1. Amunu kaka ue na o bee suā sɔ̄ o bee bɔātɛ̄ enɔ Baibol a?

 O NYƐŊIAGEBU sɔ̄ o bee bɔātɛ̄ enɔ Baibol ni? Bee a dap lu nyɛŋia loo sɔ̄ o bee suā kɔ Bari ɛrɛ bee. Naadaba loo a bee sukɛ̄ lo esuā kɔ Bari naa wee tɔg pya nɛɛ bu miā. E a dap lu kɔ bu a bee ɛɛ sɔ̄ o bee dā nu akiiloo bɛābu kɔ elu elɛɛ pya e’ua kɛ̄ bu luh sa ba sikɛ̄ tɔɔ̄dum bu paradais a kɛnɛkɛ̄.

2. Gbaāloo nɔ kaka ue a le bu Baibol, amunu kwabaloo nu na o bee doo a? (Pya Ɛfɛsɔs 5:1, 2)

² Kuma kɛ̄ o kiisī lo enɔ Baibol doo, kɛ̄ wereloo o ɛrɛ loo Jɛhova nyimnage doolo. Lo wereloo bee a zū kɔ o su nu o nɔ yere bu dogo. O bee biaɛ nu fii leere dɛɛa nyɔɔ pya daakuu Baibol. O bee nɔ lo etɔɔ̄dum a lee nyɔɔbee o gbī edoo nu Bari gbī. O bee nɔ o Tɛ a le li bunyɔɔ dookɛ̄ nwiī wee nɔ ye tɛ le ye ka doo.—Buū Pya Ɛfɛsɔs 5:1, 2.

3. Pya amunu ebip na i dap bip aba ii a?

³ I dap bip aba ii kɔ: ‘Wereloo m ɛrɛ loo Jɛhova agagetɛ̄ anyaawo ee tua sɔ̄ m bee lu Nɛɛ Kraist ni? Aā sɔ̄ m bee liamaā, kɛ̄ m kɛɛrɛ nu sa doo dogo doo beege lo Jɛhova, eetɔɔ̄ na kɛ̄ m tɔgɛ wereloo kumaloo pya na wuga nɛɛdam le nɛɛwa doo ni?’ Lo a le “wereloo o bee ɛrɛ tua sɔ̄” efira kina tɔɔ, loo a aa ɔ. Dua nu a doo wo bee siranage loo Pya Nɛɛ Kraist a bee le bu tua sɔ̄ o’oo tup zua. Jizɔs naa bee wa kiī, e a naale ekiīnage ili. (Mum 2:4, 7) A suā kɔ i dap sikɛ̄ ɛrɛ dua wereloo i bee ɛrɛ tua sɔ̄ i bee nɔ kaka ue.

4. Ena i kɔnia bu ekobee ue ama a?

⁴ Ekobee ue ama ekɔ ue nyɔɔ kɛ̄ i dap kiisī lo enyimɛ wereloo i ɛrɛ loo Jɛhova le pya dɔɔ̄na doo. Lɛɛ i suā pio  leelee ili le pya dɔɔ̄na e’ɛrɛ sɔ̄ i agɛrɛtɛ̄ i wereloo.

5-6. Pya amunu nu finiabah na Pɔɔl bee kpesī bu ye esiatam zue ue a, e ena a bee ye zū kɔ a kiisī lo esitam nɛ Jɛhova a?

⁵ Nɛɛ lɛɛratam Pɔɔl bee ɛrɛ iinaloo bu esiatam Jɛhova. Mɛ a bee ɛrɛnage gbɛnɛ-edo nu finiabah. Pɔɔl wee bialoo kiā nyɔɔnyɔɔ dɛɛ̄ kiā, e sigara kiā naa wee aadee waɛ lo sɔ̄. Sɔ̄ Pɔɔl gaa bee sigara kiā, a wee kpesī “taāŋa bu gbɛnɛ pɛnɛ” le “taāŋa kɛ̄bah pya aŋana nu” lɛɛbah nɛɛ. Pio sɔ̄ pya a ye gbanasī wee ye zipnage. (2 Kɔr 11:23-27) E a naale dɛ̄dɛɛ̄ sɔ̄ na pya ye wuga bu yira wee tɔgɛ nia loo kɛ̄ a gaa piiga doo lo eyerebah wa nɛ a.—2 Kɔr 10:10; Fil 4:15.

⁶ Ena a bee yerebah nɛ Pɔɔl kɔ a kiisī bu esiatam Jɛhova a? Pɔɔl bee nɔ gbɛnɛ-edo nu akiiloo elap dogo Jɛhova aābu Kpa Kaɛ le aāloo pya nu a bee ye siraloo. Pɔɔl bee suā leere kɔ Jɛhova Bari weree ye loo. (Rom 8:38, 39; Ɛfɛs 2:4, 5) E lo ama bee doo kɔ a wereloo Jɛhova kaāna. Pɔɔl bee tɔgɛ wereloo loo Jɛhova tɛ̄maloo “esitam nɛ pya kaɛ.”—Hib 6:10.

7. Ena alu ziī sīdee i dap nyimɛ wereloo i ɛrɛ loo Jɛhova a?

⁷ I dap nyimɛ wereloo i ɛrɛ loo Bari tɛ̄maloo enɔ ye Muɛ̄ Ue leere. Kuma sɔ̄ o gaa buū Baibol, piiga lo esuā nu ziī ziī dɔ i tɔgɛ akiiloo Jɛhova. Bip aba ɔɔ kɔ: ‘Bu mɛ sīdee na e’ɛma ama tɔgɛ kɔ Jɛhova were mɛ loo a? Pya e a mɛ tɔgɛ na a doo kɔ m wereloo Jɛhova a?’

8. Bu mɛ sīdee na yere kara dap i yerebah nɛ kɔ i nyimɛ wereloo i ɛrɛ loo Bari a?

⁸ Dɔɔ̄na sīdee i dap nyimɛ wereloo i ɛrɛ loo Jɛhova na tɛ̄maloo ekɔ ue aābu beenyiɛ i ye nɛ bu kara. (Yɔɔ 25:4, 5) E Jɛhova gaa le agara pya i kara. (1 Jɔn 3:21, 22) Ziī wuga nɛɛwa a kura Khanh a le Asia kɔ: “Wereloo m ɛrɛ loo Jɛhova bee dɛɛa nyɔɔ pya nu m enɔā, kerewo lo wereloo agatɛ̄ sɔ̄ m muɛ kɛ̄ a agara pya na kara doo. Lo ama doo kɔ m gbī ewee doo pya nu a ye nia.” b

9. Bu mɛ sīdee na Timoti bee tɔgɛ kɔ a gaa nyim e kiisī leere bu etɔgɛ wereloo a?

⁹ Sɔ̄ pio zua etɛ̄na aā sɔ̄ Pɔɔl bee lu Nɛɛ Kraist, a bee zɔ̄ŋia ziī zege nwiīnɛɛdam ye bee kura Timoti. Timoti bee wereloo Jɛhova, e a bee werenage loo pya nɛɛ. Pɔɔl bee kɔ nɛ pya Filipai kɔ: “Mm ɛrɛ lɔgɔ nɛɛ doodoo [Timɔti] lo a e’ɛrɛ kaāna taɛ kumaloo nu a elee i loo.” (Fil 2:20) Kɛ̄ ama Pɔɔl naa bee le aa kɔ ue kumaloo kɛ̄ Timoti para enɔɔ nu ale kɛ̄ a para nɛ ekɔaue taɛkɛ̄ doo, mɛ wereloo Timoti bee ɛrɛ loo pya wuga nɛɛdam le nɛɛwa bee tɔaloo Pɔɔl kaāna. Bu kaka, pya a bee le bu bɔŋanaloo Timoti bee ina bee ɛrɛ ɛɛbu lo esikɛ̄ ye muɛ.—1 Kɔr 4:17.

10. Bu mɛ sīdee na Anna le ye dam bee tɔgɛ wereloo ba ɛrɛ loo pya wa wuga nɛɛdam le nɛɛwa a?

¹⁰ Ili gbīnage pya sīdee i dap yerebah nɛ pya wuga nɛɛdam le nɛɛwa ba lu Pya Nɛɛ Kraist. (Hib 13:16) Naa kɛɛrɛbu nu a bee siraloo Anna a bee lu ekue bee bu ekobee ue i aa a. Sɔ̄ ziī gbɛnɛ fii efɔp bee dɔ sah, ye dam le ɛɛ bee si be ziī wuga bu bɔŋanaloo sa muɛ kɔ elala a le nyɔɔ wa tɔ egbea. E wo bee doo kɔ wa bɛloo alu biaɛ. Anna bee kɔ: “I bee su wa bɛloo  sa kuma wee log, e i bee su miā dɛm tɛ̄madɛɛ̄, bɛɛra leere sa wa obara ma. Kiikɛ̄ ili le, a bee le kunɛ nwīgbagbara nu, mɛ a doo kɔ i lu kaāna gbo mmɛ nii’ee.” Wereloo Anna le ye dam bee tɔgɛ loo pya lo wuga nɛɛdam le nɛɛwa bee wa zū kɔ ba a yerebah nɛ pya dɔɔ̄na.—1 Jɔn 3:17, 18.

11. (a) Tɔɔ̄loo pya dɔɔ̄na doodoo wa sɔ̄ i wa tɔgɛ wereloo kumaloo? (b) Dookɛ̄ kpa Kam 19:17 kɔ doo, bu mɛ sīdee na Jɛhova wee doo dogo sɔ̄ i tɔgɛ wereloo kumaloo pya dɔɔ̄na a?

¹¹ Sɔ̄ i aara pya dɔɔ̄na bu wereloo le fɛgɛ, ba wee muɛ epiaga i gaa doo lo enɔ kɛ̄ Jɛhova kɛɛrɛ nu sa doo dogo doo. E ba dap tɔgɛ nia loo i fɛgɛ dogo eekɛ̄ i suā doo. Khanh i bee kue bee tua sɔ̄ a bee nyɛŋiabu pya nɛɛ a bee ye yerebah nɛ. A bee kɔ: “Bu mɛ ɛɛ loo dɛ̄dɛɛ̄ pya wuga nɛɛwa lo a bee mɛ su kuma uwe zue ue. Ba bee lu wee ɔp mɛ ekuma wee deānu, sa mɛ obianage ɔp mmɛ tɔ bu kpoogaloo. Nyaawo na m suā kɔ a bee wa su kaāna epiaga bah a. E ba bee doo wo nyɔɔbee ba were mɛ loo.” Bu kaka, naale dɛ̄dɛɛ̄ nɛɛ na edoo i yaa loo nu i wa doo nɛ a. Khanh bee kɔ kumaloo pya a bee ye yerebah nɛ kɔ: “E bee mɛ nia lo e’obara wa kpɛ loo wa fɛgɛ dogo, mɛ mm suā kɛ̄ lɔgɔ aba tɔɔ̄. Kerewo, Jɛhova suā, e m bara kɔ a obara wa kpɛ mɛ nɛ.” Khanh kɔ kaka. Jɛhova muɛ kere nwīgbagbara fɛgɛ dogo i tɔgɛ loo pya dɔɔ̄na. A ɛp nua nu a kuī, le doodoo kɔm lo a e’obara i kpɛ nɛ—Buū Kam 19:17.

12. Bu mɛ sīdee na pya wuga nɛɛdam tɔgɛ wereloo kumaloo bɔŋanaloo a? (Ɛpnage foto.)

¹² Lo o lu wuga nɛɛdam, o dapge tɔgɛ wereloo tɛ̄maloo e’inaloo pya dɔɔ̄na sa  wa yerebah nɛ ni? Ziī zege wuga nɛɛdam a kura Jordan bee bip ziī nɛɛ kanɛɛ pya nu edap doo lo eyerebah loo tam bu bɔŋanaloo. Lo nɛɛ kanɛɛ bee ye kaɛgɛ loo kɛ̄ a gbī enyim kiisī doo sa ye zuurabahtɔ̄ nyɔɔ pio nu a dap sikɛ̄ doo lo enyim kiisī leere. Bu edoba, a bee kɔ nɛ Jordan kɔ a wee bagara ina Tɔ Nɔnu Buɛ̄-mɛnɛ sa kana muɛ̄ pya dɔɔ̄na, agara ebip bie enɔānu, gbaaloo pya ye eku tam zue ue si uwe zue ue dɛ̄dɛɛ̄ sɔ̄, sa gbī pya dɔɔ̄na sīdee a dap yeābah nɛ pya dɔɔ̄na. Naale aba bee Jordan bee nɔ aā nu sɔ̄ a bee su zuurabahtɔ̄ ama yere bu dogo, mɛ a gaa bee nyimɛnage ye wereloo loo pya ye wuga nɛɛdam le nɛɛwa. Jordan bee nɔ kɔ sɔ̄ ziī wuga nɛɛdam lu nɛɛ yerebahtam, naale lo sɔ̄ na a bɔātɛ̄ eyerebah nɛ pya dɔɔ̄na a, taāwo, a kiisī lo eyerebah wa nɛ.—1 Tim 3:8-10, 13.

13. Bu mɛ sīdee na wereloo bee zū ziī wuga nɛɛdam a kura Christian kɔ a sikɛ̄ nyim tura lo elu nɛɛ kanɛɛ a?

¹³ E lo o ebee lu nɛɛ yerebahtam ale nɛɛ kanɛɛ sɔ̄ akii adumɛ ni a? Jɛhova nyɛŋiabu tam o bee si sɔ̄ akii adumɛ le wereloo o bee ɛrɛ lo a bee a zū kɔ o doo wo. (1 Kɔr 15:58) A muɛnage kɛ̄ o kiisī lo etɔgɛ wereloo doo. Bu ziī wuga nɛɛdam a kura Christian naa bee ɛɛ sɔ̄ a bee lu elɛɛ ye dɔ nɛɛ kanɛɛ bah. Kerewo a bee kɔ, “M bee biaɛfii lo edoo dɛ̄dɛɛ̄ nu m dap doo lo etaāŋabah Jɛhova aāloo wereloo m ye ɛrɛ loo, kere m ɛrɛ dɔtam bu bɔŋanaloo ale mm ɛrɛ.” Sɔ̄ sɔ̄ aa kiisī, a bee sikɛ̄ lu etubo ye baloo nua nɛɛ kanɛɛ. Christian bee kɔ: “Bɔɔ bee mɛ aa kina lo esikɛ̄ si tam doodoo nɛɛ kanɛɛ. Mɛ m bee biaɛfii kɔ lo a le Jɛhova e’ɛrɛ mɛ toesaɛ̄ loo sa gbī kɔ m sikɛ̄ si tam  doodoo nɛɛ kanɛɛ, m si nyɔɔ wereloo m ye ɛrɛ loo le loo pya na wuga nɛɛdam le nɛɛwa.”

14. Ena o nɔ aāloo pya nu ziī wuga nɛɛwa a aa Georgia kɔ a?

¹⁴ Pya zooro Jɛhova tɔgɛnage wereloo kumaloo pya nɛɛ le aba le. (Mat 22:37-39) Bu edoba, ziī wuga nɛɛwa a kura Elena alu Georgia bee kɔ: “Tua sɔ̄, aba nu a bee mɛ zū kɔ m zue ue na wereloo m ɛrɛ loo Jɛhova. Mɛ kɛ̄ wereloo m ɛrɛ loo na Tɛ a le li bunyɔɔ kiisī lo enyim doo, kɛ̄ wereloo m ɛrɛ loo pya nɛɛ kiinagesī lo enyim doolo. M bee piiga lo ekɛɛrɛ pya taāŋa ba gaa kpesī le ue m dap wa kɔ nɛ sa a tɔā wa loo. Kɛ̄ m kiisī lo ekɛɛrɛ nu a wa kiiloo bu lo sīdee ama doo, kɛ̄ na taɛ lo eyerebah wa nɛ nyimnage yiiloo doolo.”—Rom 10:13-15.

15-16. Dookɛ̄ alu etɔgɛ bu foto doo, amunu biī na a le bu tɔgɛ wereloo kumaloo pya dɔɔ̄na a?

¹⁵ Sɔ̄ i tɔgɛ wereloo kumaloo pya i wuga, naale aba alaba na a dɔbiī nɛ a. Sɔ̄ dumɛloo COVID-19 bee bɔātɛ̄, ziī wuga nɛɛdam a kura Paolo le ye wa bee yerebah lo enɔɛ̄ gbɛnɛ-edo pya wuga nɛɛwa e’ana kɛ̄ ba edap su wa fon ale kɔmputa daānu doo lokwa ba dap zue ue. Ziī wuga nɛɛwa lo a naa bee dap su ye fon daānu tua sɔ̄ bee sikɛ̄ para. A bee dap su ye fon kuema pya ye manamana nua loo Doonu Nyɛŋiabu Loo Luh Jizɔs. Taa tup pya lo nɛɛ bee si tɛ̄ma nyɔɔ vidio! Lo  wuga nɛɛwa le pya ye manamana bee ɛrɛ biī aāloo epiaga Paolo le ye wa bee doo. Sɔ̄ esaa, lo wuga nɛɛwa bee ɛm kpa ma Paolo kɔ: “Ɔɔyaage lo etɔgɛ nu ili pya nama nɛɛ. Mm le e’ibere kɛ̄ Jɛhova aa i kɛɛrɛbu doo le dɛ̄dɛɛ̄ o epiaga.”

¹⁶ Paolo enɔā kaāna nu a kuī aāloo pya siranu a le doodoo lo ama. A bee lu enyɛŋia ye bu kɔ wereloo kuī kaāna ee suānu ale nu nɛɛ para. A kɔ: “M wee si tam kuūdɛɛ̄loo sɛkiut. Nii’ee m suā kɔ kere pya wuga nɛɛdam le nɛɛwa naa dapna nyɛŋiabu pya na ekɔaue, ba elege aa nyɛŋiabu kɛ̄ m bee wa yerebah nɛ doo.”

17. Dɔɔ̄na ba mɛɛ na e’ɛrɛnage biī sɔ̄ i tɔgɛ wereloo a?

¹⁷ Sɔ̄ i tɔgɛ wereloo kumaloo pya dɔɔ̄na, ili ilii loo ɛrɛnage biī aāloo bu sīdee ii bee ɛmadɛɛ̄. Lo ama bee siraloo Jonathan a tɔɔ̄ New Zealand. Sɔɔ̄pie ziī Dee Nwīpinikaɛ sɔ̄ zue aa bee mɔ kaāna, a bee muɛ ziī nɛɛ sɛmdee a gaa zue ue kpaɛ̄ dee. Jonathan bee biaɛfii lo enyɔɔnɛ lo nɛɛ sɛmdee si tam sɔɔ̄pie pya dɔɔ̄na dɔɔ̄na Dee Nwīpinikaɛ. A naa bee suā dua biī e’ɛrɛ aāloo ye elap dogo alu fɛgɛ ama. Jonathan bee kɔ: “Taɛ lo sɔ̄ ama, mm bee wereloo si uwe zue ue. Mɛ sɔ̄ m muɛ kɛ̄ lo nɛɛ sɛmdee sere baloo tɔgɛnu sa muɛ kɛ̄ a kiisī leere bu tam zue ue doo bee doo kɔ m wereloo tam ama kaāna. M bee ɛrɛnage gbo lo a mɛ yerebah nɛ kɔ m kiisī leere bu edɔɔ̄, ɛrɛ ɛɛbu loo tam zue ue sa tɔɔ̄ waɛloo Jɛhova.”

18. Ena Jɛhova gbī kɔ i doo a?

¹⁸ Jɛhova gbī kɔ dɛ̄dɛɛ ii i kiisī lo ewere ye loo sa wereloo pya dɔɔ̄na. Dookɛ̄ i enɔā doo, i dap agɛrɛtɛ̄ wereloo i ɛrɛ loo Jɛhova tɛ̄maloo ebuū ye Muɛ̄ Ue sa ɛrɛ ekɛɛrɛ nyɔɔ, le tɛ̄maloo eyere kara ye nɛ dɛ̄dɛɛ̄ sɔ̄. I dap nyimɛ wereloo i ɛrɛ loo pya i wuga nɛɛdam le nɛɛwa tɛ̄maloo eyerebah wa nɛ. Kuma sɔ̄ i wereloo aa nyim a, i tɔɔ̄ waɛloo Jɛhova kaāna le pya i butɔ bu edɔɔ̄. E i ɛrɛ ekpeloo aāloo nyinia gbo ama mmɛ deedee!