Nicolas le Céline bee kpesī keekee nu finiabah. Ba bee ɛrɛ aā esiatam aā tɔ naatam a le France lo ekii aā bɔŋanaloo. Ba bee kɔ, “Tua sɔ̄ bu i bee ɛɛ kaāna, sɔ a esaa i bee bɔātɛ̄ epeere pya i gbo. Ii bee dap yiiloo pya wuga bu aā bɔŋanaloo ama leere” a Bu kɛ̄tɔɔ̄ alu finiabah ama, o dap doodoo wa ɛrɛ ɛɛbu sɔ̄ o kii aā bɔŋanaloo ni? Ena pya dɔɔ̄na dap doo lo eyerebah i nɛ a? Amunu leelee bu edɔɔ̄ na o ɛrɛ a, e bu mɛ sīdee na bui dap su yea mɛm loo ziī bu o aā bɔŋanaloo a?

NIA NU EDAP A YEREBAH NƐ SƆ̄ O GAA KPESĪ PYA NU FINIABAH

1. Dɛɛa nyɔɔ Jɛhova. (Yɔɔ 37:5) Ziī wuga nɛɛwa a kura Kazumi li Japan, bee aa bɔŋanaloo e bee tɔɔ̄ nu alu 20 zua, sɔ̄ ye dam bee ɛrɛ aā tam sa a bee lu enyaana ye. Bu mɛ sīdee na a bee “su [ye] dee nɛ Jɛhova a”? A bee kɔ: “M bee yere kara nɛ Jɛhova aā bu na beenyiɛ dɛ̄dɛɛ̄ sɔ̄ kiiloo pya nu bɔɔ, e’ɔaloo, le etɛɛrɛ m bee kpesī. Ɛrɛgebah sɔ̄ m doo wo, Jɛhova wee mɛ nɛ e’agaloo m gbī.”

Bu mɛ sīdee na i dap kiisī lo e dɛɛa nyɔɔ Jɛhova a? Dookɛ̄ te wee gbī maā lokwa a nyim doo, kɛ̄ i yira gbīnage nu edoo kɔ a nyim sa agaloo doolo. Nicolas, a bee lu ekɔ nu a kiiloo tua sɔ̄ a, bee gbī muɛ kɔ kɛɛrɛbu loo edobah Abraham, Jizɔs, le pɔɔl—pya nɛɛ a bee piiga lo edoo nu a lu ekɛɛrɛ Bari—bee ye yere mɛm loo kɔ Jɛhova gaa le yere ye kpotɛ̄. Lo a le o kiisī lo ebuū Baibol  dɛ̄dɛɛ̄ sɔ̄, eyerebah a nɛ kɔ o dap tama pya nyaa bu o dum, e o nɔ pya nu o dap su yea mɛm loo pya dɔɔ̄na bu o aā bɔŋanaloo.

2. O aa su o nama bɔŋanaloo dooreloo o aā bɔŋanaloo. (Eklis 7:10) A bee lu ebɛɛ̄ kɔ Jules a nyaana sīdee doonu wa barasī sɔ̄ a bee aa Benin kii United States. “M bee kɛɛrɛ kɔ m kɔe nu a mɛ kiiloo nɛ dɛ̄dɛɛ̄ pya aā nɛɛ m muɛ,” lo wuga bee kɔ. Nyɔnɛbee lo ama lu kee lo kɛ̄ a wee doonu doo a, a bee bɔātɛ̄ ezuua aaloo pya nɛɛ bu lo bɔŋanaloo. A bee nyaana ye ekɛɛrɛ sɔ̄ a bee suāloo pya wuga nɛɛdam le nɛɛwa leere. Lo wuga bee kɔ, “nyaawo m yiga kɔ dɛ̄dɛɛ̄ pya nɛɛ a le a nyɔɔ kɛnɛkɛ̄ lu ziī. Ba doonu sa kɔ ue bu keekee sīdee. A lee kɔ i su pya nɛɛ dookɛ̄ ba le doo.” Nyɔɔwo, o aa su o nama bɔŋanaloo dooreloo o aā bɔŋanaloo. Dookɛ̄ ziī nɛɛ sɛmdee a kura Anne-Lise bee kɔ doo, “M bee kii dɔɔ̄na bɔŋanaloo lo enɔ aānu, naale bee kɔ dɛ̄dɛɛ̄ nu bu na aā bɔŋanaloo ebee loo nama bɔŋanaloo.”

Alunage ebɛɛ̄ kɔ pya kanɛɛ aa su wa aā bɔŋanaloo dooreloo wa nama bɔŋanaloo. Keekee sīdee doonu naa bee piya. A lee kɔ i suā kɛ̄ lo kɛ̄ mɛā doo lɛɛ i gaa kɔ nu i kɛɛrɛ. (Ekils 3:1, 7b) A lee kɔ i tɔgɛ le edobah pya wuga, e a naale su ba ekpo wa aa kɔ ba a kɛɛrɛ nu dookɛ̄ ili gbī doo —2 Cor. 1:24.

3. Su loo nɛ esiātam bu o aā bɔŋanaloo. (Fil 1:27) Kii aā bɔŋanaloo wee gbī sɔ̄ le mɛm, mɛ alu ebɛɛ̄ kɔ aba sɔ̄ o kii aā bɔŋanaloo o si enɔānu si le si. Nyɔɔbee, lo pya o aā bɔŋanaloo ama naa muɛ a dɛ̄dɛɛ̄ sɔ̄, ba e doodoo wa a yerebah nɛ ni? Lucinda, lo a bee su baɛ ye miɔŋɔ nɛɛwa kuma gbɛnɛ buɛ li South Africa bee kɔ, “A bee lu ekɔ mɛ nɛ kɔ m yiiloo pya nɛɛ bu na aā bɔŋanaloo ama leere, si uwe zue ue, sa sudɔ bu enɔānu dɛ̄dɛɛ̄ sɔ̄. I bee kɔ nɛ pya wuga kɔ ba dap tɔɔ̄ i tɔ ɛrɛ zɔ̄zɔ̄ŋia si uwe zue ue.”

“Sɔ̄ i piiga” lo e nyɔɔnɛ pya wuga nɛɛdam le nɛɛwa siniatam bu bɔŋanaloo edoo kɔ i yere mɛm loo i yira “kiiloo zue le yere ue.” Anne-Lise, i bee kɔ nu a kiiloo tua sɔ̄ a, pya kanɛɛ bee ye yere mɛm loo kɔ a nyɔɔnɛ dɛ̄dɛɛ̄ nɛɛ bu ye bɔŋanaloo si uwe zue ue. Ena a bee sira aābu a? lo wuga nɛɛwa bee kɔ, “m bee nwaabah suā kɔ lo ama na kaāna sīdee su loo gbaāloo bɔŋanaloo a.” Gbaāloo wo, kiīloo nɛ esiatam doodoo kwa Tɔ Nɔnu Buɛ̄-Mɛnɛ etɔgɛ kɔ o su lo bɔŋanaloo nua olo. Kɛ̄ o suloo nɛ doo, kɛ̄ pya wuga edoonage kɔ loo a a sukɛ̄ bu o aā butɔ bu edɔɔ̄ doolo.

4. Yii aā gbo. (2 Kɔr 6:11-13) Tɔgɛ taɛ bu pya nɛɛ lu ziī le sīdee eyii aā gbo, nyɔɔwo nɔɔ̄ lo enwaabah ina enɔānu le su sɔ̄ enɔānu ekpana yimaloo pya wuga, lokwa o wa suāloo leere. Piiga lo esuā bee  ziī ziī pya a le o aā bɔŋanaloo. Sɔ̄ o suā bee pya nɛɛ sa lu nɛɛ a waɛ eyiiloo edoo kɔ pya nɛɛ a dap a yii gbo.

Taā o nɛ taāŋa aba ɔɔ kɔ ba naa yiie a loo, doo kɔ pya wuga nɛɛdam le nɛɛwa a suā taɛ nɛɛ o lu. Nɔnu aāloo nu wuga Lucinda bee kɔ, lo a kɔ, “i nyɔɔnɛ pya wuga ɛrɛ le gbanialoo anyaawo nyɔɔnɛbee i bee wa kue nua i tɔ.”

‘SUAA BAƐBAH SUĀ ZIĪ’

Sɔ̄ nɛɛ yii aā bɔŋanaloo pya nɛɛ mma bu dap doo kɔ a ɛrɛ bɔɔ. Bu mɛ sīdee na o dap doo kɔ nɛɛ a aā elu bu o bɔŋanaloo a sueloo kɛ̄ a? Nɛɛ lɛɛratam Pɔɔl bee i yere mɛm loo kɔ i ‘Su baɛbah suā ziī dookɛ̄ Kraist bee i su ili doo.’ (Rom 15:7) Tɛ̄maloo enɔ Kraist, pya kanɛɛ dap yerebah nɛ aā nɛɛ doo kɔ a sueloo kɛ̄. (Ɛp ekpo a kura “ Ena Edoo Kɔ O Kii Bu Aā Bɔŋanaloo A Kiā Leere A.”) Kɛ̄adoo, dɛ̄dɛɛ̄ nɛɛ bu bɔŋanaloo gbaāloo pya miɔŋɔ dap yerebah nɛ aā nɛɛ kɔ loo ye a sukɛ̄.

Su baɛbah suā pya dɔɔ̄na kuranage kɔ o kue wa nua o tɔ, ale aara wa saanɛɛ.sa wa yerebah nɛ. Bu edobah, ziī wuga nɛɛwa bee su ye sɔ̄ sa tɔgɛ dɔɔ̄na aā wuga nɛɛwa pya kɛ̄ a le lo barasī le kɛ̄ eyii fah doo. Kɛ̄ lo wuga nɛɛwa bee doo dogo doo bee tɔaloo aā nɛɛ sa ye yerebah nɛ kɔ loo ye a su kɛ̄.

YEREBAH DOO KƆ NƐƐ A NYIM BU EDƆƆ̄

Sɔ̄ ngurube gaa nyim aākɛ̄, a wee lɛa ye ekpaloo loo gbɛnɛkpo sɔ̄ lɛɛ aa dap su ye paā pɛā. Bu aba lo sīdee, sɔ̄ o gaa kii aā bɔŋanaloo, alu ebɛɛ̄ kɔ o lɛa ɛrɛgebah nu edoo kɔ o aa dap pɛɛ̄ bu sīdee a tɔɔ̄dɔnu bu esiatam Jɛhova. Nicolas le Céline kɔ “kii dɔɔ̄na bɔŋanaloo wee dɔbiī nɛ nɛɛ gbɛnɛ, e lokwa i dap nyɔɔnɛ keekee nɛɛ alu keekee barasī tɔnia alu ebɛɛ̄ kɔ i nɔ pio aā elap dogo.” Jean-Charles, a bee lu ekɔ nu akiiloo tua sɔ̄ a bee kɔ nu akiiloo kɛ̄ pya ye tɔ  e’ɛrɛ biī doo kɔ, “yiibu aā bɔŋanaloo eyerebah doo kɔ pya i miɔŋɔ a nyim agaloo bu edɔɔ̄ sa tɔɔ̄ waɛloo Jɛhova. Sɔ̄ pio enɔɔ̄ etɛ̄na, i nwiī nɛɛwa bee lu e nɛ ye nu edoo bu enɔānu taɛ yɛɛ kaɛ, e i nwiī nɛɛdam bee lu nɛɛ zue ue a sii liamaā.”

Lo adoo o kɛ̄tɔɔ̄ naa nɛ a dee lo ekii bu aā bɔŋanaloo, doodoo kiikɛ̄ ebɛɛ̄ pya zue ue le a? O dap doo kɔ o bɔŋanaloo alu aā tɛ̄maloo esu pya zuurabahtɔ̄ alu enɛ bu ekobee ue ama yere bu dogo. Kumasɔ̄ o gaa dɛɛa nyɔɔ Jɛhova a, gbaaloo pya dɔɔ̄na bu bɔŋanaloo si uwe zue ue sa yii aā gbo ale tɔɔ̄loo pya o nama gbo leere. O dapge yiiloo pya aā nɛɛ a le bu o bɔŋanaloo sa wa yerebah nɛ sɔ̄ alu ebɛɛ̄ ni? Kumasɔ̄ wereloo lu elap dogo Pya Nɛɛ Kraist a, yerebah nɛ pya dɔɔ̄na edoo kɔ o tɔɔ̄ waɛloo Bari. (Jɔn 13:35) Suā leere kɔ, “dua wɔp zɔɔ ama lu nu a nia Bari.”—Hib 13:16.

Kaɛlɛɛ taāŋa Pya Nɛɛ Kraist gaa kpesī, gbɛnɛ-edo aba e kīrasī lo e’ɛrɛ ɛɛbu sa kiisī leere bu wa aā bɔŋanaloo, e olo dapnage doo wo! Anne-Lise bee kɔ, “nyaana bɔŋanaloo doo kɔ i werenageloo pya dɔɔ̄na.” Kazumi eyiga leere anyaawo kɔ, “Jɛhova dap a yerebah nɛ bu sīdee o sii bee ɛmadɛɛ̄.” E Jules kɔ, “E pya gbo m e’ɛrɛ eyerebah doo kɔ loo mɛ a sukɛ̄. Nyaawo loo mɛ sukɛ̄ bu na aā bɔŋanaloo mmɛ lo dɔ e’aga mɛ bah lo e aabu.”