A ɛrɛ pya nu a tɔgɛ kɔ Jizɔs bee lu Gbɛnɛ Nɛɛ Tɛsi Ewɔp sɔ̄ a bee liamaā bu zua 29 C.E. E na a tɔgɛ doo wo a? Sɔ̄ Jizɔs gaa bee liamaā, a bee su ye loo nɛ doodoo zɔɔ alu ewaara lo edoo nu Bari “gbī.” (Gal 1:4; Hib 10:5-10) Kuma sɔ̄ waara zɔɔ a tɔɔ̄dɔ nu ama bee le aā sɔ̄ Jizɔs bee liamaā a, kura nage kɔ gbɛnɛ tɔkaɛ bu edɔɔ̄, lo a tɔɔ̄dɔ nɔɔnɔɔnu Jɛhova loo logaloga taāŋabah a dɛɛa nyɔɔ a’agara ebee dap le taɛ lo sɔ̄. Da wɔp zɔɔ nyɔɔ lunage ebɛɛ̄ loo tɔkaɛ bu edɔɔ̄.—Mat 3:16, 17; Hib 5:4-6.

Kuma sɔ̄ gbɛnɛ tɔkaɛ bu edɔɔ̄ le a, alu ebɛɛ̄ kɔ gbɛnɛ nɛɛ tɛsī ewɔp a le lokwa a dap kuūdɛɛ̄loo. Lokwa a dap lu esi lo tam, a bee lu etɔ̄ nɔɔ̄ bee Jizɔs tɛ̄maloo “kaɛ edɔɔ̄ le tɛ̄maloo ekpo.” (Doonu pya Nɛɛ lɛɛratam 10:37, 38; Maak 1:9-11) Kerewo, i tɛɛ̄ doodoo wa suā kɔ a bee lu etubobaloo Jizɔs nua Gbɛnɛ Nɛɛ Tɛsī Ewɔp lɛɛ a gae u sa alu elɛɛ ye kɛ̄ bu luh ni? I muɛ̄ gbɛnɛ nu anua sɔ̄ i kɛɛrɛbu edoba Erɔn le pya nɛɛ a bee le sɔ̄ alɛ e’aara lo ba bee si tam doodoo gbɛnɛ nɛɛ tɛsī ewɔp kɛɛ̄ Lok Mozis.

Dookɛ̄ lok Jɛhova bee nɛ Mozis kɔ doo, aba gbɛnɛ nɛɛ tɛsī ewɔp na a wee dap yii kɛ̄ alu Kaɛ Eenyɔɔ bie tɔkpo a, e sɔ̄ a esaa kɛ̄ alu Kaɛ Eenyɔɔ bie tɔkaɛ. Wee lu esu bɛ fima kɛ̄ yeā kee yɛɛ Kɛ̄ Alu Kaɛ Eenyɔɔ. Gbɛnɛ nɛɛ tɛsī ewɔp wee yii akɛāma aba nyɔɔ dee Doonu Uu Pɔrɔ. (Hib 9:1-3, 6, 7) Dookɛ̄ a bee lu etɔ̄ nɔɔ̄ bee Erɔn le pya a bee lu pya tɛsī ewɔp sɔ̄ alɛ e’aara lɛɛ ba gae yii kpaɛ̄ “bɛ-fima-kɛ̄ kaɛ” loo tɔkpo doo, bee dap nage lu etubobaloo Jizɔs doodoo Gbɛnɛ Nɛɛ Tɛsī Ewɔp loo gbɛnɛ tɔkaɛ Jɛhova bu edɔɔ̄ lɛɛ a gae u, lɛɛ sɔ̄ a esaa a tɛɛ̄ yee “bɛ-fima-kɛ̄, lo a le ye namloo” sa tɔɔ̄dum li bunyɔɔ. (Hib 10:20) Wo na anua nɛɛ lɛɛratam Pɔɔl bee kɔ Jizɔs gaa lu doodoo “nɛɛ tɛsī ewɔp” lɛɛ a yii “kɛ̄ kaɛ a naa lu esu bah daā,” lo a le “aba bunyɔɔ.”—Hib 9:11, 24.

Lɔgɔ kee naale yɛɛ sɔ̄ aā yii bɔmadum bee lu ebɔātɛ̄ le sɔ̄ a bee lu edoo agɛrɛ. E na anua a? Sɔ̄ Jizɔs bee kii bunyɔɔ sa su ye dum nɛ nyɔɔ pya nɛɛ, a bee doo nu a tɔgɛ kɔ elua edoo lo aā yii bɔmadum agɛrɛ. Wo tɔgɛ nage kɔ elua ebɔātɛ̄ lo yii bɔmadum, ale doo kɔ a le. Pya e na a bee le bu dodoo wo a?

Tuatua, Jizɔs bee sira kɛ̄sī Jɛhova, sɔ̄ esaa, a bee su ye dum nɛ Jɛhova doodoo zɔɔ, e bu kpɛdumɛ, Jɛhova bee su biī a aaloo waara zɔɔ miī Jizɔs. Lo a sii lu edoo pya nu ama, lo aā yii bɔmadum naale e’agatɛ̄.

Baibol naa kɔ i nɛ taɛ sɔ̄ Jɛhova bee su biī a aaloo waara zɔɔ a’agara Jizɔs. Nyɔɔwo, ii dap kɔ taɛ sɔ̄ lo aā yii bɔātɛ̄ le sɔ̄ a bee lu edoo agɛrɛ. Kerewo, i suā kɔ Jizɔs bee kii bunyɔɔ 10 biradee lɛɛ a gae lu dee pɛntikɔst. (Doonu pya Nɛɛ lɛɛratam 1:3) Bu nwī kere sɔ̄ ama, a bee su biī a aaloo ye waara zɔɔ bɛɛ kɛ̄sī Jɛhova, e Jɛhova bee su. (Hib 9:12) Nu a tɔgɛ kɔ lo ama lu kaka bee sirapie leere bie Pɛntikɔst. (Doonu pya Nɛɛ lɛɛratam 2:1-4, 32, 33) Lo sɔ̄ na aā yii bɔmadum bee lu edoo agɛrɛ a.

Lo ekɔ kpuree, aā yii bɔmadum bee bɔātɛ̄ sa lu edoo agɛrɛ sɔ̄ Jɛhova esua biī a aaloo waara zɔɔ Jizɔs. Lo yii bɔmadum bee lu edoo agɛrɛ, e Jizɔs nɛɛ a bee le yɛɛ lo yii bɔmadum bee lu Gbɛnɛ Nɛɛ Tɛsī Ewɔp.—Hib 7:25; 8:1-3, 6; 9:13-15.