1. Ena anua a lee kɔ i kpɛ̄naloo lɛɛ bugia siranu gae sira a?

 SƆ̄ NƐƐ kpɛ̄naloo lɛɛ nu gae sira wee kpɔā dum. Bu edoba, pya nɛɛ a kpɛ̄naloo lɛɛ bugia siranu gae sira wee dap tɛɛ̄ yeebah, sa ba wee dapnage yerebah nɛ pya dɔɔ̄na. Ziī bɔŋanaloo a wee yerebah nɛ pya nɛɛ li Europe kɔ doo wo ama kɔ: “Kpɛ̄naloo leere wee kpɔā dum.”

2. Ena anua i kpɛ̄naloo baɛ gbɛnɛ etɛɛrɛloo a? (Matiu 24:44)

² “Gbɛnɛ etɛɛrɛloo” ebɔātɛ̄ sɔ̄ a naa lu e’ɛmadɛɛ̄. (Mat 24:21) Kerewo, bu sīdee alu kee loo pya dɔɔ̄na pɔrɔ siranu, a naale elu nyɛŋialoo dɛ̄dɛɛ̄ nɛɛ. Bu nu a dap lu 2,000 zua akii adumɛ, Jizɔs bee zuurabahtɔ̄ pya a wee ye nyɔɔnɛ dumɛ kɔ ba a kpɛ̄naloo baɛ lo dee. (Buū Matiu 24:44.) Lo i kpɛ̄naloo, ewaɛ i bah lo etama lo e’aga kɛ̄tɔɔ̄ sa yerebah nɛ pya dɔɔ̄na kɔ ba doonage wo.—Luk 21:36.

3. Bu mɛ sīdee na egerebu, toesaɛ̄ le wereloo eyerebah i nɛ kɔ i kpɛ̄naloo baɛ gbɛnɛ etɛɛrɛloo a?

³ Kɛɛrɛbu taa elap dogo lo eyerebah i nɛ kɔ i kpɛ̄naloo baɛ gbɛnɛ etɛɛrɛloo. I doo dogo doodoo wa lo alu ekɔ i zue e’agabah yereue biaɛ sa pya a naa taāŋabah Bari gbana i sī? (Mum 16:21) Elu ebɛɛ̄ kɔ i ɛrɛ egerebu lokwa i dap gbaɛ̄tɔ̄loo Jɛhova, sa dɛrɛ nyiɛ nyɔɔ kɔ ekpega i. Ena i doo a lo pya i wuga peere pio nu ale dɛ̄dɛɛ̄ nu ba ɛrɛ lo etama dum a? (Hab 3:17, 18) Elu ebɛɛ̄ kɔ i ɛrɛ toesaɛ̄ lokwa i wa dap dɔɔ̄nu nɛ. Ena i doo a, lo a sira kɔ nyɔɔ kɛ̄ pya edonyɔɔ a gbaaloo ziī i bebe loo doo doo kɔ i tɔɔ̄ kpaɛ̄ pya i wuga bu pio kere sɔ̄ ani? (Ezek 38:10-12) Elu ebɛɛ̄ kɔ i agɛrɛtɛ̄ wereloo i ɛrɛ loo pya i wuga lokwa i dap tɛɛ̄ yeebah sɔ̄ kɛ̄tɔɔ̄ e’aga ama.

4. Bu mɛ sīdee na Baibol tɔgɛ kɔ i ɛrɛ ekiisī lo e’ɛrɛ egerebu, toesaɛ̄, le wereloo a?

⁴ Muɛ̄ Ue Bari yere i mɛm loo kɔ i kiisī lo e’ɛrɛ egerebu,  toesaɛ̄ le wereloo. Kpa Luk 21:19 kɔ: “Tɛ̄maloo bui nyɔɔnyɔɔ egerebu na bui ɛrɛ bui dum a.” Pya Kɔlɔsi 3:12 kɔ: “Yaaraa beenyiɛ esaɛ̄.” E 1 Pya Tɛsalɔnaika 4:9, 10 kɔ: “Bɔɔlo bɔɔloo loo bee lu etɔgɛ i aā bah Bari kɔ bui wereloo ɛnia bui. . . . Mɛ i bara i bah bɔɔlo pya wuga, kɔ bui doo wo emanyɔɔ.” Dɛ̄dɛɛ̄ pya ue ama bee lu ekɔ nɛ pya a wee nyɔɔnɛ dumɛ Jizɔs lo ba bee tɔgɛ kɔ ba ɛrɛe egerebu, toesaɛ̄, le wereloo. Kerewo, ba ɛrɛ ekiisī lo etɔgɛ pya elap dogo ama. Ili ɛrɛnage edoo wo. I kɛɛrɛbu loo kɛ̄ Pya Nɛɛ Kraist bu tua sɔ̄ o’oo tup zua bee tɔgɛ ziī ziī elap dogo ama doo lo eyerebah i nɛ kɔ i dap doo wo. Lɛɛ i ɛp pya sīdee i dap nɔ pya a wee nyɔɔnɛ dumɛ Jizɔs ama lo edoo kɔ i kpɛ̄naloo baɛ gbɛnɛ etɛɛrɛloo.

5. Bu mɛ sīdee na Pya Nɛɛ Kraist bu tua sɔ̄ o’oo tup zua bee egerebu bu doā-ɛp a bee wa lu loo a?

⁵ Bee lu ebɛɛ̄ kɔ Pya Nɛɛ Kraist bu tua sɔ̄ o’oo tua zua a egerebu. (Hib 10:36) Kaɛlɛɛ kɔ ba bee tɛɛ̄bu pya taāŋa lo dɛ̄dɛɛ̄ nɛɛ aa tɛɛ̄bu, ba bee kpenagesī pya dɔɔ̄na doā-ɛp. Bee lu etɛ̄ŋaloo gbɛnɛ-edo aba tɛ̄mabah pya zaāsī yigabari pya Juu le pya bɛbɛɛ Rom, gbaāloo pya wa butɔ. (Mat 10:21) E pio sɔ̄, ba bee piiga lo edoo kɔ pya ezū a aabah pya a anna yira lo ba gbī edoo kɔ epoo epoo a le bu bɔŋanaloo tɛ̄maloo wa tɔgɛnu aa wa ɛrɛ pah nyɔɔ. (Doonu 20:29, 30) Kerewo, Pya Nɛɛ Kraist ama bee egerebu. (Mum 2:3) Bu mɛ sīdee? Ba bee ɛrɛ ekɛɛrɛ nyɔɔ pya a bee egerebu lo Kpa Kaɛ kɔ nu akiiloo, doodoo Job. (Jem 5:10, 11) Ba bee yere kara nɛ Bari kɔ a nɛ wa ekpo. (Doonu 4:29-31) E ba bee bie ekɛɛrɛ nyɔɔ pya le nu a sira aabu wa egerebu.—Doonu 5:41.

6. Ena o nɔ aāloo nu Merita bee doo lo e’egerebu sɔ̄ a bee lu egbana ye sī a?

⁶ Ili dapnage egerebu lo i kiisī lo enɔ sa ɛrɛ ekɛɛrɛ nyɔɔ pya edoba a le bu Muɛ̄ Ue Bari le pya i kpa a kɔ nu akiiloo pya a bee egerebu. Ziī wuga nɛɛwa a kura Merita a tɔɔ̄ Albania bee doo lo ama. E a bee doo kɔ a dap tama sɔ̄ pya ye butɔ bee ye gbanasī bu e’agabah. A kɔ: “Sɔ̄ m bee nɔ nu akiiloo Job bu Baibol bee mɛ yere mɛm loo kaāna. A bee tɔga kaāna sa naa suā nɛɛ a gaa bee doo kɔ a tɔga, kerewo a bee kɔ: ‘Mmɛ dee m u mm le kpo na kaāna yira lɛa loo.’ (Job 27:5) M bee kɛɛrɛ kɛ̄ nu m gaa bee tɛɛ̄bu tera sɔ̄ m su dooreloo lo Job doo. Lo mda bee lu kee loo alɛ, nyɔɔbee m bee suā nɛɛ a gaa mɛ doā-ɛp.”

7. Kereadoo ii aa kpesī pya doā-ɛp a aga anyaawo, ena i piiga lo edoo a?

⁷ I dap agɛrɛtɛ̄ i egerebu tɛ̄maloo ewee yere kara nɛ Jɛhova dɛ̄dɛɛ̄ sɔ̄ sa kɔ pya nu a i taɛ̄ŋɛ ye nɛ. (Fil 4:6; 1 Tɛs 5:17) Naadaba, oo gaa tɛɛ̄ bu doā-ɛp a aga gbɛnɛ anyaawo. Kerewo, o wee gbīge leredee a aabah Jɛhova ɛrɛgebah sɔ̄ bu a biira, sɔ̄ oo suā nu edoo ale sɔ̄ nu a eebee ni? Lo o kiisī lo egbī yerebah aābah Bari aā ziī dee yii ziī sɔ̄ o gaa kpesī taāŋa anyaawo, edoonage kɔ o dap doo wo sɔ̄ o kpesī pya taāŋa e’aga li deesī. Lo sɔ̄ o ɛrɛ mmɛɛ dɛrɛ nyiɛ nyɔɔ kɔ a suā taɛ sɔ̄ le kɛ̄ eyerebah a nɛ doo sɔ̄ alu ebɛɛ̄.—Yɔɔ 27:1, 3.

8. Bu mɛ sīdee na edoba Mira tɔgɛ kɔ lo i egerebu bu pya doā-ɛp i kpesī anii’ee eyerebah i nɛ kɔ i dap egerebu bu pya doā-ɛp i kpesī li deesī a? (Jemes 1:2-4) (Ɛpnage foto.)

⁸ Lo i egerebu bu pya doā-ɛp i kpesī anyaawo, edoo kɔ i dap egerebu bu gbɛnɛ etɛɛrɛloo a gaa lu li deesī. (Rom 5:3) Ena anua i dap kɔ doo wo a? Gbɛnɛ-edo pya  wuga emɔna kɔ sɔ̄ ba egerebu bu ziī doā-ɛp yerebah wa nɛ kɔ ba a dap egerebu bu lo dɔɔ̄na. Egerebu doo kɔ ba a agaloo, sa agɛrɛtɛ̄ yira ba ɛrɛ bu Jɛhova kɔ a le ekpɛ̄naloo lo eyerebah wa nɛ. E lo yira bee wa yerebah nɛ kɔ ba a egerebu bu doā-ɛp a sikɛ̄ lu. (Buū Jemes 1:2-4.) Ziī wuga nɛɛwa a kura Mira a wee si tam sɛmdee li Albania, emɔna kɔ egerebu a bee ɛrɛ sɔ̄ akii adumɛ a eyerebah ye nɛ kɔ a kiisī lo e’egerebu. A kɔ, pio sɔ̄ a bee kɔ aba alɛ na a gaa kpesī gbɛnɛ-edo taāŋa a. Mɛ a bee nyɛŋiabu pya nu Jɛhova edoora lo eyerebah ye nɛ bu 20 zua akii adumɛ, e lo sɔ̄ a bee kɔ nɛ aba ɛɛ kɔ: ‘Kiisī lo etɔɔ̄ agara. O aa yiga kɔ dɛ̄dɛɛ̄ taāŋa o e’erabah tɛ̄maloo yerebah Jɛhova bu pya zua akii adumɛ alu yɔrɔ.’ Olo dapnage kɛɛrɛbu loo kɛ̄ Jɛhova eyerebah a nɛ kɔ o egerebu doo. Suā leere kɔ a gaa yere nukuādɛɛ̄ loo ziī ziī sɔ̄ o egerebu bu doā-ɛp e a gaa le nɛ a ekpɛanu. (Mat 5:10-12) E lɛɛ a gae lu sɔ̄ gbɛnɛ etɛɛrɛloo ebɔātɛ̄, o enɔā pya kɛ̄ e’egerebu doo sa le ekpɛ̄naloo lo e’egerebu kiisī.

9. Bu mɛ sīdee na bɔŋanaloo a bee le Antiɔk loo Syria bee tɔgɛ toesaɛ̄ a?

⁹ Naa kɛɛrɛ nu a bee sira sɔ̄ Pya Nɛɛ Kraist a bee tɔɔ̄ Judia bee kpesī gbɛnɛ kii. Baɛbaɛ beenyiɛ naale loo kɔ, sɔ̄ bɔŋanaloo a le Antiɔk loo Syria edaā nu akiiloo lo kii, ba bee ɛrɛ toesaɛ̄ loo pya wa wuga ba le Judia. E lo sɔ̄ ba bee tɔgɛ wa toesaɛ̄ bu dogo. Ba “bee yira ziī ziī aba dookɛ̄ ye ekpo le doo, lo eyere nu ma pya wuga, pya a le etɔɔ̄ Judia lo enyeabah wa nɛ.” (Doonu 11:27-30) Kereadoo pya wuga a bee le kɛ̄ lo kii aa bee dɔ bee le kɛ̄ a binia, Pya Nɛɛ Kraist a bee le Antiɔk bee biaɛfii lo eyerebah wa nɛ.—1 Jɔn 3:17, 18.

10. Bu pya amunu sīdee na i dap tɔgɛ toesaɛ̄ loo pya i wuga bu yira sɔ̄ ba kpesī pɔrɔ siranu a? (Ɛpnage foto.)

¹⁰ Ili dapnage tɔgɛ toesaɛ̄ anii’ee sɔ̄ i dā kɔ pɔrɔ siranu siraloo pya i wuga bu yira. I kpɛ̄naloo lo edoo dogo, naadaba tɛ̄maloo ebip pya kanɛɛ nu i dap yerebah lo edoo, tɛ̄maloo etura nu lo eyeākpotɛ̄ tam Buɛ̄-mɛnɛ tɛ̄ma ɛŋɛnɛ nyɔuwe, ale tɛ̄maloo eyere kara bee pya lo pɔrɔ siranu siraloo. b (Kam 17:17) Bu edoba, bu zua 2020, bee lu etubobaloo nu a eeloo 950 Disaster Relief Committee aābu dɛ̄dɛɛ̄ nyɔuwe kɔ ba a kuūdɛɛ̄loo pya dumɛloo COVID-19 ɛrɛ pah nyɔɔ. I doo yaa pya a bee nyɔɔnɛ pya relief committee si tam. Toesaɛ̄ ba ɛrɛ loo pya wa wuga nɛɛdam le nɛɛwa zū wa kɔ ba a dɔɔ̄nu wa nɛ, wa kuūdɛɛ̄loo bu edɔɔ̄, sa bu pio kɛ̄tɔɔ̄ ba kwaloo ale obia top tɔ le kɛ̄ etɔɔ̄ taāŋabah wa nɛ.—Dooreloo 2 Pya Kɔrint 8:1-4.

11. Bu mɛ sīdee na tɔgɛ toesaɛ̄ yere ka loo i Tɛ a le li bunyɔɔ a?

¹¹ Sɔ̄ i tɔgɛ toesaɛ̄ sɔ̄ bugia siranu sira sah, pya dɔɔ̄na wee yere nukuādɛɛ̄ loo kɛ̄ i suloo waāna zɔɔ doo. Bu edoba, bu zua 2019, Hurricane Dorian bee gbeesī ziī Tɔ Nɔnu Buɛ̄-mɛnɛ a le Bahamas. Sɔ̄ pya i wuga bee le aa sikɛ̄ top lo tɔ, ba bee bip ziī nɛɛ a wee si tam wu be a naale nɛɛ wuga kɔ a naa kɔ kuma kpugi esu lo esi lo tam. A bee wa kɔ nɛ kɔ: “Enia mɛ lo edɔɔ̄ . . . nu siātam, pya esi, le nu tam bu yɔrɔ i nɛ. . . . M gbī edoo lo ama nɛ bui  bɔŋanaloo. Bu mɛ ɛɛ loo kɛ̄ [buī] nyɔɔnɛ pya bui gbo dania nu doo.” Gbɛnɛ-edo nɛɛ a le bu nyɔuwe naa taāŋabah Jɛhova. Mɛ booboo aba gaa ɛp Pya Ekeebee Jɛhova. Naa ɛp kɛ̄ alu gbɛnɛ dee a i kpaānɛ kɔ kɛ̄ i tɔgɛ toesaɛ̄ doo dap zuura pya nɛɛ nua loo Nɛɛ lo ye “toesaɛ̄ kuī” doo a!—Ɛfɛs 2:4.

12. Bu mɛ sīdee na ɛrɛ toesaɛ̄ anii’ee i kpɛ̄naloo baɛma gbɛnɛ etɛɛrɛloo a? (Mumuuna 13:16, 17)

¹² Ena anua elu ebɛɛ̄ kɔ i tɔgɛ toesaɛ̄ bu gbɛnɛ etɛɛrɛloo a? Baibol doo kɔ i suā kɔ pya nɛɛ a naa yerekpotɛ̄ bira bɛbɛɛ lo nyɔuwe ama ekpesī keekee nu finiabah anyaawo le bu gbɛnɛ etɛɛrɛloo. (Buū Mumuuna 13:16, 17.) Pya i wuga nɛɛdam le nɛɛwa dap gbī yerebah lokwa ba ɛrɛ nu a wa bɛɛ̄. Naale bee sɔ̄ i Mɛnɛ Kraist Jizɔs elu lo ebiaɛ biaɛ, a muɛ i i gaa tɔgɛ toesaɛ̄ sa i kue kɔ “ɛrɛa epoo loo buɛ̄-mɛnɛ.”—Mat 25:34-40.

13. Dookɛ̄ Pya Rom 15:7 tɔgɛ doo, mɛ sīdee na Pya Nɛɛ Kraist bu tua sɔ̄ o’oo tup zua bee kiisī lo e’agɛrɛtɛ̄ wa wereloo a?

¹³ Dɛ̄dɛɛ̄ nɛɛ bee muɛ kɔ Pya Nɛɛ Kraist a bee le bu tua sɔ̄ o’oo tup zua bee wereloo ziī. Mɛ a bee wa waɛge bah lo etɔgɛ wereloo ni? Naa kɛɛrɛbu loo kɛ̄ pya a aa keekee kɛ̄ bee le bu bɔŋanaloo Rom doo. Naale aba pya Juu a bee lu etɔgɛ Lok Mozis na a bee le bu lo bɔŋanaloo a, mɛ pya dɔɔ̄na buɛ̄ lo a bee lu ekpɔā wa bu keekee sīdee bee lenage. Pio Pya Nɛɛ Kraist bee le pya zooro sɔ̄ pio aba bee le pya a ɛrɛ wa loo, e naadaba pio aba bee ɛrɛ zooro a wa le kɛɛ̄. Bu mɛ sīdee na Pya Nɛɛ Kraist ama bee dap kiisī lo e’agɛrɛtɛ̄ wereloo ba ɛrɛ loo ziī kaɛlɛɛ kɔ ba lu kee loo ziī a? Nɛɛ Lɛɛratam Pɔɔl bee wa zuurabahtɔ̄ kɔ “bui suaa ziī.” (Buū Pya Rom 15:7.) Ena lo ama kura a? Nu ue alu etap nua “suaa ziī” kura na, su baɛbah suā nɛɛ sa ye lu fɛgɛ loo, ale aara saanɛɛ bie o tɔ ale yɛɛ pya o gbo. Bu edoba, Pɔɔl bee kɔ nɛ Failimɔn kɔ a su Onesimus alu zooro a bee teera aaloo ye tɛ ɛrɛ a “leere.” (Fail 17) E Prisila le Akwila bee su baɛbah suā Apɔlɔs lo a naa bee suā gbɛnɛ-edo nu akiiloo Kraist, tɛ̄maloo e “su ye” yere wa tɔ. (Doonu 18:26) Pya Nɛɛ Kraist ama naa lɛɛbaloo kɔ keekee kɛ̄ ba aa, le wa keekee sīdee doonu a poo wa, mɛ ba bee kiisī lo esu baɛ bah suā ziī.

14. Bu mɛ sīdee na Anna le ye dam bee tɔgɛ wereloo a?

¹⁴ I dap tɔgɛ wereloo kumaloo pya i wuga nɛɛdam le nɛɛwa tɛ̄maloo eyii wa gbo. E lo ama ezū wa kɔ ba a were i loo. (2 Kɔr 6:11-13) Naa kɛɛrɛbu edoba Anna le ye dam. Sɔ̄ sɔ̄ sii bee binia aā sɔ̄ ba bee bɔātɛ̄ si tam zue ue dɔɔ̄na edo bie barasī West Africa, dumɛloo COVID-19 bee bɔātɛ̄. Lo dumɛloo bee doo kɔ ba aa dap zɔ̄ŋia pya a le bu lo bɔŋanaloo sī le sī, e wo bee doo kɔ a aga wa bah esuāloo pya lo wuga. Dam le wa ama edap doodoo wa tɔgɛ wereloo wa kumaloo ni? Ba bee nyɔɔnɛ pya lo wuga kɔnia ue tɛ̄ma nyɔɔ vidio sa wa kɔ nɛ kɛ̄ aa wa taɛ emuɛ wa sa wa suāloo sī le sī doo. Lo ama bee tɔaloo pya lo wuga kaāna, e pya wuga bee bɔātɛ̄ ekuegi wa sa wa yereue ma. Ena anua dam le wa ama bee gbī esuāloo pya a le bu lo bɔŋanaloo a? Anna kɔ: “Wereloo a bee lu etɔgɛ i kumaloo bu sɔ̄ efɛɛloo le sɔ̄ etɛɛrɛloo naa ibere mɛ, e lo ama zū mɛ kɔ m wereloo pya dɔɔ̄na.”

15. Ena o nɔ aāloo edoba Vanessa kumaloo wereloo dɛ̄dɛɛ̄ pya i wuga nɛɛdam le nɛɛwa a? (Ɛpnage foto.)

¹⁵ Gbɛnɛ-edo ii le bu bɔŋanaloo lo pya  wuga nɛɛdam le nɛɛwa a le bu aa keekee kɛ̄ sa ɛrɛ keekee elap dogo. I dap agɛrɛtɛ̄ wereloo i wa ɛrɛ kumaloo tɛ̄maloo ebie ekɛɛrɛ nyɔɔ wa le elap dogo. A bee agabah ziī wuga nɛɛwa a kura Vanessa a le New Zealand lo egbaaloo pio pya a le bu wa bɔŋanaloo. Mɛ a bee biaɛfii kɔ taā a tɔɔ̄e aaloo pya wa elap dogo ye biirebu, etɔɔ̄ wa waɛloo sa wa su sɔ̄ tɔ̄ma kpaɛ̄. Dodoo wo bee ye yerebah nɛ kɔ a muɛ nu anua Jɛhova were wa loo. A kɔ: “Aā sɔ̄ na dam bee bɔātɛ̄ esitam kuūdɛɛ̄loo sɛkiut, i bee ɛrɛ gbɛnɛ-edo pya wuga nɛɛdam le nɛɛwa ba ɛrɛ keekee elap dogo lo i bee su sɔ̄ tɔ̄makpaɛ̄, e a bee mɛ waɛbah lo enyɔɔnɛ wa dania nu. E nyaawo, bu mɛ ɛɛ loo keekee elap dogo pya wuga ɛrɛ. E lo ama nianage Jɛhova nyɔnɛbee ezuura pya a aa keekee kɛ̄, sa ɛrɛ keekee elap dogo nua loo ye.” Sɔ̄ i nɔ lo e’ɛp pya dɔɔ̄na dookɛ̄ Jɛhova wa ɛp doo, i tɔgɛ kɔ i weree wa loo.—2 Kɔr 8:24.

16. Ena anua elu ebɛɛ̄ kɔ i ɛrɛ wereloo bu gbɛnɛ etɛɛrɛloo a? (Ɛpnage foto.)

¹⁶ Elu ebɛɛ̄ kaāna kɔ i wereloo pya i wuga bu gbɛnɛ etɛɛrɛloo. Mɛ kɛ̄ na i ɛrɛ kpega aā sɔ̄ lo gbɛnɛ etɛɛrɛloo ebɔātɛ̄ a? Naa kɛɛrɛbu loo nu Jɛhova bee kɔ nɛ pya ye nɛɛ sɔ̄ a bee lu ebebe loo Babilɔn a dee kere a, a bee kɔ: “Luaa, pya na nɛɛ, yiraa bu dɛ̄dɛɛ̄ bui tɛm, sa kpaɛ̄ dɛ̄dɛɛ bui bū tɛaā dumɛ; gɔā bui loo bu ziī nwī sɔ̄ mmɛ sɔ̄ gbɛnɛ saŋ etɛɛ̄.” (Ais 26:20) Bee kɔ ue ama ekuunage ili sɔ̄ i kpesī gbɛnɛ etɛɛrɛloo. “Bui tɛm” alu ekɔ ama dap tɔɔ̄dɔ i bɔŋanaloo. Jɛhova eyira yii kɔ ekpegae i bu gbɛnɛ etɛɛrɛloo lo i kiisī lo egbaaloo pya i wuga ye taāŋabah. Nyɔɔwo, i ɛrɛ epiiga kaāna anyaawo lo e’ɛp tɛɛ̄ ekwɔ pya i wuga tɛrɛ sa wa wereloo kaāna. I kpɔā dap dɛɛa nyɔɔ lo ama!

17. Lo i kpɛ̄naloo anyaawo, ena i dap doo bu gbɛnɛ etɛɛrɛloo a?

¹⁷ “Lo gbɛnɛka dee Jɛhova” esu gbɛnɛ etɛɛrɛloo nua nyɔɔ miɔŋɔ nɛɛ. (Zef 1:14, 15) Pya nɛɛ Jɛhova ekpesī e’aga kɛ̄tɔɔ̄. Mɛ lo i kpɛ̄naloo anyaawo, i dap fɛɛrɛloo sa yerebah nɛ pya dɔɔ̄na. I dap egerebu bu ɛrɛgeba kɛ̄tɔɔ̄ finiabah i kpesī. Sɔ̄ pya i wuga bu yira gaa tɔga, i dap doo kumakɛ̄ i dap doo lo eyerebah wa nɛ tɛ̄maloo etɔgɛ wa toesaɛ̄ loo sa wa yerebah nɛ loo pya nu a wa bɛɛ̄. E lo i nɔ lo ewereloo pya i wuga anyaawo, i dapnage wa wereloo li deesī. E lo sɔ̄ Jɛhova enɛ i dum anaatah bu nyɔuwe a naale eluna enyɛŋiabu pɔrɔ siranu le etɛɛrɛloo.—Ais 65:17.