1-2. (a) Amunu zuurabahtɔ̄ na Jizɔs bee nɛ pya a wee ye nyɔɔnɛ dumɛ a? (b) Ena anua pya a wee nyɔɔnɛ dumɛ Jizɔs bee ye teera bie a? (Ɛp nage foto.)

 “LU KAKA kɔ edɔɔ̄ le egbī edoo, mɛ namloo lu e’ɔaloo.” a (Mat 26:41b) Jizɔs bee kɔ ue ama lo etɔgɛ kɔ a suāe kɔ ii mmana. Mɛ dɔɔ̄na nu a gaa kɔ na kɔ i nwaɛ̄dɛɛ̄ lokwa ii dɛrɛ nyiɛ nyɔɔ aba ii yee kɛ̄. Tua sɔ̄ lo uunɛ lɛɛ Jizɔs gae kɔ ue ama, pya a wee ye nyɔɔnɛ dumɛ bee yira yii kɔ ba naale e’aae ye loo. (Mat 26:35) Ba bee gbī edoo nu a lee. Mɛ, ba naa bee suā kɔ sɔ̄ dɔā-ɛp elu ba enwaabah doo nu a naa lee. Nyɔɔwo, Jizɔs bee wa zuurabahtɔ̄ kɔ: “Tɔɔ̄naa baɛ sa taaŋa lokwa buii yii bu ɛma ɛp.”—Mat 26:41a.

² Mɛ alu ekiɛnu kɔ, pya a wee ye nyɔɔnɛ dumɛ naa bee kiisī lo etɔɔ̄baɛ. Sɔ̄ a bee lu e’aa Jizɔs, ba naa bee ye bie, sɛh ba bee ye teera bie ni? Nyɔɔbee ba naa bee nwaɛ̄dɛɛ̄ sa tɔɔ̄baɛ a, pya a wee ye nyɔɔnɛ dumɛ bee doo taɛ nu ba bee kɔ ba naale edooe. Ba bee teera bie Jizɔs.—Mat 26:56.

3. (a) Lokwa i kiisī lo etɔɔ̄ agara nɛ Jɛhova, ena anua ii ɛrɛ ekɛɛrɛ kɔ i agaeloo sa dap doo nu a lee dɛ̄dɛɛ̄ sɔ̄ a? (b) Pio ena i kɔnia bu ekobee ue ama a?

 ³ Ii ɛrɛ ekɛɛrɛ kɔ i agaeloo sa dap doo nu alee dɛ̄dɛɛ̄ sɔ̄. Bu kaka, i ebiaɛra fii kɔ ii le edoo lɔgɔ nu ebiire bu Jɛhova. Mɛ, i lunage pya a naa mma sa dap dɔ bu doā-ɛp. (Rom 5:12; 7:21-23) Lo ii su zuurabahtɔ̄, i dap nwaabah dɔ bu doā-ɛp a doo kɔ pɔrɔ a bee kɔ a lee. Lokwa i kiisī lo edoo nu a nia Jɛhova le Jizɔs sa ii dɔ bu doā-ɛp sa doo pɔrɔ, alu ebɛɛ kɔ i kiisī lo enwaɛ̄dɛɛ̄ sa tɔɔ̄baɛ dookɛ̄ Jizɔs bee i zuurabahtɔ̄ doo. Ekobee ue ama dap i yerebah nɛ lo edoo wo. Tuatua, i gaa le kɛɛrɛ bu pya kɛ̄tɔɔ̄ a bɔloo kɔ i nwaɛdɛɛ̄. Lɛɛ i kɔnia kɛ̄ i nwaɛdɛɛ̄ kumaloo doā-ɛp doo. Bu ye kpɛdumɛ, i kɔnia kɛ̄ i kiisī lo enwaɛdɛɛ̄ doo.

BU PYA AMUNU SĪDEE NA I KIISĪ LO ENWAƐDƐƐ̄ A?

4-5. Ena anua i kiisī lo enwaɛdɛɛ̄ loo pɔrɔ, kere lo a kiikɛ̄ a?

⁴ Pio pɔrɔ kiikɛ̄ ee pya lo dɔɔ̄na mɛ ba dap ɔɛloo i gbaniāloo kiikɛ̄ Jɛhova le. Ba dapnage i zū kɔ i doo pɔrɔ alu kirikiri.

⁵ Dɛ̄dɛɛ̄ ii kpesī doā-ɛp lo edoo pɔrɔ. Mɛ ziī ziī ii ɛrɛ keekee kɛ̄ i ɔloo. Nyɔɔwo a ɛrɛ nu a i dap doā-ɛp kɔ i doo pɔrɔ. Bu edobah, a ɛrɛ nɛɛ adap le aa bebeloo doā-ɛp kunagā. Sɔ̄ dɔɔ̄na nɛɛ dap le aa bebeloo e’agabah dogo a naa ɛɛ doodoo ɛp foto ekotɛ̄ nɛɛ ale dagibahloo aba ɛɛ. Pya dɔɔ̄na dapnage le aa bebeloo ɛrɛ bɔɔloo nɛɛ, taɛ lo e le nyɔɔ waloo, nwaābah ɛrɛ saŋ, ale dɔɔ̄na nu. Dookɛ̄ Jemes kɔ doo, “ziī ziī nɛɛ lu edoā-ɛp sɔ̄ ye pɔrɔ taɛ ye kɛrɛ sa ye gɔm.”—Jem 1:14.

6. Ena i ɛrɛ e kaāna kumaloo a?

⁶ Ekɔ o suāge pya nu a wee doo kɔ a waɛ a bah edoo pɔrɔ ni? Naa lee edag aba ii tɛ̄maloo ekɛɛrɛ kɔ i agaeloo gbɛnɛ ale bee ii le edap dooe nu a bee piya. (1 Jɔn 1:8) Nyɔnɛbee, Pɔɔl tɔgɛ kɔ “pya kaɛ edɔɔ̄ le loo dapnage dɔ bu doā-ɛp” lo ba naa nwaɛdɛɛ̄ lo. (Gal 6:1) I ɛrɛ elu nɛɛ i kaāna bu i beenyiɛ sa suā pya kɛ̄ ii agaloo.—2 Kɔr 13:5.

7. Ena i nwaɛdɛɛ̄ loo gbɛnɛ a? Naa nɛ edobah.

⁷ Aba sɔ̄ o esuā pya kɛ̄ a wee a waɛbah lo edoo pɔrɔ, ena o doo a? Piiga lokwa o dap amana pya lo nu! Bu edobah, bu sɔ̄ a bee lu e’ɛm Baibol, kɛ̄ a wee bee  piya gbɛnɛ loo ekpadaɛ̄ a tɛɛ̄ ɛŋɛnɛ buɛ̄ na ye nudee. Nyɔɔwo, ye nudee na a wee lu ebaɛloo gbɛnɛ a. Bu aba lo sīdee, alunage ebɛɛ̄ kɔ i nwaɛdɛɛ̄ loo ɛrɛgebah nu i suā kɔ a wee doo kɔ a waɛ i bah edoo pɔrɔ.—1 Kɔr. 9:27.

KƐ̄ E NWAƐDƐƐ̄ DOO

8-9. Bu mɛ sīdee na nwiī zuguru alu ekɔ nu kumaloo bu kpa Kam 7 ekobee ebee dap amana lo edoo kirikiri pɔrɔ a? (Kam 7:8, 9, 13, 14, 21)

⁸ Bu mɛ sīdee na i nwaɛdɛɛ̄ lokwa ii doo pɔrɔ a? Naa kɛɛrɛbu nu i dap nɔ aāloo nwiī zuguru alu ekɔ bu kpa Kam 7 ekobee. A nyɔɔnɛ wa-kiā-uwe kunagā. Ye 22 barakpaɛ̄ kɔ i nɛ kɔ “aba sɔ̄” nwiī zuguru a nyɔɔnɛ ye. Mɛ a bee lu etɔgɛ lɛɛ aa lu ye 22 barakpaɛ̄ kɔ ɛrɛ pio nu a bee dasī doo lo a doo kɔ kina kina a doo lo pɔrɔ.

⁹ Ena a doo kɔ a doo lo pɔrɔ a? Tuatua, ye loo uunɛ, a bee “tɛɛ̄ dee kpaɛ̄ tɔ” wa-kiā-uwe. Lɛɛ a kiā kii ye tɔ. (Buū Kam 7:8, 9.) Dɔɔ̄na, sɔ̄ a bee muɛ lo wa a naa kiā aa. Taāwo, a bee lɛɛbahloo a ye kuɛ̄ nuūnu loo sa gbaɛ̄tɔ̄ sɔ̄ a gaa kɔ nu a kiiloo booboo zɔɔ̄ a ewɔba, naadabah lo edoo kɔ a kɛɛrɛ kɔ a naale pɔrɔ nɛɛ. (Buū Kam 7:13, 14, 21.) Lo nwiī zuguru ama bee amana pya kɛ̄tɔɔ̄ bɔɔ lo a ye yerebu doo pɔrɔ, ebee baɛloo ye, sa naa dɔbu doā-ɛp sa doo pɔrɔ.

10. Bu mɛ sīdee anii’ee na nɛɛ dap tɛɛ̄ aba ekwɔ lo nwiī zuguru bee tɛɛ̄ a?

¹⁰ Ue Solomon kɔ ama tɔgɛ nu a dap siraloo ɛrɛgebah nɛɛ a gaa taāŋabah Jɛhova. A dap dɔbu doo kirikiri pɔrɔ sa sɔ̄ esaa a kɛɛrɛ kɔ dɛ̄dɛɛ̄ nu ama sira “aba sɔ̄.” Ale a dap kɔ, “A aadee sira.” Kerewo, lo a kɛɛrɛbu nu a sira a kaāna, edap muɛ kɔ a ɛrɛ pio nu a doo lo a naa bɔloo lo a doo kɔ a doo lo pɔrɔ. Pio lo nu dap lu pɔrɔ gbo, ɛrɛ ekpeloo a naa bɔloo, ale sigara pya kɛ̄ a naa bɔloo sī le sī ale nyɔɔ intanɛt. Pio sɔ̄ edapnage ɔbɛ yere kara, buū Baibol, si enɔanu, ale si uwe zue ue. Doodoo nwiī zuguru alu ekɔ bu kpa kam, naadabah ye pɔrɔ naa “aadee sira.”

11. Lokwa ii doo pɔrɔ ena i lɛɛbahloo a?

¹¹ Ena i nɔ aāloo ani? Naale aba lo pɔrɔ naa i ɔbɛ edoo a, lunage ebɛɛ̄ kɔ i ɔbɛ edoo pya nu ezū i kɔ i doo lo pɔrɔ. Solomon doo kɔ i suā lo ama sɔ̄ ekɔa nu akiiloo lo nwiī zuguru le wa-kiā-uwe a sah. Sɔ̄ a gaa kɔ nu a kiiloo lo wa a kɔ, “O a kiā pe nyɔɔ dɛ̄dɛɛ̄ ye nwiī dee.” (Kam 7:25) A kɔnage kumaloo dua pɔrɔ wa ama kɔ, “Sere o dee ye biniāloo, e o a tɛɛ̄ kpaɛ̄ nudee ye tɔ.” (Kam 5:3, 8) Aii, i nwaɛdɛɛ̄ loo pɔrɔ tɛ̄maloo ekpooraloo kaāna aāloo pya kɛ̄tɔɔ̄ a i zū kɔ i doo pɔrɔ. b Lo ama kura kɔ kere nu a naa bee piya kɔ Pya Nɛɛ Kraist a doo, i dap lɛɛbahloo lo a le edoo kɔ i doo pɔrɔ.—Mat 5:29, 30.

12. A munu biaɛfii na Job bee doo a, e bu mɛ sīdee na eyerebah ye nɛ kɔ a nwaɛdɛɛ̄ sa naa doo pɔrɔ a? (Job 31:1)

¹² Lokwa ii yii bu kɛ̄tɔɔ̄ edoo kɔ i doo pɔrɔ, a lu ebɛɛ̄ kɔ i biaɛfii sa nwaɛdɛɛ̄ kaāna. Nu Job bee doolo. Alɛ “ le baɛ [ye] dɛɛ̄ ebee doo yii bɔma dum” kɔ a naale e’ɛp wa a naale alɛ bu taɛ. (Buū Job 31:1.) Nwaɛdɛɛ̄ sa biaɛfii doo wo edoo kɔ aa yii bu dum kunagā. Ili dapnage nwaɛdɛɛ̄ sa biaɛfii lo e’ɔbɛ ɛrɛgebah nu ezū i yerebu doo pɔrɔ.

13. Ena anua i nwaɛdɛɛ̄ lo nu i kɛɛrɛ a? (Ɛpnage foto.)

 ¹³ I ɛrɛ e nwaɛnagedɛ̄ɛ loo nu i kɛɛrɛ. (A’aa 20:17) Pio nɛɛ kɛɛrɛ kɔ ɛrɛ taɛ sa kiisī lo ekɛɛrɛbu pɔrɔ dogo naa bee piya kuma sɔ̄ ba naa dooe a. Mɛ dua ekɛɛrɛ ama bee piya. Nɛɛ a kiisī lo e ɛrɛ pɔrɔ taɛ gaa doo kɔ lo taɛ a agatɛ̄ ye bu. Bu ziī sīdee, a gaa sere doā-ɛp nɛ aba ɛɛ lo ebɔātɛ̄ bebeloo. Kɛ̄adoo, pɔrɔ ekɛɛrɛ wee aadee yii nyiɛ nɛɛ pio sɔ̄. Nu eyerebah a nɛ na lo e’amana pɔrɔ ekɛɛrɛ aba sɔ̄ sa kɛɛrɛbu nu a lee. Sɔ̄ i doo wo ii yiga kɔ pɔrɔ ekɛɛrɛ a nyim mmɛ lo dɔ e’aga i bah lo ebe, sa a dap i zū kɔ i doo kirikiri pɔrɔ.—Fil 4:8; Kɔl 3:2; Jem 1:13-15.

14. Dɔɔ̄na ena eyerebah i nɛ kɔ i nwaɛdɛɛ̄ loo nu edoo kɔ i doo pɔrɔ a?

¹⁴ Dɔɔ̄na ena i doo lo enwaɛdɛɛ̄ kiiloo nu edoo kɔ i doo pɔrɔ a? I ɛrɛ e suā leere kɔ gbaɛ̄tɔ̄loo lok Jɛhova edɔbiī i nɛ dɛ̄dɛɛ̄ sɔ̄. Pio sɔ̄ a dap i agabah lo edoo kɔ i ekɛɛrɛ, taɛ, a gbaaloo nu Bari kɔ. Mɛ efɛɛloo beenyiɛ lo i ɛrɛ etɔgɛ kɔ abɔloo kɔ i doo wo.

15. Bu mɛ sīdee na nɔ lo esere ekɛɛrɛ nyɔɔ pya nu a lee eyerebah i nɛ kɔ i nwaɛdɛɛ̄ loo nu edoo kɔ i doo pɔrɔ a?

¹⁵ Alu ebɛɛ̄ kɔ i nɔ lo esere ekɛɛrɛ nyɔɔ pya nu a lee. Lo i nɔ lo e ‘baaloo pɔrɔ sa wereloo doo le,’ i kpɛ̄naloo edoo nu a lee sa amana nu edoo kɔ i doo pɔrɔ. (Amos 5:15) Sɔ̄ i sere ekɛɛrɛ nyɔɔ le nu, eyerebah i nɛ kɔ i amana sɔ̄ doā-ɛp i bugia lu nyɔɔ.

16. Bu mɛ sīdee na doo pya nu edoo kɔ i agɛrɛbah wereloo Jɛhova eyerebah i nɛ kɔ i kiisī lo enwaɛdɛɛ̄ a? (Ɛpnage foto.)

¹⁶ I tɛɛ̄ doodoo wa nɔ lo esere ekɛɛrɛ nyɔɔ pya nu a lee ni? I dap kiisī lo edoo pya nu edoo kɔ i wereloo kiikɛ̄ Jɛhova le a’agatɛ̄. Sɔ̄ i le enɔānu Pya Nɛɛ Kraist ale uwe zue ue, ii wee aadee kpesī doā-ɛp lo edoo pɔrɔ. Taāwo, i wee nyimɛ i taɛ lo edoo nu a nia Jɛhova.  (Mat 28:19, 20; Hib 10:24, 25) Sɔ̄ i buū, nɔ, sa ɛrɛ ekɛɛrɛ nyɔɔ Muɛ̄ Ue Bari doo kɔ i agɛrɛbah wereloo nu a lee sa baaloo pɔrɔ. (Josh 1:8; Yɔɔ 1:2, 3; 119:97, 101) Nyɛŋiabu kɔ Jizɔs bee kɔ nɛ pya a wee ye nyɔɔnɛ dumɛ kɔ, “Tɔɔ̄naa baɛ sa taāŋa lokwa buii yii bu ɛma ɛp.” (Mat 26:41) Yere kara nɛ i Tɛ̄ a le li bunyɔɔ edoo kɔ a yerebah i nɛ sa edoonage kɔ i agɛrɛtɛ̄ i biaɛfii lo edoo nu e’ɛɛrɛ ye bu.—Jem 4:8.

KIISĪ LO ENWAƐDƐƐ̄

17. Pya amunu e’ɔaloo na a bee kiisī lo elu taāŋa nɛ Pita a?

¹⁷ I dap be eebah pio pya i e’ɔaloo kere ii mmana. Mɛ i le gaa kiigesī lo ebebeloo pio pɔrɔ taɛ bu nyɔɔnyɔɔ sɔ̄. Kɛɛrɛbu loo edobah nɛɛ lɛɛrɛtam Pita. A bee ɛrɛ bɔɔloo pya nɛɛ sɔ̄ a bee ana Jizɔs taa sɔ̄. (Mat 26:69-75) Mɛ a bee kɔ bɔɔ naa bee aana Pita sɔ̄ a bee yira ekeebee bu e’agaloo bie tɔ biaɛ Sanhedrin. (Doonu 5:27-29) Kerewo, sɔ̄ pio zua etɛ̄na, a bee “ɛrɛ aa bɔɔ loo eku pya kooa piī,” sa ɔbɛ enyɔɔnɛ Pya Nɛɛ Kraist alu dɔɔ̄na edo gbaa denu bu ziī nwiī sɔ̄. (Gal 2:11, 12) Pita bee sikɛ̄ ɛrɛ bɔɔ. Naadabah bɔɔ naa bee ye tah bu doo pippip.

18. Ena a dap siraloo pio pɔrɔ taɛ a i le bu a?

¹⁸ Dapnage sira loo ili doo wo. Bu mɛ sīdee? E’ɔaloo i kɛɛrɛ kɔ i ebea eeba dap sikɛ̄ doo kɔ a waɛ i bah lo edoo pɔrɔ. Bu edobah, ziī wuga bee kɔ: “m bee amana ɛp foto atɔgɛ ekotɛ̄ nɛɛ bu lop zua sa kɛɛrɛ kɔ m ebea eeba. Mɛ a ɛrɛ kɛ̄tɔɔ̄ a bee doo kɔ a sikɛ̄ lu edoā mɛ ɛp dɔɔ̄na sɔ̄.” I kaɛgɛ ye kɔ a naa bee pee beenyiɛ ye. A bee suā kɔ alu ebɛɛ̄ kɔ a kiisī lo epiiga, naadabah dɛ̄dɛɛ̄ dee lo e’amana lo pɔrɔ dogo a bu lo sɔ̄ eku ama. A gaa agɛrɛbah nwaɛdɛɛ̄ lo e amana ɛp foto a tɔgɛ ekotɛ̄ nɛɛ, e ye wa le pya kanɛɛ gaa ye yerebah nɛ.

19. Ena i dap doo lo a ɛrɛ pɔrɔ i sii dap lɛɛbahloo a?

¹⁹ Ena i doo a, lokwa pɔrɔ dogo i sii dap be eebah naa doo kɔ i doo pɔrɔ a? Tɛ̄maloo esu zuurabahtɔ̄ Jizɔs a kɔ:  “Tɔɔ̄naa baɛ.” Kere sɔ̄ o kɛɛrɛ kɔ o le e’agaloo, amana pya kɛ̄tɔɔ̄ lo edoo kɔ awaɛ a bah edoo pɔrɔ. (1 Kɔr 10:12) Kiisī lo edoo pya nu a bee a yerebah nɛ lo ebebeloo lo pɔrɔ dogo. Kam 28:14 kɔ: “Leelee a le nɛ nɛɛ a ɛrɛ bɔɔ loo Jɛhova dɛ̄dɛɛ̄ sɔ̄.”—2 Pit 3:14.

BIĪ I ƐRƐ LO I KIISĪ LO ENWAƐDƐƐ̄

20-21. (a) Amunu biī na i ɛrɛ a lo i kiisī lo ewaɛdɛɛ̄ loo doo nu edoo kɔ i doo pɔrɔ a? (b) Lo i doo nu a kuu ili, ena Jɛhova edoo i nɛ a? (2 Pya Kɔrint 4:7)

²⁰ I suā leere kɔ lo i kiisī lo enwaɛdɛɛ̄ loo nu edoo kɔ i doo pɔrɔ, e dɔbiī i nɛ dɛ̄dɛɛ̄ sɔ̄. Sɔ̄ i doo pɔrɔ i dap ɛrɛ “ekpe nu doo gbee bu ziī nwī sɔ̄,” mɛ sɔ̄ i tɔɔ̄dum dookɛ̄ Jɛhova gbī doo nua i gbɛnɛ ɛɛbu loo. (Hib 11:25; Yɔɔ 19:8) Nyɔnɛbee a bee lu edɛm i kɔ i tɔɔ̄dum dookɛ̄ Bari gbī doo. (Jɛn 1:27) Sɔ̄ i tɔɔ̄dum dookɛ̄ Jɛhova gbī doo i ɛrɛ le ekɛɛrɛ beenyiɛ, edeesī li i ɛrɛ dum a naatah.—1 Tim 6:12; 2 Tim 1:3; Jud 20, 21.

²¹ Bu kaka, “namloo lu e’ɔaloo.” Mɛ lo ama naa kura kɔ ii ɛrɛ lɔgɔ yerebah. Jɛhova le ekpɛ̄naloo lo e nɛ i ekpo a i bɛɛ̄. (Buū 2 Pya Kɔrint 4:7.) Mɛ suā kɔ Bari wee nɛ ekpo a eenyɔɔ ili ekpo. IIii ekpo na kɛ̄ i gaa piiga doo ziī ziī dee lokwa ii doo pɔrɔ, e lo ama lu nu a kuu ili lo edoo. Lo i doo lo a kuu ili i dap suā leere kɔ Jɛhova e’agara i kara sa i yere mɛm loo sɔ̄ alu ebɛɛ̄. (1 Kɔr 10:13) Aii, tɛ̄maloo yerebah Jɛhova, i dap kiisī lo enwaɛdɛɛ̄ sa ii doo pya nu edoo kɔ i doo pɔrɔ.