Ebip Pya A Buū Bip
Ena alu ekɔ a “aakɛ̄” sa “mɔ” bu kpa Aisaia 60:1 a?
Aisaia 60:1 buū kɔ, “Aākɛ̄, mɔ; nyɔnɛbee ɛɛdee elua, e nyiɛŋia Jɛhova e’aarakɛ̄ a nyɔɔ.” Pya dɔ a waɛ kpaɛ dɔ kpa kaɛ ama tɔgɛ kɔ lo nu na Zion, ale Jerusalem, a bee lu ekobee kɛ̄ loo Juda bu lo sɔ̄. a (Ais 60:14; 62:1, 2) Lo buɛ̄ yira dɔ yube lo edonyɔɔ. A ɛrɛ baɛ ebip i agara akiiloo dɔ kpa kaɛ ama: Tuatua, mɛ sɔ̄ le bu mɛ sīdee na Jerusalem bee “aakɛ̄” sa mɔ bu sīdee a tɔɔ̄ dɔ nu a? Eree baɛ, ekɔ pya ue Aisaia bee kɔ bu dɔ ama ɛrɛ gbɛnɛ dooa gbɔ̄mɛɛ̄ bu ilii sɔ̄ ama ni?
Mɛ sɔ̄ le bu mɛ sīdee na Jerusalɛm bee “aakɛ̄” sa mɔ bu sīdee a tɔɔ̄dɔ nu a? Jerusalɛm le ye tɔkaɛ bee le bu gbegbee sɔ̄ pya Juu bee le bah aa li Babilɔn bu 70 zua. Mɛ sɔ̄ pya Midia le pya Pesia bee be eebah Babilɔn, bee lu elɛɛbahloo kɔ pya Izrɛl a bee le dɛ̄dɛɛ̄ barasī Babilɔn gaa bee bɛɛ a obia kii wa buɛ̄, lokwa ba dap sikɛ̄ taāŋabah Jɛhova bie lo kɛ̄. (Ezra 1:1-4) Aā bu zua 537 B.C.E, pya a bee siga a bee bɔ ture nyiɛ loo a aabu 12 wa gā bee doo wo. (Ais 60:4) Ba bee bɔātɛ̄ ewɔp zɔɔ, sere doonu, sa obia wu tɔkaɛ. (Ezra 3:1-4, 7-11; 6:16-22) Ka Jɛhova bee sikɛ̄ mɔ nyɔɔ Jerusalɛm dɔɔ̄na sɔ̄, lo a kura kɔ a bee bɔātɛ̄ emɔ nyɔɔ pya ye nɛɛ. Ba bee obia lu ɛɛdee atɔɔ̄dɔ nu nɛ pya edonyɔɔ a naa bee suāloo Jɛhova.
Kerewo, mɔmanudɛɛ̄ Aisaia akiiloo obara kaka taāŋabah sere ye dɔ bee dooa gbɔ̄mɛɛ̄ bu nwīgbagbara sīdee nyɔɔ Jerusalɛm a dee kere. Gbɛnɛ-edo pya Izrɛl naa bee kiisī lo egbaɛ̄tɔ̄loo Bari. (Neh 13:27; Mal 1:6-8; 2:13, 14; Mat 15:7-9) Sɔ̄ esaa, ba bee kiīnage Jizɔs Kraist lo a le Mɛsaia. (Mat 27:1, 2) Bu zua 70 C.E, a bee lu egbeesī Jerusalɛm le ye tɔkaɛ lo eree baɛ sɔ̄.
Jɛhova ebee kɔ sere kɛ̄ kɔ lo ama esira. (Dan 9:24-27) Sirapie leere kɔ, a naa bee lu ekɛɛrɛ Jɛhova kɔ Jerusalɛm a le a kɛnɛkɛ̄ a doo gbɔ̄mɛɛ̄ dɛ̄dɛɛ̄ gah loo mɔmanudɛɛ̄ akiiloo obara kaka taāŋabah sere ye dɔ a le bu kpa Aisaia 60 ekobee.
Ekɔ pya ue Aisaia bee kɔ bu dɔ ama ɛrɛ gbɛnɛ dooa gbɔ̄mɛɛ̄ bu ilii sɔ̄ ama ni? Aiī, mɛ a dooa gbɔ̄mɛɛ̄ kiiloo dɔɔ̄na wa a tɔɔ̄dɔ nu, lo a le “Jerusalɛm a le nyɔɔ.” Pɔɔl bee ye ɛm kumaloo kɔ: “Alɛ na ilii ka a.” (Gal 4:26) Jerusalɛm a le nyɔɔ na lo gah bɔŋanaloo Bari a le bunyɔɔ lo pya a le bu na pya nɛɛ a le bu edɔɔ̄ ba ye tɔɔ̄ nɛ. Pya ba lu ye “miɔŋɔ” na Jizɔs le pya 144,000 Pya Nɛɛ Kriast alu etɔ̄ nɔɔ̄ bee, lo ba ɛrɛ bɛābu kii bunyɔɔ doodoo Pɔɔl. Pya Nɛɛ Kraist alu etɔ̄ nɔɔ bee na ba lu “edonyɔɔ a le kaɛ” a, lo a le “Izrɛl lo Bari.”—1 Pit 2:9; Gal 6:16.
Bu mɛ sīdee na Jerusalɛm a le nyɔɔ “aakɛ̄” sa “mɔ” a? A doo wo tɛ̄maloo pya ye miɔŋɔ alu etɔ̄ nɔɔ̄ bee ba le a kɛnɛkɛ̄. Naa su wa kɛ̄tɔɔ̄ dooreloo mɔmanudɛɛ̄ a le bu kpa Aisaia 60 ekobee.
Pya Nɛɛ Kraist alu etɔ̄ nɔɔ̄ bee ɛrɛ e “aakɛ̄” nyɔɔbee ba ebee yiibu ziī bu edɔɔ̄, sɔ̄ pya anna yira ba tɔɔ̄dɔ kpakpaa pya buɛ a bee lu ekɔ bu mɔmanudɛɛ̄ bee wa kuɛ bu baɛ sɔ̄ o’oo tup zua C.E. a. (Mat 13:37-43) Nyɔɔwo, ba bee le bah aa bu Babilɔn Lo Gbɛnɛ lo a le dɛ̄dɛɛ̄ ekwɔ sīdee taāŋabah. Pya alu etɔ̄ nɔɔ̄ bee bee kiisī lo ele bah aa mmɛ “kuma lo sɔ̄ ama,” lo a bee bɔātɛ̄ bu zua 1914. (Mat 13:39, 40) Sɔ̄ sɔ̄ naa binia bu zua 1919, ba bee lu puɛ sa aba lo sɔ̄ ba bee bɔātɛ̄ emɔ bu sīdee a tɔɔ̄dɔ nu tɛ̄maloo ezue le yereue akiiloo Buɛ̄-mɛnɛ. b Aā lo sɔ̄ mmɛ anyaawo, pya nɛɛ ba aabu dɛ̄dɛɛ̄ edonyɔɔ elua yii bu lo ɛɛdee, gbaāloo pya a siga loo Izrɛl loo Bari lo a le “pya mɛnɛ-buɛ̄” alu ekɔ nu akiiloo bu kpa Aisaia 60:3.—Mum 5:9, 10.
Deesī li, Pya Nɛɛ Kraist alu etɔ̄ nɔɔ̄ bee gaa le doo kɔ ɛɛdee a aabah Jɛhova a mɔ bu gbɛnɛ sīdee. Bu mɛ sīdee ni? Sɔ ba e’ua aa kɛnɛkɛ̄, ba elu “aā Jerusalem’’ ale wa Kraist. Dɛ̄dɛɛ̄ aba lu 144,000 lo ba enyɔɔnɛ ye bɛɛ doodoo mɛnɛ le pya wɔp zɔɔ.—Mum 14:1; 21:1, 2, 24; 22:3-5.
Aā Jerusalem ama gaa le ɛrɛ gbɛnɛ dooa gbɔ̄mɛɛ̄ loo nu a le bu kpa Aisaia 60:1. (Su Aisaia 60:1, 3, 5, 11, 19, 20 dooreloo Mumuuna 21:2, 9-11, 22-26.) Dookɛ̄ Jerusalem a kɛnɛkɛ̄ bee lu beekɛ̄ loo bɛbɛɛ pya Izrɛl a kere doo, kɛ̄ aā Jerusalem, le Kraist, elunage bɛbɛɛ lo aā sɔ̄ eku doolo. Bu mɛ sīdee na aā Jerusalem “[lu] aa bunyɔɔ aa kɛ̄ Bari le”a? Tɛ̄maloo edoo nu e’ɛrɛ pah nyɔɔ pya a le kɛnɛkɛ̄. Dɛ̄dɛɛ̄ pya a ɛrɛ bɔɔ loo Bari ba aabu dɛ̄dɛɛ̄ edonyɔɔ “ekia bu ye ɛɛ’dee.” Ba gaa le lu puɛ aa kɛ̄bah pɔrɔ le luh. (Mum 21:3, 4, 24) Lo ama ekura kɔ ‘elu e’obara dɛ̄dɛɛ̄ nu sere ye dɔ,’ dookɛ̄ a bee kɔ doo tɛ̄ma nu Aisaia le pya dɔɔ̄na nɛɛ mɔmanudɛɛ̄. (Doonu 3:21) Lo gbɛnɛ obara nu sere dɔ bee bɔātɛ̄ sɔ̄ Kraist bee lu Mɛnɛ, e a e’ina sɔ̄ ye Bɛbɛɛ Baɛ Boo Le Lop Top Zua e’ina kuma.
a Aisaia 60:1, bu New World Translation kɔ “wa” taā a kɔ “Zion,” ale “Jerusalem,” nyɔnɛbee pya bee ue akura, “aakɛ̄” le “mɔ” bu muɛ̄ ue Hibru kiiloo nɛɛwa lo a lu ekure “o” Bee ue akura “wa” yerebah nɛ pya a buū bu Beke kɔ ba a suā kɔ wa a gaa lu ekɔ nu akiiloo ama tɔɔ̄dɔ nu.
b Obara nu sere dɔ bu edɔɔ̄ a bee sudɔ bu zua 1919 lunage ebaatɛ̄ bu kpa Ezekiel 37:1-14 le Mumuuna 11:7-12. Ezekiel bee mɔmanudɛɛ̄ loo kɛ̄ dɛ̄dɛɛ̄ Pya Nɛɛ Kraist alu etɔ̄ nɔɔ̄ bee elu obara wa sere dɔ bu edɔɔ̄ lɛɛ bu zooro ba bee le bu nyɔɔnyɔɔ sɔ̄. Lo mɔmanudɛɛ̄ bu kpa Mumuuna gaa kɔ ue kumaloo ziī nwīgbagbara eku pya wuga nɛɛdam alu etɔ̄ nɔɔ̄ bee lo ba gaa bee zaāsī tam lo a bee lu e’ɔbɛ wa tam bu ziī nwī sɔ̄ a le yere wa kpɔgɔrɔ. Bu zua 1919, bee lu etubo wa bahloo nua “zooro a bɔloo eture nyiɛ loo sa suā nu.”—Mat 24:45; buū Pure Worship of Jehovah—Restored At Last!, p. 118.
