1. Ena Jɛhova gbī kɔ alu edoo anii’ee a?

 NII’EE, Jɛhova gbī kɔ le yereue akiiloo ye Buɛ̄-mɛnɛ alu ezue mmɛ dɛ̄dɛɛ̄ kɛ̄ a le bu nyɔuwe. (Maak 13:10; 1 Tim 2:3, 4) Tam ama ɛɛ tam Jɛhova, e a lee kaāna kɔ etubobaloo aba ye Nwiīnɛɛdam a wereloo kɔ a baɛbee lo tam. I suā leere kɔ kɛɛ̄ leredee a aabah Jizɔs, tam zue ue elu esi mmɛɛ dookɛ̄ Jɛhova gbī doo lɛɛ kuma gae lu.—Mat 24:14.

2. Ena i nɔ bu ekobee ue ama a?

² Bu ekobee ue ama, i muɛ kɛ̄ Jizɔs aa su ye “zooro a bɔloo eture nyiɛ loo sa suā nu” nɛa nuede bu edɔɔ̄ pya ye zooro doo, le kɛ̄ aa wa bɔŋɛnɛloo lokwa ba dap si tam zue ue lo alu tam a kuī ee dɛ̄dɛɛ̄ tam ama doo. (Mat 24:45) I muɛnage nu ziī ziī ii dap doo lo eyerekpotɛ̄ Jizɔs le zooro a bɔloo eture nyiɛ loo.

3. Amunu ekpo na alu enɛ Jizɔs a?

³ Jizɔs gaa baɛbee tam zue ue. I tɛɛ̄ doodoo wa suā lo ama ni? Nwīgbagbara sɔ̄ lɛɛ Jizɔs gae kii bunyɔɔ, a bee nyɔɔnɛ pio pya a wee ye nyɔɔnɛ dumɛ bɔŋia bie nyɔɔ kpokɛ̄ Galili. A bee wa kɔ nɛ kɔ: “Ebee lu enɛ mɛ dɛ̄dɛɛ̄ ekpo bunyɔɔ le kɛnɛkɛ̄.” Yere nukuādɛɛ̄ loo ue a sikɛ̄ kɔ sɔ̄ a kɔ: “Nyɔɔwo kiraa sa doo kɔ dɛ̄dɛɛ̄ edonyɔɔ alu pya a mɛ nyɔɔnɛ dumɛ.” (Mat 28:18, 19) Nyɔɔwo, baɛbee tam zue ue bee le yɛɛ ziī nu a bee lu enɛ ekpo Jizɔs kɔ a doo.

4. Ena anua i suā leere kɔ Jizɔs lege gaa baɛbee tam zue ue a?

 ⁴ Jizɔs bee kɔ tam zue ue le doo kɔ pya nɛɛ a nyɔɔnɛ ye dumɛ elu esi tɛ̄ma ɛŋɛnɛ “dɛ̄dɛɛ̄ edonyɔɔ” le kɔ ele e loo pya a wee ye nyɔɔnɛ dumɛ “dɛ̄dɛɛ̄ dee mmɛ kuma lo sɔ̄ ama.” (Mat 28:20) Pya ue ama tɔgɛ kɔ tam zue ue ekiisī tɛ̄maloo leredee a aaba Jizɔs mmɛ bu ilii dee ama.

5. Bu mɛ sīdee na i aa doo gbɔ̄mɛɛ ue a le bu kpa Le-yɔɔ 110:3 a?

⁵ Bu Jizɔs naa bee dɔ kɔ buā pya esitam zue ue edɔ kiikɛ̄ bu sɔ̄ kpɛdumɛ. A bee suā kɔ ue mɔmanudɛɛ̄ lo nɛɛ uɛ le-yɔɔ bee ɛm edooa gbɔ̄mɛɛ, lo a kɔ: “Pya o nɛɛ gaa le su loo wa nɛ bu yɔrɔ.” (Yɔɔ 110:3) Lo o gaa si tam zue ue, suā kɔ o waa yerekpotɛ̄ Jizɔs le zooro a bɔloo eture nyiɛ loo sa suānu, le kɔ o gaa doo gbɔ̄mɛɛ lo mɔmanudɛɛ̄. Lo tam aa kiisī, mɛ a ɛrɛ pya nu finiabah a le.

6. Ziī amunu nu finiabah na pya aa zue ue Buɛ̄-mɛnɛ aa kpesī anii’ee a?

⁶ Ziī nu finiabah pya a gaa zue ue Buɛ̄-mɛnɛ kpesī na gbanasī. Pya anna yira, pya zaāsī yigabari, le pya a le bu bira bɛbɛɛ ekɔa esah akiiloo i tam nɛ pya nɛɛ. Lo pya i manamana, pya i suāloo, le pya i koo kɛ̄tam yiga esah ama, ba dap i zū kɔ i ɔbɛ taāŋabah Jɛhova le kɔ i ɔbɛ ezue ue. Bie pio barasī, alu egbana i sī tɛ̄maloo eyegere i, i yere bɔɔ bu, i aa, sa i yerenage tɔ-kpɔgɔrɔ. Pya nu ama naa lu i nyɛŋia loo. Jizɔs bee kɔ sere kɛ̄ kɔ: “Booboo edonyɔɔ ebaa i loo nyɔɔ mdaa bee.” (Mat 24:9) Sɔ̄ pya nɛɛ i baaloo doo wo lu nu a tɔgɛ kɔ Jɛhova aa i yerekpotɛ̄. (Mat 5:11, 12) Pɔrɔ edɔɔ̄ na a le tɛ̄ dɛ̄dɛɛ̄ gbanasī ama a. Kerewo, Jizɔs si ekpo ye ee! Tɛ̄maloo yerebah Jizɔs, le yereue aa inaloo pya nɛɛ a le dɛ̄dɛɛ̄ edonyɔɔ. Naa ɛp nu a tɔgɛ ama.

7. Ena o muɛ a gaa sira lo a tɔgɛ kɔ mɔmanudɛɛ̄ a le bu kpa Mumuuna 14:6, 7 aa dooa gbɔ̄mɛɛ a?

⁷ Doodoo pya aa zue ue Buɛ̄-mɛnɛ, ziī nu finiabah i kpesī na sɔ̄ i zɔ̄ŋia pya a kɔ dɔɔ̄na muɛ̄ ue. Bu mɔmanudɛɛ̄ lo Jizɔs bee doo kɔ Jɔn a muɛ, a bee kɔ sere kɛ̄ kɔ bu ilii dee ama, le yereue ebe eebah nu finiabah ama. (Buū Mumuuna 14:6, 7.) Bu mɛ sīdee? I gaa yerebah doo kɔ gbɛnɛ-edo nɛɛ a dap dā le yereue Buɛ̄-mɛnɛ. Nii’ee, pya nɛɛ a le tɛɛ̄ ɛŋɛnɛ nyɔuwe dap buū pya i kpa a dɛɛa nyɔɔ Baibol aā i dɔ intanɛt jw.org a le bu nu a eeloo 1,000 muɛ̄ ue! Eku A Baɛbee bee nɛdee kɔ alu etap kpa a kura Ɛrɛ Ekpeloo Dum Mmɛ Deedee! bu nu a eeloo 700 muɛ̄ ue. Kpa ama na alu kpog-bee nu tam i gaa su yeābah nɛ pya nɛɛ kɔ ba a nyɔɔnɛ dumɛ Jizɔs a. Eluanage edoo kɔ nuede bu edɔɔ̄ a le kɛ̄ nɛ pya bɔnɔ tɛ̄maloo bii si ee alu eyere bu gāmā, le pya kpa alu ekwa nɛ pya zimadɛɛ̄. I gaa muɛ kɛ̄ pya mɔmanudɛɛ̄ a le bu Baibol aa dooa gbɔ̄mɛɛ doo. Pya nɛɛ a “aaloo ziī ziī edonyɔɔ lo a kɔ keekee muɛ̄ ue” aa nɔ ekɔ “muɛ̄ ue a loga” lo alu kaka ue a le bu Baibol. (Zek 8:23; Zef 3:9) Lu edoo dɛ̄dɛɛ̄ lo ama tɛ̄maloo leredee a aabah Jizɔs Kraist.

8. Ena esira aabu i tam zue ue anii’ee a?

⁸ Nii’ee, nu a eeloo 8,000,000 pya nɛɛ a aa 240 edo eyira bu bɔŋanaloo Jɛhova, e ziī ziī zua, gbɛnɛ-edo nɛɛ aa liamaā! Kerewo, naale aba kɔ gbɛnɛ-edo aā nɛɛ aa yiibu bɔŋanaloo Jɛhova, mɛ nu a kuī eera na bee pya aā nɛɛ a nyɔɔnɛ dumɛ Jizɔs ama yaa “aā mɛā,”  lo alu elap dogo alu ebɛɛ̄ kɔ Pya Nɛɛ Kraist a ɛrɛ. (Kɔl 3:8-10) Gbɛnɛ-edo nɛɛ e’ɔbɛ dogo kunagā, dogo lumiī, elap dogo ɛp sī nwīnī yere bere, le wereloo ziī edo ema ziī. Mɔmanudɛɛ̄ a le bu kpa Aisaia 2:4 edooa gbɔ̄mɛɛ; ba naa gaa ‘nɔna benɔ̄.’ Sɔ̄ i piiga lo e’ɛrɛ aā sīdee tɔɔ̄dum, i yerebah nɛ pya nɛɛ kɔ ba alu bu bɔŋanaloo Bari, e i tɔgɛ kɔ i gaa nyɔɔnɛe leredee a aabah Jizɔs Kraist alu i nɛɛ zaāsī. (Jɔn 13:35; 1 Pit 2:12) Lɔgɔ nu ama naa dɔkɛ̄ sira. A sira nyɔɔbee Jizɔs aa i yerebah nɛ.

9. Dookɛ̄ kpa Matiu 24:45-47 kɔ doo, ena Jizɔs bee kɔ sere kɛ̄ kumaloo sɔ̄ kpɛdumɛ a?

⁹ Buū Matiu 24:45-47. Jizɔs bee kɔ sere kɛ̄ kɔ bu sɔ̄ kpɛdumɛ ama, a gaa le tuboe baloo “zooro a bɔloo eture nyiɛ loo sa suā nu” lo enɛ nuede bu edɔɔ̄ pya zooro Bari. Nyɔɔwo, i ɛmadɛɛ̄ kɔ lo zooro epiiga lo esi ye tam leere bu ilii dee ama. E taɛ nu a gaa siranage lo. I nɛɛ zaāsī aa su nwīgbagbara eku pya nɛɛdam alu etɔ̄ nɔɔ̄ bee ama nɛa nuede pya nɛɛ Bari le pya a ɛrɛ taɛ bu kaka ue. Ba nɛ nuede ama “taɛ ye sɔ̄,” lo a le taɛ sɔ̄ a bɔloo. Pya nɛɛ ama naa ɛp aba aba nua pya etɔ̄ nu nɛ pya dɔɔ̄na. (2 Kɔr 1:24) Taāwo, ba suā kɔ Jizɔs na wa “nɛɛ zaāsī, le nɛɛ lok” loo pya ye nɛɛ a.—Ais 55:4.

10. Amunu kpa a le yɛɛ pya kpa alu etɔgɛ bu foto ayah na a bee a zū kɔ o bɔātɛ̄ etaāŋabah Jɛhova a?

¹⁰ Aā bu zua 1919, zooro a bɔloo eture nyiɛ loo ekwaa keekee kpa lo a yerebah nɛ pya a yiibu bɔŋanaloo aā kɔ ba a dap nɔ kaka ue a le bu Muɛ̄ Ue Bari. Bu zua 1921, lo zooro bee kwa kpa a kura The Harp of God lo esu yeābah nɛ pya  aā nɛɛ kɔ ba a nɔ kpog-bee kaka ue a le bu Baibol. Sɔ̄ sɔ̄ aa kiisī, a bee lunage ekwa pya dɔɔ̄na kpa. Amunu kpa na a bee a yerebah nɛ kɔ o suāloo i Tɛ a le bunyɔɔ sa ye wereloo a? Ekɔ a bee le “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Ena Baibol I Dap Tɔgɛ Ani?, sɛh i aā kpa a kura, Ɛrɛ Ekpeloo Dum Mmɛ Deedee! Bee lu ekwa dɛ̄dɛɛ̄ pya kpa ama lokwa i dap su yeābah nɛ pya nɛɛ kɔ ba a nyɔɔnɛ dumɛ Jizɔs. E ziī ziī aba bee lu ekwa taɛ sɔ̄ a bɔloo.

11. Ena anua alu ebɛɛ̄ kɔ i nɔ nu akiiloo Jɛhova le Baibol a?

¹¹ Naale aba pya aā nɛɛ na alu ebɛɛ̄ kɔ ba a ɛrɛ togatoga suānu akiiloo Jɛhova le Baibol a. Alu ebɛɛ̄ kɔ dɛ̄dɛɛ̄ ii i ɛrɛ. Nɛɛ lɛɛratam Pɔɔl bee ɛm kɔ: “E’aga nuede le nɛ pya a enyima tura nɛɛ.” Lɛɛ a kɔ yereloo kɔ dodoo pya nu ama eyerebah i nɛ “lo esuā kee a le yɛɛ le le pɔrɔ.” (Hib 5:14) A dap aga egbaɛ̄tɔ̄loo pya daakuu Jɛhova anyaawo nyɔnɛbee gbɛnɛ-edo nɛɛ aa tɔɔ̄dum a naa ɛɛ. Mɛ Jizɔs bee suā kɔ alu ebɛɛ̄ kɔ i nɔ pya nu eyerebah i nɛ kɔ i agɛrɛtɛ̄ i yira. Kɛ̄ i ɛrɛ pya zuurabahtɔ̄ ama aā na bu Muɛ̄ Ue Bari, lo a le Baibol. Zooro a bɔloo eture nyiɛ loo kwa nuede bu edɔɔ̄ ama sa dɔɔ̄ yaari tɛ̄maloo leredee a aabah Jizɔs.

12. Bu mɛ sīdee na i enɛā ka bee Bari dookɛ̄ Jizɔs bee doo a?

¹² I nɛ ka bee Bari dookɛ̄ Jizɔs bee doo. (Jɔn 17:6, 26) Bu edoba, bu zua 1931 i bee bɔātɛ̄ eyiga bee a le bu Baibol a kura Pya Ekeebee Jɛhova, e dodoo wo tɔgɛ kɔ bee Bari kuī i loo,  le kɔ i gbī kɔ alu esuā i loo tɛ̄maloo bee i Tɛ a le li bunyɔɔ. (Ais 43:10-12) E aā bu Lop Enɔɔ̄ bu lo zua, bee a le kaɛ ama aa sira nyɔɔ eko dumɛ dɛ̄dɛɛ̄ ekpo magazin. Gbaāloo wo, elua esere bee Bari taɛ kɛ̄ a ye bɔloo bu New World Translation of the Holy Scriptures. Lo ama lu kiiyasī loo nu keekee sīdee yigabari edora lo elɛɛ bee Jɛhova bu gbɛnɛ-edo wa tatap Baibol.

13. Ena a doo kɔ o yiga kaāna kɔ Jizɔs aa su “zooro a bɔloo eture nyiɛ loo sa suā nu” daānu anii’ee a? (Jɔn 6:68)

¹³ Tɛ̄maloo zooro a “bɔloo eture nyiɛ loo sa suā nu,” Jizɔs esere ziī bɔŋanaloo a nyimɛ logaloga taāŋabah a kɛnɛkɛ̄. Bɔŋanaloo ama tɔɔ̄ a loo doodoo wa? Naadaba, nu dap a tɔɔ̄loo dookɛ̄ a bee tɔɔ̄loo nɛɛ lɛɛratam Pita doo, sɔ̄ a kɔ nɛ Jizɔs kɔ: “Mɛɛ na i kii pii a? Olo ɛrɛ dɛ̄dɛɛ̄ ue dum a naa wee tah.” (Jɔn 6:68) Mɛ kɛ̄ na ziī ziī ii i bee le anii’ee lo ii bee yiibu bɔŋanaloo Jɛhova a? Jizɔs aa i nɛ nuede bu edɔɔ̄ a i gbɔɛ̄loo tɛ̄maloo lo bɔŋanaloo. A tɔgɛnage i nu lokwa i dap si i tam zue ue leere. Gbaāloo wo, a yerebah i nɛ kɔ i dap “yaa aā mɛā,” lokwa i doo nu a nia Jɛhova.—Ɛfɛs 4:24.

14. Bu mɛ sīdee na o e’ɛrɛ biī bu sɔ̄ dumɛloo COVID-19 nyɔɔbee o le bu bɔŋanaloo Jɛhova a?

¹⁴ Jizɔs nɛ i leredeebah sɔ̄ taāŋa sira. Lo ama bee i dɔbiī nɛ kaāna sɔ̄ dumɛloo COVID-19 bee bɔātɛ̄. Kere gbɛnɛ-edo pya a le bu nyɔuwe naa bee suā nu edoo, Jizɔs bee yerebah doo kɔ i ɛrɛ leredeebah alu ebɛɛ̄ lokwa i tɔɔ̄ bu kpoogaloo sa lo dumɛloo naa yii i loo. Bee lu eyere i mɛm loo kɔ i wee koa nu  biɔ̄ sɔ̄ i le kɛ̄ pya nɛɛ mma sa tɔɔ̄ kina kɛ̄ a binia aaloo pya dɔɔ̄na. Bee lu ekɔ nɛ pya kanɛɛ kɔ ba a wee kue pya nɛɛ a le bu bɔŋanaloo lokwa ba suā nu alu wa ebɛɛ̄ bu namloo le bu edɔɔ̄. (Ais 32:1, 2) I bee ɛrɛnage leredeebah le yere mɛm loo tɛ̄maloo pya ue a aabah Eku A Baɛbee.

15. Amunu leredeebah na a bee lu enɛ akiiloo kɛ̄ esi enɔānu le kɛ̄ ezue ue doo bu sɔ̄ dumɛloo COVID-19 a, e ena a bee sira aabu a?

¹⁵ Bu sɔ̄ dumɛloo ama, i bee ɛrɛnage leredeebah akiiloo kɛ̄ elu esi enɔānu bu bɔŋanaloo le uwe zue ue doo. Bu nwanwanbah, i bee bɔātɛ̄ esi enɔānu Pya Nɛɛ Kraist, asɛmbli, le kɔnvɛnsɔn tɛ̄maloo vidio. I bee bɔānagetɛ̄ ezue ue tɛ̄maloo ɛm lɛta le tɛ̄mabu fon ee kɛ̄ i wee doo tua sɔ̄. Jɛhova bee nɛ leelee i epiaga. Gbɛnɛ-edo tɔ-naatam enɛa kpɛa akiiloo kɛ̄ pya zue ue yiiloo doo. Bu kaka, gbɛnɛ-edo nɛɛ e’ɛrɛ lele kpɛa bu sɔ̄ ama.—Ɛp ekpo a kura “ Jɛhova Bee Nɛ Leelee I Esiatam Zue Ue.”

16. Ena i suā leere a?

¹⁶ Naadaba, pio nɛɛ bee dap kɛɛrɛ kɔ bɔŋanaloo ama bee doo dogo yeekɛ̄ kumaloo lo dumɛloo. Mɛ sɔ̄ sɔ̄ aa kiisī, i bee muɛ nu a tɔgɛ kɔ pya lo zuurabahtɔ̄ lee kaāna. (Mat 11:19) E kuma sɔ̄ i ɛrɛ ekɛɛrɛ nyɔɔ kɛ̄ Jizɔs aa zaāsī pya ye nɛɛ doo, i suā leere kɔ kaɛlɛɛ ɛrɛgeba nu a sira li deesī, Jɛhova le ye Nwiīnɛɛdam a wereloo ele i loo.—Buū Pya Hibru 13:5, 6.

17. Tɔɔ̄ a loo doodoo wa lo e’ɛrɛ Jizɔs nua o nɛɛ zaāsī ni?

¹⁷ Naa ɛp kɛ̄ bu i ɛɛ doo kɔ i gaa si tam kɛɛ̄ leredee a aabah Jizɔs a! Kaɛlɛɛ kɔ i aa keekee barasī, ɛrɛ keekee sīdee doonu, sa kɔ keekee muɛ̄ ue, dɛ̄dɛɛ̄ ii le bu bɔŋanaloo a ɛrɛ gbaaloo. I ɛrɛ zuurabahtɔ̄ a aabu Muɛ̄ Ue Bari lo a i yerebah nɛ kɔ i si tam zue ue leere. Lu eyerebah nɛ ziī ziī ii kɔ i nyaanabaloo i sīdee tɔɔ̄dum sa doo kɔ a lee, e i gaa piiga lo ewereloo ɛnia ii. I ɛrɛ kaāna nu anua i ɛrɛ ɛɛbu kɔ Jizɔs lu i nɛɛ zaāsī!