekpo bee pya dɔɔ̄na.

BU MƐ SĪDEE NA I DAP BIIBAHLOO KAKA UE AGƐRƐ A

10. Ba mɛɛ na Jɛhova esua kɔa ue sa nɛ leredeebah pya ye nɛɛ a?

¹⁰ Kiisī lo edɛrɛ nyiɛ nyɔɔ leredeebah a aabah bɔŋanaloo Jɛhova. Bu buɛ̄ Izrɛl a dee kere, Jɛhova wee kɔ ue nɛ pya Ye nɛɛ tɛ̄maloo Mozis, e sɔ̄ esaa a bee kɔ tɛ̄maloo Joshua. (Josh 1:16, 17) Sɔ̄ pya Izrɛl bee ɛp pya nɛɛ ama doodoo pya a tɔɔ̄dɔ Jɛhova, ba bee ɛrɛ leelee. Sɔ̄ gbɛnɛ-edo zua etɛ̄na aā sɔ̄ a bee lu ewu bɔŋanaloo Pya Nɛɛ Kraist, a bee le 12 pya nɛɛ leeratam na a bee nɛ leredeebah a. (Doonu 8:14, 15) Sɔ̄ a esaa, pya dɔɔ̄na nɛɛ kanɛɛ ba le Jerusalem bee wa gbaaloo. Tɛ̄maloo enyɔɔnɛ leredeebah pya nɛɛ a bɔ ture nyiɛ loo ama nɛ, “dɛ̄dɛɛ̄ bɔŋanaloo Kraist bee agaloo bu yira, sa ba yii loo bu buā dɛ̄dɛɛ̄ dee.” (Doonu 16:4, 5) Bu ilii dee ama, ili ɛrɛnage leelee sɔ̄ i nyɔɔnɛ  leredee a aabah bɔŋanaloo Bari. Mɛ etɔɔ̄loo Jɛhova doodoo wa lo ii yiga e’ɛp pya nɛɛ a gaa su zaasī i yɛɛ nua pya nɛɛ Jɛhova etubebahloo ni? I dap agara ebip ama tɛ̄maloo ekɛɛrɛ nu a bee sira sɔ̄ pya Izrɛl aa bee kii buɛ̄ a bee lu eyira yii loo.

11. Bu Izrɛl a dee kere, ena a bee siraloo pya nɛɛ a naa bee nwadɛɛ̄ nɛɛ Jɛhova bee sagɛ kɔ a zaā wa sī, lo a le Mozis a? (Ɛpnage foto.)

¹¹ Sɔ̄ pya Izrɛl aa bee kiā kii buɛ̄ a bee lu eyira yii loo, pya nɛɛ a siā bee a wa le yɛɛ bee be Mozis le dɔ tam Jɛhova bee ye nɛ. Ba bee kɔ: “Dɛ̄dɛɛ̄ bɔŋanaloo lu kaɛ [e a naale aba Mozis], ziī ziī aba, e Jɛhova le wa taɛ yɛɛ.” (Buā 16:1-3) Kereadoo “dɛ̄dɛɛ̄ bɔŋanaloo” bee le kaɛ kɛdɛɛ̄ Bari, Jɛhova bee sagɛ Mozis kɔ a zaāsī pya Ye nɛɛ. (Buɛ̄ 16:28) Sɔ̄ pya a siā bee a le yɛɛ pya Izrɛl lo ba bee lɛɛbeekɛɛ̄ bee be Mozis sa ye gbɛ̄, a bee le Jɛhova na ba bee gbɛ̄ a. Ba naa bee sere ekɛɛrɛ nyɔɔ nu Jɛhova gbī, mɛ nu ba bee sere ekɛɛrɛ nyɔɔ na nu ba alaba gbī lo a le dɔ ekpo, gbɛnɛ dɔ le kɔ pya nɛɛ a yere wa ka loo. Jɛhova bee fɛ pya a gaa bee zaāsī lɛɛbeekɛɛ̄ ama, e a bee fɛnage booboo sɔ̄ baɛ boo le lop tup pya dɔɔ̄na a bee wa yerekpotɛ̄. (Buā 16:30-35, 41, 49) Nii’ee i suānage kɔ bu Jɛhova naa ɛɛ loo pya a naa nwadɛɛ̄ nɔɔnɔɔ nu bu ye bɔŋanaloo.

12. Ena anua i kiisī lo edɛrɛ nyiɛ nyɔɔ bɔŋanaloo Jɛhova a?

¹² I dap kiisī lo edɛrɛ nyiɛ nyɔɔ bɔŋanaloo Jɛhova. Ɛrɛgebah sɔ̄ alu ebɛɛ̄ kɔ alu ekwabahloo ziī nu a kiiloo kɛ̄ i dābeeloo ziī ue a le bu Baibol doo, ale sīdee alu enɔɔ i esiatam Buɛ-mɛnɛ, pya a gaa su zaāsī i yɛɛ naa wee pee sɔ̄ lo ekwabahloo. (Kam 4:18) Ziī nu a nua ba wee doo wo na nyɔɔ bee ba gbī edoo kɔ bu Jɛhova a ɛɛ. Ba wee piiga nage kɛ̄ ba dap doo lo emuɛ kɔ wa biaɛfii dɛɛa nyɔɔ Muɛ̄ Ue  Bari, lo a lu daakuu dɛ̄dɛɛ̄ pya nɛɛ Jɛhova ɛrɛ e nyɔɔnɛ.

13. Ena alu “ue a nɛ le dum” a, e ena i doo lokwa i daba bialoo kaka ue a?

¹³ “Nyɔɔnɛ edobah ue a nɛ le dum.” (2 Tim 1:13) Nu “ue a nɛ le dum” kura na tɔgɛnu Pya Nɛɛ Kraist alu e gbī muɛ bu Baibol. (Jɔn 17:17) Pya tɔgɛnu ama na alu ekatɛ̄ dɛ̄dɛɛ̄ nu i yiga a. Bɔŋanaloo Jɛhova tɔgɛ i kɔ i daba bialoo sa muɛ kɔ dɛ̄dɛɛ̄ pya nu i yira a dɛɛa nyɔɔ pya tɔgɛnu ama. Lo i doo doo wo, i gaa le ɛrɛ leelee.

14. Bu mɛ sīdee na pio Pya Nɛɛ Kraist naa bee aabahloo “ue a nɛ le dum” agɛrɛ a?

¹⁴ Ena esira lo a le i ɔbɛ edoo kɔ pya nu i yira a dɛɛa nyɔɔ “ue a nɛ le dum” a? Naa ɛp edobah ama. Bu tua sɔ̄ o’oo tup zua, pio Pya Nɛɛ Kraist bee kɔ dee Jɛhova elua. Naa dabah ue ama bee le bu ziī lɛta lo pya nɛɛ bee kɛɛrɛ kɔ nɛɛ leeratam Pɔɔl na a ɛm a. Taā pio Pya Nɛɛ Kraist a bee le Tɛsalɔnaika dasī gbītɛ̄ lo ue, ba bee yiga sa kɔnage lo esah ue yaari. Lo ba bee nyiɛŋiabu pya nu Pɔɔl ebee wa tɔgɛ sɔ̄ a bee wa le loo, naale e bee lu edag wa. (2 Tɛs 2:1-5) Pɔɔl bee zuurabahtɔ̄ pya ye wuga kɔ ba aa yiga dɛ̄dɛɛ̄ nu ba dā. E lo ama eyerebah wa nɛ lo a le ziī nu a mɛā doo wo sikɛ̄ sira li deesī. Bu lo eree baɛ kpa Pɔɔl bee ɛm ma pya wuga a le Tɛsalɔnaika, a bee kɔ kpaɛ̄ kɔ: “Mda, Pɔɔl, su na bah ɛma kana muɛ̄ ama i ma. Nu ama lu edobah nu bu dɛ̄dɛɛ̄ na kpa m wee ɛm.”—2 Tɛs 3:17.

15. Bu mɛ sīdee na i dap kpega i loo aāloo esah a bee kɔ alu kaka ue a ni? Naa nɛ edobah. (Ɛpnage foto.)

¹⁵ Ena i dap nɔ aāloo pya ue Pɔɔl bee kɔ nɛ pya wuga a bee le Tɛsalɔnaika a? Sɔ̄ i dā ziī ue a lu kee loo nu i ebee nɔ aābu Baibol ale sɔ̄ i dā ziī ue alu nyɛŋia pya nɛɛ kɔ, alu ebɛɛ̄ kɔ i nwaɛdɛɛ̄. Bu barasī Soviet Union a kere, pya i baā bee ɛm ziī lɛta sa nɛ pya wuga e ba bee ɛm lo lɛta bu sīdee a le doodoo bee a aa i beekɛ̄. Lo lɛta bee kɔ nɛ pya wuga kɔ ba a pooa sa ɛrɛ dɔɔ̄na bɔŋanaloo nyɔɔ wa loo. Lo  lɛta bee bee kɔ alu taɛ lɛta, lo a aa i beekɛ̄. Mɛ kerewo, lɛta ama naa bee dap dag pya wuga a bɔ ture nyiɛ loo. Ba bee suā kɔ pya yere ue a le bu lo lɛta naa gbaaloo pya nu e bee lu etɔgɛ wa. Nii’ee, pio sɔ̄ pya a baaloo kaka ue gbī ekwɔ i sa i poo tɛ̄maloo pio ue ba yere nyɔɔ intanɛt, tɛ̄ma bu computa ale fon. Taā i “nwaabah nyɔŋa aa bu [i] ekɛɛrɛ,” i dap kpega i loo tɛ̄maloo edasī kɛɛrɛ sa gbītɛ lo a le nu i dā ale nu i buū gbaageloo pya kaka ue i ebee nɔ naa e.—2 Tɛs 2:2; 1 Jɔn 4:1.

16. Dookɛ̄ ue a le bu kpa Rom 16:17, 18 kɔ doo, ena i doo a lo pio nɛɛ dabia aaloo kaka ue a?

¹⁶ Kiisī lo egbaaloo pya a gaa tɔɔ̄ agara nɛ Jɛhova. Jɛhova gbī kɔ i taāŋa ye bah bu gbaaloo. I gaa le kiisī lo etɔɔ̄bu gbaaloo lo a le i aabahloo kaka ue agɛrɛ. Ɛrɛgebah nɛɛ a dabia aaloo kaka ue wee yere epoo epoo bu bɔŋanaloo, nyɔɔwo Bari zuura i bahtɔ̄ kɔ: “Bui kpooraloo i aa nyɔɔ wa dee.” Lo ii doo wo, i dap zuua aaloo kaka ue sa yiga pya nu a naa lu kaka, e ii le edapna tɔɔ̄ agara nɛ Jɛhova.—Buū Rom 16:17, 18.

17. Pya amunu biī na i ɛrɛ a lo a le i suāloo nu a lu kaka ue sa aa bahloo agɛrɛ a?

¹⁷ Sɔ̄ i suāloo nu alu kaka ue sa aa bahloo agɛrɛ, edoo kɔ i tɔɔ̄bu nwanaloo le kpoogaloo bu edɔɔ̄. (Ɛfɛs 4:15, 16) Wo edoo kɔ alu ekpega i aāloo pya esah tɔgɛnu pɔrɔ edɔɔ̄ le sīdee a gbī edag i, e i kiisī lo ele bu kpoogaloo kɛ̄bah Jɛhova bu gbɛnɛ etɛɛraloo. Kiraasī lo e’aa nu alu kaka biibahloo, “e Bari efɛɛloo eyɔ i tɔɔ̄.”—Fil 4:8, 9.