1. E na bee ue a kura “kaka” tɔɔ̄dɔ a?

“O BEE tɛɛ̄ doodoo wa su kaka?” “Bee lu ekpɔā a bu kaka ni?” “Ku zua o etɔna bu kaka?” Dap lu kɔ elua ebip a pya ebip ama, ale bee olo o ebiba pya dɔɔ̄na. E na i kure “kaka” a? Gbɛnɛkpo sɔ̄, I wee su baātɛ̄ nu i yiga, i sīdee taāŋabah, le i sīdee tɔɔ̄dum. Pya nɛɛ a le “bu kaka” suā nu Baibol tɔgɛ, e ba tɔɔ̄ dookɛ̄ ye daakuu le doo. E nu a sira aabu na bee, ba lu puɛ aabu ekwɔ sīdee taāŋabah sa ba ɛrɛ dum a lee eera kere ba lu pya nɛɛ a naa mmana.—Jɔn 8:32.

2. Dookɛ̄ kpa Jɔn 13:34, 35 kɔ doo, e na alu tuatua nu a dap doo kɔ kaka ue a nia nɛɛ a?

² Taɛ e na a bee doo kɔ o su kaka a? Pio sɔ̄ a bee dap lu le elap dogo pya nɛɛ Jɛhova. (1 Pit 2:12) Ale a bee le nyɔɔ wereloo ba bee a tɔgɛ kumaloo. Gbɛnɛ-edo nɛɛ wee yere nukuādɛɛ̄ loo lo wereloo tua sɔ̄ ba si i enɔānu, e ba nyɛŋiabu loo ee ɛrɛgeba dɔɔ̄na nu ba bee nɔ bie enɔānu lo dee. Lo ama naa lu i nyɛŋia loo nyɔnɛbee Jizɔs bee kɔ elu esuāloo pya a wee ye nyɔɔnɛ dumɛ tɛ̄maloo wereloo ba ɛrɛ loo ɛnia aba. (Buū Jɔn 13:34, 35.) Mɛ a ɛrɛ pya dɔɔ̄na nu alu ebɛɛ̄ kɔ i doo lokwa i ɛrɛ e’agatɛ̄ yira.

3. E na esira lo i yira bu Bari dɛɛa nyɔɔ aba wereloo pya i wuga nɛɛdam le nɛɛwa tɔgɛ a?

³ I yira aa dɛɛa nyɔɔ aba wereloo i muɛ̄ yɛɛ pya nɛɛ Bari. E na anua a? Naa su kɔ ziī o wuga bu yira, lo a le nɛɛ kanɛɛ ale nɛɛ sɛmdee si gbɛnɛ pɔrɔ. Ale bee ziī wuga nɛɛdam ale nɛɛwa doo nu a i biirebu. Ale kɔ ziī  nɛɛ lu nɛɛ a ana yira, sa a kɔ i nɛ kɔ nu i yiga naa lu kaka. Lo nu a doo wo sira, o ɔbɛge etaāŋabah Jɛhova ni? Nu i nɔ aāloo na kɔ: Lo o yira bu Bari dɛɛa nyɔɔ kɛ̄ pya dɔɔ̄na doo dogo doo, e a naa dɛɛa nyɔɔ gbanialoo o ɛrɛ kumaloo Jɛhova alɛɛ loo, o yira naale e’agaloo. Lo e’agɛrɛtɛ̄ o yira, o ɛrɛ ebii bahkɛ̄ nɔ Baibol, dābeeloo nu o gaa nɔ, sa o gbītɛ̄ nu lokwa o suā kɔ nu o gaa nɔ akiiloo Jɛhova lu kaka. O ɛrɛ esuā leere kɔ Baibol aara kaka ue akiiloo Jɛhova.—Rom 12:2.

4. Aāloo nu a le bu kpa Matiu 13:3-6, 20, 21, e na pio nɛɛ wee doo sɔ̄ alu edoā-ɛp wa yira a?

⁴ Jizɔs bee kɔ pio nɛɛ esu “ɛɛbu” suā kaka, mɛ wa yira e’ɔloo sɔ̄ elu edoā wa ɛp. (Buū Matiu 13:3-6, 20, 21.) Naa daba, ba naa bee suā kɔ pya a nyɔɔnɛ dumɛ Jizɔs etɛɛ̄ bu e’aga kɛ̄tɔɔ̄ le taāŋa. (Mat 16:24) Ale bee ba bee kɛɛrɛ kɔ lulu Nɛɛ Kraist edoo kɔ ba aa ɛrɛ taāŋa doo pippip, lo a kura kɔ ba naale e’ɛrɛ lɔgɔ nu finiabah mɛ aba leelee na ba ewee ɛrɛ a. Bu nyɔuwe a bee piya ama, taāŋa ɛrɛge ele. Kɛ̄tɔɔ̄ dap nyaa, e lo ama edoo kɔ i aa ɛrɛ ɛɛbu pio sɔ̄.—Yɔɔ 6:6; Eklis 9:11.

5. Bu mɛ sīdee na gbɛnɛ-edo pya i wuga nɛɛdam le nɛɛwa gaa tɔgɛ sa yiga kɔ ba ɛrɛe kaka ue a?

⁵ Gbɛnɛ-edo pya i wuga nɛɛdam le nɛɛwa gaa tɔgɛ sa yiga kɔ ba ɛrɛe kaka ue. Bu mɛ sīdee? Wa yira naa nyɔŋa kere pya wa wuga bu yira doo wa piya nu loo ale ba doo dogo a naa bɔloo. (Yɔɔ 119:165) Ɛrɛgeba sɔ̄ ba kpesī doā-ɛp, wa yira naa ɔloo mɛ a agaloo. (Jem 1:2-4) Bu mɛ sīdee na o dap ɛrɛ dua e’agatɛ̄ yira ama a?

6. E na yira pya Nɛɛ Kraist bu tua sɔ̄ o’oo tup zua bee dɛɛa nyɔɔ a?

⁶ Yira pya Nɛɛ Kraist bu tua sɔ̄ o’oo tup zua bee dɛɛa nyɔɔ suānu ba ɛrɛ aābu Kpa Kaɛ le tɔgɛnu Jizɔs Kraist, lo a le “kaka le yereue.” (Gal 2:5) Pya nu a le bu lo kaka ama na dɛ̄dɛɛ̄ tɔgɛnu pya Nɛɛ Kraist, gbaāloo kaka akiiloo waara zɔɔ a’agara Jizɔs le ye aakɛ̄ bu luh. Nɛɛ lɛɛratam Pɔɔl bee yiga kɔ pya tɔgɛnu ama lu kaka. E na anua a? Nyɔnɛbee a bee su Kpa Kaɛ tɔŋɛ “siā kɔmɛ Kraist ɛrɛ emuɛ̄ pɔrɔ, sa aakɛ̄ yɛɛ pya a e’ua.” (Doonu pya Nɛɛ lɛɛratam 17:2, 3) Pya Nɛɛ Kraist bu tua sɔ̄ o’oo tup zua bee su dɛ̄dɛɛ̄ lo tɔgɛnu sa dɛɛa nyɔɔ kaɛ edɔɔ̄ lo edābeeloo Muɛ̄ Ue Bari. Ba bee dābeeloo kɔ pya tɔgɛnu ama bee dɛɛa nyɔɔ nu Kpa Kaɛ kɔ. (Doonu pya Nɛɛ lɛɛratam 17:11, 12; Hib 5:14) Wa yira naa bee dɛɛa nyɔɔ nu ba kɛɛrɛ le kɛ̄ nu wa tɔɔ̄loo doo, e ba naa bee taāŋabah Jɛhova nyɔɔbee bu wa wee ɛɛ sɔ̄ ba le kpaɛ̄ pya wa wuga bu yira. Taāwo, wa yira bee dɛɛa nyɔɔ “suānu Bari.”—Kɔl 1:9, 10.

7. E na yira i ɛrɛ bu kaka ue Baibol edoo i nɛ a?

⁷ Kaka ue a le bu Muɛ̄ Ue Bari naa wee nyaa. (Yɔɔ 119:160) Bu edoba, lo kaka ue naa nyaa kere i wuga bu yira biire i bu ale a si gbɛnɛ pɔrɔ. E a naa nyaa nage sɔ̄ i kpesī taāŋa. Nyɔɔwo, a bɔloo kɔ i dābeeloo pya tɔgɛnu Baibol kaāna sa yiga kɔ ba lu kaka. I e’agatɛ̄ yira a dɛɛa nyɔɔ kaka ue Baibol edoo kɔ i yira agɛrɛ sɔ̄ i kpesī doā-ɛp, dookɛ̄ kpe aā-fah wee doo kɔ fah a bia ziī dɔ doo sɔ̄ gbɛnɛ efɔp gaa dɔ. Bu mɛ  sīdee na o dap agɛrɛtɛ̄ o yira kɔ o ɛrɛe kaka a?

8. Dookɛ̄ 2 Timɔti 3:14, 15 tɔgɛ doo, bu mɛ sīdee na Timoti bee yiga kɔ a ɛrɛe kaka ue a?

⁸ Timoti bee suā kɔ a ɛrɛe kaka ue. E na a bee doo kɔ a suā doo wo a? (Buū 2 Timɔti 3:14, 15.) Ye ka le ye kaāma bee doo kɔ a suā “nu a le bu kpa kaɛ.” Mɛ alɛ bee sunage sɔ̄ le mɛm nɔā Baibol. E a bee sira kɔ, a bee “yira agɛrɛ” kɔ Baibol aara kaka ue. Sɔ̄ a esaa, Timoti, ye ka, le ye kaāma bee lu pya Nɛɛ Kraist. Bu kaka, nu a bee nia Timoti na wereloo pya Nɛɛ Kraist ye tɔgɛ kumaloo, e a bee ye taɛ ele kpaɛ̄ pya Nɛɛ Kraist sa kuūdɛɛ̄loo pya wuga nɛɛdam le nɛɛwa. (Fil 2:19, 20) Kerewo, ye yira bee agatɛ̄, naale nyɔɔ ye ekɛɛrɛ kiiloo pya nɛɛ, mɛ nyɔɔ kaka ue a ye zuura waɛma loo Jɛhova. E olo ɛrɛ nage enɔ Baibol sa ɛrɛ ekɛɛrɛ nyɔɔ nu o enɔā akiiloo Jɛhova.

9. Taa amunu kpog-bee kaka ue na a bɔloo kɔ o yiga a?

⁹ Lo ebɔātɛ̄, lu ebɛɛ̄ kɔ o yiga taa kpog-bee kaka ue. Tuatua, lee kɔ o yiga kɔ Jɛhova Bari na a Dɛm dɛ̄dɛɛ̄ nu a. (A’aa 3:14, 15; Hib 3:4; Mum 4:11) Eree baɛ, o ɛrɛ eyiga kɔ Baibol lu yereue Bari nɛ pya nɛɛ. (2 Tim 3:16, 17) Lo eree taa, o ɛrɛ esuā leere kɔ Jɛhova ɛrɛ ziī eku pya nɛɛ ba ye taāŋabah lo Jizɔs gaa wa zaāsī, sa Pya Ekeebee Jɛhova na lo eku a. (Ais 43:10-12; Jɔn 14:6; Doonu pya Nɛɛ lɛɛratam 15:14) Susuā pya lo kpog-bee kaka ue naa kura kɔ i suā dɛ̄dɛɛ̄ nu a le bu Baibol. Nu o seea sī na lo esu o ‘ekpo buābee’ yeā mɛm loo o yira kɔ o ɛrɛe kaka ue.—Rom 12:1.

10. Gbaāloo nɔ kaka ue, e na alu ebɛɛ̄ kɔ i piiga lo edoo a?

¹⁰ Aba sɔ̄ o suā taa kpog-bee kaka ue akiiloo Bari, Baibol, le pya nɛɛ Bari a,  lu ebɛɛ̄ kɔ o su Kpa Kaɛ baātɛ̄ kaka ue ama nɛ pya dɔɔ̄na. E na anua a? Nyɔnɛbee doodoo pya Nɛɛ Kraist i ɛrɛ etɔgɛ kaka ue pya nɛɛ ba gbī egbaɛ̄ i tɔ̄loo. * (1 Tim 4:16) E kuma sɔ̄ i piiga lo edoo kɔ pya dɔɔ̄na a yiga kaka a aabu Baibol, i yere mɛm loo ilii yira bu pya lo kaka ue.

11. Amunu edoba na nɛɛ lɛɛratam Pɔɔl bee sere kɛ̄ kiiloo tɔgɛ nu a?

¹¹ Sɔ̄ nɛɛ lɛɛratam Pɔɔl bee tɔgɛ nu pya nɛɛ, a bee wa “zū kumaloo Jizɔs aā bu lok Mozis le aāloo pya zue ue.” (Doonu pya Nɛɛ lɛɛratam 28:23) Bu mɛ sīdee na i dap nɔ edoba Pɔɔl sɔ̄ i gaa tɔgɛ kaka ue pya dɔɔ̄na a? Ii ɛrɛ e aadee wa kɔ nɛ nu Baibol kɔ. Mɛ i ɛrɛ eyerebah nɛ pya i gaa nyɔɔnɛ nɔ Baibol kɔ ba a ɛrɛ ekɛɛrɛ nyɔɔ nu Kpa Kaɛ kɔ sa tɔɔ̄ waɛloo Jɛhova. I gbī kɔ ba a su kaka ue, naale nyɔɔbee ba ɛrɛ i nia bu, mɛ nyɔɔbee ba dābeeloo kɔ nu ba gaa nɔ lu kaāna kaka akiiloo i wereloo Bari.

12-13. Bu mɛ sīdee na pya tɛ le ka edap yerebah nɛ pya wa miɔŋɔ kɔ ba a bia bu kaka a?

¹² Pya tɛ le ka, bui wee gbī kɔ pya bui miɔŋɔ a bia bu kaka. O dap kɛɛrɛ kɔ lo ba ɛrɛ le gbo bu bɔŋanaloo, ba dap kiisī leere bu edɔɔ̄. Kerewo, lokwa pya o miɔŋɔ yiga kɔ ba ɛrɛe kaka, alu ebɛɛ̄ kɔ ba a ɛrɛ nu a eenyɔɔ pya kaāna gbo. A bɔloo kɔ ba a ɛrɛ le gbanialoo kiikɛ̄ Bari le sa suā kɔ ba ɛrɛe kaka ue a aabu Muɛ̄ Ue Bari.

¹³ Lokwa pya tɛ le ka tɔgɛ kaka akiiloo Bari pya wa miɔŋɔ, ba alaba etɔgɛ le edoba tɛ̄maloo ewee nɔ Baibol. Ba ɛrɛ esu sɔ̄ ɛā ekɛɛrɛ nyɔɔ nu ba nɔ. Lo sɔ̄ na ba edap tɔgɛ pya wa miɔŋɔ kɔ ba a doo nage wo a. Alu ebɛɛ̄ kɔ ba a tɔgɛ pya wa miɔŋɔ kɛ̄ esu pya kpa i wee su nɔā Baibol daānu doo, dookɛ̄ ba wee tɔgɛ pya nɛɛ ba gaa nyɔɔnɛ nɔnu doo. Bu dodoo wo, ba eyerebah nɛ pya wa miɔŋɔ kɔ ba a tɔgɛ nia loo Jɛhova le sīdee a gaa i su nɛā nuede bu edɔɔ̄, lo a le tɛ̄maloo “zooro a bɔloo eture nyiɛ loo sa suā nu.” (Mat 24:45-47) Pya tɛ le ka, bui aa tɔgɛ aba kpog-bee kaka ue pya bui miɔŋɔ. Yerebah wa nɛ kɔ ba a ɛrɛ e’agatɛ̄ yira tɛ̄maloo etɔgɛ wa “nu a toga kiikɛ̄ loo Bari” dookɛ̄ wa zua le wa edaābeeloo nu le doo.—1 Kɔr 2:10.

14. E na anua i nɔ nu akiiloo mɔmanudɛɛ̄ Baibol a? (Buū ekpo a kura “ O Dapge Baatɛ̄ Pya Mɔmanudɛɛ̄ Ama Ni?”)

¹⁴ Mɔmanudɛɛ̄ Baibol lu zii gbɛnɛ gah loo Muɛ̄ Ue Bari a yerebah doo kɔ i yira bu Jɛhova a agatɛ̄. Pya amunu mɔmanudɛɛ̄ Baibol na a agɛrɛtɛ̄ oloo yira a? O dap kɔ ue nyɔɔ mɔmanudɛɛ̄ akiiloo “kpɛdumɛ dee.” (2 Tim 3:1-5; Mat 24:3, 7) Mɛ dɔɔ̄na amunu mɔmanudɛɛ̄ a edooa gbɔ̄mɛɛ̄ na a dap agɛrɛtɛ̄ o yira a? Bu edoba, o dapge baatɛ̄ sīdee mɔmanudɛɛ̄ a le bu kpa Daniel 2 ekobee ale 11 ekobee edooa gbɔmɛɛ̄ sa le gaa dooa gbɔ̄mɛɛ̄ ni?  * Sɔ̄ o yira dɛɛa nyɔɔ nu a le bu Baibol, o yira e’agatɛ̄ kaāna. Naa kɛɛrɛ edoba pya wuga ba bee tɔga kɛ̄bah tɛ̄ŋaloo li Germany bu eree Baɛ Sɔ̄ Nɔ̄ Nyɔuwe a. Kere ba naa bee aadee dābeeloo mɔmanudɛɛ̄ Baibol akiiloo kpɛdumɛ dee, ba bee ɛrɛ e’agatɛ̄ yira bu Muɛ̄ Ue Bari.

15-17. Bu mɛ sīdee na nɔ Baibol bee yere mɛmloo pya i wuga a bee lu etɛ̄ŋaloo kɛɛ̄ bɛbɛɛ Nazi a?

¹⁵ Kɛɛ̄ bɛbɛɛ Nazi li Germany, bee lu eyere gbɛnɛ-edo pya i wuga nɛɛdam le nɛɛwa kpɔgɔrɔ. Hitler le ziī gbɛnɛ nɛɛbee a kura Heinrich Himmler bee baaloo Pya Ekeebee Jɛhova. Dookɛ̄ ziī wuga nɛɛwa kɔ doo, Himmler bee kɔ nɛ ziī eku pya wuga nɛɛwa a bee le kpɔgɔrɔ kɔ: “Jɛhova dap bɛɛ bunyɔɔ, mɛ nyɔɔ kɛnɛkɛ̄ ama ili na i gaa bɛɛ a! I muɛ̄ pya edap egerebu, i naa ɛp sɛh elu bɔɔlo sɛh ili!” E na a bee yerebah nɛ pya nɛɛ Jɛhova kɔ ba a bia bu yira agɛrɛ a?

¹⁶ Pya Nɔ Baibol bee suā kɔ Buɛ̄-mɛnɛ Bari ebee bɔātɛ̄ ebɛɛ aābu zua 1914. A naa bee wa lu nyɛŋia loo sɔ̄ ba bee kpesī e’agabah doā-ɛp. Kerewo, pya nɛɛ Jɛhova bee suā leere kɔ  lɔgɔ bɛbɛɛ pya nɛɛ naale edap ɔbɛ Bari lɛɛloo edoo ye ekɛɛrɛ. Hitler naa bee dap lɛɛ kaka taāŋabah ale wu ziī bɛbɛɛ a agaloo ee Buɛ̄-mɛnɛ Bari. Pya i wuga bee suā kɔ bɛbɛɛ Hitler e’ina kuma ziī dee.

¹⁷ Nu pya wuga nɛɛdam le nɛɛwa ama yiga bee lu kaka. Sɔ̄ naa bee binia, bɛbɛɛ Nazi bee dɔ, e Heinrich Himmler, nɛɛ a bee kɔ “nyɔɔ kɛnɛkɛ̄ ama ili na i gaa bɛɛ a,” bee teera lo ekpɔā ye dum. Sɔ̄ a gaa bee teera a bee zɔŋia zii wuga nɛɛdam a suāloo a bee le kpɔgɔrɔ a kura Lübke. Bu gbɛnɛ e’ɔaloo, Himmler bip wuga Lübke kɔ: “Nɛɛ nɔ Baibol, e na a gaa sira a?” Wuga Lübke bee kɔ nɛ Himmler kɔ Pya Ekeebee Jɛhova bee suā leere kɔ bɛbɛɛ Nazi gaa le dɔ le kɔ a gaa le lu e’agarae wa. Himmler lo a wee kɔ pɔrɔ ue pima Pya Ekeebee Jɛhova a, naa bee ɛrɛna lɔgɔ nu ekɔ. Sɔ̄ naa binia, a bee fɛ aba ɛɛ. E na i nɔ aāloo a? Pya nu i nɔ aābu Baibol gbaāloo pya mɔmanudɛɛ̄ a le bu Baibol dap agɛrɛtɛ̄ i yira bu Bari sa doo kɔ i dɛrɛ ye nyiɛ nyɔɔ kaɛlɛɛ ɛrɛgeba taāŋa i gaa tɛɛ̄ bu.—2 Pit 1:19-21.

18. Dookɛ̄ kpa Jɔn 6:67, 68 tɔgɛ doo, e na anua i gbī ‘kaka suānu le edaābeeloo nu’ Pɔɔl bee kɔ ue kumaloo bu Pya Filipai 1:9 a?

¹⁸ Doraa ziī ziī ii i tɔgɛ wereloo lo etɔgɛ kɔ i lue pya kaka Nɛɛ Kraist. Mɛ alu ebɛɛ̄ kɔ i ɛrɛ ‘kaka suānu le edaābeeloo nu.’ (Fil 1:9) Lo a naa le doo wo, i “yɛɛ kii ɛrɛgeba kɛ̄ tɛ̄mabah dɛ̄dɛɛ̄ efɔp tɔgɛnu, gbaāloo pya ana yira.” (Ɛfɛs 4:14) Sɔ̄ gbɛnɛ-edo pya Nɛɛ Kraist bu tua sɔ̄ o’oo tup zua C.E. bee ɔbɛ enyɔɔnɛ dumɛ Jizɔs, nɛɛ lɛɛratam Pita bee yiga kɔ Jizɔs ɛrɛ “dɛ̄dɛɛ̄ ue dum a naa wee tah.” (Buū Jɔn 6:67, 68.) Kere Pita naa bee dābeeloo dɛ̄dɛɛ̄ nu akiiloo tɔgɛnu Jizɔs, a bee tɔɔ̄ agara nyɔnɛbee a bee suā kaka ue akiiloo Kraist. Olo dap nage agɛrɛtɛ̄ o yira bu pya nu Baibol tɔgɛ. Lo o doo wo, o yira e’agaloo kaɛlɛɛ ɛrɛgeba nu o tɛɛ̄ bu, e o yerebah nɛ pya dɔɔna kɔ ba a ɛrɛ e’agatɛ̄ yira.—2 Jɔn 1, 2.