Yereue Jizɔs bee zue bee lu lo efɛɛloo. Kerewo, a ɛrɛ ziī sɔ̄ a bee kɔ nɛ pya a wee ye nyɔɔnɛ dumɛ kɔ: “Bui aa kɛɛrɛ kɔ m bee su efɛɛloo [nua] bu nyɔuwe, mm bee lu wee yere efɛɛloo, mɛ gɛ̄ nɔ̄. Nyɔnɛbee m bee lu wee poo nɛɛdam pima ye tɛ, le nwiī-gbobia pima ye ka, le nwiī-gbobia a lu e’ii pima ye ka-dam.” (Mat 10:34, 35) Ena Jizɔs aa bee kɔ ani?

Naale kɔ Jizɔs aa bee gbī epoo pya a nuūna ziī butɔ lɛɛloo ziī, mɛ a bee suā kɔ pya ye tɔgɛnu dap poo pya a nuūna ziī butɔ lɛɛloo ziī. Nyɔɔwo, alu ebɛɛ̄ kɔ pya a gbī enyɔɔnɛ dumɛ Kraist sa liamaā a suā pya nu esira aabu wa biaɛfii ama. Lo a le nɛɛ ba ii ale nɛɛ ba iya ale ɛrɛgeba dɔɔ̄na nɛɛ a le wa butɔ na a wa gbanasī a, a dap lu nu finiabah wa nɛ lo etɔɔ̄nɛ pya tɔgɛnu Kraist.

Baibol yere mɛm loo Pya Nɛɛ Kraist kɔ ba a nyɔɔnɛ “dɛ̄dɛɛ̄ nɛɛ tɔɔ̄ bu efɛɛloo.” (Rom 12:18) Kerewo, pya tɔgɛnu Jizɔs dap le doodoo “gɛ̄ nɔ̄” bu pio butɔ. Lo ama wee sira sɔ̄ ziī nɛɛ a le butɔ su baɛbah suā pya tɔgɛnu Jizɔs, sa pya dɔɔ̄na a le lo butɔ gbanasī ale ba kiī pya lo tɔgɛnu. Lo a sira doo wo, a kura kɔ ba esua wa loo nua nɛɛ “baa” nɛɛ a su baɛbah suā kaka ue a.—Mat 10:36.

Pio sɔ̄, pya a gaa nyɔɔnɛ dumɛ Kraist lo pya wa butɔ naa gaa taāŋabah Bari, wee kpesī pya kɛ̄tɔɔ̄ a dap doā-ɛp wereloo ba ɛrɛ kumaloo Jɛhova le Jizɔs. Bu edoba, pya wa butɔ a naa gaa taāŋabah Bari dap wa zū kɔ ba a sere dee seseea lo Kpa Kaɛ naa yerekpotɛ̄. Sɔ̄ alu edoā wa ɛp doo wo a, ba edoo nu enia mɛɛ ni? Jizɔs bee kɔ: “Nɛɛ a wereloo tɛ ale ka emanyɔɔ mda naale ebɔ mɛ loo.” (Mat 10:37) Kaka a le na bee, Jizɔs naa gaa bee kɔ pya a ye nyɔɔnɛ dumɛ aa werenaloo wa tɛ le ka kaāna, lokwa ba ye bɔe loo. Taāwo, a gaa bee siibahdɛɛ̄ kɛ̄ a bɔloo esu nu a kuī sere dɔ a bɔloo doo. Lo pya i butɔ a naa gaa taāŋabah Bari gbana i sī sa naa gbī kɔ i taāŋabah Jɛhova, i kiinagesī lo ewere wa loo, kerewo, i suā kɔ wereloo i ɛrɛ kumaloo Bari ɛrɛ esu tua dɔ bu i dum.

Baɛbaɛ beenyiɛ naale loo kɔ, gbanasī a aa butɔ wee ziloo nɛɛ kaāna. Kerewo, pya a nyɔɔnɛ dumɛ Jizɔs ɛrɛ enyɛŋiabu pya ue a bee kɔ, lo a kɔ: “Nɛɛ a naa su ye [te-tɔga] sa mɛ nyɔɔnɛ naale ebɔ mɛ loo.” (Mat 10:38) Nyɔɔwo, Pya Nɛɛ Kraist ɛp gbanasī a aa butɔ nua ziī sīdee tɔga lo pya a gaa nyɔɔnɛ dumɛ Kraist ɛrɛ esu baɛbah suā. E aba lo sɔ̄, ba ɛmanagedɛɛ̄ kɔ, wa le elap dogo ezū pya wa butɔ a naa gaa taāŋabah Bari ama kɔ ba a nyaana wa beenyiɛ sa nɔ Baibol sɔ̄ esaa.—1 Pit 3:1, 2.