Jɛhova gbī kɔ baɛ pya nɛɛ a iya ziī a le bu gbaaloo sa tɔɔ̄ bia bu ɛɛbu. (Mat 19:4-6) Lo o gbī e’iya ale o gbī e’ii, o tɛɛ̄ doodoo wa dap muɛ nɛɛ a bɔloo ni? Jɛhova alu Nɛɛ a bee i dɛm suā nu a bɔloo kɔ i doo lokwa i biraloo iya ziī le i iya dam le wa kiisī leere. Nyɔɔwo, lo o su pya zuurabahtɔ̄ Jɛhova enɛa i yere bu dogo, elee a loo kaāna. Naa ɛp pio lo zuurabahtɔ̄ ama.

Tuatua, i ɛrɛ edābeeloo kɔ: “Beenyiɛ lu nu dag eenyɔɔ dɛ̄dɛɛ̄ nu, e a bee piya ereloo.” (Jer 17:9) Aba sɔ̄ baɛ nɛɛ ba gbī e’iya ziī zɔ̄ŋia sa biraloo iya ziī, e’agabah taɛ ba ɛrɛ kiiloo ziī dap nwaabah aakɛ̄ sa lo ama dap doo kɔ ba aa biaɛna nu fii bu sīdee suānu leloo. Sɔ̄ biaɛfii pya nɛɛ a gbī e’iya ziī dɛɛa nyɔɔ aba wa taɛ, gbɛnɛ-edo sɔ̄ piya nu wee sira aabu. (Kam 28:26) Nu anua a naa bɔloo kɔ baɛ nɛɛ a nwaabah kɔ kɛ̄ nu wa tɔɔ̄loo doo nɛ ziī ale yira yii lɛɛ ba gae suāloo ziī leere lo.

Kpa Kam 22:3 kɔ: “Nɛɛ a ɛrɛ buā-bee muɛ nu bɔɔ sa gɔ̄ ye loo mɛ pya a naa ɛrɛ ekɛɛrɛ kiisī sa muɛ pɔrɔ ye tɛ̄maloo.” E na alu gɛɛgɛɛloo a le bu kii nyɔɔ intanɛt wee gbī nɛɛ o ii ale nɛɛ o iya ani? Alu ekiɛ̄nu kɔ pio nɛɛ ba bee gbī nɛɛ ba e’ii ale nɛɛ ba e’iya aā nyɔɔ intanɛt sa biraloo iya ziī emɔna bu kpɛdumɛ kɔ lo nɛɛ aa bee wa dag e. Lo dɔɔ̄na na kɔ, pio pya alu dag siā wa loo nyɔɔ intanɛt bu sīdee alu kee loo nu ba lu, lo edag pya dɔɔ̄na sa wa yibnage kpugi bah pio sɔ̄. Siga sɔ̄, pya nɛɛ alu dag ama kɔ esah kɔ ba lue Pya Ekeebee Jɛhova.

Naa kɛɛrɛ dɔɔ̄na nu bɔɔ a le bu ama. Pio dɔ intanɛt pya nɛɛ si wee gbī nɛɛ ba e’ii ale nɛɛ ba e’iya wee su kɔmputa kɔā pya a bɔloo e’iya ziī tɛ̄maloo esu ziī sīdee būŋa sɔm daā. Kerewo, lɔgɔ nu a tɔgɛ kɔ lo sīdee ama kiā leere naale. Eluge nu suānu le loo kɔ i dɛrɛ nyiɛ nyɔɔ suānu miɔŋɔ nɛɛ lokwa i iya dam le wa alu nu a kuī ama kiisī leere ni? Etɛɛ̄ doodoo wa i kɛɛrɛ kɔ susu pya nu alu esu kɔmputa daā ama elee ee pya daakuu Baibol ni?—Kam 1:7; 3:5-7.

Zuurabahtɔ̄ a le bu kpa Kam 14:15 kɔ: “Nɛɛ a naa ɛrɛ ekɛɛrɛ yira dɛ̄dɛɛ̄ nu, mɛ nɛɛ buā-bee ɛp kɛ̄ a gaa kii.” Lɛɛ o gae biaɛfii nɛɛ o kɛɛrɛ kɔ elu o dam ale o wa,  o ɛrɛ edasī suāloo lo nɛɛ leere. Mɛ lo a le o gbī lo nɛɛ aā nyɔɔ intanɛt oo le edap ye suāloo leere. Kereadoo bui muɛ pya nu akiiloo ziī sa su sɔ̄ wee yeā ue ma ziī, o dapge kɔ o esuāeloo lo nɛɛ leere ni? Pio pya ba bee kɛɛrɛ kɔ ba emɔnae wa kaāna wereloo emɔna nu a wa ɔbɛ sɔ̄ ba mɔna ziī sī le sī.

Nɛɛ ɛm le-yɔɔ bee kɔ: “Mm yɔ pya kɔ esah ɛŋɛtɛ̄ aba dɔ, ale yɔ pya baɛ sī bɔŋanaloo.” (Yɔɔ 26:4) Booboo nɛɛ kɛɛrɛ kɔ a naa bee piya lo ekɔ esah kiiloo nu ba lu nyɔɔ intanɛt lokwa a bee kɔ ba lu kaāna nɛɛ kɛ̄dɛɛ̄ pya nɛɛ. Ba dap gɔ̄ taɛ wa elap dogo ale ba naale etɔgɛ taɛ nu ba lu sɔ̄ ba aa yere ue ma nɛɛ nyɔɔ intanɛt. Kere pio nɛɛ kɔ ba lue Pya Ekeebee Jɛhova, ekɔ bu kaka ba luge pya Nɛɛ Kraist eliamaā ni? Ekɔ ba agage loo bu edɔɔ̄ ni? Ekɔ ba ɛrɛge kaāna gbanialoo kumaloo Jɛhova ni? Ba luge pya nɛɛ alu enɛ enwadɛɛ̄ bu bɔŋanaloo ni? Sɛh ba lu pya a sere pɔrɔ edoba ale pya “pɔrɔ dogo” ni? (1 Kɔr 15:33; 2 Tim 2:20, 21) E ba luge puɛ lo e’ii ale e’iya dɛɛa nyɔɔ daakuu Baibol ni? Alu ebɛɛ̄ lo esuā pya nu ama, mɛ ii le edap suā lo a le ii bip aābah pya dɔɔ̄na Nɛɛ Ekeebee ba ye suāloo leere. (Kam 15:22) E bu kaka, zooro Jɛhova a yira agɛrɛ naale ekɛɛrɛ lo esu “loo . . . yere loo” nɛɛ a naa yira.—2 Kɔr 6:14; 1 Kɔr 7:39.

Nyɔɔbee alu gɛɛgɛɛloo lo esu intanɛt gbiā nɛɛ e’ii ale nɛɛ e’iya a, a ɛrɛ pya dɔɔ̄na sīdee a lee eera lo esu gbiā nɛɛ e’ii ale nɛɛ e’iya sa ɛrɛ le gbanialoo lo edoo kɔ i iya dam le wa alu lo ka le loo. Mɛ kɛ̄ na o dap gbī nɛɛ o ii ale nɛɛ o iya aā ani? Lo i le kɛ̄ a naa lu ekpaɛ̄ zɔ̄zɔ̄ŋia, Pya Ekeebee Jɛhova dap suāloo pya dɔɔ̄na bie enɔānu bu bɔŋanaloo, pya i asɛmbli, pya i kɔnvɛnsɔn le pya dɔɔ̄na zɔ̄zɔ̄ŋia i wee ɛrɛ.

Lo alu sɔ̄ gbaa bɔŋana ama naa waɛ, naa daba nyɔɔbee dumɛloo COVID-19, i su i fon le kɔmputa siā pya i enɔānu bu bɔŋanaloo kɛ̄ i ɛrɛ dee lo ezɔ̄ŋia pya dɔɔ̄na nɛɛ Ekeebee ba lege aba aba. O dap muɛ kɛ̄ ba ɛrɛ epoo bu enɔānu sa dā kɛ̄ ba kɔ wa yira siā doo. (1 Tim 6:11, 12) O dapnage nyɔɔnɛ zii aba kɔnia ue tɛ̄maloo vidio sɔ̄ enɔānu e’ina kuma. Tɛ̄maloo sɔ̄ ziī eku Pya Ekeebee gbaa zɔ̄ŋia bu vidio nyɔɔ fon ale bu kɔmputa lo e’ɛrɛ ekpeloo, o dap ɛp kɛ̄ lo nɛɛ yɔ pya dɔɔ̄na dania nu doo le kɛ̄ a wa aara nage doo, lo ama dap doo kɔ o suā taɛ nɛɛ a lu. (1 Pit 3:4) Sɔ̄ sɔ̄ aa kiisī, o suā loo lo nɛɛ leere, sa dap gbītɛ̄ suā sɛh bui nu seeasī luge aba etɛɛ̄nɛ sa lu lo bui dap iya zii naa e.

Sɔ̄ pya a le aba aba gbī nɛɛ ba e’ii ale nɛɛ ba e’iya dɛɛa nyɔɔ daakuu Baibol, ba emuɛ kaka ue a le bu kam a kɔ: “Nɛɛ a gbī [le] wa [ale le dam] muɛ gbī le nu muɛ, sa ɛrɛ ewonu aābah Jɛhova.”—Kam 18:22.