30 EKOBEE UE ENƆ
YƆƆ 36 I Baɛloo I Beenyiɛ
Pya Nu A Kuī I Nɔ Aāloo Pya Mɛnɛ A Bee Bɛɛ Izrɛl
“Bui sikɛ̄ muɛ kee a le yɛɛ nɛɛ kaāna dogo le nɛɛ bag dogo, yɛɛ nɛɛ a sitam nɛ Bari le nɛɛ a naa sitam ye nɛ.” —MAL 3:18.
NU I NƆ
Nɔ nu akiiloo pya mɛnɛ a bee bɛɛ Izrɛl eyerebah i nɛ kɔ i suā nu i dap doo lo etaāŋabah Jɛhova bu sīdee a gbī.
1-2. Ena Baibol i kɔ nɛ akiiloo pio pya mɛnɛ a bee bɛɛ Izrɛl a?
Baibol kue bee nu a eeloo 40 pya mɛnɛ a bee bɛɛ Izrɛl. a E a kɔ i nɛ taɛ nu pio aba bee doo. Bu edobah, kere pya lo mɛnɛ a bee lee bee doo nu a bee piya. Naa kɛɛrɛbu loo Mɛnɛ Devid a bee lee. Jɛhova kɔ: “Na zooro Devid . . . su dɛ̄dɛɛ̄ ye beenyiɛ mɛ nyɔɔnɛ, sa doo aba nu a kaāna bu na baɛ dɛɛ̄.” (1 Mɛnɛ 14:8) Kerewo, gbara ama bee kue wa nɛɛ sa nɔɔ kɔ alu efɛ ye dam bie sī nɔ̄.—2 Sam 11:4, 14, 15.
2 Bu dɔɔ̄na sīdee, gbɛnɛkpo pya mɛnɛ a bee tɔɔ̄dum a naa nia Jɛhova bee doonage pio nu a lee. Naa kɛɛrɛbu Rehoboam. Bu dɛɛ̄ Jɛhova “a bee doo pɔrɔ.” (2 Edoo 12:14) kerewo, Rehoboam bee gbaɛtɔ̄loo Bari sɔ̄ a bee ye kɔ nɛ kɔ aa bebe loo lop gā a, sa wa lɛɛbahloo kɔ a tubobahloo mɛnɛ nɛ wa loo. A bee wu agɛrɛ gbɛnɛkpo buɛ̄ a le kɛɛ̄ ye bɛbɛɛ lo ekpega pya nɛɛ Bari lɛɛ kɛ̄bah pya wa baa.—1 Mɛnɛ 12:21-24; 2 Edoo 11:5-12.
3. Amunu ebip akuī na a aakɛ̄ a, e ena i kɔnia bu ekobee ue ama a?
3 Ebip a kui a aa kɛ̄ na, lo a le pya mɛnɛ Izrɛl bee doo nu a lee ale nu a bee piya, bu mɛ sīdee na Jɛhova biaɛfii kɔ lo mɛnɛ bɔ loo eture nyiɛ loo a? Ture ebip ama eyerebah i nɛ kɔ i dābeeloo nu Jɛhova i gbī aābah. I gaa le kɔnia taa nu Jɛhova wee kɛɛrɛbu loo sɔ̄ a gaa ɛp pya mɛnɛ Izrɛl: wa ekɛɛrɛ beenyiɛ, kɛ̄ ba kiiya sɔ̄ ba tɛɛ̄ ekwɔ doo, le kɛ̄ ba kiisī lo etaāŋabah Jɛhova bu kaka sīdee doo.
BA BEE WERELOO JƐHOVA AĀBU DƐ̄DƐƐ̄ WA BEENYIƐ
4. Ziī amunu kee na a bee le yɛɛ pya mɛnɛ a bee bɔ ture nyiɛ loo le pya lo a naa bee bɔ ture nyiɛ loo a?
4 Pya mɛnɛ a bee doonu a lee bee taāŋabah Jɛhova aābu wa beenyiɛ. b Le Mɛnɛ Jehoshafat bee “gbī Jɛhova tɛ̄maloo dɛ̄dɛɛ̄ ye beenyiɛ.” (2 Edoo 22:9) Sɔ̄ alu ekɔ nu akiiloo Josia, Baibol kɔ: “lɛɛ alɛ ga elu lɔgɔ mɛnɛ a ye bee naale, nɛɛ a bee kiiya pii Jɛhova tɛ̄maloo dɛ̄dɛɛ̄ ye beenyiɛ.” (2 Mɛnɛ 23:25) Ena i kɔ akiiloo Solomon, lo sɔ̄ gbɛnɛ-edo zua etɛ̄na a bee doonu a naa lee a? “Ye beenyiɛ naa bee yiina kaāna.” (1 Mɛnɛ 11:4) Kiiloo Abijam, dɔɔ̄na mɛnɛ a naa bee bɔ ture nyiɛ loo, Baibol kɔ: “Ye beenyiɛ naa bee era bu kaka loo Jɛhova ye Bari.”—1 Mɛnɛ 15:3.
5. Naa baatɛ̄ nu a kura kɔ nɛɛ taāŋabah Jɛhova bu beenyiɛ a era.
5 Ena a kura kɔ nɛɛ taāŋabah Jɛhova bu beenyiɛ a era a? Nɛɛ ye beenyiɛ era naa taāŋabah Bari aba nyɔɔbee a suā kɔ a bɔloo kɔ a doo wo. Taāwo, a taāŋa ye bah nyɔɔbee togatoga wereloo le enwadɛɛ̄ a ye ɛrɛ kumaloo. Gbaāloo wo, a kiisī lo ewere ye loo sa ye nwadɛɛ̄ dɛ̄dɛɛ̄ dee bu ye dum.
6. Bu mɛ sīdee na i kiisī lo e’ɛrɛ beenyiɛ a era a? (Kam 4:23; Matiu 5:29, 30)
6 Bu mɛ sīdee na i kiisī lo enɔ pya mɛnɛ a bee bɔ ture nyiɛ loo, sa ɛrɛ beenyiɛ a era a? Tɛ̄maloo ekiī pɔrɔ ezū. ɛrɛ ekpeloo a naa bɔloo, bu edobah, a dap gbee i beenyiɛ. Pɔrɔ gbaniāloo le ɛrɛ taɛ kiiloo kponia zɔ̄. Lo i suā kɔ ziī nu e ina gaa ɔɛloo i wereloo kiikɛ̄ Jɛhova le, lee kɔ i nwaābah nyaana i ekɛɛrɛ.—Buū Kam 4:23; Matiu 5:29, 30.
7. Ena a nua alu ebɛɛ̄ kɔ i kiī pɔrɔ ezū a?
7 Ii le e’ɛrɛ baɛ baɛ ekɛɛrɛ. Nyɔɔbee lo ii nwaɛdɛɛ̄, i dap kɛɛrɛ kɔ kuma sɔ̄ i gaa taāŋabah Jɛhova a, ii le e’ɛrɛ lɔgɔ pɔrɔ ezū egbee i gbaniāloo. Lo ebaatɛ̄, naa kɛɛrɛ kɔ o le kɛ̄ ee kɛ̄ tɔɔ le gbɛnɛ fii efɔp gaa dɔ. Sɔ̄ o e ina tɔ, o doo kɔ tɔ a’ara miā. Mɛ ena esira lo a le o kpaāna bu yeere a? Lo gbɛnɛ fiitɔɔ efɔp gaa le nwaabah yii o tɔ. Ena i nɔ aāloo a? Alu ebɛɛ̄ kɔ i kiisī lo edoo nu a eenyɔɔ aba ɛrɛ nuede bu edɔɔ̄ a doo kɔ i gbaniāloo kiikɛ̄ Jɛhova le a’ara miā. I ɛrɛnage ekpaɛ̄ bū loo pɔrɔ ezū, lokwa “efɔp,” tɔɔ lo nyɔuwe ama ale elap a naa bɔloo, naa yii i bu beenyiɛ sa i gbee.—Ɛfɛs 2:2.
BA BEE KIIYA AALOO WA PƆRƆ
8-9. Bu mɛ sīdee na Mɛnɛ Devid le Mɛnɛ Hezekia bee doo dogo kiiloo sɔ̄ alu ekɔ wa pɔrɔ wa nɛ a? (Ɛpnage eko.)
8 Dookɛ̄ i bee kɔ doo tua sɔ̄, Mɛnɛ Devid bee si gbɛnɛ pɔrɔ. Mɛ sɔ̄ nɛɛ mɔmanudɛɛ̄ Natan bee kɔ ye pɔrɔ ye nɛ, Devid bee kumalookɛ̄ sa kiiya. (2 Sam 12:13) Aāloo nu Devid ɛm bu kpa Le-yɔɔ 51, tɔgɛ kɔ pɔrɔ a bee si a bee ye kiɛ̄ kaāna. Devid naa bee sereloo nɛ Natan doodoo bee e kiiyae, mɛ a bee kiiya aā taɛ bu ye beenyiɛ.—Yɔɔ 51:3, 4, 17, kerebah ue a le bɔātɛ̄ Yɔɔ 51.
9 Mɛnɛ Hezekia bee sinage pɔrɔ kiikɛ̄ Jɛhova le. Baibol kɔ: “beenyiɛ ye bee danaloo, nyɔɔbee wo gbɛnɛ saŋ bee ye dɔ nyɔɔ le nyɔɔ Juda le Jerusalem.” (2 Edoo 32:25) Ena anua Hezekia bee eeloo nɛ nyɔɔ a? Nyɔɔnɛbee Jɛhova bee doo kɔ a ɛrɛ zɔ̄, be eeba pya Asiria, le kɛ̄ a ye bɔ̄ lɛɛ bu gbɛnɛ dumɛ loo doo. Bee dap lu danaloo nɛ nyɔɔ na a bee doo kɔ a tɔgɛ ye zɔ̄ pya Babilɔn a, lo a doo kɔ nɛɛ mɔmanudɛɛ̄ Aisaia a kɔ ye nɛ kɛ̄ nu a doo ama biirebu Jɛhova doo. (2 Mɛnɛ 20:12-18) Doodoo Devid, Hezekia bee kumalookɛ̄ sa kiiya. (2 Edoo 32:26) Mɛ bu kpɛdumɛ, Jɛhova bee ye ɛp nua mɛnɛ a bɔ ture nyiɛ loo “e a bee doo nu a lee.”—2 Mɛnɛ 18:3.
Mɛnɛ Devid le Mɛnɛ Hezekia bee kumalookɛ̄ kiiya sɔ̄ a bee lu ekɔ wa pɔrɔ wa nɛ (Ɛp 8-9 barakpaɛ̄)
10. Bu mɛ sīdee na Amazia bee doo dogo kiiloo sɔ̄ alu ekɔ ye pɔrɔ ye nɛ a?
10 Doodoo mɛnɛ David le Hezekia, Mɛnɛ Amazia lo Juda bee doo nu a lee “naale tɛ̄maloo beenyiɛ a naa ɛrɛ beebee.” (2 Edoo 25:2) Ena a bee sira a? Sɔ̄ Jɛhova bee ye yerebah nɛ kɔ a be eebah pya Edom, Amazia bee uubeekɛ̄ nɛ pya dɔɔ̄na nwī-bari. c Sɔ̄ nɛɛ mɔmanudɛɛ̄ Jɛhova bee ye kɔ nɛ kiiloo dogo ama, a naa bee ye gbaɛ̄tɔ̄loo, a bee ye kpo.—2 Edoo 25:14-16.
11. Dookɛ̄ 2 Kɔrint 7:9, 11 kɔ doo, ena i doo lokwa Jɛhova i aaloo pɔrɔ nɛ a? (Ɛpnage foto.)
11 Ena i nɔ aāloo pya edobah ama a? Alu ebɛɛ̄ kɔ i kiiya aaloo pya i pɔrɔ, sa piiga kumakɛ̄ i dap doo lokwa ii sinakɛ̄ si lo pɔrɔ. Ena i doo a lo a le pya kanɛɛ bu bɔŋanaloo nɛ i zuurabahtɔ̄, kere nyɔɔ nu a naa kuī a? Ii le ekɛɛrɛ kɔ Jɛhova ale pya kanɛɛ naa were i loo. Kere pya mɛnɛ a bee doo nu a lee bu Izrɛl bee lunage enɛ wa zuurabahtɔ̄ sa wa kāmɛnɛ. (Hib 12:6) Sɔ̄ alu e zuura i bahtɔ̄, i ɛrɛ e (1) su bu kumalookɛ̄ (2) kwabahloo nu alu ebɛɛ̄ kɔ i doo, le (3) sa kiisī lo esu dɛ̄dɛɛ̄ i beenyiɛ siatam nɛ Jɛhova. Lo i kiiya aaloo pya i pɔrɔ, Jɛhova e’aaloo inɛ.—Buū 2 Kɔrint 7:9, 11.
Sɔ̄ alu enɛ i zuurabahtɔ̄, i (1) kumalookɛ̄ su, (2) nyaana i dogo kɛ̄ alu ebɛɛ̄, sa (3) i kiisī lo etaāŋabah Jɛhova aābu dɛ̄dɛɛ̄ i beenyiɛ (Ɛp 11 barakpaɛ̄) f
BA BEE TAĀŊABAH JƐHOVA BU SĪDEE A GBĪ
12. Ena a doo kɔ pya mɛnɛ a bɔ ture nyiɛ loo alu kee loo pya mɛnɛ a naa bɔ ture nyiɛ loo a?
12 Pya mɛnɛ Jɛhova bee muɛ kɔ ba bɔ ture nyiɛ loo bee ye taāŋabah bu sīdee a gbī. E ba yere mɛm loo dɛ̄dɛɛ̄ pya nɛɛ Jɛhova kɔ ba a doonage wo. Kerewo, dookɛ̄ i enɔā doo, ba bee tɛɛ̄ ekwɔ. Mɛ ba bee taāŋabah Jɛhova aābu dɛ̄dɛɛ̄ wa beenyiɛ sa gbeesī dɛ̄dɛɛ̄ ekwɔ sīdee taāŋabah. d
13. Ena anua Jɛhova bee biaɛ Mɛnɛ Ahab kɔ a naa bɔ ture nyiɛ loo a?
13 Ena anua Jɛhova biaɛ siga pya lo mɛnɛ kɔ ba naa bɔ ture nyiɛ loo a? Bu kaka, naale dɛ̄dɛɛ̄ nu ba doo na a bee piya a. Kere Mɛnɛ Ahab alu bag bee ɛrɛ kumalookɛ̄ sa ɛrɛ ekiɛnu nyɔɔ sɔ̄ a bee fɛ Naboth. (1 Mɛnɛ 21:27-29) Alɛ bee topnage gbɛnɛ buɛ̄ a kii nyɔɔ sa be eebah nɛ pya Izrɛl. (1 Mɛnɛ 20:21, 29; 22:39) Mɛ Ahab wee bee piya kaāna sa nyimɛ ekwɔ sīdee taāgabah kɛɛ̄ ye bɛbɛɛ le ezū a aabah ye wa. Nyɔɔbee wo, a naa bee kiiya.—1 Mɛnɛ 21:25, 26.
14. (a) Ena anua Jɛhova bee biaɛ Mɛnɛ Rehoboam kɔ a bee piya a? (b) Pio ena pya mɛnɛ a naa bɔ ture nyiɛ loo bee doo a?
14 Naa kɛɛrɛbu dɔɔ̄na mɛnɛ a bee doo nu a bee piya, lo a le Rehoboam. Dookɛ̄ a bee lu ekɔ doo tua sɔ̄, a bee doo pio nu a lee bu ye bɛbɛɛ. Mɛ sɔ̄ ye bɛbɛɛ elua ewu agɛrɛ, a bee ɔbɛ egbaɛ̄tɔ̄loo lok Bari sa bɔātɛ̄ etaāŋabah nwī nɛɛ pie. (2 Edoo 12:1) Sɔ̄ a esaa, a bee taāŋabah Bari, e pio sɔ̄ a taāŋabah dɔɔ̄na nwī-bari. (1 Mɛnɛ 14:21-24) Rehoboam le Ahab naale aba pya mɛnɛ a bee aaloo kaka taāŋabah. Bu kaka, booboo pya mɛnɛ a naa bɔ ture nyiɛ loo bee yerekpotɛ̄ ekwɔ sīdee taāŋabah. Mɛ kiikɛ̄ Jɛhova le, taāŋa ye bah bu kaka sīdee na a tɔgɛ sɛh lo mɛnɛ lee ale a bee piya a.
15. Ena anua kiisī lo etaāŋabah bu kaka sīdee kuī loo Jɛhova a?
15 Ena anua sīdee a bee lu esu taāŋabah Jɛhova kuī ye loo a? Ziī nu a nua na kɔ, pya mɛnɛ bee yerebah nɛ pya nɛɛ kɔ ba a taāŋabah Bari bu kaka sīdee. Lo dɔɔ̄na, sɔ̄ pya nɛɛ taāŋabah ekwɔ bari wee doo kɔ ba a si pɔrɔ sa aara pya dɔɔ̄na bu pɔrɔ sīdee. (Hos 4:1, 2) Gbaaloo wo, pya Izrɛl le pya wa mɛnɛ bee lu pya ebee kiī wa dum nɛ Jɛhova. Nyɔɔbee wo, Baibol su sɔ̄ ba taāŋabah ekwɔ bari dooreloo sɔ̄ dam ale wa maloo dɔɔ̄na nɛɛ a naale ye dam ale ye wa. (Jer 3:8, 9) Nɛɛ a doo wo gaa doo pɔrɔ pima ye dam a le ye wa sa yere ekiɛ̄nu bu ye wa ale ye dam. Bu aba lo sīdee, sɔ̄ nɛɛ a kiīloo nɛ Jɛhova taāŋabah ekwɔ bari, a doo pɔrɔ Ye pima. e—Deut 4:23, 24.
16. Taɛ ena alu kee a le yɛɛ nɛɛ kaāna dogo le nɛɛ bag dogo kɛɛ̄dɛɛ̄ Jɛhova a?
16 Ena i dap nɔ aāloo a? Bu kaka, i ɛrɛ e biaɛfii lo ekiī ekwɔ sīdee taāŋabah. Mɛ i ɛrɛ e kiinagesī lo etaāŋabah Bari bu sīdee a gbī sa lu kirikiri bu ye esiatam. Nɛɛ mɔmanudɛɛ̄ Malaki bee kɔ kee a le yɛɛ nɛɛ kaāna dogo le nɛɛ pɔrɔ dogo kɛɛ̄dɛɛ̄ Jɛhova. A bee ɛm kɔ, “lo sɔ̄ na bui sikɛ̄ muɛ̄ kee a le yɛɛ nɛɛ kaāna dogo le nɛɛ bag dogo a, yɛɛ nɛɛ a sitam nɛ Bari le nɛɛ a naa sitam ye nɛ.” (Mal 3:18) I gbī kɔ Jɛhova a ɛp i nua nɛɛ kaāna dogo. Nyɔɔwo, i nwaɛdɛɛ̄ lokwa lɔgɔ nu naa kpaɛ̄ i lɛɛ loo taāŋabah Jɛhova, kere i tɛɛ̄ ekwɔ. I gaa doo gbɛnɛ pɔrɔ lo a le i ɔbɛ etaāŋabah Jɛhova.
17. Ena anua i nwaɛdɛɛ̄ lo nɛɛ i sagɛ kɔ i ii ale i iya a?
17 Lo o le aba ɔɔ sa gaa kɛɛrɛ lo e ii wa ale iya dam, o dapge muɛ kɛ̄ ue Malaki kɔ ama dap ɛrɛ pah nyɔɔ nɛɛ o sagɛ kɔ o ii’e ale nɛɛ o iya doo ni? Nɛɛ dap ɛrɛ pio le dogo, lo a naa gaa taāŋabah lo kaka Bari, luge nɛɛ kaāna dogo kɛ̄dɛɛ̄ Jɛhova anyaawo ni? (2 Kɔr 6:14) Lo o ii ye ale o iya ye, edooge kɔ o agɛrɛbah wereloo Jɛhova ni? Naa kɛɛrɛbu taāŋa pya wa a bee taāŋabah yɔ lo Solomon bee ii bee ye nua nyɔɔ. Nyɔɔbee ba naa bee taāŋabah Jɛhova a, kinakina ba bee doo kɔ Solomon a taāŋabah yɔ.—1 Mɛnɛ 11:1, 4.
18. Ena tɛ le ka a tɔgɛ pya wa miɔŋɔ a?
18 Pya tɛ le ka, suaa edobah a kiiloo pya mɛnɛ a le bu Baibol yeabah nɛ pya bui miɔŋɔ kɔ ba a ɛrɛ taɛ lo etaāŋabah Jɛhova. Yerebah wa nɛ kɔ ba a suā kɔ pya mɛnɛ Jɛhova bee yerekpotɛ̄ na pya lo a bee ye taāŋabah, sa yere mɛm loo pya dɔɔ̄na kɔ ba a taāŋanage ye bah. Tɔgɛ pya o miɔŋɔ tɛ̄maloo o dogo le o ue, kɔ pya nu a doodoo si enɔānu, si uwe zue ue, na pya nu a kuī bu dum a. (Mat 6:33) Lo oo doo wo, pya o miɔŋɔ dap ɛp lu lu nɛɛ Ekeebee Jɛhova nua taāŋabah pya “wa butɔ.” Lo ama dap doo kɔ taāŋabah Jɛhova aa wa kuīloo ale ba dap lɛɛ bahloo etaāŋa ye bah.
19. Amunu bɛābu na a le nɛ pya a bee ɔbɛ etaāŋabah Jɛhova a? (Ɛpnage ekpo a kura “ O Dap Obia Pii Jɛhova!”)
19 Nɛɛ e bee lɛɛbahloo etaāŋabah Jɛhova, ekɔ a naa dapna lu ye gbo ni? Eeye, lo a kiiya sa sikɛ̄ taāŋabah Jɛhova. Lo edoo wo, lu ebɛɛ̄ kɔ a kumalookɛ̄ sa su yerebah a aabah pya kanɛɛ. (Jemes 5:14) Dɛ̄dɛɛ̄ epiaga a doo lo e obia lu gbo Jɛhova naa pe!
20. Lo i nɔ pya mɛnɛ a bee bɔ ture nyiɛ loo ama, bu mɛ sīdee na Jɛhova e ɛp i a?
20 Pya ena i enɔā aāloo pya mɛnɛ Izrɛl a? I dap bee pya mɛnɛ Izrɛl a bee bɔ ture nyiɛ loo, sɔ̄ i taāŋabah Jɛhova aābu dɛ̄dɛɛ̄ i beenyiɛ. Dooraa i nɔ nu aāloo pya i tɛɛ ekwɔ, kiiya, sa kwabahloo pya nu a lu ebɛɛ̄. I nyiɛŋianagebu kɛ̄ a lu ebɛɛ̄ kɔ i taāŋabah Bari bu kaka sīdee doo. Lo ziī ziī ii tɔɔ̄ bu bɔ ture nyiɛ loo nɛ Jɛhova, alɛ gaa le e’ɛp a doodoo nɛɛ a kaāna bu ye baɛdɛɛ̄.
YƆƆ 45 Pya Nu M Kɛɛrɛ Bu Na Beenyiɛ
a Bu ekobee ue ama, bee ue a kura “mɛnɛ pya Izrɛl” kiiloo dɛ̄dɛɛ̄ pya mɛnɛ a bee bɛɛ pya nɛɛ Jɛhova, kereadoo ba bee bɛɛ baɛ gā loo buɛ̄-mɛnɛ Juda, ale lop gā loo buɛ̄-mɛnɛ Izrɛl, ale dɛ̄dɛɛ̄ lo 12 gā.
b UE ALU EKƆ BAATƐ̄: Baibol su bee ue a kura “beenyiɛ” lo ebaātɛ̄ taɛ nu nɛɛ lu li bu, gbaāloo nu a ye nia, ye ekɛɛrɛ, kɛ̄ a mɛā doo, ye elap dogo, ye ekpo, ye mɛm, le nu a seeasī.
c A sira pie kɔ pya mɛnɛ a wee taāŋabah yɔ wee taaŋabah pya ekwɔ ekwɔ bari pya edo nyɔɔ a wa be eebah bee taāŋabah.
d Mɛnɛ Asa bee si gbɛnɛ pɔrɔ. (2 Edoo 16:7, 10) Kerewo, Baibol kɔ Asa bee doo nu a nia Jɛhova. Kereadoo tua sɔ̄ a naa bee su zuurabahtɔ̄, a bee kɔ a bee sikɛ̄ kiiya. Sɔ̄ alu egba dɛ̄dɛɛ̄ ye le dogo ɛp, a eenyɔɔ pya ekwɔ a bee tɛɛ̄. Ziī gbɛnɛ nu i muɛ na kɔ Asa bee taāŋabah aba Jɛhova, sa lɛɛ taāŋabah yɔ kɛɛ̄ ye bɛbɛɛ.—1 Mɛnɛ 15:11-13; 2 Edoo 14:2-5.
e I dap muɛ kɔ taāŋabah lu gbɛnɛ loo Jɛhova nyɔɔnɛbee tuatua le lo e ere baɛ lok Mozis kɔ aa lu etaāŋabah lɔgɔ nɛɛ ale lɔgɔ nu, mɛ aba Jɛhova.—A’aa 20:1-6.
f UE A BAATƐ̄ FOTO A LE NYƆƆ Eko: Mɛnɛ Devid le Mɛnɛ Hezekia bee kumalookɛ̄ kiiya sɔ̄ a bee lu ekɔ wa pɔrɔ wa nɛ. 23 naɛsī: Zege nɛɛ kanɛɛ a gaa kɔ kɛ̄ ziī wuga ɔ̄ mii bu sīdee a naa bɔloo doo. Lo wuga kumalookɛ̄ su lo zuurabahtɔ̄, nyaa kɛ̄ alu ebɛɛ̄, sa kiisī lo etaāŋabah Jɛhova leere.
